Ko e Tohi Mai he Kau Fakatufono
He hoko a tautolu ke he kamataaga he mataulu he tau tau he senetenari ke 21 aki, kua fiafia ke tohi atu ki a mutolu, ko e “fakaalofa ke he tau matakainaga” he lalolagi katoa, mo e nava atu ki a mutolu ma e gahua malolo ha mutolu. (1 Pete. 2:17) Teitei 2,000 tau kua mole, ne huhu a Iesu: “Ka hau e Tama he tagata, mailoga he ha ke moua mai e ia e tua ke he lalolagi?” (Luka 18:8) Ko e gahua makai ha mutolu he fekafekauaga he tau kua mole ne tali e huhu mo e taogo e! Falu ia mutolu ne favale ki ai mo e va ha ko e tua ha mutolu. He tau motu loga, kua fakauka a mutolu pete ni e tau felakutaki, tau matematekelea pauaki, tatalu, po ke hoge. (Luka 21:10, 11) Fakaaue ke he makai ha mutolu ma e tau gahua mitaki, ha kua maeke agaia ia Iesu ke “moua mai e . . . tua ke he lalolagi.” Ha ha i ai moli e fiafia he lagi ha ko e mena ia!
Iloa e tautolu nakai mukamuka e fakauka. Manamanatu la ke he tau kamatamata he tau matakainaga ha tautolu he taha motu ha Asia lalo. Ko e favaleaga ke he Tau Fakamoli a Iehova kua fa mahani mau ai he motu ia. Nakai la leva, ne moumou he tau leoleo e toloaga mafola he kavi ke 700 tagata. Kua pa e tau puhala tu ti taofi e falu 1,300 mai he fakalataha atu. Ko e matakau he tau tagata fakagalogalo, ko e falu ia lautolu ko e tau leoleo, ne huhu atu ke he fale he toloaga, mo e tafolo e tokologa he tau hukui, ti tugi e fakatuaga kua amanaki ke fakaaoga ma e toloaga. He falu magaaho, ne tafolo fakakelea he tau tagata mao fakalotu e tau matakainaga ha tautolu aki e tau fua ulu miti ne pao aki e tau fao.
Ko e tau kelipopoaga pihia kua matakutakuina ka e nakai ofo ai. Ne omoi he agaga e aposetolo ko Paulo ke tohi: “Ko lautolu oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.” (2 Timo. 3:12) He senetenari fakamua, ne fakauka e tau Kerisiano ke he favaleaga ke he tau kupu mo e ke he tino, ti hokotia e falu ke mamate. (Gahua 5:40; 12:2; 16:22-24; 19:9) Ko e mena taha ia ni ke he senetenari ke 20 aki, ti nakai fakauaua ai to fakatumau ke pihia foki he senetenari 21 nei. Kua talahau agaia e Iehova ki a tautolu: “Ko e tau kanavaakau oti kua taute ke tau kia koe, nakai monuina ia.” (Isa 54:17) Ko e mafanatia mua ue atu ha e mena ia! Moli, ha kua uho moli a tautolu ki a Iehova ati puhala mai he hana perofeta ko Sakaria, ne pehe a ia: “Ha ko ia kua piki atu kia mutolu, ka piki atu ai a ia ke he alito mata he hana fofoga.” (Saka. 2:8) Ko e tau fi he tau tagata tapuaki ha Iehova kua nakai maeke ke kautu katoatoa. To tumau e tapuakiaga mea!
Ma e fakatai, he tau motu ne talahau fakamua, ne olioli he Tau Fakamoli a Iehova ua e tapunu fou he tau tagata fakailoa he tau he fekafekauaga he 2001. E, kua fakauka e tau matakainaga ha tautolu i ai ke he tau mena uka, tuga ni he tau matakavi oti. Ke he tau he fekafekauaga kua mole he lalolagi katoa, ne papatiso ai he tau fahitapu takitaha 5,066 ke fakamailoga ha lautolu a tukuleleaga ki a Iehova. Ko lautolu nai ne fou he mogonei kua mauokafua, fakalataha mo tautolu oti, ke ‘tumau mo e katoatoa e mitaki, mo e puke ke he finagalo oti he Atua.’—Kolo. 4:12.
Manamanatu foki, ke he tau mena tutupu fou i Heleni. Pete ne totou tau e totokoaga vevela mai he Lotu Ofotoko Heleni, kua mailoga tuai he fakatufono e Tau Fakamoli a Iehova mogonei ko e “lotu talahaua.” Ko e tohi ne fakaata e mailogaaga nei nukua talahau foki ko e Peteli Heleni ko e “fale kua tapu mo e fakatapu, ne tukulele ke tapuaki ke he Atua.” Kua fiafia foki a mautolu ke tala atu ki a mutolu ke he tau he fekafekauaga kua mole, ne fakapuloa he tau hopoaga e tau fifiliaga matafakatufono kua lauia mitaki e tapuakiaga ha tautolu i Kanata, Pulugaria, Romania, Rusia, Sapani, Sihamani, mo e Tau Fahi Kaufakalataha. Ko e fakaaue ha ia ha tautolu ki a Iehova he hafagi tumau e gutuhala ma e matagahua he tau motu ia!
He manamanatu a tautolu ke he tau puhala kua lalago e Iehova hana tau tagata he tau aho fakahiku nei, kitia ai e tautolu ko ia ko e Kapitiga mitaki lahi kua moua e tautolu. Kua fiafia a tautolu ke he fakafetuiaga ha tautolu mo ia, he iloa kua fakaalofa a ia ki a tautolu, he fakaako a tautolu, mo e fakatonu a tautolu. E, to fakatumau e tau kamatamata he tua ke moua e tautolu. Ka ko e tua mauokafua ki a Iehova ka fakakautu ai a tautolu. Ne tohi e Iakopo: “Haku a tau matakainaga na e, kia manatu a mutolu ko e mena ke fiafia lahi ai ka moua a mutolu he tau kamatamata kehekehe; he iloa e mutolu ko e kamatamata he tua ha mutolu, kua tupu mai ai e fakauka.” (Iako. 1:2, 3) Mua atu ai, ko e fakauka ha tautolu kua fakatata e fakaalofa ha tautolu ma Iehova, ti tamai he mena nei ki a tautolu e olioli lahi! Kia mafanatia, ma tau matakainaga fakahelehele, to lalago e Iehova a tautolu takitokotaha. Kaeke ke fakatumau a tautolu ke tua fakamoli, to nakai kaumahala a ia ke lagomatai a tautolu ke hokotia ke he lalolagi fou. Manako a ia ki a tautolu ke kautu.
Ti, fakamalolo e mautolu a mutolu ma tau matakainaga tane mo e fifine, fuata mo e motua, ke tokaloto e tau monuina homo ue atu kua fakatoka mai i mua. Kia tatai e aga ha tautolu mo e he aposetolo ko Paulo: “Ha kua manatu au ko e mena noa e tau mamahi he vaha nai ke fakatai ke he monuina ke fakakite mai ia tautolu a mui.” (Roma 8:18) Falanaki ki a Iehova ka fehagai mo e tau matematekelea kehekehe. Fakauka, ti aua neke mahala. To nakai, nakai tokihala a koe. Kua fakamafana mai he Kupu he Atua ki a tautolu: “To moui e tagata tututonu ke he hana tua.”—Hapa. 2:4.
Ha mutolu a tau matakainaga,
Kau Fakatufono he Tau Fakamoli a Iehova