Veveheaga 8

Ko e Ha ne Fakaatā ai he Atua e Mahani Kelea ke Hoko mai ke he Vaha ha Tautolu?

1. Fefe e kitiaga he tau tagata he lalolagi hagaao ke he mahani hepehepe?

MAI he kamataaga he fakamauaga tala he tagata ne hā hā i ai e tupufetui he mahani kelea. Ko e vaha nei foki, ha mena ni ka kitekite a koe ke he lalolagi, ko e fakamaligi toto, tau agahala, vihiatia mo e tau mahani feuaki. Kua fa mahani tumau ko e tau tagata tutūtonu, mahani lilifu ne fa lauia ai ha ko e tau mahani kolokolovao he falu. To lauia ai foki a lautolu he mahani favale, po ke uta kehe ha lautolu a tau kaina, ha lautolu a tau fakahele po ke tau momoui foki ha lautolu ni. Liga kua fita he lauia ai a koe po ke nakai, ke he tau mena pihia. Ka e pete foki ni kua nakai pihia, ka e liga kua iloa e koe e falu a mena ne fakatupu ai e mamahi ke he haau a loto manamanatu, ko e lauiaaga ke he fakafiliaga nakai hako, ha kua fakavai mo e fakahēhē.

2. Ko e tau kakano ne fakaatā ai he Atua e mahani hepehepe kua lata mo e tau hūhū ne lagā mai he vaha fe?

² Ko e ha ne fakaatā ai he Atua e tau mahani kelea pihia a to hoko mai ke he vaha nei ha tautolu? Hā hā i ai e loga he tau kakano, ke iloa e mooli he tau mena ia kua lata ke kumikumi e matakupu ne tupu mai ha ko e totoko atu. Liga kua totou tuai e koe e talahauaga nei mai he Tohi Tapu ke he veveheaga tolu he Kenese. Atiomai a ke kumikumi, ki ai, e kakano mooli he tau mena nei ne tutupu ai.

3. Fakamaama fakaku la po ke heigoa e mena ne tupu he magaaho ne veli ai e tagata ke he hala.

³ Fakaku, ko e mena hanei ne hoko ai: ne talaage a Iehova ke he tagata ko e haana moui na falanaki ni ke he omaoma haana ki a ia e Tufuga, ko e haana a liuliu to fakahiku ai ke he mate. (Kenese 2:17) Ko ia ne totoko ke he Atua, ko Satani, ne fakateaga ke he talahauaga nei. Ko ia ne talaage ke he hoana a Atamu ko laua ia e tau tagata ne kua fakalataha pete ni he nakai omaoma ka e, “Nakai ni mamate a mua.” Ti pehe foki a ia ko e ha laua a liuliu to tolomaki atu ai ki mua e mitaki he tau mena ma laua, fakatupu mai ai ke aala e tau mata ha laua, ti maeke ai ia laua “ke tuga ne tau atua ke iloa ai e mitaki mo e kelea.” (Kenese 3:4, 5) He mogonei, ko e heigoa ne fakalataha ai ke he totokoaga ia a Satani?

KO E TAU MATAKUPU KUA HAGAHAGA KELEA LAHI

4. Fakahigoa la falu he tau mena tutupu ne malagaki mai ai ha ko e totokoaga he Tiapolo.

⁴ Ne loga e tau matakupu mo e tau hūhū ne lagā mai ai. Fakamua, ko Satani ne fakatu e ia e hūhū ke he fakamooliaga he Atua. Ko e mooli, ne fakahigoa e ia e Atua ko e pikopiko, ne hagaao ai e mena ia ke he moui mo e mate. Ke ua, aki, ne hūhū e ia e falanakiaga he tagata ke he haana a Tufuga, ke he tumauaga he haana a moui mo e fiafia. Ne pehe a ia ko e moui he tagata mo e haana a pulotu ke pule ni e ia e tau puhala haana mo e kautu ai, nakai moua ha ko e omaoma ki a Iehova. Ne fakafetoko ai a ia to maeke he tagata ke gahua puleheloto nakai falanaki ki a ia e haana a Tufuga ka e tuga ni e Atua, to fifili foki e ia e mena kua hako po ke hepe, mitaki po ke kelea. Tolu aki, ko e fetoko atu ke he fakatufono tohia he Atua, kua pehe ni a ia ko e puhala ne pule ai e Atua kua hepe ti nakai fai aoga ke lata mo e tau mena momoui haana ti ko e puhala ia ne paleko atu ai a ia ke he Atua mo e haana a tonu ke pule ai.

5. Ke tuga ne fakakite mai he tohi a Iopu i loto he Tohi Tapu, ko e heigoa e falu hūhū ne fakatu hake e Satani?

⁵ Ka ko e gahua ha ne fakatu mai ai foki taha hūhū, tuga ne fakakite mai ai fakamui ke he Tohi Tapu he tohi Iopu, veveheaga 1 mo e 2. Hā hā i ai, ne fakatuuta ai mo e tagata ne higoa ko Iopu, ne fakakite e liu hūhū a Satani ke he omaoma mo e fakamooli ki a Iehova ko e Atua he tau mena momoui oti kana. Ke he loga he tau kupu, ne pehe ai a Satani ko lautolu ne fekafekau ke he Atua ha ko e, nakai ko e fakaalofa ke he Atua mo e haana pule tututonu, ka ko e mai ni he tau mahani lotokai, tuga mo e tau koloa monuina he tino ne foaki age he Atua ma lautolu. Ne pehe foki a ia, kaeke ke uta kehe e tau mena ia, pete ni ko e tagata tuga a Iopu to haga kehe mai he Atua. (Iopu 1:6-11; 2:4, 5) E, ko e totoko atu a Satani i Etena ne liu hūhū ai ke he fakamooliaga he tau mena momoui oti he Atua hā hā i ai ke he lagi mo e lalolagi nei. Kaeke ke tuku ke he kamakamata, to fakamooli nakai ha lautolu a fakaalofa ke he ha lautolu a Matua hā hā he lagi mo e fakakite ai kua manako ni a lautolu ke he pule haana ka e nakai ko e pule kehe?

KO E PUHALA HE ATUA KE FAKAHAKO AI E MATAKUPU

6. Ne fakatu hake nakai e Satani e hūhū ke he malōlo he Atua? Ti ko e heigoa e mata kupu kua lata ke fakaoti ai?

⁶ Kitiala, fakamolemole, ko Satani nakai fakatu e ia ha hūhū ke he malōlo he Atua. Nakai paleko e ia a Iehova ke fakaaoga haana a malōlo ke mua ue atu fakaoti a ia tuga mo e haana a totoko atu. Ka e paleko e ia e tonu mo e hako he puhala he haana a pule. Ti pihia foki ni, ne hūhū e ia, e mahani fakamooli he tau mena momoui he Atua. Ti ko e matakupu ke he hako mo e hepe kua lata ke fakatonu ai.

7. Fakamaama e fakatai kua fakakite ai po ke fakaoti fefe e taha faga hūhū uka hagaao ke he hako mo e hepe.

⁷ Ko e tau hokotaki pikopiko ha Satani ke he Atua ne fakatai, mai ai kua lata, mo e mahani fakatagata. Kaeke kua ha i ai e tagata kua lahi haana a magafaoa ti hokotaki pikopiko he taha he haana a tau tuutakaina a ia ke he puhala he levekiaga he haana magafaoa nakai fakaalofa fakamooli a lautolu ke he matua tane ka ko e nonofo noa ni a lautolu mo ia ke moua he tau mena kai mo e tau koloa ne age e ia ma lautolu. To tali fefe he matua tane ke he tau hokotaki pihia? Kaeke ke fakaaoga e ia e mahani favale ki a ia ne totoko mai, kua nakai tali ai e tau hokotaki ia. Ka e, to fifili ai liga ni kua mooli. Ka ko e tali ni kua mitaki lahi kaeke ke fakaata e ia haana a magafaoa ke eke mo tau talahau fakamooli ke fakakite ko e matua tane ha lautolu ko ia kua tonu mo e fakaalofa ke eke mo ulu he magafaoa ti kua lahi e fiafia ke nonofo mo ia ha kua fakaalofa a lautolu ki a ia! Ti fakakatoatoa ai e fakatokolugaaga ki a ia.—Fakatai 27:11; Isaia 43:10.

8. Ko e heigoa ne kua fakakite mai po ke ha ne fakaatā ai he Atua e lahi he tau magaaho ke fakaoti ai e matakupu mo e nakai fai fakauaua?

⁸ Kua eke e mena nei mo fakataiaga ke he tau mena mitaki kua taute he Atua. Kua pihia foki, ne fakaata e ia loga he tau magaaho kua molea 6,000 he tau tau ke he matakupu kua fakatokanoa ai. Nukua fakaatā e ia e vaha ia, nakai ni ke fakaatā e tau mena momoui fakamooli haana ke iloa ai ha lautolu a fakamooliaga ki a ia mo e haana a pule, ke fakakite ai foki ko e falu a pulekehe ko e fakaotiaga ni ke he kelea. (Fakatai 1:30-33; Isaia 59:4, 8) Ko e totoko atu ke he Atua ko Iehova, kua eke e Satani a ia mo pule totoko! Ti ko e tauteaga he puhala ne fakaako age e Satani, ko e faoa uluaki ne fakapuloa e laua e tutokotaha mai he pule a Iehova ka e nonofo ai ki lalo he takitakiaga a Satani. (Kenese 3:6; Roma 6:16) Ha ko e fakaataaga he Atua e tagata mo Satani ke hohoko ke he katoatoaaga he ha lautolu a tau laliaga ke gahua mo e fakatu ai e pule tutokotaha mai he Tufuga, ko e kaumahalaaga katoa ha lautolu ke taute taha fakatufono mitaki, mo e tau monuina mooli ma e tau tagata, to eke ia mo fakamooliaga ke he tau vaha i mua mo e nakai fakatikai. A to hoko e mogoia to fakaaoga e Iehova a lautolu ha he lalolagi kua fakaalofa ki a ia ke fakamatala haana higoa mo e finagalo ke fakamaama ki a lautolu oti kua fakaalofa mo e kumi ke he tau mena kua tonu.

9. Ko e heigoa e talahauaga he Atua ke he taha Falao a Aikupito ne kua tatai ua mo e mena ia ne tupu ki a Satani ko e Tiapolo?

⁹ Ti ko e mena nei, kua tuga ni e haofiaaga a Falao i Aikupito ne taute e ia e puhala ne tatai mo Satani ko e Tiapolo ke totoko ki a Iehova ko e Atua, ti kua pehe a Iehova ki a ia: “Hanai, ane fakaolo atu haku lima, mo e ta a koe mo e hau a motu ke he tatalu, a kua mahakava tuai a koe mai he lalolagi. Ko e moli, ko e mena ia ni kua fakatu ai e au a koe, kia fakakite e au haku mana kia koe, kia talahaua ai foki haku a higoa ke he lalolagi oti.”—Esoto 9:15, 16.

KO E HEIGOA E TAUI KUA FAKAKITE MAI AI

10. Fakaaoga fefe e Satani e tau magaaho ne fakaatā ai he Atua hagaao ke he lagi mo e lalolagi?

¹⁰ Kua fakakite mai he Tohi Tapu ko Satani ne kua fakaaoga e vaha ia ke ati hake ai e fakapotopotoaga ki luga he lagi mo e lalolagi nei kua pule a ia ki ai. Ko e lau lahi he haana a pule ke he lalolagi ne fakakite mai fakatonu ai ha kua maeke ke foaki e ia ki a Iesu e tau motu oti he lalolagi kaeke ke hufeilo a Iesu ki a ia. (Mataio 4:8, 9) Ko e mena haia ne fakahigoa ai a Satani ko e “e iki he lalolagi.” (Ioane 16:11) Ko e heigoa e aoga he mena nei ma e tau tagata, ko e heigoa foki e taui ha ko e puhala tutokotaha he tagata mai he Atua mo e haana pule?

11. Ko e heigoa e taui momoko ha ko e puhala fia tutokotaha he tagata mai he Atua mo e haana a pule?

¹¹ Ko e fakamauaga tala tuai kua fakamooli ai e tonu ne nakai moua mai e mafola, tokotoko mitaki mo e moui tukulagi ma e tau tagata. Ne ta mai ni e faahi kehe: ka ko e matematekelea mo e mamahi ke he afe he tau tau, katoa mo e mate. Ko e tau fakamauaga he tau tala tuai mo e tau mena tutupu matakutakuina ke he tau gahua he lalolagi he vaha nei kua eke ia mo fakamooliaga kua nakai maeke he tagata ke moua e kautu ke pule ai ka noa mo e Atua. Ne lali e tagata ke he tau puhala he tau fakatufono kehekehe, ka e galo agaia ni e puipuiaga mo e fiafia tumau. Mooli ni, kua tupu tolomaki ki mua e loga he tau koloa fakalalolagi. Ko e mooli kia kua tupu tolomaki ki mua ha kua maeke he tagata ke fakafano e tau lokete (rockets) ke he mahina, ka e nakai maeke ke nonofo fakalataha mo e mafola ke he lalolagi nei? Ka ko e heigoa e aoga ke ta e tau fale mo e katoatoa e tau mena kua hā hā i ai, ka kua mavehevehe e tau magafaoa, ha ko e vevehe he tau tane mo e tau hoana mo e mahani kolokolovao? Ko e tau tau, latau auloa he tau puhala tu, moumou e tau momoui tau kaina mo e fakatupu lahi e mahani hepehepe ko e tau mena ia kia kua lata ke hula ki ai? Nakai pihia! Ka ko e tau fua a ia kua moua mai ai ha ko e nakai omaoma ke he Atua. Ko e mooli, he Fakamatalaaga 8:9 ne pehe “kua pule ai e taha tagata ke he taha, ke kelea ai e ia ni.”

12. (a) Ko e heigoa e talahauaga he taha tagata tohi tala talahaua hagaao ke he tupumaiaga he fakaatukehe ke he lalolagi? (e) Ke fakatatai atu ke he perofetaaga a Ieremia, maeke nakai he tagata ke takitaki fakahaohao mitaki e ia haana a puhala?

¹² Ti ko e leva he fakaatā he Atua e mahani kelea ne kua fakamooli mo e nakai fakauaua ko e laliaga he tagata ke ‘tuga e Atua’ ko e kaumahalaaga kelea lahi haia. (Salamo 127:1) Kua pehe e taha tagata tohitala talahaua: “Ko e lahi he kumikumi ha ko e kaumahalaaga, kua iloa lahi ai e tautolu ko e nakai fiafia kua hā hā he lalolagi ko e tau mena taute ni he tau tagata. Ko e matapatu he kaumahalaaga ha tautolu ha kua nakai iloa e veveteaga he mena vihi ke he pule tutokotaha.”a Ko e tagata tohi tala Tohi Tapu ne fakaaoga he agaga he Atua ko Ieremia ne pehe a ia: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai. Iehova na e, kua akonaki mai a koe kia au.”—Ieremia 10:23, 24; kikite foki kia Fakatai 16:25.

13. Ha kua fakamooli ai e kaumahala he pule ne Satani, ko e heigoa he Atua mogo nei kua lata tonu ke taute?

¹³ Ko e fakaohoohoaga ha Satani ke he tauteaga he tau mena he lalolagi kua moua mai ai e femaveheveheaki, mahani kelea mo e mate, ko e haana pule foki kua fakaaoga ai ke he pikopiko, fakaohooho mo e lotokai. Ne fakamooli ai e ia kua nakai aoga a ia ke pule ai ke he taha mena taha. Ti kua tonuhia ni ki a Iehova ke fakaoti e ia e fakafualoto tokolalo fakalataha mo lautolu oti ne kau mo ia ke he tauteaga he tau mahani kelea. (Roma 16:20) Ka e kua e fakamooliaga he tau mena momoui ne eke he Atua ke he pule fakaalofa noa a Iehova mo e talahauaga a Satani to fuluhi kehe oti a lautolu ka tuku ke he kamakamata?

14. (a) Mai he gahuahuaaga mitaki fe ne maeke ai he falu a tagata ke fekafekau fakamooli ke he Atua? (e) Ha ko e tumau ke he omaomaaga a Iopu ke he Atua pete ni he fakaohooho mai e Satani, kua fakamooli ai e Iopu po ke heigoa e Tiapolo?

¹⁴ Ko Iehova ko e Atua ne iloa “nakai tuai oti e fakaalofa” ko e mena iloa foki e ia ko e falu he tau tagata to fekafekau a lautolu ki a ia mo e fakamooli, mai he fakaalofa, ka e nakai ha ko e totogi po ke fakaohooho. (1 Korinito 13:8) Ko e afe mo afe a lautolu ne kua taute e tau mena nei mai he tau senetenari. Ko Iopu taha ia lautolu ia. Pete ni he fakamamafa fakalahi e Satani ki a ia mo e uta kehe haana a tau koloa, tau fanau mo e tino malolo, ka e pehe agaia ni a Iopu: “Ato hoko ke he aho ke mate ai au nakai toka e au haku a mahani hakohako.” (Iopu 27:5) Ne fakamooli e Iopu ko Satani ko e pikopiko.

15. (a) Ne tali fefe e Iesu e tau hokotaki pikopiko a Satani hagaao ke he Atua? (e) Maeke nakai ke fakamooli e omaomaaga he tagata mitaki katoatoa ko Atamu ke he Atua?

¹⁵ Tuga kua kitia e tautolu, ko e tagata mitaki katoatoa ko Iesu ne totoko e ia e tau kamakamata mo e tau totogi a Satani. Au atu ai, he magaaho ne fahi ai he tau kautau leveki mo e pao fao ai ke he akau ke mate ai, Ne fakatumau ni e Iesu haana a fakamooli ke he Atua. (1 Peteru 2:23) Fakamooli mai ai ko e tagata mitaki katoatoa ko Atamu mena maeke foki ke taute e ia ane mai ke loto a ia ki ai, ti ko e Atua nakai hepehepe ke ole mai e omaoma katoatoa he tagata. (2 Tesalonia 1:4, 5) Ha koe haana a fakamooli ki a Iehova, ne talaage e Iesu e tali mitaki lahi ke he palekoaga pikopiko a Satani.

16. (a) Pete ni kua fakamooli a Satani ko e pikopiko, ko e ha kua ekefakakelea agaia e ia e tau tagata kua fakaalofa ke he Atua? (e) Po ke heigoa kia e fakamooliaga he tau fekafekau fakamooli he Atua kua fakakite fakatonu mai ai?

¹⁶ Ka ko Satani, mo e haana manatu fakakeukeu ha ko e lotokai mo e fakatokoluga, ne nakai talia e ia ke fakatokolalo haana tau puhala goagoa. Pete ni e leva lahi e fakamooli e hepe haana mo e pikopiko, ka e fakatumau agaia ke ekefakakelea ki a lautolu kua fakaalofa ke he Atua. (Fakakiteaga 12:17) Tali mai he mate a Iesu loga e tau afe he tau Kerisiano ne fekafekau ki a Iehova ko e Atua ha ko e ha lautolu a fakaalofa ki a ia mo e manako ke he haana a pule fakaalofa noa ki luga ia lautolu. Ti ko e mogo nei, teau mo teau e tau afe kua fakailoa atu ha lautolu a fakamooli ki a Iehova ko e pule. (Fakakiteaga 7:9, 10) Ko e ha lautolu a fakamooli ke he taofiaga he Kupu a Iehova mo e ha lautolu a fakalilifu mo e omaoma ke he haana fakatufono ti kua maeke ai ia lautolu ke nonofo mo e nakai fakaagitau, pete ni kua totoko lahi mai a Satani. Ko e fakafetuiaga, fakaalofa mo e tumauaga ne fakakite ai he tau fakafekau he Atua mai he tau senetenari kua fakamooli ai e tokoluga he tau fakamooliaga ko e puhala he pule a Iehova mo e fakaalofa noa ko e puhala ni a ia kua tonu, to omaoma tumau ai e tagata ki a ia pete ni he hoko e mamahi lahi haana a kamatamata, ko Satani ko e pikopiko mahomo atu a ia he tau vaha oti.

FEFE E LOA HE FAKAHOLOFAKAHAGA AI E KAMATAMATA?

17. To fakaatā kia he Atua e mahani kelea ke tupu tukulagi ai ti fefe he tali mai he tohi a Tanielu e hūhū ia?

¹⁷ Ne fakaatā ai e Iehova e mahani kelea a to hoko mai ke he vaha nei ke eke mo fakahakoaga he tau matakupu ne fakatu e Satani. Ka e nakai fakaatā e ia e mahani kelea ke fakaholo fakahaga ai mo e nakai fai fakaotiaga. Kua fakatoka e ia e magaaho kua fafati ke fakahoko ai e fakaotiaga. Ko e tagata tohi tala he Tohi Tapu ko Tanielu ne pehe a ia hagaao ke he mena nei ke he vaha loa ne kua mole atu ki tua: “To hoko ai e fakahikuaga ke he vaha kua kotofa.”—Tanielu 11:27.

18. Pete ni he kitia he tagata ko e ligaliga loa e vaha teitei ke 6,000 he tau tau, ka e matamata loa nakai ke he Atua? Ti fefe he kitia he Atua e afe he tau tau?

¹⁸ Kua teitei katoa tuai e ono e afe he tau tau mai he vaha a Atamu ki a tautolu kua matamata leva lahi ke he kitiaaga he mouiaga fakatagata ki a lautolu kua momoui ke he fitu e hogofulu he tau tau. Ka e tali mai he fakatoka ai he Atua e magaaho, kua mitaki ni ke fakaaue ke he haana a kitekiteaga ke he mena nei. Ko e perofeta ko Mose, he Salamo 90:4 ne pehe hagaao ki a ia: “Ha ko e taha afe he tau tau ki mua haau, tuga e aho neafi ia ka mole atu.” Ko e taha e tau ko e vaha loa a ia ke he tama lima e tau tau, ka ko e tagata kua onogofulu ko e mena kua ku lahi ki a ia. Pihia foki ki a Iehova, kua moui ke he tukulagi, ko e afe he tau tau kua tuga ni e taha e aho.—2 Peteru 3:8.

19. Ko e ha kua pehe ai ko e fakaatāaga he Atua e mahani hepehepe nakai ko e fakafiliaga hepe a ia ki a tautolu?

¹⁹ Ko e magaaho fafati nei kua fakaatā ai e mahani kelea kua nakai fakafili hepe ai ki a tautolu. Ko e ha, ane mai ke tuki malipilipili he Atua he mogoia ni e tau momoui ha lautolu ne totoko ki a ia i Etena, a po kua nakai ni fanau mai a tautolu! To nakai fakaai ke moua e tautolu e tokanoaaga ke moui tukulagi ai ke he haana fakatokaaga foou. Ko e mena mooli haia ne nakai fakakū ai e Iehova haana fakamanavalahi ke he vaha fakamua ke moua e tautolu e tokanoaaga ke momoui ai he mogonei, mo e tukulagi ke he tau vaha i mua. (2 Peteru 3:9, 15) Pihia ni, kua fakaaoga foki he Atua e vaha nei ke moua mai he tagata e palepale ia Iesu.—Kalatia 4:4, 5.

20. Fakakite fefe mai he Tohi Tapu ia Roma 9:22-24 e fakamaamaga po ke ha ne fakaatā ai he Atua e mahani hepehepe?

²⁰ Ke lafi atu ki ai, kua fakaaoga foki he Atua e vaha nei ke fifili mo e tauteute mai he tau tagata e “tau kapiniu he fakaalofa.” Ko lautolu ia hanei ka ati hake ai e fakatufono tututonu ki luga ia lautolu ka nonofo tukulagi ai ke he fakatokaaga foou. Ko e tau monuina ha a ia he kautu he lagi ke lata mo e tau tagata! Ke he vaha he tauteaga he Atua e “tau kapiniu he fakaalofa,” ne kua fakakite e ia lahi he haana a fakamanavalahi. Ne fakauka a ia ke he tau tagata kelea, ko e “tau kapiniu he ita.” Ne taofi e ia ha lautolu a malaia. Ko e ha? Kua tali mai fakamaama he Tohi Tapu: “Ke fakailoa mai foki e lahi ue atu he hana lilifu ke he tau kapiniu he fakaalofa.” (Roma 9:22-24) Ke he kautu he Atua he lagi to tuku atu e lilifu mo e fakahekeaga ke he higoa he Atua mo e fakaotioti a lautolu ne mahani kelea ko e “tau kapiniu he ita.” Pihia ni, ne fakaatā e ia e mahani kelea ke fakaholoatu ai ke he falu a vaha, ko e aga mooli he Atua mo e haana tau mahani kua fakakite ai, ko e nakai kitia noa: e haana a fakaalofa mo e fakamanavalahi. Ko e tau mena pehe nei kua fakatupu ai ha tautolu a fakaaue ki a ia e Tufuga mo e tau aga ha tautolu takitokotaha, he fifitaki atu ki a ia.—Efeso 5:1.

21. Ko e heigoa e falu a mena aoga kua moua mai ai ha ko e fakaatāaga he Atua e mahani hepehepe ke he vaha kua fafati ki ai?

²¹ Hā hā i ai foki taha aogaaga he leva e fakaatā he Atua e mahani kelea. Kaeke ke fai magaaho i mua ke hūhū ai he taha e tauteaga he tau mena he Atua, to nakai liu foki a ia ke age po ke fakaatā ke liu taute foki ai ke he taha puhala. Ko e fakamauaga he ono e afe he tau tau he kaumahalaaga a Satani, ko e haana a tau temoni, mo e tau tagata ne kua lali ke taute e tau gahua mo e nakai falanaki ke he Atua ne moua ai e tali kua lata. Nakai fai taha ke talahau fakatonu: ‘Nakai moua e lautolu ha magaaho,’ po ke pehe, ‘Ka ne mai ke fai magaaho.’ Ko e magaaho ne fakaatā ne lata ai ke fakamooli e puhala he totoko atu ke he Tufuga ne kua kelea lahi mahaki! Ti kua tonuhia ni ke he Atua ke fakamafiti e fakaotiaga ha lautolu ne totoko nukua fakamatakutaku e mafola he lalolagi katoa.—Salamo 145:20.

22. To loa fefe e tau magaaho he fakaatā ai he Atua e mahani hepehepe, ti ko e heigoa e tonuhia kua fakatoka mai ma tautolu ke lata mo e tau magaaho ku kua toe?

²² Kua kukū e tau magaaho kua toe ti moumou e Iehova e fakatokaaga kelea nei. Ti ko e magaaho ku nei kua toe kua tuku mai ki a tautolu e tokanoaaga ke kau fakalataha mo ia ‘kia fiafia ai haana loto.’ (Fakatai 27:11) Kaeke ke tuku atu mo e tau loto katoa a tautolu ke he haana pule, to fakamonuina e ia a tautolu ke he moui tukulagi he fakatokaaga foou haana. Ko e fifiliaga ke talia po ke tiaki kua tuku mai ki mua ia tautolu taki tokotaha.—Teutaronome 30:19, 20.

23. (a) Fefe he kitia e tautolu e omaomaaga ke he Atua? (e) Ka hoko ke he fakakatoatoaaga he taute he tau fekafekau fakamooli he Atua e gahua fakapuloa he haana a higoa mo e haana a finagalo ke he lalolagi katoa, ko e heigoa mogoia ka taute e Iehova?

²³ Ko e omaoma ke he Atua kua nakai uka lahi. Kaeke he fakaaue a tautolu ha ko e pulotu a Iehova kua mua ia ki a tautolu ha ko ia ko e Atua he fakaalofa, ko e mena ia kia omaoma a tautolu ki a ia ke he tau mena oti. Po ke heigoa e finagalo a Iehova, to manako a tautolu ke taute, ke he tau vaha matematekelea po ke ha mena kua taute e tautolu ke he tau aho he mouiaga nei. Ko e puhala haia he tau fakafekau fakamooli he Atua ne manamanatu tumau ki ai. (Tanielu 3:16-18; Salamo 119:33-37) Ko e senetenari fakamua ne pehe e falu ke he fakafiliaga tokoluga: “Kua lata ni ke mua e omaoma ke he Atua ke he omaoma ke he tau tagata.” (Gahua 5:29) Ko e vaha nei, kua fakaaoga e Iehova haana a tau fekafekau fakamooli ke fakailoa haana higoa mo e haana finagalo ke he lalolagi oti. (Mataio 24:14) Ka oti e mena ia he taute ke latalata mitaki ai, ti fakakite e ia ki a Satani haana malōlo muaatu ke lipilipi a ia mo lautolu oti ne totoko, fakaoti ai foki e fakatokaaga kelea nei. Ti, fakamea ai e Iehova e lalolagi katoatoa mai he mahani kelea ka e fakaatā e puhala ma e haana a fakatokaaga foou.

[Tau Matahui Tala]