Veveheaga 9

Ko e Kakano kua O atu ai e “Fuifui Mamoe Gahoa” ke he Lagi

1. (a) Ko e magaaho ne nofo a Iesu he lalolagi nei ko e heigoa ne talaage e ia ke he haana a tau tutaki ke he mouiaga he lagi? (e) Ko e ha kua tokologa e tau tagata ne fia o ke he lagi?

HA NE nofo agaia a Iesu Keriso fakalataha mo e haana tau tutaki ke he lalolagi, ne vagahau atu e ia ki a lautolu e moui hā hā he lagi. Ne talaage e ia ki a lautolu to fano a ia ke taute taha mena ke nonofo ai a lautolu, to hoko mai e magaaho ke fakalataha ai a lautolu mo ia. (Ioane 14:1-3) Ko e tau miliona he tau tagata kua fakavē ha lautolu a tau loto ke he moui ia hā hā he lagi. Kua eke e moui ia kia lautolu ke moua mai ai e fakamanavaaga mai he tau mena matematekelea he mouiaga nei. Ka e iloa nakai e koe, ko e heigoa e mena kua fakatoka ai he Atua pihia ke o atu e falu ke he lagi? Iloa nakai e koe ko e heigoa ha lautolu a tau mena ka taute?

2. (a) Ko e heigoa e kautu he Atua, ti ko fe ne toka ai? (e) Ha kua pehe a Iesu ke he “fuifui mamoe gahoa” to eke ma lautolu “e kautu” ko e heiga e kakano he mena ia?

² Ko e vaha ne gahua ai a Iesu he lalolagi nei ne fakamatala e ia loga he tau mena ke he “kautu he Atua.” Ne fakaako e ia haana a tau tutaki ke liogi, hagaao ke he Kautu he Atua ke hoko mai, kia taute ai haana a finagalo ke he lalolagi nei. Ti eke ai e lalolagi mo kaina fulufuluola ma e tau tagata. Ka ko e kautu, po ke fakatufono, to eke he Atua ma haana ke he Lagi, ko e mena foki haia ne fa pehe ai a Iesu, “ke he kautu he lagi.” (Mataio 5:20; 6:9, 10) Ko e tau manatu nei foki ke maama ai ia tautolu haana tau kupu ne pehe: “Ua matakutaku a koe e fuifui mamoe gahoa na e; ha ko e mena finagalo ha mutolu a Matua ke foaki mai e kautu kia mutolu.” (Luka 12:32) E, to foaki age he Atua ke he “fuifui mamoe gahoa” e kotofaaga ke pule ai a lautolu ke he fakatufono he Atua ha he lagi ke he tau tagata oti kana.

3. Ko e heigoa he Fakakiteaga 20:6 ne vagahau ki a lautolu ka liu tutū mai ke he moui he lagi ke taute ke he mena na?

³ Ko e Fakakiteaga 20:6 kua totou pehe ki a lautolu kua liliu tutū mai ke he moui ha he lagi: “Ka e eke a lautolu mo tau ekepoa he Atua mo Keriso, ti eke foki a lautolu mo tau patuiki fakalataha mo ia ke he tau tau ne taha e afe.” Ko Iesu Keriso ko e patuiki pule mo e ekepoa ne mua, ti ko lautolu nei kua fakamooli ne ta mai he lalolagi to fekafekau fakalataha mo ia.—Fakakiteaga 5:9, 10.

4. Ko e ha kua lata tonu ai ko lautolu ne kua kotofa he Atua ma e kautu he lagi ke ta mai ni he lalolagi?

⁴ Ko e ha ne kua fifili mai ai a lautolu he lalolagi nei ma e gahua pihia? Ko e mena kua pihia ai ha ko e mai he lalolagi nei ne paleko ai e pule a Iehova. Mai hinai ne tuku atu ai e kamatamata he fakamooliaga he tagata ke he Atua mai he fetokoaga he Tiapolo. Mai hinai foki ne fakakite fakamooli ai e Iesu haana a omaoma ke he Atua, ke he kamatamata, ti foaki atu ai e ia haana moui mo lukutoto ma e tau tagata. Ti mai he lalolagi nei ne kua fifili ai e Iehova e “fuifui mamoe gahoa” he tau tagata ke nonofo fakalataha ai a lautolu mo e haana a Tama ke he kautu he lagi. Ko lautolu oti nei ne kua fakakite ha lautolu a tua ke he fakamouiaga mai he Atua ia Keriso. Ko lautolu haia kua fakamooli ai ko e pikopiko e Tiapolo he pehe a ia ko e omaoma noa ni e tagata ke he Atua ha ko e tau mena ne manako a ia ki ai. Kua finagalo a Iehova ke fakaaoga a lautolu mo haana fakahekeaga.—Efeso 1:9-12.

5. (a) Ko e ha e fakatokaaga ia ko e mena fakaalofa noa he Atua ke tuku e kotofaaga ki a lautolu ne kua iloa e tau mena uka kua taute mau he tau tagata? (e) Ko e heigoa e tau monuina ki a lautolu he lalolagi nei ke moua e fiafia ka fakaaoga he tau ekepoa he lagi e aoga he lukutoto a Keriso?

⁵ To eke a lautolu mo tau patuiki mo e tau ekepoa i lalo he fakatonuaga a Iesu Keriso, to fekafekau a lautolu mai he lagi kia fakahoko ai e finagalo a Iehova ke he tau tagata. Kua mua atu ni e mitaki ke eke a lautolu mo tau pule, ha kua fita e fakamooli ha lautolu a tua ke he Atua! (Fakakiteaga 20:4) Kua mua atu foki e fakaalofa noa he Atua ha kua tuku age e ia e kotofaaga ki a lautolu ne kua iloa e tau mena uka ne fa mahani mau ai mo e tau tagata! Ko e mooli ni, to kau fakalataha a lautolu mo Keriso, ke he tauteaga he tau pule tonu mo e maama ki a lautolu kua pule ki ai. (Heperu 2:17, 18) To fakamonuina lahi ai a lautolu oti ha he lalolagi nei ha ko e mena to foaki atu he tau ekepoa hā hā he lagi e tau monuina mai he lukutoto a Keriso, to fakamaulu ai a lautolu fakaagaga, tau manamanatuaga mo e tau faahi tino ato hoko atu a lautolu ke he moui mitaki katoatoa!—Fakakiteaga 21:2-4.

TOKO FIHA A LAUTOLU KA O ATU KE HE LAGI?

6. Toko fiha a lautolu he “fuifui mamoe gahoa”?

⁶ Ko lautolu ne kua uiina he Atua ke fekafekau fakalataha ke he lagi mena toko gahoa ni a lautolu. Tuga he talahau e Iesu ko lautolu haia ko e “fuifui mamoe gahoa.” Mole ai e liu atu a Iesu ke he lagi, ti fakakite ai e Iesu e katoatoa ha lautolu ke he fakakiteaga ke he aposetolo ko Ioane, ne tohia ai pehe: “Ne kitia atu au, kitiala foki, kua tu mai e Punua mamoe ke he mouga ko Siona, kua fakalataha foki mo ia e tau tagata ne teau e afe ti fagofulu ma fa e afe . . . ko lautolu ne fakafua mai he lalolagi.” (Fakakiteaga 14:1, 3) Ko e “Punua mamoe” ne matai ki ai, ko Iesu Keriso; ti ko e “mouga ko Siona” nakai hā hā he lalolagi nei, ka ko e lagi kua hā hā i ai a Iesu. (Ioane 1:29; Heperu 12:22) Ti ko e 144,000 a lautolu haia ne kua mamate ke he lalolagi ko e tau tagata, ka kua liliu tutū mai ke he moui fakaagaga ke he lagi tuga ni a Iesu. (Roma 6:5) Kaeke ke fakatatai atu ke he afe mo afe he tau miliona tagata ha he lalolagi, kua mooli ni, ko e “fuifui mamoe gahoa” a lautolu.

7. (a) Ko e 144,000 ko lautolu ni kia ka moua e fakamouiaga”? (e) Ko e heigoa e talahauaga a Iesu hagaao ki a lautolu ka nonofo ke he lalolagi?

⁷ Ka ko e, “fuifui mamoe gahoa” kua o atu ke he lagi nakai ko lautolu ni hokoia ka moua e fakamouiaga. Tuga ni kua iloa e tautolu, to hā hā i ai he lalolagi nei e tau tagata fiafia ke pule hifo a lautolu ki ai. Ne matai mai ai e Iesu ko e tau “mamoe kehe” ko lautolu haia ko e “moto tagata tokologa” kua fekafekau atu ainei a lautolu fakamooli ke he Atua.—Ioane 10:16; Fakakiteaga 7:9, 15.

ILOA FEFE HE TAGATA KO IA TAHA HE “FUIFUI MAMOE GAHOA”

8. Maeke fefe he taha kua uiina ke he lagi ke iloa?

⁸ Kua iloa e lautolu hā hā i ai ke he “fuifui mamoe gahoa” kua uiina he Atua a lautolu ke he mouiaga hā hā he lagi. Iloa fefe? Ha ko e fakagahuahuaaga he agaga he Atua, kua fakatoka mo e fakatupu ai ki loto ia lautolu e amaamanakiaga ke he mouiaga ha he lagi. Ko e aposetolo ko Paulo ko ia taha he “fuifui mamoe gahoa,” kua tohia mai pehe: “Kua fakamoli mai e Agaga ia ni ke he tau agaga ha tautolu, ko e fanau he Atua a tautolu. Kaeke ko e fanau a tautolu, ti ko e tau hakeaga foki, ko e tau hakeaga ni he Atua, ko e tau hakeaga fakalataha mo Keriso; kaeke kua mamahi a tautolu fakalataha mo ia kia fakamonuina foki a tautolu fakalataha mo ia.” (Roma 8:16, 17) Ko e fakagahuahuaaga he agaga he Atua kua liliu ai e tau amaamanakiaga he tagata pihia, ti ko e haana a tau manamanatuaga mo e tau liogi kua hagaao ia ke he Atua, fekafekau ki a ia mo e amaamanaki ai ke he moui hā hā he lagi. Ko e haana a fakalatahaaga mo Keriso ke he lagi kua mua atu ia ki a ia ke he tau mena ha he lalolagi.

9. Fakamua ke fifili haana tuaga hagaaao atu ke he moui ha he lagi, ko e heigoa kua lata ai?

⁹ Nakai fakauaua liga kua manamanatu foki a koe ke he mena ia, po kua manamanatu foki a koe ko koe taha ka moua e mouiaga ia ke he lagi. Fakamua ke iloa mo e maama ki a ia haana a tuaga, kua lata ke iloa e ia e fakaakoaga he Tohi Tapu ke he mena ia. Ko e ha? Ha ko e agaga tapu he Atua kua fakamooli ai kua uiina e ia a ia ke he lilifu hā hā he lagi, ko e agaga taha ia ni ne takitaki aki ai e tohiaga he Tohi Tapu. Kaeke kua pihia e manatu, omai a ke kumikumi ki ai.

10. (a) Ko e tua fefe ke fakatupu e taha ke amaamanaki ke finatu ke he lagi? (e) Ko e heigoa e tau mena mooli he Tohi Tapu kua nakai iloa e lautolu kua manatu ko e tau tagata mitaki ni ka o atu ke he lagi?

¹⁰ Ko e tau vaha kua mole atu, talitonu kia a koe, ko e tau tagata mahani mitaki oti ni ka o atu ke he lagi? Kaeke kua pihia, ti lali ai a koe ke takitaki haau a moui ke he puhala kua tonu, ti amaamanaki foki a koe ke totou fakalataha mo lautolu. Po kua amaamanaki pihia foki a koe ke feleveia mo e haau a tau fakahelehele ne kua galo ai ha ko e mate. Ha ne manamanatu a koe pihia, iloa nakai e koe kua fakakite mai pehe e Tohi Tapu, ke he tau fekafekau fakamooli he Atua ko e Patuiki ko Tavita mo Ioane Papatiso nakai o atu ke he lagi? (Gahua 2:29, 34; Mataio 11:11) Ko e vaha ia, iloa nakai e koe, mena toko 144,000 ne kua fifili mai he moto tagata tokologa he hogofulu ma hiva e tau senetenari ne kua mole, ko lautolu ni a ia ka moua e moui ke he lagi? Ne iloa foki nakai e koe mena fakakite mai he Tohi Tapu e amaamanakiaga he moui tukulagi i lalo hifo he tau tutūaga hako mo e tonu ma lautolu oti ha he lalolagi, kua eke mo fekafekau fakamooli ke he Atua?—Salamo 37:10, 11, 29.

11. Ha ko e heigoa e fakaakoaga fakavai hagao ke he solu kua tokologa e tau tagata kua manatu to o atu a lautolu ke he lagi?

¹¹ Ha ne manamanatu a koe ke he moui hā hā he lagi ma haau, ne kua talitonu nakai a koe ke he moui tukulagi fakaagaga ma e tagata moui solu (soul)? Ti kua maama mitaki ai foki haau a amaamanakiaga ko e haau a solu to finatu ai ke he lagi. Kaeke kua pihia haau a amanakiaga ti nakai moua mai ha ko e agaga he Atua kua fakamooli ai ki a koe. Ko e tonu he mena ia, tuga kua iloa e koe, kua pehe mai e Kupu mooli he Atua, ka mate e tagata moui solu ti nakai hā hā i ai a ia. Ti ko lautolu kua mamate kua falanaki a lautolu ke he Atua ke fakaliututū mai ke he mena kua finagalo a Ia ki ai ma lautolu.—Esekielu 18:4; 1 Korinito 15:35-38.

12. (a) Ko hai ke taute e fifiliaga he tau tagata ka moua e moui ke he lagi? (e) Ko e heigoa e amaamanaki mai he Atua kua fakakite ma e tau tagata he vaha nei?

¹² Ko e mena haia kua lata ai ke kumikumi a tautolu ke he Tohi Tapu ke eke mo takitakiaga ka e nakai tupu mai ai ha ko e logona hifo, po ke moua mai ai he tau manatu noa nakai mai he Tohi Tapu ke fakahēhē aki ha tautolu a tau manamanatuaga. Ko lautolu kua moua e moui ke he lagi nakai fifili ni e lautolu; ka ko e Atua ni ke fifili a lautolu. (2 Tesalonia 2:13, 14) Kua uiina a lautolu ke toka oti e tau magafaoa mo e tau kapitiga mo e tau mena oti he lalolagi ha kua moua e lautolu e kotofaaga ke patuiki; mo e tau ekepoa fakalataha mo Keriso ke eke mo matutakiaga ke he “kitofaitane.” (Fakakiteaga 21:2) Kua tuku atu pihia he Atua ki mua ia lautolu, ti kua talia e lautolu mo e fiafia kua lahi. Ka kua lata foki ke iloa, nakai ko e moui ke he lagi hokoia ni, ke fakaoti ai e tau matematekelea he mouiaga nei. Mena fakaalofa foki ni e Atua ke he haana a “tau mamoe kehe.” Ko e haana a maveheaga to taute e ia e lalolagi nei mo parataiso, ko e mamahi mo e fakaatukehe to mole atu ai. Kua fakakite tonu mai e ia to hā hā i ai e amaamanakiaga ke he moui he lalolagi nei, kua takitaki atu ai he Atua e tokologa he tau tagata ke he tau tau loga kua mole atu.

13. (a) Ko hai kua lata ke kai e falaoa mo e inu e uaina he Fakamanatuaga he mate a Keriso? (e) Ko hai foki ke fakalataha ai?

¹³ Ka ko e tau tau taki taha ke he fakamanatuaga he mate a Keriso, ko lautolu kua toe agaia ke he lalolagi nei mai he “fuifui mamoe gahoa,” kua Fakamanatu tumau e lautolu e aho mate a Keriso. Tuga he fakaako e Iesu, ne kai e lautolu e areto mo e inu ke he uaina, ko e tau mena fakatai ke he tino mo e toto ne foaki atu e Iesu ma e tau tagata oti kana. Ne talaage a Iesu ki a lautolu ne kua poaki e ia ki ai ke kai mo e inu ke he fakamanatuaga, kua eke e ia mo lautolu e ‘maveheaga ma e kautu’; ti ko lautolu kua nakai eke mo tau hukui ke he kautu he lagi to nakai kai po ke inu ke he fakamanatuaga. (Luka 22:19, 20, 29) Ka e pete ni ia, ko lautolu oti kua amaamanaki ke he moui he lalolagi nei kua fakapotopoto fakalataha tumau ke kitia e fakamanatuaga he kaiaga mena he ha tautolu a Iki. Tuga mo e taha ia lautolu kua talia fiafia e moui ki lalo hifo he pule he kautu he lagi, kia fakalataha atu ai foki a koe ke he fakapotopotoaga ia.

KO E LIU MAI A KERISO

14. Ko e heigoa e maveheaga ne taute e Iesu ke he haana liu haele mai?

¹⁴ Ko e magaaho afiafi ato hoko ai e mate a Iesu Keriso ne mavehe a ia ke he toko hogofulu ma taha e tau fakamooli mai he “fuifui mamoe gahoa,” to liu mai foki a ia, pehe: “Ke fano au ke taute taha mena ke nonofo ai a mutolu. . . . to liu mai au, ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au.”—Ioane 14:2, 3.

15. (a) Ko e heigoa ne talahau he Fakakiteaga 1:7 ke he liu haele mai a Keriso, pehe kia to liu kitia mata a ia? (e) To iloa fefe e tautolu to nakai liu onomata e tau tagata ki a Keriso ka liu haele mai?

¹⁵ To liu mai kia a ia ke kitia fakatino tagata? To pehe ai e falu mena fakakite mai he tohi Fakakiteaga 1:7: “Kitiala, kua haele mai a ia mo e tau aolagi, to kitia foki a ia he tau mata oti kana.” Kua pehe kia e kakano he kupu ia to kitia ai he tau mata nei ha tautolu a ia? Kua vagahau mai e Tohi Tapu, nakai kitia hokoia ke he tau mata he tino nei ka e kitia ai foki he lotomatala po ke loto manamanatu. Ne fakakite mai e Iesu ko e tau Farasaio ne mata pouli a lautolu, ka e pehe a lautolu, “ko e mena ala a mautolu.” Ne mata pouli a lautolu fakaagaga. (Ioane 9:39-41; Isaia 43:8) Ko e kitiaaga he tau mena fakaagaga ne fakahagaao mo e maama ki ai e Fakakiteaga 1:7. “To kitia foki a ia he tau mata oti kana,” ha kua pete ni kua nakai tua a lautolu ki a ia, ka fakaotioti e Keriso a lautolu ne mahani hepehepe, to iloa ai ni e lautolu ha ko e mena kua oti tuai he fakailoa mai. To nakai liu mai fakatino tagata a Iesu ke kitia, ha kua fakamaama mai e ia pehe: “Toe tote ti nakai kitia he lalolagi au, ka e kitia e mutolu au. Kua moui au, ko e mena ia ke momoui ai a mutolu.” (Ioane 14:19) Ko e tau tagata to nakai liliu kitia e lautolu a ia ha kua liu atu tuai a ia ke he lagi. Ka ko e “fuifui mamoe gahoa” to liliu kitia e lautolu a ia, ha ko e mena to uta e ia a lautolu ke fakalataha mo ia.

16. Ti ko e heigoa e kakano he liu haele mai a Keriso?

¹⁶ Ti ko e liu haele mai a Keriso, nakai liu mai a ia fakatino tagata ke nofo ke he lalolagi. Ka to taute e ia haana a pule fakapatuiki ke he lalolagi, to fakaliututū mai e ia e “fuifui mamoe gahoa,” mai ia lautolu ne mamate ke moua e palepale ke he lagi. To igatia ai a lautolu ke taute e finagalo fakaalofa hofihofi noa he Atua mai he haana kautu. Kua moui ai a koe he vaha ke kitia mo e iloa ai e koe e tau monuina loga mai he pule he Kautu ia.—Fakakiteaga 11:15-18.