Nakai Leva To Hoko e Tokanoaaga he Monuina ma e Fanau he Atua

“Nukua mahala e tau mena ne eke ke he mena popo vave . . . Ne fakamahala mo e amaamanaki, ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.”​—ROMA 8:20, 21.

1. Kua fakatai fefe e poa ha Iesu he Aho he Fakafeiloaga?

NE FOAKI e Iehova hana Tama fuataha mo poa lukutoto ke hafagi aki e puhala ke he moui he lagi ma e 144,000 tagata mo e amanakiaga ke he lalolagi ma e tau tagata ne toe. (1 Ioane 2:1, 2) Tuga kua kitia ai he vala tala fakamua, kua fakatai e poa ha Iesu ma e tau Kerisiano fanau he agaga, he magaaho ne poa he ekepoa ne mua ha Isaraela e povi ma e hana ni a hala, hana magafaoa, mo e magafaoa Levi he Aho he Laveakiaga ne lagataha he tau. He aho taha ia, ne poa e ia e koti ma e hala he falu Isaraela, tuga ni ka moua he tau tagata tokologa e aoga he poa he Keriso. Ko e koti moui kua fakatino ke uta kehe e tau hala loga he tau tagata he tau kua mole, mo e kua fakagalo tamokimoki atu ke he vao.a​—Levitika 16:7-15, 20-22, 26.

2, 3. Ko e heigoa e kakano he talahauaga ha Paulo ne tohi he Roma 8:20, 21?

² He mole e talaage e amaamanakiaga he tau tagata ka eke mo “tau tama he Atua” he lagi, ne talahau e aposetolo ko Paulo: “Kua fakaneinei e tau mena ne eke ti fakatalitali ni ke he fakakite mai e tau tama he Atua. Nukua mahala e tau mena ne eke ke he mena popo vave, nakai loto a ia ki ai, ka e pihia ha ko ia ne mahala ai. Ne fakamahala mo e amaamanaki, ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.” (Roma 8:14, 17, 19-21) Ko e heigoa e kakano he talahauaga nei?

³ He magaaho ne tufuga ai ha tautolu a tupuna ko Atamu ko e tagata mitaki katoatoa, ko e “tama a ia he Atua.” (Luka 3:38) Ha kua hala ai, kua hokotia a ia ke he “tupaaga ke he mena popo vave” mo e fakahoko e tuaga nei ke he lanu tagata. (Roma 5:12) Ne fakaata he Atua e tau tagata ke fanau mo e mena “popo vave” ne fehagai mo lautolu kakano ko e nakai mitaki katoatoa ne moua e lautolu, ka kua foaki e ia e amaamanakiaga he puhala he “tega,” ko Iesu Keriso. (Kenese 3:15, NW; Ke 22:18; Kalatia 3:16, NW) Ne tuhi atu e Fakakiteaga 21:1-4 ke he magaaho ka ‘mate, fakatutuku, tagi, matematekelea, ha kua mole atu e tau mena fakamua.’ Ha ko e maveheaga anei ke he “tau tagata,” kua fakatonu mai ki a tautolu to kitia he kaufakalatahaaga he tau tagata he lalolagi fou ka nonofo i lalo he pule he Kautu e fakafouaga he loto manamanatu mo e he tino ke he malolo katoatoa mo e moui tukulagi ko e “fanau he Atua” he lalolagi. He magahala he Pule Afe Tau he Keriso, “to toka noa ai [e tau tagata omaoma mai he] tau mena ne eke mai he tupaaga ke he mena popo vave.” He mole e fakakite e fakamoli ki a Iehova he magahala he kamatamata fakamui, to tokanoa tukulagi a lautolu mai he tufaaga he hala mo e mate. (Fakakiteaga 20:7-10) Ko lautolu he lalolagi he mogoia to “hoko atu ai ke he tokanoaaga ha ha he monuina he fanau he Atua.”

Kua Talahau a Lautolu “Ati Hau Ā”

4. Ko e heigoa e kakano ke ‘uta noa e vai he moui’?

⁴ Ko e amaamanakiaga mitaki ha a ia ne toka i mua he tau tagata! Ti ko e mena haia ne muamua ai e tau Kerisiano fanau he agaga ne ha ha agaia he lalolagi ke tutala ke he falu hagaao ki ai! Ha ko e mena to fai vala a lautolu he “kitofaitane” he Punua Mamoe lilifu, ko Iesu Keriso, kua putoia ai a lautolu ne fakauku ne toe agaia ke he fakamoliaga he tau kupu fakaperofeta nei: “Kua pehe mai foki e Agaga mo e kitofaitane, Ati hau ā; kia pehe atu foki a ia kua fanogonogo, Ati hau ā; ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.” (Fakakiteaga 21:2, 9; 22:1, 2, 17) Nakai, ko e tau fua he poa lukutoto ha Iesu kua ai fakakaupa ki a lautolu ne 144,000 ne fakauku. Kua fakatumau e agaga he Atua ke gahua he puhala ia lautolu ne toe he vahega kitofaitane he lalolagi he talahau “Hau ā.” Ko e ha tagata ne logona ne kua fia inu ma e tututonu kua uiina ke talahau “Hau ā,” he fakaata e ia a ia ni ke moua e tau foakiaga loga ha Iehova ma e fakamouiaga.

5. Ko hai ne fiafia e Tau Fakamoli a Iehova ki ai ke nonofo he vahaloto ha lautolu?

⁵ Kua tua e Tau Fakamoli a Iehova ke he foakiaga ha Iehova ma e moui he puhala ia Iesu Keriso. (Gahua 4:12) Kua fiafia a lautolu ha ko e tau tagata loto fakamoli he vahaloto ia lautolu ne manako ke fakaako hagaao ke he tau fioiaaga he Atua mo e taute hana finagalo. Kua hafagi e tau Fale he Kautu ha lautolu ki a lautolu oti ne manako ke ‘o mai mo e uta noa e vai he moui’ he “vaha ke fakahiku” nei.​—Tanielu 12:4.

Tau Hikiaga mo e Mole Mafiti he Tau Aho

6. Kua gahuahua fefe e agaga he Atua i luga he tau fekafekau ha Iehova he magahala he tau vaha kehekehe?

⁶ Kua fai magaaho e Atua ke taute ai hana a tau finagalo, ati haofia ai hana tau fehagaiaga mo e tau tagata ha ko e mena nei. (Fakamatalaaga 3:1; Gahua 1:7) Pete kua hifo mai e agaga he Atua ki luga he tau fekafekau hana he vaha nakaila Kerisiano ia, kua nakai fanau a lautolu mo tau tama fakaagaga hana. Ka e, kamata mo Iesu, kua hoko tuai e magaaho a Iehova ke fakaaoga e agaga tapu ke fanau e tau tagata tane mo e fifine tukulele ke he tufaaga he lagi. Ka e kua ha tautolu a vaha? Ko e agaga taha ia ne gahuahua ke he “tau mamoe kehe” ha Iesu, ka kua nakai fakalagalaga ia lautolu e amaamanakiaga mo e tau manako ke he moui he lagi. (Ioane 10:16) Mo e moui tukulagi ke he lalolagi parataiso, ko e ha lautolu a amaamanakiaga ne age he Atua, kua fiafia lahi a lautolu ke lagomatai e tau tagata fakauku ne toe he fakamatala he magahala he vaha fehikitaki nei mai he lalolagi tuai ke he lalolagi tututonu fou he Atua.​—2 Peteru 3:5-13.

7. Ko e heigoa e gahua helehele ne lavelave e Tau Tagata Fakaako Tohi Tapu ki ai, ka ko e heigoa ne iloa e lautolu hagaao ke he parataiso?

⁷ Ne kamata e Atua ke “takitaki e tau tama tokologa ke he monuina” aki e liligiaga he agaga tapu he Penetekoso 33 V.N., mo e fakatoka foki e ia e magaaho ke fakakatoatoa mai e ‘Isarela fakaagaga he Atua’ ne 144,000. (Heperu 2:10; Kalatia 6:16; Fakakiteaga 7:1-8) Kamata mai he 1879, kua fa mahani ai ke totoku i loto he mekasini nei e gahua helehele ne putoia ki ai e tau Kerisiano fakauku. Ka kua iloa foki he Tau Tagata Fakaako Tohi Tapu (ne ui he mogonei ko e Tau Fakamoli a Iehova) kua toka he Tohi Tapu e amaamanakiaga he moui tukulagi he lalolagi parataiso. Ke fakatai ki ai, ne talahau mai he fufuta he Watch Tower ia Iulai 1883: “He magaaho ka fakatu e Iesu hana kautu, mo e uta kehe e mahani kelea, mo e falu mena pihia., to eke e lalolagi nei mo parataiso, . . . ti ko lautolu he tau tukuaga ha lautolu to o mai ki loto ia. Mo e ka omaoma ke he tau matafakatufono to moui tukulagi a lautolu i ai.” He mole atu e magaaho, kua oti e helehele ha lautolu ne fakauku, mo e kua helehele fakaagaga mai e tau tagata ne nakai moua e amaamanakiaga ke he lagi ki loto he fakatokatokaaga ha Iehova. He magaaho ia ni, ne foaki he Atua ke he tau fekafekau fakauku hana, tau Kerisiano liu fanau foki, e iloilo homo ue atu.​—Tanielu 12:3; Filipi 2:15; Fakakiteaga 14:15, 16.

8. Kua tupu fefe e maama ke he amaamanakiaga ke he lalolagi he atu tau fakamua he 1930?

⁸ Tali mai he 1931 kua feoaki a lautolu ne amaamanaki ke he lalolagi mo e fakapotopotoaga Kerisiano. He tau ia, ne fakamaama e Iehova ki a lautolu ne toe he tau Kerisiano fanau he agaga ke kitia ko e hagaao e Esekielu veveheaga 9 ke he vahega he lalolagi nei, ne kua fakamailoga ke hao atu ke he lalolagi fou he Atua. Kua talahau ai he 1932 ko lautolu ne tuga e tau mamoe he vaha nei kua tatai ai mo e hoa ha Iehu ko Ionatapu. (2 Tau Patuiki 10:15-17) He 1934, kua fakamaama e lata he “tau Ionatapu” ke “fakamoli” po ke tukulele, a lautolu ni ke he Atua. He 1935 ko e “lanu tagata tokologa,” po ke “moto tagata tokologa”​—ne manatu fakamua ko e vahega fakaagaga ke ua aki ka “fakahoa” e kitofaitane he Keriso he lagi​—kua kitia ai ko e tau mamoe kehe ne moua e amaamanakiaga ke he lalolagi. (Fakakiteaga 7:4-15; 21:2, 9; Salamo 45:14, 15) Mo e tali mai he 1935 ne takitaki e lautolu ne fakauku e kumikumiaga ma e tau tagata tututonu ne loto lahi ke nonofo tukulagi he lalolagi parataiso.

9. He mole e 1935, ko e ha ne oti e kai mo e inu e tau Kerisiano ke he falaoa mo e uaina he Kaiaga Afiafi he Iki?

⁹ He mole e 1935, kua oti ai e fakalataha he falu Kerisiano ke he falaoa mo e uaina he Kaiaga Afiafi he Iki. Ko e ha? Kakano kua mailoga e lautolu ko e ha he lalolagi e amaamanakiaga ha lautolu, nakai ke he lagi. Kua talahau ai he taha fifine ne papatiso he 1930: “Pete ni he manatu ko e mena hako ke [fakalataha] ki ai, mua atu ke he tau fekafekau mau, ne nakai fakaai au ke tuaha ko e amaamanakiaga ke he lagi haku. Ti, he 1935, kua fakamaama fakamitaki mai ki a mautolu kua fakapotopoto tuai e moto tagata tokologa mo e amaamanakiaga ke nonofo tukulagi he lalolagi. Tokologa ia mautolu ne fiafia lahi he maama ko e vala he moto tagata tokologa a mautolu, mo e fakaoti agataha e fakalataha ha mautolu ke he falaoa mo e uaina.” Kua hiki foki e tau fakahagaaoaga he tau tohi Kerisiano. Ha kua taute pauaki e tau tohi ia he tau tau fakamua ma e tau tutaki ha Iesu ne fanau he agaga, mai he 1935 ne foaki he The Watch­tow­er mo e he falu tohi he “fekafekau fakamoli” e tau mena kai fakaagaga ke lata mo e tau manako ha lautolu ne fakauku mo e ha lautolu a tau hoa ne moua e amaamanakiaga ke he lalolagi.​—Mataio 24:45-47.

10. Liga hukui fefe a ia kua fakauku ne nakai fakamoli?

¹⁰ Kia fakalata, kua nakai fakamoli taha ia lautolu ne fakauku. To fai hukui nakai? Kua fakakite mai e Paulo he hana a tutalaaga ke he akau olive fakatai. (Roma 11:11-32) Kaeke kua lata ke hukui a ia ne fanau he agaga, to age he Atua e ui ke he lagi ke he taha tagata ne mauokafua e tua he tuku atu ki a ia e fekafekauaga tapu he tau tau loga.​—Fakatatai Luka 22:28, 29; 1 Peteru 1:6, 7.

Tau Kakano Loga ke Fakatulou

11. Pete ni ko e heigoa e amaamanakiaga ha tautolu, kua fakamoli mai fefe a Iakopo 1:17 ki a tautolu?

¹¹ Ke he taha mena ni ne fekafekau mo e tua fakamoli a tautolu ki a Iehova, to fakamakona e ia ha tautolu a tau manako mo e tau loto tututonu. (Salamo 145:16; Luka 1:67-74) Pete ni he moua e tautolu e amaamanakiaga moli ke he lagi po kua amaamanaki a tautolu ke he lalolagi, ha ha ia tautolu e tau kakano loga ke fakatulou ke he Atua. Kua taute tumau e ia e tau mena ma e mitaki ha lautolu ne fakaalofa ki a ia. Ne talahau he aposetolo ko Iakopo “ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia, kua hifo mai mai he Matua he maama,” ko Iehova ko e Atua. (Iakopo 1:17) Kia mailoga ai e tautolu e falu he tau mena fakaalofa mo e fakamonuina nei.

12. Ko e ha kua maeke ia tautolu ke talahau kua fakaigatia age e Iehova ke he tau fekafekau tua fakamoli hana e amaamanakiaga homo lahi?

¹² Kua fakaigatia e Iehova hana tau fekafekau aki e amaamanakiaga homo lahi. Ne ui e ia falu ke he moui he lagi. Ke he hana tau fakamoli he vaha nakaila Kerisiano, ne tuku age e Iehova e amaamanakiaga mitaki lahi he liu tu mai ke he moui tukulagi he lalolagi. Tuga a ia, ne fai tua a Aperahamo ke he liu tu mai mo e tatali atu “ke he māga kua fai fakaveaga”​—ko e Kautu he lagi ka fakaliu tu mai a ia ke he moui he lalolagi. (Heperu 11:10, 17-19) Ti liu foki ai, he magaaho fakahiku nei, hane foaki he Atua ke he tau miliona e amaamanakiaga ke he moui tukulagi he lalolagi parataiso. (Luka 23:43; Ioane 17:3) Moli ni, ko lautolu ne foaki age e Iehova ki ai e amaamanakiaga mua ue atu ia kia fakatulou a ki ai.

13. Kua gahuahua fefe e agaga tapu he Atua i luga he tau tagata hana?

¹³ Ne foaki e Iehova hana agaga tapu mo mena fakaalofa ke he hana tau tagata. Ko e tau Kerisiano ne age ki ai e amaamanakiaga ke he lagi kua fakauku aki e agaga tapu. (1 Ioane 2:20; 5:1-4, 18) Ko e tau fekafekau he Atua ne moua e amaamanakiaga ke he lalolagi kua lagomatai mo e takitaki foki he agaga. Ia lautolu nei ko Mose, ne moua e agaga a Iehova, tuga e tau tagata tane toko 70 ne kotofa ke lagomatai a ia. (Numera 11:24, 25) I lalo he fakaohoohoaga he agaga tapu, kua fekafekau a Pesaleli ke eke ko e tufuga he tau gahua oti he faituga utafano ha Isaraela. (Esoto 31:1-11) Ne ha i luga ia Kiteona, Iefeta, Samisoni, Tavita, Elia, Elisaio, mo e falu foki e agaga he Atua. Pete ni to nakai uta a lautolu nei he vaha i tuai ke he lilifu he lagi, ka kua takitaki mo e lagomatai he agaga tapu a lautolu, tuga e tau mamoe kehe ha Iesu he vaha nei. Ti, ke moua e agaga he Atua kua nakai kakano a ia kua moua e tautolu e ui ke he lagi. Ka kua foaki mai he agaga a Iehova e takitakiaga, ke lagomatai a tautolu ke fakamatala mo e fakakatoatoa falu he tau kotofaaga mai he Atua, tuku mai ki a tautolu e malolo ke he mena ne nakai fahia ki ai, mo e tuku ia tautolu e tau fua he fakaalofa, fiafia, mafola, fakauka, totonu, mahani molu, mo e manako fakalatalata. (Ioane 16:13; Gahua 1:8; 2 Korinito 4:7-10; Kalatia 5:22, 23) Nakai kia loto fakaaue a tautolu ke he mena fakaalofa nei mai he Atua?

14. Kua moua fefe e tautolu e aoga mai he tau mena fakaalofa he Atua ko e iloilo mo e pulotu?

¹⁴ Ko e iloilo mo e pulotu ko e tau mena fakaalofa mai he Atua, ti kia fakatulou a tautolu ki ai, pete ko e amaamanakiaga ha tautolu he lagi po ke he lalolagi. Kua lagomatai he iloilo tonuhia ha Iehova a tautolu ke ‘mailoga e tau mena kehekehe’ mo e ‘mahani ke lata mo e Iki, kia fiafia mai a ia.’ (Filipi 1:9-11; Kolose 1:9, 10) Kua eke e pulotu mai he Atua mo puipuiaga mo e takitakiaga he moui. (Tau Fakatai 4:5-7; Fakamatalaaga 7:12) Kua fakave ke he Kupu he Atua e iloilo mo e pulotu moli, ti ko e tau tagata fakauku ne toe agaia kua futiaki lahi atu ke he mena ne talahau i ai hagaao ke he ha lautolu a amaamanakiaga ke he lagi. Pete ni ia, ko e loto ke he Kupu he Atua mo e maama mitaki ai kua nakai fakakite ko e puhala a ia he Atua ke ui a tautolu ke he moui he lagi. Pete ni he tohi he tau tagata tuga a Mose mo Tanielu e falu vala he Tohi Tapu, ka e to fakaliu tu mai a lautolu ke he moui he lalolagi. Ti ka amaamanaki a tautolu ke he lagi po ke ke he lalolagi, kua moua e tautolu oti e tau mena kai fakaagaga he puhala he “fekafekau fakamoli mo e loto matala” ne talia e Iehova. (Mataio 24:45-47) Kua fakatulou ha a tautolu oti ke he iloilo ne kua moua!

15. Ko e heigoa taha he tau mena fakaalofa ne mua he Atua, mo e fefe e onoonoaga hau ki ai?

¹⁵ Ko e taha he tau mena fakaalofa ne mua atu he Atua ko e foakiaga fakahele he poa lukutoto ha Iesu, ne kua aoga ki a tautolu pete he moua e tautolu e amaamanakiaga ke he lagi po ke ke he lalolagi. Nukua lahi e fakaalofa he Atua ke he lalolagi he tau tagata ti “ta mai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Mo e fakalagalaga he fakaalofa ha Iesu a ia ke “foaki atu foki hana moui mo lukutoto ke hukui aki e tau tagata tokologa.” (Mataio 20:28) Tuga ne fakamaama he aposetolo ko Ioane, ko Iesu Keriso “ko e lukutoto foki a ia mo e tau hala ha tautolu [ko lautolu ne fakauku]; ka e nakai kuenaia e tau hala ha tautolu, ka e katoa mo e lalolagi oti kana.” (1 Ioane 2:1, 2) Ko e mena ia, kia hokulo ai e fakatulou ha tautolu oti ke he foakiaga fakahele nei ma e fakamouiaga ke he moui tukulagi.b

To Ha I Ai Nakai a Koe?

16. Ko e heigoa e magaaho ka fakamanatu he mole e mogo to la ia Aperila 11, 1998, mo e ko hai kia ha ha i ai?

¹⁶ Ko e fakatulou ke he lukutoto ne foaki mai he Atua he kakano he hana Tama ka omoomoi aki a tautolu ke ha ha he tau Fale he Kautu po ke he falu fale foki ka tolo e Tau Fakamoli a Iehova ki ai ka mole e mogo to la ia Aperila 11, 1998, ke fakamanatu e matulei he Keriso. He magaaho ne fakatu e ia e fakamanatuaga nei mo e hana tau aposetolo tua fakamoli he po fakahiku he hana moui he lalolagi, ne pehe a Iesu: “Kia eke e mutolu e mena nai mo fakamanatuaga kia au.” (Luka 22:19, 20; Mataio 26:26-30) Ko e tau tagata fakauku gahoa ne toe agaia to kai mo e inu e falaoa nakai fakaea, ne fakatai aki e tino nakai hala ha Iesu, mo e uaina kula nakaila ea, ne fakatai aki e hana toto ne liligi he poa. Ko e tau Kerisiano fanau he agaga ni hokoia ka kai mo e inu kakano ko lautolu hokoia ia ni he maveheaga fou mo e kua moua e fakamoliaga maaliali he agaga tapu he Atua ko e ha lautolu e amaamanakiaga ke he lagi. Ko e tau miliona foki ka ha ha ai ka eke mo tau tagata kitekite lilifu, ne kua fakatulou ke he fakaalofa ne fakakite he Atua mo e Keriso ne fakalata atu ke he poa ha Iesu ati maeke ai e moui tukulagi.​—Roma 6:23.

17. Ko e heigoa ka manatu e tautolu hagaao ke he fakaukuaga he agaga?

¹⁷ Ko e tau onoonoaga fakamua, tau manatu mai he mate e fakahele, tau mena uka he mogonei ne vihi ki ai e moui he lalolagi, po ke logona kua moua e monuina uho mai ia Iehova ka liga fakataki atu e falu ke hehe e tau manamanatuaga ko e ha lautolu e moui ke he lagi. Ka kia manatu e tautolu oti kua nakai poaki mai he tau kupu Tohi Tapu ki a tautolu ke fakalataha ke he falaoa mo e uaina he Fakamanatuaga ke fakakite ha tautolu a fakatulou ke he poa lukutoto he Keriso. Ka e, ke fakauku he agaga kua “nakai mai ia ia kua manako, ti nakai mai ia ia kua poi, ka e mai he Atua,” ko Ia ne fanau a Iesu ke eke mo Tama fakaagaga mo e kua ta mai ke he lilifu e toko 144,000 ni he falu tama.​—Roma 9:16; Isaia 64:8.

18. Ma e laulahi ha lautolu ne fekafekau ki a Iehova he vaha nei, ko e heigoa e tau monuinaaga ne ha ha i mua?

¹⁸ Ko e moui tukulagi he lalolagi parataiso ko e amaamanakiaga mai he Atua ke he tokologa he tau tagata ne fekafekau ki a Iehova he tau aho fakamui nei. (2 Timoteo 3:1-5) Nakai leva, to olioli a lautolu ke he parataiso homo nei. To taute he tau iki e tau matagahua he lalolagi i lalo he pule mai he lagi. (Salamo 45:16) To mailoga ai e tau tutuaga mafola ka fakatatai atu e tau tagata he lalolagi ke he tau matafakatufono he Atua mo e mua atu e fakaako hagaao ke he tau puhala ha Iehova. (Isaia 9:6, 7; Fakakiteaga 20:12) To loga lahi e tau gahua ke taute, ko e ta e tau kaina mo e kautu ke he lalolagi. (Isaia 65:17-25) Mo e manamanatu la ke he fakalatahaaga fiafia he magafaoa he liliu moui mai e tau tagata ne mamate! (Ioane 5:28, 29) He mole e kamatamata fakahiku, to uta kehe e tau mahani kelea oti. (Fakakiteaga 20:7-10) He nonofo tukulagi ai he mogo fakamui, to puke e lalolagi he tau tagata mitaki katoatoa ne kua ‘toka noa ai e tau mena ne eke mai he tupaaga ke he mena popo vave mo e ka hoko atu ke he tokanoaaga ha ha he monuina he fanau he Atua.’

[Tau Matahui Tala]

To Tali Fefe e Koe?

◻ Ko e heigoa e kakano ke ‘uta noa e vai he moui’?

◻ Pete ni ko e amaamanakiaga ha tautolu ke he lagi po ke he lalolagi, ko e heigoa e tau kakano ne fakatulou a tautolu ke he Atua?

◻ Ko e heigoa e fakamanatuaga lagataha he tau kia o atu oti a tautolu ki ai?

◻ Ma e tokologa he tau tagata ha Iehova, ko e heigoa ka ha i ai anoiha?

[Fakatino he lau 14]

Hane kamata e totou miliona ke ‘uta noa e vai he moui.’ Ko koe nakai taha ia lautolu ia?