Kua Takitaki e Iehova e Tau Tama Tokologa ke he Monuina
“Kua lata kia ia [Atua] he takitaki e tau tama tokologa ke he monuina, ke fakakatoatoa ai e Iki he fakamouiaga ha lautolu ha ko e tau matematekelea.”—HEPERU 2:10.
1. Ko e ha kua iloa moli e tautolu to fakamoli e finagalo a Iehova ma e tau tagata?
KUA taute e Iehova e lalolagi mo kaina mau tukulagi ma e magafaoa he tagata ne mitaki katoatoa, ke olioli tukulagi e moui. (Fakamatalaaga 1:4; Isaia 45:12, 18) Moli, kua agahala e matua tupuna ha tautolu ko Atamu mo e fakaholo age ke he fanau hana e hala mo e mate. Ka to fakamoli e finagalo he Atua ma e tau tagata he puhala he hana Tega he Maveheaga, ko Iesu Keriso. (Kenese 3:15; 22:18; Roma 5:12-21; Kalatia 3:16) Kua omoi he fakaalofa ke he lalolagi he tau tagata a Iehova ke foaki “hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Mo e ko e fakaalofa ne fakaohooho a Iesu ke “foaki atu foki hana moui mo lukutoto ke hukui aki e tau tagata tokologa.” (Mataio 20:28) Kua liu fakatau he “lukutoto” nei e tonu mo e amaamanakiaga ne galo ia Atamu ati maeke ai ke moua e moui tukulagi.—1 Timoteo 2:5, 6; Ioane 17:3.
2. Kua fakatai fefe e fakagahuaaga he poa lukutoto ha Iesu he Aho he Fakafeiloaga ha Isaraela ne fakalagataha he tau?
2 Ko e fakagahuahuaaga he poa lukutoto a Iesu kua fakatai ai ke he Aho he Fakafeiloaga ne lagataha he tau. He aho ia, ne poa fakamua he ekepoa ne mua e povi ma e tau hala mo e foaki ai e toto he Vaka tapu i loto he Tapu Mua Ue Atu he faituga utafano, mo e he faituga he mogo fakahiku. Kua taute e mena nei ma hana ni, hana magafaoa, mo e magafaoa he tau Levi. Ne foaki fakamua pihia e Iesu Keriso ke he Atua e uho he hana toto ke ufitia aki e tau hala he “tau matakainaga” fakaagaga hana. (Heperu 2:12; 10:19-22; Levitika 16:6, 11-14) He Aho he Fakafeiloaga, ne poa foki he ekepoa ne mua e koti ma e tau hala mo e foaki ai e toto i loto he Tapu Mua Ue Atu, ke taute aki e laveakiaga ma e tau agahala he tau magafaoa 12 nakai ekepoa ha Isaraela. To fakagahua pihia he Ekepoa Ne Mua ko Iesu Keriso hana toto he moui ma lautolu he tau tagata ne fakagahuahua e tua, ti fakamagalo ha lautolu a tau agahala.—Levitika 16:15.
Tataki Atu ke he Monuina
3. Hagaao atu ke he Heperu 2:9, 10, ko e heigoa ne fa e taute he Atua ke he 1,900 e tau tau?
3 Kua 1,900 he tau tau ne fa e taute he Atua taha mena aoga lahi hagaao ke he “tau matakainaga” ha Iesu. Hagaao ke he mena nei, ne tohia he aposetolo ko Paulo: “Kua iloa e tautolu a ia ne eke ke toe tote ti lata mo e agelu, ko Iesu ia, kua fakafoufou a ia ke he fakahekeaga mo e lilifu, ha ko e mamahi he mate, kia hoko kia ia e mate ha ko e tau tagata oti kana ke he fakaalofa noa he Atua. Ha ko ia kua eke e tau mena oti māna, kua eke foki e tau mena oti e ia, kua lata kia ia [Iehova ko e Atua] he takitaki e tau tama tokologa ke he monuina, ke fakakatoatoa ai e Iki he fakamouiaga ha lautolu ha ko e tau matematekelea.” (Heperu 2:9, 10) Ko e Iki Hukui he fakamouiaga ko Iesu Keriso, ne mitaki katoatoa e omaoma ha ko e tau mena ne matematekelea a ia ki ai, he nofo agaia a ia mo tagata he lalolagi. (Heperu 5:7-10) Kua fanau fakamua a Iesu mo tama fakaagaga he Atua.
4. He magaaho mo e puhala fe ne fanau ai a Iesu mo Tama fakaagaga he Atua?
4 Ne fakaaoga e Iehova hana agaga tapu, po ke malolo gahuahua, ke fanau a Iesu mo hana Tama fakaagaga, ke takitaki atu a ia ke he monuina ha ha he lagi. He mogo ne nofo tokotaha mo Ioane Papatiso, ne fakauku a Iesu ke he vai ke fakamailoga e foakiaga hana ke he Atua. Ne talahau he fakamauaga he Evagelia ha Luka: “Kua papatiso foki e motu oti, ti papatiso mo Iesu, kua liogi a ia, ati maihiua ai e lagi. Kua haele hifo e Agaga Tapu ki luga hana, kua tino mai, tuga ne lupe; kua hoko mai foki e leo mai he lagi, kua pehe mai, Ko e haku a Tama fakahele a koe, kua fiafia ni au kia koe.” (Luka 3:21, 22) Ne kitia e Ioane e agaga tapu ne hifo mai ki luga a Iesu mo e logona a Iehova ne vagahau he talia a ia ko e Hana Tama fakahele. He magaaho ia mo e he agaga tapu, ne fanau e Iehova a Iesu ko e uluaki he ‘tau tama tokologa ne takitaki ke he monuina.’
5. Ko hai ne moua fakamua e aoga he poa ha Iesu, mo e ko e heigoa e numera ha lautolu?
5 Kua fakamua e “tau matakainaga” ha Iesu ke moua e aoga he hana lukutoto. (Heperu 2:12-18) He fakakiteaga, ne kitia he aposetolo ko Ioane a lautolu kua fita he monuina he Mouga ko Siona he lagi fakalataha mo e Punua Mamoe, ko e Iki ne liu fakatu mai ko Iesu Keriso. Ne kitia foki e Ioane e numera ha lautolu, he talahau: “Ne kitia atu au, kitiala foki, kua tu mai e Punua mamoe ke he mouga ko Siona, kua fakalataha foki mo ia e tau tagata ne teau e afe ti fagofulu ma fa e afe, kua tohi e higoa he hana Matua ke he tau matale ha lautolu. . . . Ko lautolu ia ne fakafua mai he tau tagata, ko e tau fua uluaki ma e Atua mo e Punua mamoe. Kua nakai moua foki ha pikopiko ke he tau gutu ha lautolu; ha kua nakai fai tepu a lautolu ki mua he nofoaiki he Atua.” (Fakakiteaga 14:1-5) Ti ko e ‘tau tama tokologa ne takitaki ke he monuina’ he lagi kua 144,001 ni he katoatoa—ko Iesu mo e hana tau matakainaga fakaagaga.
“Fanau Mai he Atua”
6, 7. Ko hai ne “fanau mai he Atua,” mo e ko e heigoa e kakano he mena nei ma lautolu?
6 Ko lautolu ne fanau e Iehova kua “fanau mai he Atua.” He hagaao atu ke he tau tagata pihia, ne tohia he aposetolo ko Ioane: “Ko lautolu auloa kua fanau mai he Atua, nakai hala a lautolu, nukua toka mau hana [ha Iehova] tau fua ki loto ia lautolu; nakai maeke foki ke hala a lautolu, ha kua fanau mai a lautolu he Atua.” (1 Ioane 3:9) Ko e “tau fua” nei ko e agaga tapu he Atua. He gahua fakalataha mo e hana kupu, kua tuku age takitaha ke he 144,000 e “fanau fakafou” ke he amaamanakiaga he lagi.—1 Peteru 1:3-5, 23.
7 Ko Iesu ko e Tama he Atua tali mai he hana fanau fakatagata, tuga ni a Atamu ko e tagata mitaki katoatoa ko e “tama he Atua.” (Luka 1:35; 3:38) Pete ia, he mole e papatiso a Iesu, kua mailoga lahi ai ati fakailoa e Iehova: “Ko e haku a Tama fakahele a koe, kua fiafia au kia koe.” (Mareko 1:11) Ha ko e fakailoaaga nei ne fakahoa e holoaga he agaga tapu, kua kitia maaliali ai kua takitaki mai he Atua a Iesu mo Tama fakaagaga Hana he magaaho ia. Ke tuga ia, kua tuku age ki a Iesu he magaaho ia e “fanau fakafou” katoa mo e tonuhia ke liu moua e moui ko e Tama fakaagaga he Atua i luga he lagi. Ke tuga a ia, ko e tau matakainaga fakaagaga hana kua “liu foki fanau.” (Ioane 3:1-8; kikite The Watchtower, Novema 15, 1992, lau 3-6.) Ke tuga foki a Iesu, nukua fakauku he Atua a lautolu mo e poaki age ke fakapuloa e tala mitaki.—Isaia 61:1, 2; Luka 4:16-21; 1 Ioane 2:20.
Fakamoliaga he Fanauaga
8. Ko e heigoa e fakamoliaga kua fanau he agaga a (a) Iesu (e) hana tau tutaki fakamua atu?
8 Na fai fakamoliaga kua fanau he agaga a Iesu. Ne kitia e Ioane Papatiso e agaga ne ha i luga a Iesu mo e logona e fakailoaaga he Atua ne eke e Mesia fakauku fou mo tama fakaagaga. Ka e to iloa fefe he tau tutaki ha Iesu kua fanau he agaga a lautolu? He aho ne haele hake a ia ke he lagi, ne pehe a Iesu: “Ko e mena papatiso ni a Ioane ke he vai; ka ko mutolu, to papatiso a mutolu ke he Agaga Tapu, ka e nakai la mole e tau aho loga.” (Gahua 1:5) Koe tau tutaki ha Iesu kua “papatiso ke he Agaga Tapu” he aho he Penetekoso 33 V.N. Ko e liligi ia he agaga kua fakalataha ai mo e “tomumu mai he lagi tuga ne matagi kua havili lahi mai” mo e “tau alelo tuga ne afi” ki luga takitokotaha he tau tutaki. Ko e mena ne mua atu kua maeke e tau tutaki ke “vagahau ke he tau vagahau kehekehe tuga he foaki mai he Agaga e vagahau kia lautolu.” Ti haia e fakamoliaga ne kitia maali mo e logona mitaki, ko e puhala ke he monuina ha ha he lagi ke eke mo tau tama he Atua kua fita e hafagi ma e tau tutaki he Keriso.—Gahua 2:1-4, 14-21; Ioelu 2:28, 29.
9. Ko e heigoa e fakamoliaga kua fanau he agaga e tau Samaria, Konelio, mo e falu he senetenari fakamua?
9 Kua fai magaaho ne mole, ne fakamatala a Filipo ko e tagata fakamatala i Samaria. Pete kua talia he tau Samaria hana fekau mo e papatiso ai, kua mahala a lautolu ke fakamoli kua fanau he Atua a lautolu mo tau tama hana. He magaaho ne liogi e tau aposetolo ko Peteru mo Ioane mo e fakalago ha laua tau lima ki luga ha lautolu ne talitonu, “ti moua ai e lautolu e Agaga Tapu” ke he taha puhala ne kua kitia moli he tau tagata kitekite. (Gahua 8:4-25) Ko e fakamoliaga anei, kua fanau tuai he agaga e tau Samaria talitonu mo tau tama he Atua. Pihia foki he 36 V.N., ne talia e Konelio mo e falu he tau Tagata Motu Kehe e kupu moli he Atua. Ko Peteru mo e tau Iutaia talitonu ne fakatauo mo ia kua “ofo lahi . . . he liligi hifo ke he tau tagata kehe e fakaalofa he Agaga Tapu. Ha ko e mena kua fanogonogo atu a lautolu kia lautolu kua vagahau mai ke he tau vagahau kehekehe, mo e fakaheke atu ke he Atua.” (Gahua 10:44-48) Tokologa e tau Kerisiano he senetenari fakamua ne moua e “tau mena fakaalofa he agaga,” tuga e vagahau kehekehe. (1 Korinito 14:12, 32) Ti kua kitia maaliali ai he tau tagata nei kua fanau he agaga a lautolu. Ka e to iloa fefe he tau Kerisiano he mogo fakamui kua fanau he agaga a lautolu po ke nakai?
Ko e Fakamoli he Agaga
10, 11. He fakave ke he Roma 8:15-17, to fakamaama fefe e koe, nukua fakamoli mai e agaga mo lautolu ko e tau hakeaga fakalataha mo Keriso?
10 Kua mauokafua e fakamoliaga he tau Kerisiano fakauku oti ne 144,000 kua moua e lautolu e agaga he Atua. Hagaao ke he mena nei, ne tohia e Paulo: “Kua moua e mutolu e Agaga ke hiki tama, ko ia kua tauui atu ai a tautolu, Ava, ko e Matua na e. Kua fakamoli mai e Agaga ia ni ke he tau agaga ha tautolu, ko e fanau he Atua a tautolu. Kaeke ko e fanau a tautolu, ti ko e tau hakeaga foki, ko e tau hakeaga ni he Atua, ko e tau hakeaga fakalataha mo Keriso; kaeke kua mamahi a tautolu fakalataha mo ia kia fakamonuina foki a tautolu fakalataha mo ia.” (Roma 8:15-17) Kua ha ha he tau Kerisiano fakauku e aga tama ke he ha lautolu a Matua he lagi, ko e logonaaga mua ue atu he tama. (Kalatia 4:6, 7) Kua mauokafua lahi a lautolu ke he fanauaga mai he Atua mo tau tama fakaagaga ko e tau hakeaga fakalataha mo Keriso i luga he Kautu he lagi. Kua lahi ai e matagahua he agaga tapu a Iehova ke he mena nei.
11 I lalo he fakaohoohoaga he agaga tapu he Atua, ko e agaga, po ke mahani ne mua, ha lautolu ne fakauku kua omoomoi ai a lautolu ke tali ke he puhala mitaki ke he mena ne talahau he Kupu he Atua hagaao ke he amaamanakiaga he lagi. Tuga anei, he magaaho ne totou e lautolu e mena ne talahau he Tohi Tapu hagaao ke he tau fanau fakaagaga ha Iehova, ne fakailoa agataha e lautolu kua hagaao e tau kupu ia ki a lautolu. (1 Ioane 3:2) Iloa e lautolu kua “papatiso ai [a lautolu] kia Keriso Iesu” mo e ke he hana matulei. (Roma 6:3) Ko e taliaaga mauokafua ha lautolu ko lautolu e tau tama fakaagaga he Atua, ka mamate mo e liu fakatu mai ke he monuina ha ha he lagi, ke tuga a Iesu.
12. Ko e heigoa ne fakahu he agaga he Atua i loto he tau Kerisiano fakauku?
12 Ke fanau mo tama fakaagaga, nakai ko e mena ke kumikumi ki ai a ia. Ko lautolu ne fanau he agaga kua nakai manako ke o hake ke he lagi kakano kua fakatupetupe ke he tau mena uka he lalolagi ne mogonei. (Iopu 14:1) Ka e, kua fakahu ni he agaga a Iehova i loto ha lautolu ne fakauku e amaamanakiaga mo e manako ne kehe lahi ke he tau tagata tokologa. Kua iloa e lautolu ia ne fanau, ko e moui tukulagi he mitaki katoatoa e tau tagata i luga he lalolagi parataiso ne viko takai he tau magafaoa fiafia mo e tau kapitiga to homo ue atu. Pete ni ia, nakai ko e manako ne mua e moui pihia he tau loto ha lautolu. Kua ha ha ia lautolu ne fakauku e manako mo e amaamanakiaga malolo ati fakamakai ai a lautolu ke poa oti e tau koloa mo e tau pipiaga he lalolagi.—2 Peteru 1:13, 14.
13. Hagaao atu ke he 2 Korinito 5:1-5, ko e heigoa e “manako lahi” ha Paulo, mo e ko e heigoa ne fakakite mai he mena nei hagaao ki a lautolu ne fanau he agaga?
13 Kua malolo lahi e amaamanakiaga he moui he lagi ne age he Atua ki a lautolu ia, ati tatai ai e tau manatu ha lautolu mo Paulo, ne tohia mai: “Kua iloa e mautolu kaeke ke vete e fale api ha mautolu ha ha he lalolagi, ha ha ia mautolu e fale mai he Atua, ko e fale nakai eke he tau lima, ke tumau tukulagi ke he lagi. Ha kua oi a mautolu ke he fale nai; kua manako lahi he fia fakatapulu mai a mautolu ke he fale ha mautolu mai he lagi. Kaeke foki ke fakatapulu mai a mautolu, ti nakai moua a mautolu kua noa mo e felevehi. Ha ko mautolu ni ha ha he fale api nai, kua oi a mautolu he pehia; ha kua nakai loto a mautolu ke vevete kehe e tapulu ka kia fakatapulu ai, kia mahala e mena mole vave ke he moui. Ka ko ia kua taute a mautolu mo e mena ia ni, ko e Atua haia; ko ia foki kua foaki mai e fakamoli he Agaga kia mautolu.” (2 Korinito 5:1-5) Kua “manako lahi” a Paulo ke liu fakatu mai ke he lagi ke eke mo e agaga moui ne nakai maeke ke mate. Hagaao atu ke he tino tagata, ne fakaaoga e ia e metafoa he fale api malolo vave, ko e nofoaga nakai mao mo e nakai tukulagi ka fakatai ke he fale. Pete kua nonofo he lalolagi ke he tino maeke ke mate, ko e tau Kerisiano ne moua e agaga ne eke mo fakamailoga he moui he lagi ne tatali, kua amanaki tuai ke he “fale mai he Atua,” ko e tino fakaagaga nakai maeke ke mate mo e nakai to popo. (1 Korinito 15:50-53) Ke tuga a Paulo, kua maeke ia lautolu ke talahau fakamoli: “Kua fakamalolo a mautolu, kua mua foki ha mautolu a manako ke o kehe mo e tino [tagata], kia nonofo [he lagi] a mautolu mo e Iki.”—2 Korinito 5:8.
Uta ke he Tau Maveheaga Uho
14. He magaaho ne fakatu ai e fakahokoaga he Fakamanatuaga, ko e heigoa e maveheaga ne totoku fakamua e Iesu, mo e ko e heigoa e matagahua he hagaao atu ke he tau Isaraela fakaagaga?
14 Kua mauokafua e tau Kerisiano fanau he agaga kua uta tuai a lautolu ke he tau maveheaga uho ne ua. Ne totoku e Iesu taha he tau mena nei he magaaho ne fakaaoga e ia e falaoa nakai fakaea mo e uaina ke fakatu aki e Fakamanatuaga he hana matulei ka hoko mai, mo e talahau hagaao ke he kapiniu uaina: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.” (Luka 22:20; 1 Korinito 11:25) Ko hai ka fakalataha ke he maveheaga fou? Ko Iehova ko e Atua mo lautolu he Isaraela fakaagaga—ko lautolu ne fioia e Iehova ke ta mai ke he lilifu ha ha he lagi. (Ieremia 31:31-34; Kalatia 6:15, 16; Heperu 12:22-24) Ha kua fakagahuahua ai he toto ha Iesu, ne ta mai he maveheaga fou e tau motu kehe ke moua ai e tau tagata ma Iehova mo e taute e tau Kerisiano fanau he agaga nei mo vala he “fanau” a Aperahamo. (Kalatia 3:26-29; Gahua 15:14) Kua taute he maveheaga fou ma e tau Isaraela fakaagaga oti ke takitaki atu ke he monuina he liu fakatu mai ke he moui nakai maeke ke mate i luga he lagi. Ha ko e “maveheaga tukulagi,” to tukulagi hana tau aoga. To kitia ni, ko e fai matagahua foki nakai e maveheaga nei ke he falu puhala he magahala he Afetau mo e ka mole atu.—Heperu 13:20.
15. Ke felautatai mo e Luka 22:28-30, kua kamata uta ke he maveheaga fe e tau tutaki fakauku ha Iesu, mo e he mogo fe?
15 Ko e “tau tama tokologa” ha Iehova ne fioia ke ‘takitaki ke he monuina,’ kua uta takitaha ai ke he maveheaga ma e Kautu he lagi. Hagaao ke he maveheaga nei he vahaloto hana mo e tau tutaki ne muitua ke he tau tuagahui hana, ne pehe a Iesu: “Ko mutolu nā, ne tumau a mutolu kia au ke he tau mena ne kamatamata ai au. Tuga ne kotofa mai he haku a Matua e kautu kia au, ke pihia foki he kotofa e au kia mutolu. Kia kai a mutolu mo e inu ke he haku a kaiaga mena ke he kautu haku, kia nonofo foki ke he tau nofoaiki, mo e fakafili e tau faoa a Isaraela ne hogofulu ma ua.” (Luka 22:28-30) Kua fakamau e maveheaga he Kautu he magaaho ne fakauku e tau tutaki ha Iesu aki e agaga tapu he Penetekoso 33 V.N. Kua tumau e maveheaga ke gahuahua tukulagi he vahaloto he Keriso mo e hana tau hoa patuiki. (Fakakiteaga 22:5) Ti, kua mauokafua tuai e tau Kerisiano fanau he agaga kua ha ha a lautolu he maveheaga fou mo e he maveheaga ma e Kautu. Ti, he fakahokoaga he Kaiaga Afiafi he Iki, ko e gahoa ni hokoia ia lautolu kua fakauku ne toe agaia he lalolagi kua fakalataha ke he falaoa, ne fakamailoga e tino tagata nakai hala ha Iesu, mo e uaina, ne fakamailoga hana toto mitaki katoatoa ne liligi kehe he mate mo e fakamoli aki e maveheaga fou.—1 Korinito 11:23-26; kikite The Watchtower, Fepuari 1, 1989, lau 17-20.
Kua Uiina, Fifili, mo e Fakamoli
16, 17. (a) Ke takitaki ke he monuina, ko e heigoa kua lata ke moli he tau 144,00 oti? (e) Ko hai e “tau patuiki ne tokohogofulu,” mo e taute fefe atu a lautolu ke he “tau matakainaga” ha Iesu ne toe he lalolagi?
16 Ko e fakagahuaaga fakamua he poa lukutoto ha Iesu ne maeke ai e 144,000 ke fai uiina ke he moui he lagi mo e fifili he kua fanau he agaga he Atua. Moli, ke ‘takitaki ke he monuina,’ kua lata ia lautolu ke ‘au atu e lalilali ha lautolu ke fakamau ha lautolu a uiaga mo e fifiliaga,’ mo e lata ia lautolu ke fakamoli ke he mate. (2 Peteru 1:10; Efeso 1:3-7; Fakakiteaga 2:10) Ko lautolu kua fakauku ne toe agaia he lalolagi hane tumau ha lautolu a fakamoli pete ko e totoko mai he “tau patuiki ne tokohogofulu” ne fakatino e tau pule fakapolitika oti. “To tau a lautolu nai ke he Punua mamoe,” he talahau he agelu, “ka e kautu e Punua mamoe kia lautolu; ha ko ia ko e Iki he tau iki mo e Patuiki he tau patuiki, ko lautolu foki kua fakalataha mo ia kua uiina, mo e fifili, mo e fakamoli.”—Fakakiteaga 17:12-14.
17 Nakai fakaai ha pule he tagata ke totoko ki a Iesu, ko e “Patuiki he tau patuiki,” ha ko ia i luga he lagi. Ka kua fakakite e lautolu e faitaua ke he “tau matakainaga” hana ne ha ha agaia he lalolagi. (Fakakiteaga 12:17) Ka e to fakaoti e naia he tau he Atua i Amaketo, magaaho ka fakamoli e kautuaga ma e “Patuiki he tau patuiki” mo e hana “tau matakainaga”—‘ko lautolu kua uiina, mo e fifili, mo e fakamoli.’ (Fakakiteaga 16:14, 16) Ka e he magaaho nei, kua lavelave lahi e tau Kerisiano fanau he agaga. Ko e heigoa ha lautolu ne fa e taute he mogonei, ato takitaki atu e Iehova a lautolu ke he monuina?
Ko e Heigoa e Tali Hau?
◻ Ko hai kua ‘takitaki he Atua ke he monuina ha ha he lagi’?
◻ Ko e heigoa e kakano ke “fanau mai he Atua”?
◻ Ko e puhala fe ne “fakamoli mai e agaga” mo e falu he tau Kerisiano?
◻ Ko e heigoa e tau maveheaga ne uta ki ai a lautolu ne fanau he agaga?
[Fakatino he lau 11]
He Penetekoso 33 V.N., kua kitia ai e fakamoliaga kua mahafagi e puhala ke he monuina ne ha ha he lagi