Tau Fakamoli Kerisiano ne Moua e Maaga Moli he Lagi
“Ha ko e māga moli ha tautolu ha ha he lagi ia.”—FILIPI 3:20.
1. Ko e heigoa e finagalo homo lahi a Iehova ne hagaao ke he tau tagata?
TO EKE a lautolu ne fanau mai mo tau tagata ke pule ko e tau patuiki mo e tau ekepoa he lagi, mo e pule foki ke he tau agelu. (1 Korinito 6:2, 3; Fakakiteaga 20:6) Ko e mena fakaofogia ha e kupu moli ia! Ka ko e finagalo a Iehova a ia, mo e to fakakatoatoa foki e ia he puhala mai he hana Tama fuataha, ko Iesu Keriso. Kua taute he ha he Tufuga ha tautolu e mena ia? Mo e kua lata he ha e iloilo ke he mena ia ke lauia e Kerisiano he vaha nei? Kia kikite la tautolu ko e tali fefe he Tohi Tapu e tau huhu nei.
2. Ko e heigoa e mena fou ne fakailoa e Ioane Papatiso ka taute e Iesu, mo e matutaki e mena fou nei ke he heigoa?
2 He magaaho ne tauteute tuai e Ioane Papatiso e puhala ma Iesu, ne fakailoa e ia to taute e Iesu e taha mena fou. Kua pehe e fakamauaga: “Kua fakamatala e [Ioane], kua pehe, Na mui mai taha ia au, kua homo atu a ia ia au, nakai aoga au ke tukutuku hifo mo e vetevete e pipiaga he hana tau afialoalohui. Ko au ni kua papatiso atu e au a mutolu ke he vai; ka ko ia to papatiso e ia a mutolu ke he Agaga Tapu.” (Mareko 1:7, 8) Fakamua to hoko e magaaho ia, nakaila papatiso a taha mo e agaga tapu. Ko e fakatokatokaaga fou a nei ne kua putoia ai e agaga tapu, mo e hagaao ke he finagalo a Iehova ne kua teitei ke fakakite mai ke tauteute ai e tau tagata ma e pule he lagi.
“Liu Foki Fanau”
3. Ko e heigoa e tau mena fou hagaao ke he Kautu he lagi ne fakamaama age e Iesu ki a Nikotemo?
3 He feleveia fufu mo e Farasaio tokoluga, ne fakakite lahi mai e Iesu e finagalo faka-Atua nei. Kua hau e Farasaio, ko Nikotemo, ki a Iesu he po, mo e pehe a Iesu ki a ia: “Ka nakai liu foki fanau e tagata, ti nakai maeke ke kitia e ia e kautu he Atua.” (Ioane 3:3) Ko Nikotemo, ko e Farasaio kua liga kumikumi ke he tau Tohiaga Tapu Heperu, mo e iloa ai e kupu moli homo ue atu he Kautu he Atua. Kua perofeta mai he tohi a Tanielu to foaki age e Kautu ke he “taha kua tuga e Tama he tagata” mo e “to tuku atu ia ke he motu he tau tagata tapu hana ne Mua ue atu.” (Tanielu 7:13, 14, 27) Ko e mena “to tuki malipilipi mo e fakaotioti” he Kautu e tau kautu oti kana mo e tu tukulagi ai. (Tanielu 2:44) Liga ne manamanatu a Nikotemo ko e to fakakatoatoa e tau perofetaaga nei ke he motu Iutaia; ka e pehe a Iesu ke maeke ai ke kitia e Kautu, kua lata e taha ke liu fanau mai foki. Kua nakai maama e Nikotemo, ti kua holo atu ai a Iesu ke pehe: “Kaeke kua nakai fanau e tagata ke he vai mo e Agaga, ti nakai maeke ke hao a ia ke he kautu he Atua.”—Ioane 3:5.
4. Ma lautolu ne fanau mai he agaga tapu, to hiki fefe ha lautolu a fakafetuiaga mo Iehova?
4 Na kua vagahau a Ioane Papatiso ke he papatiso mo e agaga tapu. He magaaho nei, kua pehe foki a Iesu kua lata e tagata ke fanau mai he agaga tapu kaeke ke hu a ia ke he Kautu he Atua. Mai he fanauaga kua mua atu e kehe nei, kua huhu ai e tau tagata tane mo e tau tagata fifine nakai mitaki katoatoa ke he fakafetuiaga pauaki mo e Atua ko Iehova. Kua eke tuai a lautolu mo fanau hiki hana. Kua totou e tautolu: “Ka ko lautolu oti ne talia a [Iesu], mo e tua ke he hana higoa, ne age e ia ki ai e pule kia eke a lautolu mo fanau he Atua. Ko lautolu, nakai ko e toto ne fanau ai, ti nakai ko e manako foki he tino, ti nakai ko e loto foki he tagata, ka ko e Atua ni.”—Ioane 1:12, 13; Roma 8:15.
Fanau he Atua
5. Ko e magaaho fe ne papatiso fakamua he agaga tapu e tau tutaki fakamoli, mo e ko e heigoa e tau gahuaaga he agaga tapu ne hoko he magaaho taha ia?
5 He magaaho ne vagahau a Iesu ki a Nikotemo, kua fita he haele hifo e agaga tapu ki a Iesu, fakauku ai a ia ma e hana pule fakapatuiki he Kautu he Atua he vaha i mua, mo e kua fakailoa he Atua ke he tau tagata ko e Tama Hana a Iesu. (Mataio 3:16, 17) Kua fai tama fakaagaga foki a Iehova ne moua ia Penetekoso he tau 33 V.N. Kua papatiso he agaga tapu e tau tutaki mahani fakamoli ne fakapotopoto he poko luga i Ierusalema. He magaaho ia, ne liu foki a lautolu ke fanau mai he agaga tapu ke eke mo tau fanau fakaagaga he Atua. (Gahua 2:2-4, 38; Roma 8:15) Ke lafi ki ai, kua fakauku he agaga tapu a lautolu mo e manatu ke moua e tufaaga he lagi ke he vaha i mua, ti fakamau moli ai a lautolu he agaga tapu ko e fakamoliaga he amaamanakiaga ke he lagi.—2 Korinito 1:21, 22.
6. Ko e heigoa e finagalo a Iehova hagaao ke he Kautu he lagi, mo e tonu he ha ke fai vala e tagata i ai?
6 Ko e tau tagata nakai mitaki katoatoa fakamua a nei ne fifili he Atua ke huhu atu ke he Kautu. Ko e mena ia, ka mole ha lautolu a mate mo e liu tu mai, kua eke ai a lautolu mo vala he fakatokatokaaga he Kautu he lagi ka pule ke he tau tagata mo e tau agelu. Kua finagalo a Iehova kakano ha ko e Kautu nei, to fakatapu ai hana higoa lahi mahaki mo e fakamatalahi ai hana pule katoatoa ki mua he tau tufugatia oti kana. (Mataio 6:9, 10; Ioane 12:28) Kua lata lahi ha ma e tau tagata ke fai vala he Kautu ia! Ne fakaaoga e Satani e tau tagata he magaaho ne lagaki hake e ia hana paleko fakamua ke he pule katoatoa a Iehova he katene i Etena, mo e he magaaho nei kua finagalo a Iehova ke putoia e tau tagata he tali ke he paleko ia. (Kenese 3:1-6; Ioane 8:44) Kua tohia he aposetolo ko Peteru ke he tau tagata takitaha ne fifili ke pule he Kautu ia: “Fakaaue ke he Atua ko e Matua he Iki ha tautolu ko Iesu Keriso, ko ia kua fanau fakafou ai a tautolu ha ko e hana fakaalofa lahi, kia moua e tautolu e amaamanaki kua moui, ha ko e liu tu mai a Iesu Keriso mai ia lautolu kua mamate. Kia moua e tufaaga nakai tuai popo, nakai fai kelea nakai tuai fifigo, kua toka ke he lagi ma tautolu.”—1 Peteru 1:3, 4.
7. Ko e heigoa e fakafetuiaga mo Iesu ne mua atu e kehe ne olioli ai a lautolu ne papatiso mo e agaga tapu?
7 Ha ko e tau tama tane hiki he Atua, kua eke e tau Kerisiano fifili nei mo tau matakainaga a Iesu Keriso. (Roma 8:16, 17; 9:4, 26; Heperu 2:11) Ha kua kitia moli ko Iesu e Tega he maveheaga ki a Aperahamo, ko e tau kapitiga po ke vala ke ua aki he Tega e tau Kerisiano nei ne fakauku he agaga, ko e mena ka tuku atu e fakamonuina ke he tau tagata tua. (Kenese 22:17, 18; Kalatia 3:16, 26, 29) Ko e heigoa e monuina? Ko e magaaho he laveaki mai he hala mo e fakafeilo ke he Atua mo e fekafekau ki a ia he magaaho nei mo e ke he tukumalagi. (Mataio 4:23; 20:28; Ioane 3:16, 36; 1 Ioane 2:1, 2) Kua takitaki he tau Kerisiano fakauku he lalolagi a lautolu ne loto hakohako ke he monuina nei he fakamatala hagaao ke he ha lautolu a matakainaga fakaagaga ko Iesu Keriso mo e ha lautolu a Matua hiki, ko e Atua ko Iehova.—Gahua 1:8; Heperu 13:15.
8. Ko e heigoa e “fakakiteaga” he tau tama tane he Atua ne fakauku he agaga?
8 Kua vagahau e Tohi Tapu ke he “fakakite” he tau tama tane nei he Atua ne fakauku he agaga. (Roma 8:19) Ke huhu ai ke he Kautu ha ko e tau patuiki fakalataha mo Iesu, mo e gahua auloa ai a lautolu ke fakaotioti e fakatokaaga nei he lalolagi a Satani. He mole mai, ke he afe tau, to lagomatai e lautolu ke tamai e tau aoga he poa lukutoto ke he tau tagata mo e omoi hake ai e tau tagata ke he mitaki katoatoa ne fakagalo e Atamu. (2 Tesalonia 1:8-10; Fakakiteaga 2:26, 27; 20:6; 22:1, 2) Kua fakalataha oti e tau mena nei he fakakiteaga ha lautolu. Ko e mena kua fakatalitali lahi e tau tagata tua ki ai.
9. Vagahau fefe e Tohi Tapu hagaao ke he kau he tau Kerisiano fakauku he lalolagi oti?
9 Ko e kau he tau Kerisiano fakauku he lalolagi oti ko e “fakapotopotoaga katoatoa . . . he tau uluaki, kua tohia ke he lagi.” (Heperu 12:23) Ko lautolu fakamua ne moua e aoga mai he poa lukutoto a Iesu. Ko e ‘tino foki a Keriso’ a lautolu, ne fakakite ha lautolu a fakafetuiaga mafanatia e taha ke he taha mo Iesu. (1 Korinito 12:27) Kua tohia e Paulo: “Ha kua tuga e tino, ne taha a ia, mo e loga hana tau fahi tino, ka e pete ni kua loga e tau fahi tino, ko e tino taha ia; kua pihia foki a Keriso. Ha ko e mena tokotaha foki e Agaga kua papatiso ai a tautolu oti ke he tino taha, po ke tau tagata Iutaia, po ke tau tagata Heleni, po ke tau tupa, po ke tau tagata toka noa; mo e fakainu foki a tautolu oti ke he Agaga tokotaha.”—1 Korinito 12:12, 13; Roma 12:5; Efeso 1:22, 23; 3:6.
Ko e “Isaraela he Atua”
10, 11. He senetenari fakamua, kua lata he ha ke fai Isaraela fou, mo e ko hai i loto he motu fou nei?
10 Kua molea e 1,500 tau ato hau a Iesu ko e Mesia he maveheaga, ko e motu Isaraela he tino ko e tau tagata pauaki a Iehova. Pete kua fakamanatu tumau ki ai, kua eke ne motu katoa ke nakai fakamoli. He magaaho ne hau a Iesu, ne fakatikai he motu a ia. (Ioane 1:11) Ti, kua tala age e Iesu ke he tau takitaki lotu Iutaia: “To uta kehe ia mutolu e kautu he Atua, ka e age ke he taha motu ke ta mai ai e tau fua hana.” (Mataio 21:43) Ke mailoga e “motu [ne] ta mai ai e tau fua [he Kautu]” kua aoga lahi ma e fakamouiaga.
11 Ko e motu fou ko e fakapotopotoaga he tau Kerisiano fakauku, ne fanau mai he Penetekoso he tau 33 V.N. Ko e faoa fakamua ko e tau tutaki Iutaia ha Iesu ne talia a ia ko e ha lautolu a Patuiki he lagi. (Gahua 2:5, 32-36) Ka ko e faoa he motu fou he Atua a lautolu, ko e mena nakai fakave ke he matohiaga Iutaia ha lautolu, ka e fakave ke he tua ki a Iesu. Ti ko e Isaraela fou nei he Atua ko e mena kua mua atu e kehe—ko e motu fakaagaga. He magaaho ne tokologa lahi e tau Iutaia ne nakai talitonu ke talia a Iesu, kua tuku atu ai e uiina ke he tau Samaria ke eke mo vala he motu fou, ti ke he tau Motu Kehe foki. Kua ui ai e motu fou ko e “Isaraela he Atua.”—Kalatia 6:16.
12, 13. Kua kitia maaliali fefe ko e nakai ko e taha vahega lotu tote faka-Iutaia ni hokoia e fakapotopotoaga Kerisiano?
12 I Isaraela tuai, he magaaho ne eke e tau tagata nakai ko e Iutaia mo tau tagata liliuina, kua lata na lautolu ke omaoma ke he Matafakatufono mai ia Mose, mo e lata e tau tagata tane ke taute e fakamailoga ke he mena nei he pilitome. (Esoto 12:48, 49) Kua logona hifo e falu Kerisiano Iutaia kua lata ke fakagahua foki he tau tagata ne nakai ko e Iutaia he Isaraela he Atua e mena ia. Ka e pete ni, kua fai mena kehe a Iehova he loto. Ne takitaki he agaga tapu e aposetolo ko Peteru ke he kaina he tagata Motu Kehe ko Konelio. He magaaho ne talia e Konelio mo e hana magafaoa e fakamatalaaga a Peteru, ne moua e lautolu e agaga tapu—kua pihia foki ka e nakai la papatiso a lautolu he vai. Kua fakakite maaliali ai he mena nei ko e talia e Iehova e tau Motu Kehe nei mo tau faoa a Isaraela he Atua mo e nakai talahau fakamao ke omaoma a lautolu ke he Matafakatufono mai ia Mose.—Gahua 10:21-48.
13 Kua uka e falu ne tali tonu ke talia e mena nei, mo e nakai leva kua lata e tau aposetolo mo e tau patu i Ierusalema ke tutala ki ai. Kua fanogonogo e kau takitaki ia ke he tala ne fakamaama ko e gahuahua fefe e agaga tapu ke he tau tagata tua, nakai ko e Iutaia. Kua fakakite mai he kumikumiaga ke he Tohi Tapu ko e fakakatoatoaaga a nei he perofetaaga ne moua mai he agaga. (Isaia 55:5; Amosa 9:11, 12) Kua hokotia ai ke he fifiliaga hako: Kua nakai lata e tau Kerisiano nakai ko e tau Iutaia ke omaoma ke he Matafakatufono mai ia Mose. (Gahua 15:1, 6-29) Ko e motu fou moli a Isaraela fakaagaga mo e nakai ko e vahega lotu faka-Iutaia tote.
14. Fakahaha ke he heigoa a Iakopo he ui e fakapotopotoaga Kerisiano ko e “tau faoa ne hogofulu ma ua kua paea fano”?
14 Ke felauaki mo e mena nei, he magaaho ne tohi ke he tau Kerisiano fakauku he senetenari fakamua, ne fakamataulu he tutaki ko Iakopo hana tohi “ke he tau faoa ne hogofulu ma ua kua paea fano.” (Iakopo 1:1; Fakakiteaga 7:3-8) Kua moli, nakai kotofa e tau faoa a Isaraela fou ke he tau magafaoa pauaki. Kua nakai vevehe ke he tau magafaoa 12 pauaki a Isaraela fakaagaga tuga ne taute ke he Isaraela he tino. Ka e pete ni, ne fakakite mai he fakailoaaga he agaga ke he kitiaaga a Iehova kua hukui katoatoa he Isaraela he Atua e tau magafaoa 12 a Isaraela tuai. Ka eke e tagata ne tupu mai ia Isaraela he tino mo vala he motu fou, ko e hana tupumaiaga he tino—pete ko e tupu mai he magafaoa a Iuta po ko Levi—kua nakai tuai fai kakano.—Kalatia 3:28; Filipi 3:5, 6.
Ko e Maveheaga Fou
15, 16. (a) Onoono fefe a Iehova ke he tau faoa nakai ko e Iutaia ne ha ha he Isaraela he Atua? (e) Ke he fakaveaga matafakatufono fe ne fakatu ai a Isaraela fou?
15 Ke he tau mata a Iehova, ko e tau Iutaia fakaagaga oti e faoa nakai ko e Isaraela he tino he motu fou nei! Ne fakamaama mai he aposetolo ko Paulo: “Ha ko e mena nakai ko e Iutaia a ia kua kitia, nakai ko e peritome foki a ia kua kitia ke he tino; Ka ko ia kua nakai kitia, ko e Iutaia ni a ia; ko e peritome foki, ko e mena he loto ia ha ha he agaga haia, nakai ha he tohi; ko e hana fakahekeaga nakai mai he tau tagata ia, ka e mai he Atua.” (Roma 2:28, 29) Kua tokologa e tau Motu Kehe ne talia e uiina ke eke mo vala he Isaraela he Atua, mo e fakakatoatoa ai he mena tupu nai e perofetaaga he Tohi Tapu. Ma e fakatai, kua tohi he perofeta ko Hosea: “To fakaalofa atu foki au kia ia kua nakai tuai ofania; to pehe atu foki au kia lautolu kua nakai eke mo motu haku; Ko e haku a motu a koe, ti pehe mai a lautolu, Ko e ha mautolu a Atua a koe.”—Hosea 2:23; Roma 11:25, 26.
16 Kaeke kua nakai ha ha e tau Isaraela fakaagaga i lalo he maveheaga he Matafakatufono mai ia Mose, ko e heigoa mogoia e fakaveaga ne kua eke a lautolu mo vala he motu fou? Ne taute e Iehova e maveheaga fou he puhala mai ia Iesu mo e motu fakaagaga nei. (Heperu 9:15) He magaaho ne kamata e Iesu e Fakamanatuaga ke he hana mate, he Nisana 14, 33 V.N., ne age e ia e falaoa mo e uaina ke he tau aposetolo 11 ne mahani fakamoli mo e pehe, ko e fakatai e uaina ke he “toto he maveheaga.” (Mataio 26:28; Ieremia 31:31-34) Tuga ne talahau mai he fakamauaga ia Luka, ne pehe a Iesu ko e kapiniu uaina ko e fakatai ke he “maveheaga fou.” (Luka 22:20) Kua fakakatoatoa ai e tau kupu a Iesu, he magaaho ne liligi hifo e agaga tapu he Penetekoso mo e kua fanau mai ai a Isaraela he Atua, kua uta kehe e Kautu ia Isaraela he tino mo e age ai ke he motu fou fakaagaga. Kua hukui ai a Isaraela he tino, kua eke tuai e motu fou nei mo fekafekau a Iehova, ne kua ha ha i ai hana tau fakamoli oti.—Isaia 43:10, 11.
“Ierusalema Fou”
17, 18. Ko e heigoa e tau fakamaamaaga ne foaki mai he tohi a Fakakiteaga ke he lilifu ue atu ne fakatalitali mai ke he tau Kerisiano fakauku?
17 Ko e lilifu ue atu ni ne fakatalitali mai ki a lautolu ne monuina ke fai vala he uiaga ke he lagi! Mo e fiafia lahi ha ke iloa e tau mena ofoofogia ne fakatalitali mai ki a lautolu! Kua fakamalika mai he tohi a Fakakiteaga e tau mena fulufuluola lahi he ha lautolu a tufaaga ke he lagi. Ma e fakatai, ia Fakakiteaga 4:4, kua totou e tautolu: “Kua agaagai foki e nofoaiki [ha Iehova] he tau nofoaiki ne uafulu ma fa; ne kitia foki e au e tau patu ne tokouafulu ma fa kua nonofo ke he tau nofoaiki, kua tapulu a lautolu ke he tau tapulu hina; ha i ai foki ke he tau ulu ha lautolu e tau foufou auro.” Ko e tau patu 24 nei ko e tau Kerisiano fakauku, kua liu tutu mai mo e he magaaho nei kua nonofo ai he tau tutuaga he lagi ne mavehe e Iehova ki a lautolu. Kua fakamanatu mai he ha lautolu a tau foufou mo e tau nofoaiki ki a tautolu e ha lautolu a tuaga fakapatuiki. Kia manamanatu foki, ke he ha lautolu a monuina ofoofogia lahi mahaki he fekafekau viko he nofoaiki a Iehova!
18 Ia Fakakiteaga 14:1, kua kitia tote ai e tautolu a lautolu: “Ne kitia atu au, kitiala foki, kua tu mai e Punua mamoe ke he mouga ko Siona, kua fakalataha foki mo ia e tau tagata ne teau e afe ti fagofulu ma fa e afe, kua tohi e higoa he hana Matua ke he tau matale ha lautolu.” Kua kitia e tautolu e numela gaogao ha lautolu nei ne fakauku—144,000. Ko e ha lautolu a tuaga fakapatuiki kua kitia ai ha kua tutu a lautolu mo e Patuiki ne fakanofo e Iehova he nofoaiki, “ko e Punua mamoe,” ko Iesu. Mo e kua ha ha a lautolu he Mouga ko Siona he lagi. Mena tu i Ierusalema e Mouga ko Siona he lalolagi, ko e taone he patuiki a Isaraela. Kua hukui ai he Mouga ko Siona he lagi e tuaga tokoluga lahi a Iesu mo e hana tau hakeaga ne fakalataha mo ia, ne fakakatoatoa ai a Ierusalema he lagi.—2 Nofoaga he Tau Patuiki 5:2; Salamo 2:6.
19, 20. (a) Ko e heigoa e fakatokatokaaga he lagi ka fai vala e tau Kerisiano fakauku i ai? (e) Mai he vaha fe ne kua fifili e Iehova a lautolu ka moua e maaga moli he lagi?
19 Ke felauaki mo e mena nei, kua vagahau foki hagaao ke he tau fakauku he ha lautolu a lilifu ue atu he lagi ko e “Ierusalema fou.” (Fakakiteaga 21:2) Ko Ierusalema he lalolagi nei “ko e māga haia he Patuiki to atu” mo e tuaga foki he faituga. (Mataio 5:35) Ko e Ierusalema Fou he lagi ko e fakatokatokaaga patuiki he Kautu ne puhala mai he Pule Katoatoa lahi mahaki, ko Iehova, mo e hana Patuiki ne kotofa, ko Iesu, ne kua pule he magaaho nei mo e kua taute e fekafekauaga ekepoa, he tafe mai e tau monuina uho lahi he nofoaiki a Iehova, ma e fakamauluaga he tau tagata. (Fakakiteaga 21:10, 11; 22:1-5) Ke he taha fakakiteaga foki ne logona ai e Ioane e talahauaga hagaao ke he tau Kerisiano fakauku ne mahani fakamoli, ne liu tutu mai, ko e ‘hoana he Punua mamoe.’ Ko e fakatino mafanatia ha a nei ne fakakite mai e fakafetuiaga mafanatia ka olioli ai a lautolu mo Iesu mo e ha lautolu a manako ke omaoma ki a ia! Kia manamanatu la ke he olioli i luga he lagi ka moua he tagata fakahiku aki hana palepale ke he lagi. Kua hoko tuai e magaaho he “taonaga he Punua mamoe”! Kua eke tuai e fakatokatokaaga he faoa patuiki i luga he lagi ke katoatoa.—Fakakiteaga 19:6-8.
20 E, kua fakatalitali mai e tau monuina ofoofogia lahi ki a lautolu ne kua pehe e aposetolo ko Paulo hagaao ki a lautolu: “Ha ko e māga moli ha tautolu ha ha he lagi ia.” (Filipi 3:20) Kua teitei ke ua e tau afe tau, he fifili ai e Iehova hana fanau fakaagaga mo e tauteute a lautolu ma e tufaaga ke he lagi. Hagaao ke he tau fakamoliaga oti kana, kua teitei tuai ke katoatoa e gahua fifili mo e tauteuteaga nei. Ka e kua lahi mai e tau mena ka mumui mai, tuga ne fakakite mai e Ioane he hana fakakiteaga ne fakamau ia Fakakiteaga veveheaga 7. Ti ko e magaaho nei, kua ha ha ai foki e taha matakau he tau Kerisiano kua lata ke onoono fakalahi a tautolu ki ai, mo e to tutala a tautolu ke he mena nei he tala ne mui mai.
Manatu Nakai e Koe?
◻ Ko e heigoa e tau gahuahuaaga kehekehe he agaga ki luga ia lautolu kua ha ha ai e tufaaga he lagi?
◻ Ko e heigoa e fakafetuiaga mafanatia lahi ne olioli ai a lautolu ne fakauku mo Iehova? mo Iesu?
◻ Ne fakamaama mai fefe he Tohi Tapu e fakapotopotoaga he tau Kerisiano fakauku?
◻ Ko e heigoa e fakaveaga matafakatufono ne fakatu ai e Isaraela he Atua?
◻ Ko e heigoa e tau monuina he lagi ne fakatalitali mai ke he tau Kerisiano fakauku?
[Tau Fakatino he lau 18]
Mai he vaha kua teitei ke ua e afe tau, kua fifili e Iehova a lautolu ka pule ke he Kautu he lagi