Patuiki Iloilo ko Solomona

KO E fuata mui a Solomona he magaaho ne patuiki a ia. Ne fakaalofa a ia ki a Iehova, mo e muitua a ia ke he fakatonuaga mitaki ne age he matua taane haana ko Tavita. Ne fiafia a Iehova ki a Solomona, ti taha pō ne pehē a Ia ki a ia he miti: ‘Solomona na e, ko e heigoa e mena ka ta atu e au ki a koe?’

Ti tali e Solomona: ‘Iehova na e haaku Atua, kua tote lahi au ti nakai iloa e au e puhala ke pule. Kia foaki mai ki a au e iloilo ke pule ke he tau tagata haau he puhala tonu.’

Ne fiafia a Iehova ke he ole ha Solomona. Ti pehē a Ia: ‘Ha kua ole mai a koe ke he iloilo ka e nakai ke moui loa po ke tau koloa, to foaki atu fakalahi e au ki a koe e iloilo ke nakai fai taha ke tatai mo koe. Ka e to foaki atu foki e au ki a koe e tau mena ne nakai ole mai e koe, ko e tau koloa mo e lilifu.’

Nakai leva ti tokoua e fifine ne o mai ki a Solomona mo e lekua vihi lahi. ‘Kua nonofo a maua mo e fifine nai ke he fale taha,’ he fakamaama he taha ia laua. ‘Ne fanau e au e tama taane, ti ua e aho he mole ne fanau foki he fifine nai e tama taane. Ti taha pō ne mate e tama haana. Ka e he mohe au, ne tuku e ia e tama haana kua mate he tapa haaku ti uta e tama haaku. He ala hake au mo e kitekite ke he tama kua mate, ne kitia e au kua nakai ko e tama haaku.’

Ke he mena nei, ne pehē e taha fifine: ‘Nakai! Ko e tama ne moui ko e haaku a ia, ko e tama ne mate ko e haana a ia!’ Ne tali e fifine fakamua: ‘Nakai! Ko e tama ne mate ko e haau a ia, ka ko e tama ne moui ko e haaku a ia!’ Ko e puhala anei ne taufetoko e tau fifine. Ko e heigoa ha Solomona ka taute?

Ne poaki a ia ke tamai e pelu, ti pehē a ia he magaaho ne moua ai: ‘Kia iihi ua e tama moui, ti age ke he tau fifine takitaha e hafa.’

‘Nakai!’ he ui he matua fifine mooli. ‘Fakamolemole ua tamate e tama. Age ai ki a ia!’ Ka e pehē e taha fifine: ‘Ua tamai a ia ke he taha ia maua; ka e iihi ua a ia.’

Fakahiku ai ne vagahau a Solomona: ‘Ua keli e tama! Age a ia ke he fifine fakamua. Ko e matua fifine mooli hanā.’ Ne iloa ai e Solomona ha kua lahi e fakaalofa hofihofi he matua fifine mooli ke he tama ti makai a ia ke age e tama ke he taha fifine ka e ua tamate a ia. Magaaho ne logona he tau tagata e puhala ne taute aki e Solomona e lekua, ne fiafia a lautolu ke moua e patuiki iloilo pihia.

He magahala ne pule a Solomona, ne fakamonuina he Atua e tau tagata he taute e kelekele ke tupu loga ai e tau saito mo e tau karite, tau fua vine mo e tau fua mati mo e falu mena kai. Ne tapulu e tau tagata ke he tau mena tui mitaki lahi mo e nonofo he tau fale mitaki. Ne loga lahi e tau mena mitaki ma e tau tagata oti.