He Puhalatū ki Tamaseko

ILOA nakai e koe ko hai kua takoto he kelekele? Ko Saulo a ia. Manatu, ko ia ne leveki e tau tapulu he tau tagata ne pinimaka a Setefano. Ono la ke he maama na kua kikila lahi! Ko e heigoa kua tupu?

He mole atu e tamate a Setefano, ne takitaki e Saulo e kumiaga ke he tau tutaki ha Iesu ke fakamamahi a lautolu. Ne fina atu a ia ke he taha fale mo e taha fale mo e toho mai a lautolu ki fafo ti tolo a lautolu ke he fale puipui. Tokologa e tau tutaki ne fehola ke he falu maaga ti kamata ke fakapuloa e “tala mitaki” i ai. Ka kua fano a Saulo ke he falu maaga ke kumi e tau tutaki ha Iesu. Kua fina atu a ia mogonei ki Tamaseko. Ka e he puhalatū, hanei e mena ofoofogia ne tupu:

Ne fakaofo ai he kikila viko takai ia Saulo e maama mai he pulagi. Ne veli a ia ke he kelekele, tuga ne kitia e tautolu he mena nei. Ti pehē e leo: ‘Saulo, Saulo na e! Ko e ha kua fakamamahi mai e koe au?’ Ko e tau tagata ne fakalataha mo Saulo ne kitia e maama mo e logona e leo, ka e nakai iloa e lautolu ko e heigoa kua talahau.

‘Ko hai a koe, ma Iki na e?’ he hūhū e Saulo.

‘Ko au ko Iesu, kua fakamamahi mai e koe,’ he talahau he leo. Ne talahau e Iesu e mena nei ha ko e mogo ka fakamamahi e Saulo e tau tutaki ha Iesu, ne logona e Iesu kua tuga ne fakamamahi ki a ia ni.

Kua hūhū a Saulo he mogonei: ‘Iki na e, ko e heigoa kua lata ia au ke taute?’

‘Matike a ti fano ki Tamaseko,’ he talahau e Iesu. ‘I ai to tala atu ki a koe e mena haau ke taute.’ Magaaho ne matike a Saulo mo e hafagi e tau mata haana, kua nakai kitia e ia ha mena. Kua matapouli a ia! Ti ko e tau tagata ne ha ha mo ia ne totō e lima haana mo e takitaki a ia ki Tamaseko.

Ne vagahau a Iesu mogonei ke he taha he tau tutaki haana i Tamaseko, he pehē: ‘Kia matike a ma Anania. Fano ke he puhalatū ne fakahigoa ko Hako. Ka hoko ke he fale ha Iuta hūhū ko fe e tagata ne higoa ko Saulo. Kua fifili e au a ia ke eke mo fekafekau pauaki haaku.’

Ne omaoma a Anania. Magaaho ne feleveia a ia mo Saulo, ne fakalago e ia e tau lima haana ki a ia mo e pehē: ‘Kua fakafano mai he Iki au ke maeke ia koe ke liu kitia mo e ke puke he agaaga tapu.’ He mogoia ni ne mokulu hifo e tau mena ne tuga e tau hinafi he tau mata ha Saulo, ti maeke a ia ke liu kitia.

Ne kua fakaaoga a Saulo ke he puhala aoga lahi ke fakamatala ke he tau tagata he tau motu loga. Ne iloa fakahaga a ia ko e aposetolo ko Paulo, to fakaako atu foki a tautolu hagaao ki a ia. Ka e fakamua, o mai la ke kitia ko e heigoa ne fakafano he Atua a Peteru ke taute.