Veveheaga 132

Ke he Fahi Matau he Atua

KO E agaga tapu ne liligi hifo he aho Penetekoso ko e fakamoliaga kua hoko a Iesu ke he lagi. Ko e fakakiteaga ne foaki he mole fakatote e mena ia ke he tutaki ko Setefano kua fakamoli foki kua hoko a Ia ki ai. Ko e magaaho fakamua ia to pini maka ha ko e hana fakamoli ke he feua fakamatala, ne hea a Setefano: “Kitiala, kua kitia e au e lagi kua maihi mai, mo e Tama he tagata ha ne tu ke he fahi matau he Atua.”

Ha he fahi matau he Atua, ne fakatali a Iesu ke he poaki mai he hana Matua: “Kia pule a koe ki mua ha lautolu kua fai fi kia koe.” Ka e he mogonei, ato totoko a ia ke he hana tau fi, ko e heigoa ha Iesu ka taute? Ko e pule a ia ke he hana tau tutaki fakauku, he takitaki a lautolu ke he ha lautolu e feua fakamatala mo e tauteute a lautolu ke eke mo tau patuiki fakalataha mo ia ke he hana a Kautu he Matua, puhala he liu tu mai.

Tuga a nei, ne fifili e Iesu a Saulo (iloa he magaaho fakamui ke he higoa Roma hana, ko Paulo) ke takitaki e gahua taute tutaki ke he falu motu foki. Ne fakamakutu a Saulo ke he Fakatufono he Atua, ka e fakahehe he tau takitaki lotu Iutaia a ia. Ko e fua, nakai ni ko e talia hokoia e Saulo e kelipopo ha Setefano ka e finatu a ia ki Tamaseko mo e pule ne fakaata mai he ekepoa ne mua ko Kaiafa ke tapaki mo e lili ti liuaki mai ki Ierusalema e ha tagata tane po ke fifine ka moua e ia i ai kua eke mo tutaki ha Iesu. Ka e taha e mena, ha he puhala a Saulo, ne ofo ni kua kikila takai e maama ia ia ti veli a ia ki lalo.

“Saulo, Saulo na e, ko e heigoa e mena ne favale mai ai a koe kia au?” he huhu he leo mai he mena nakai kitia. “Ko e Iki na e, ko hai kia a koe?” he huhu e Saulo.

“Ko au ko Iesu kua favale mai a koe ki ai,” he tali mai.

Ko Saulo, ne kua fakamatapouli fakamana he maama, ne tala age ki ai a Iesu ke fano ki Tamaseko mo e fakatali ke he tau fakailoaaga. Ne fakakite a Iesu ki a Anania, ko e taha he hana tau tutaki. Hagaao ai ki a Saulo, ne tala age a Iesu ki a Anania: “Ko e kapiniu ni a ia kua fifili māku, ke uta haku a higoa ki mua he tau motu kehe, mo e tau patuiki, mo e fanau a Isaraela.”

Ko e moli, he kua lagomatai e Iesu, ko Saulo (ne iloa mogonei ko Paulo) mo e falu a evagelia kua lahi e kautu he ha lautolu a gahua fakamatala mo e fakaako. Ko e moli, ke he 25 e tau tau he mole he fakakite a Iesu ki a ia he puhala ki Tamaseko, ne tohi e Paulo, ko e “vagahau mitaki” kua “fakamatala atu ke he tau tagata oti ke he lalolagi.”

Ne mole e tau tau loga, ne foaki mai e Iesu e tau fufuta fakakiteaga ke he hana aposetolo fakahelehele ko Ioane. Ha kua puhala mai he tau fakakiteaga nei ne fakamaama e Ioane he Tohi Tapu he tohi a Fakakiteaga, kua tuga, moui a ia ke kitia a Iesu ne liu mai he pule he Kautu. Ne pehe a Ioane kua “ha ha he agaga au” ati uta a ia ki mua he magaaho he “aho he Iki.” Ko e heigoa e “aho” nei?

Ko e fakaako fakamakutu ke he tau perofetaaga he Tohi Tapu, fakalataha mo e perofetaaga ni ha Iesu hagaao ia ke he tau aho fakahiku, kua fakakite ni ko e “aho he Iki” kua kamata mai he tau 1914 he fakamauaga tuai he tau mena tutupu! Ko e tau haia he 1914 ne liu mai a Iesu mo e nakai kitia ke he tau mata ti nakai fai fakamanatuaga ne taute he tau tagata tokologa, ka ko e hana ni a tau fekafekau fakamoli ne iloa hana a liu mai. Ko e tau ia ne age e Iehova ki a Iesu e poakiaga ke fano ke pule ki mua ha lautolu kua fai fi ki a ia!

Ko e omaoma ke he poakiaga he hana Matua, ati fakamea e Iesu e lagi mai ia Satani mo e hana tau temoni, he tolo hifo a lautolu ke he lalolagi. Ne mole he kitia e mena nei kua tupu he fakakiteaga, ne logona e Ioane e leo mai he lagi ne fakapuloa: “Kua hoko mai tuai ainei e fakamouiaga, mo e malolo, mo e kautu he Atua ha tautolu, mo e pule he hana Keriso.” E, ko e tau 1914 ne kamata e pule ha Keriso ko e Patuiki!

Ko e tala mitaki ha anei ma e hana a tau tagata tapuaki ki a Iehova he lagi! Ne fakamalolo a lautolu: “Kia fiafia ai a koe ko e lagi, mo mutolu kua nonofo ai.” Ka ko e heigoa e tuaga ma lautolu ha he lalolagi? “Oi fakaalofa kia mutolu kua nonofo ke he fonua mo e tahi,” he matutaki mai e leo he lagi, “ha kua hifo kia mutolu e Tiapolo kua ita lahi, ha kua iloa e ia kua tote hana vaha.”

Ko tautolu a e he magaaho nei ke he magahala tote ia. Kua fakakite he tau tagata he magaaho nei, ko e lata a lautolu ke huhu atu ke he lalolagi fou he Atua po ke mamahi ke he moumouaga. Ko e mena moli hanei, ko e hau a moui kua fifili ni he magaaho nei ke he puhala ne tali aki e koe e tala mitaki he Kautu he Atua ne fa e fakamatala ke he lalolagi oti i lalo hifo he takitakiaga ha Keriso.

Ko Iesu Keriso e Fekafekau he Atua ka utakehe mai he lalolagi e fakatokaaga katoa ha Satani mo lautolu oti ne lagomatai ki ai. To taute e Iesu e utakeheaga nei he tau mena kelea oti ke he tau ne fakahigoa he Tohi Tapu ko Hamaketo, po ko Amaketo. Ka mole ia, ti ko Iesu, ko e Peresona mua ue atu he lalolagi mo e lagi katoatoa he mui mai ki a Iehova ko e Atua, ka taofi a Satani mo e hana tau temoni mo e lili a lautolu ke he afe e tau tau ke he “pahua,” ko e kakano ko e tuaga tuga e mate mo e nakai gahuahua. Gahua 7:55-60; 8:1-3; 9:1-19; 16:6-10; Salamo 110:1, 2; Heperu 10:12, 13; 1 Peteru 3:22; Luka 22:28-30; Kolose 1:13, 23; Fakakiteaga 1:1, 10; 12:7-12; 16:14-16; 20:1-3; Mataio 24:14.

▪ Mole e haele hake ha Iesu ke he lagi, nofo a ia he mena fe mo e ko e heigoa ne fakatali a ia ki ai?

▪ Ko e pule a Iesu ki a hai he mole e haele hake a ia ke he lagi, mo e fakakite fefe e pule hana?

▪ Ko e kamata he magaaho fe e “aho he Iki,” mo e ko e heigoa ne tupu ai he kamataaga?

▪ Lauia fefe a tautolu takitokotaha mai he gahua fakamatala hane taute he vaha nei?

▪ Ko e heigoa e tau mena tutupu ka mumui mai he magaaho ka oti e gahua fakamatala nei?