Olioli Lahi Ue Atu mo e Fakaheke e Atua he Tau Toloaga

Mai he magahala fakamua he tau 1880 ne kitia he Tau Tagata Aoga Tohi Tapu, ko e lalafiaga ke he tau feleveiaaga tata, kua aoga lahi ki a lautolu ke feiloaaki mo e ha lautolu a tau faoa he tua ne nonofo he falu fahi. Ti kua kamata ai a lautolu ke fakatokatoka e tau fonoaga lagataha he tau he Tau Tagata Aoga Tohi Tapu ne o mai he tau fahi oti he Tau Fahi Kaufakalataha, mo e he magaaho fakamui foki ne o mai i Kanata. Ko e tau magaaho fakahauhau fakaagaga a nei; ke he falu aho ne foaki e tau fakaakoaga laulahi he Tohi Tapu, mo e moua e lautolu oti e kolikoli lahi ke he fakafetuiaki he tau fefakamafanaaki. Kua eke foki e papatisoaga he tau tagata tali tonu fou mo vala tumau he tau fonoaga. Ne fakaaoga foki e tau fonoaga ke foaki atu e gahua fakamoli lahi mahaki ke he tau tagata i tua.—Roma 1:11, 12.

He vaha nei ne moua he Tau Fakamoli a Iehova e olioli ha ko e tau toloaga tumau. Ne fa mahani ke 18 ke he 25 e tau fakapotopotoaga ne fakamatakau auloa ke he tau mena ne ui ko e tau takaiaga, ne ahiahi atu ki ai, po ke fekafekau e leveki faifano ki ai. Kua taute lagaua he tau e tau toloaga ne fakatokatoka ke o ki ai e tau fakapotopotoaga he takaiaga ia, po ke vala he takaiaga, ke feleveia auloa he aho Faiumu mo e, po ke, aho Tapu.

Ne taute lagataha he tau, e tau fonoaga lalahi ne tolu po ke fa e aho, ne ui ko e tau fonoaga he fahi motu, ne fakatokatoka ai ke he tau motu takitaha, kua maeke e tau afe tagata ke tolo auloa ke he mena taha. Ne foaki he tau fonoaga nei e ati hakeaga fakaagaga ke he Tau Fakamoli a Iehova mo e falu ne fiafia ke fanogonogo ke he tau gahua ha lautolu, mo e foaki foki e lautolu e fakamoliaga ke he tau tagata i tua.

Ko e fakaholoaga he tau toloaga nei mo e tau fonoaga ne tauteute tuai he Kau Fakatufono he Tau Fakamoli a Iehova mo e kua fakave ke he tau mena kua kuku ne lata mo e Tau Fakamoli he lalolagi katoa. Kua ha ha i ai e tau lauga, tau fakatutalaaga, mo e tau fakakitekiteaga moli he moui ne ui ko e tau fakataitaiaga, ne fakakite mai he tau leveki faifano mo e Tau Fakamoli kua lata he tau fakapotopotoaga. Kua talahau foki he falu tagata kehekehe e tau mena ne tutupu he fakafeleveia e lautolu e paleko ke moui tuga e tau Kerisiano i loto he lalolagi nakai mahani atua po ke heigoa e fua ne moua e lautolu he taute e gahua he fekafekauaga. He tau fonoaga he fahi motu kua ha ha i ai e falu maaga mena—tau fakakitekiteaga moui ne puhala mai he tau taute tala Tohi Tapu po ke tau taute tala ke he tau tutuaga he vaha fou nei, kua fakakite mai ko e kautu fefe e tau Kerisiano ke taute e tau mena vihi ne fakafehagaiaki mo lautolu he vaha nei.

Kua foaki foki e tau mena kai mo e tau mena kai fakahauhau. Kua fakaata he mena nei ke maeke ke olioli e feiloaaki he faoa he tua ka okioki e tau feleveiaaga. Ko e tau gahua oti ne putoia ke fakagahua e tau mena nei kua taute noa he Tau Fakamoli a Iehova he foaki noa e lautolu a lautolu. Ko e tau tupe ne totogi ke he tau fale ne fakaaoga mo e falu fakamoleaga ne maluia he tau mena fakaalofa ne foaki noa. Kua nakai totogi ke huhu ki ai, mo e nakai tuku tupe.

Kua maeke ia koe ke iloa mai he tau fakapotopotoaga tata he Tau Fakamoli a Iehova ko e taute he magaaho fe mo e fakatokatoka ke taute i fe he matakavi hau e tau toloaga nei. Kua maeke foki ke foaki atu e tau fakatokatokoaga o fenoga, ti maeke foki ke kumi e tau mena ke nonofo ai.

Kua lagomatai he tau toloaga mo e tau fonoaga nei e Tau Fakamoli a Iehova mo lautolu oti kana ne fakalataha mo lautolu ke molea atu e onoonoaga ha lautolu he tau fakapotopotoaga tata ha lautolu ti fiafia ke he kaufakalatahaaga katoa he tau matakainaga ha lautolu he lalolagi.—1 Peteru 2:17.

• Ko e heigoa e tau lagomatai ne moua mai he Tau Tagata Aoga Tohi Tapu he tau fonoaga ha lautolu?

• Fakamaama mai la e tau fakatokatokaaga mo e fakaholoaga he tau toloaga he takaiaga mo e tau fonoaga he fahi motu.

[Tau Fakatino he lau 18]

Taute Tala Tohi Tapu he fonoaga he fahi motu, Tau Fahi Kaufakalataha

Fonoaga he lalolagi katoa, Polani

Fonoaga he lalolagi katoa, Atenetina

Toloaga he takaiaga, Sapani

Tau hukui ne moua e tau tohi faka-Tohi Tapu, Suisalani

Papatisoaga he fonoaga he lalolagi katoa, Aferika Toga

Fakatoka maiaga he tohi faka-Tohi Tapu fou, Kanata

Tau hukui he fonoaga ne lologo fakalataha, Sepania