Tau Fonoaga he Lalolagi Katoa he 2003
HE Aho Faiumu, Oketopa 6, 2001, ko e fono lagataha he tau, he tau tagata he Watch Tower Bible and Tract Society of Pennsylvania ne fakahoko i Jersey City, New Jersey, U.S.A. He mole e fono ia, ne taha e polokalama pauaki ne olioli e lautolu mo e tau tagata uiina ha lautolu. He aho hake, he tau fono lafi ki luga ne fakahoko ke he fa e maaga i Kanata mo e Tau Fahi Kaufakalataha, ne taute e lautolu he Kau Fakatufono he Tau Fakamoli a Iehova e fakapuloaaga ne mui mai he mole e lauga fakahiku ha lautolu:
“He onoono atu a mautolu ke he vaha anoiha, kua mua atu ni e aoga ke nakai tiaki he tau tagata he Atua e fakapotopotoaga auloa ha lautolu. Ne tomatoma he aposetolo ko Paulo ko e mena nei, katoa mo e atihake e taha ke he taha, ke au atu ai he taute ha kua kitia e tautolu kua tata tuai e aho lahi mo e matakutakuina ha Iehova. (Heperu 10:24, 25) Ke fakalautatai mo e poaki faka-Tohiaga Tapu nei, kua amanaki a mautolu ke fai fonoaga fahimotu he tau fahi oti he lalolagi he tau ka hau [2002]. Ti he tau 2003, kaeke ko e finagalo ha Iehova, fakalata ni to maeke ke fakahoko e tau fonoaga pauaki he lalolagi katoa ke he falu a matakavi he lalolagi. Ko e magaaho ni anei ke leveki mo e mataala tumau, he mailoga e tau mena ne tutupu he lalolagi.”
Pete kua tupu tolomaki e tau fakauaua mo e tau totoko ha kua tata e fakatokaaga he mogonei ke he fakahikuaga, ko e tau gahua he tau tagata he Atua kua lata ke unu atu ki mua. Ko e tala mitaki he Kautu, putoia ai e ogo hataki he Tohi Tapu, kua lata ke fakapuloa ke he tau motu, tau magafaoa, tau vagahau kehekehe, mo e tau tagata oti kana, he fakamatala ‘kia matakutaku ke he Atua mo e ta age ki a ia e fakahekeaga ha kua tata lahi mai e magaaho he hana fakafiliaga.’ (Fakakiteaga 14:6, 7) Ti, ke hagaao atu ke he finagalo mo e manako mitaki he Matua ha tautolu he lagi, hane fa e fakatokatoka e tau fonoaga he lalolagi katoa ke he tau matakavi kehekehe he lalolagi ma e tau 2003.
Ke kamata aki, ko e tau toloaga pihia kua amanaki ke setulu ma e tau maaga gahoa i Amerika Tokelau mo e nakai leva he mole ti ki Europa. Ti levaleva fakatote he 2003, to ha ha ai e tau fakaholoaga ma e tau matakau he tau tagata hukui ke fenoga atu ke he tau maaga gahoa i Asia; mo e ke he matahiku he tau, to fai matakau foki ka o atu ki Aferika, Amerika Toga, mo e matakavi he Pasifika. To ole ke he falu a la ke fakakaupa e numera he tau tagata hukui ka fakafano atu ke he falu matatepu fonoaga, ti kua nakai maeke ke foaki ke he tau tagata oti e uiina ne hafagi ke he tau tagata oti ke o ke he tau fonoaga. Pete ia, ko e mena mafanatia ke fai tagata ka hukui e tau motu kehekehe he tau matakavi takitaha.
Nakai leva to moua he tau fakapotopotoaga he Tau Fakamoli a Iehova e tau fakailoaaga hagaao ke he tau toloaga nei. Ko e tau fakailoaaga hagaao ke he aho tonu mo e tau maaga tonu ka maeke ke o ki ai e tau tagata hukui ka uiina, to foaki he tau la he fahi ha lautolu. Ti kua ole atu ke nakai tohi po ke kumi fakailoaaga a koe hagaao ke he matakupu nei he magaaho nei.
Ko lautolu ka fifili mogoia ke eke mo tau tagata hukui to fakakaupa ni ke he Tau Fakamoli kua tukulele mo e papatiso ke eke mo tau fakafifitakiaga mitaki mo e fakakite e ofania fakamatakainaga ke he tau matakainaga he matakavi ia. Ko lautolu nei, mogoia, ka moua e magaaho mitaki ke fakakite ki a lautolu ne aahi mai e fakafeleveiaaga mokoina mo e mahani fakamokoi moli. (Heperu 13:1, 2) To fua mai he mena nei e “fefakamafanaaki.” (Roma 1:11, 12) Ko e tau fakamatafeiga hagaao ke he tau fakaholoaga nei to foaki he tau la ne kua uiina ke fakafano e tau tagata ke he taha motu po ke tau motu.
Ko e tau fonoaga fahimotu ne tolu-aho ma e tau 2003 to fakahoko ke he laulahi he tau motu tuga ne fa mahani ki ai. He fakapotopoto auloa, to moua he tau tagata oti e magaaho ke ‘fanogonogo, fakaako, mo e fakamafanatia.’ (Teutaronome 31:12; 1 Korinito 14:31) To foaki he mena nei e magaaho ma e tau tagata oti he Atua ke “kamata . . . mo e kitekite, kua mitaki a Iehova.” (Salamo 34:8) Ke he tau fonoaga he lalolagi katoa, pihia foki ke he loga he tau fonoaga fahimotu, to ha ha ai e tau misionare, ti to fakaaoga falu he tau polokalama.
He magahala he tau nei he kalena, hane olioli e tautolu e tau Fonoaga Fahimotu “Tau Tagata Fakapuloa Fakamakai he Kautu,” ne kua fakalagalaga a tautolu ke foaki e fakamatalaaga ne mua. He taute e tautolu e mena nei, to tupu moli e amaamanakiaga ha tautolu ma e tau mena ne tanaki e Iehova ma e tau ka hau. To lagomatai he mena nei a tautolu ke ‘fakatumau ke mataala, leveki, mo e nonofo tauteute’ he mailoga e tau magaaho uka mo e kakano lahi nei.—Mataio 24:42-44.