Fonoaga Fahimotu “Kia Fakaheke Atu ke he Atua” he 2003 he Tau Fakamoli a Iehova
1 Puhala mai he hana perofeta tua fakamoli ko Isaia, ne poaki e Iehova: “Kia haga mai la a koe kia au, haku tau tagata na e kia fakateliga mai ā mutolu kia au.” (Isaia 51:4) He tupu lahi e uka he vaha nei he fakahikuaga, nakai kia talia e tautolu ko e fakateliga ke he tau poakiaga ha Iehova kua mua atu e aoga ke nakai la pihia tali mai? Taha he tau puhala “kia fakateliga” ki a Iehova ko e omaoma hana poaki ke fakapotopoto ma e tapuakiaga. Ko e amaamanaki atu ha ia ha tautolu ke he magaaho pauaki ka fakahoko ha tautolu a tau fonoaga fahimotu lagataha he tau! Ko e Kau Fakatufono he Tau Fakamoli a Iehova kua liu foki fakatokatoka e loga he tau fonoaga fahimotu ke fakahoko ai ke he la matakavi ha Niu Silani he 2003.
2 Tuga ne fakakite mai he fufuta he Ko e Kolo Toko ia Iulai 1, 2002, ko e tau fonoaga he lalolagi katoa to taute foki ke he tau taone kua fifili, mo e to o atu ki ai e tau matakau kua fifili mai he lalolagi katoa. Ha kua gahoa ni e tau taone ka leveki e tau fonoaga he lalolagi katoa, ko e tau fakapotopotoaga ni ne kotofa ke he tau fonoaga ia ka maeke ke o atu ki ai. Ka e ko e aga he fonoaga he lalolagi katoa to hufia foki ke he tau fonoaga fahimotu oti. Ko e tau misionare to o atu ke he tau fonoaga he tau matakavi kehekehe, ti ko e magaaho mitaki a ia ke logona e tau tala tutupu ha lautolu. Ko e heigoa ha tautolu ka taute ke aoga katoatoa mai he tau fakaholoaga hane tauteute mogonei ke lata mo e ha tautolu a tau fonoaga?
3 Kia O Atu he Tau Aho Oti: Ke moua e aoga katoatoa mai he tau fakaakoaga ne puhala mai he vahega fekafekau fakamoli mo e lotomatala, kua manako a tautolu ke iloa moli ko tautolu i ai ma e fakaholoaga katoa. (Mata. 24:45) Lata nakai a koe ke ole ke he takitaki gahua ma e taha magaaho ke fina atu he tau aho oti ke he fonoaga? Ato ole a Nehemia ke he Patuiki ko Aretaseta ma e fakaataaga ke fina atu ki Ierusalema ke liu ati hake e tau kaupa, ne ‘liogi a ia ke he Atua he lagi.’ (Nehe. 2:4) Kua lata foki a koe ke liogi pihia ki a Iehova ma e malolo ke ole ke he takitaki gahua hau ma e taha magaaho ke fina atu he tau aho oti ne tolu ke he fonoaga. Ka e kua ka nakai mahalo e takitaki gahua hau ke atu taha magaaho ma hau? Maeke ke fakamaama na ko e tau fakaakoaga ne moua mai e tautolu he tau fonoaga ia ne lagomatai a tautolu ke eke mo tau tagata gahua fakamoli, fakamakamaka, mo e falanaki ki ai ka liga lagomatai a ia ke talia. Lafi ki ai, ka ha ha mo tautolu e falu he magafaoa ne nakai tua, ko e fakaalofa ha tautolu ke fakailoa tuai ki a lautolu hagaao ke he tau fakatokaaga ha tautolu ma e fonoaga.
4 Taute e Tau Fakatokatokaaga ma e Nofoaga Hau: Laulahi he tau tagata fakailoa kua tokaloto e tau poakiaga maama ma e tau fonoaga ne foaki mai he tau tau gahoa kua mole i loto he uho he Ha Tautolu a Fekafekauaga he Kautu ia Me, ti loga e tau fua mitaki hane moua. Pete ia, kua lata agaia ke ole ke he tau tagata oti ke FAKAMOLEMOLE MUMUITUA KE HE TAU HATAKIAGA NAI KE MOUA E TAU NONOFOAGA HE MOTELA:
(a) Fakamolemole ua fakamau tuai e tau motela ne nakai amanaki a koe ke fakaaoga po ke fakamau ke loga e motela he manatu ke fakakiakia takitaha mua to fifili mogoia e motela kua mitaki lahi, ti tiaki e faoa ne toe. (Mata. 5:37) Nakai totonu e mena nai, ti taofi foki e tau motela he moua e tau feua pisinisi ne kua lata ia lautolu ke moua. Kua nakai maeke foki he falu tagata fakailoa ke fakaaoga e tau poko ia, ne kua fa manako lahi ki ai.
(e) Ua fakamau e tau poko ma hau po ke falu ka e nakai age e tau higoa mo e fakafano fakamafiti e tau tupe fakamau ma e tau poko takitaha. Ka nakai fai tupe fakamau, ha ha he motela e tonuhia ke age e poko hau ke he taha tagata foki.
(i) Ua tuku ke molea e tau tagata he poko ke he mena ne fakaata he matafakatufono mo e he motela, na fa mahani ke nakai molea e fa po ke lima e tagata, fakalataha mo e tau tama. Manatu, na totogi e koe e tupe katoatoa he fakave ke he numera he tau tagata ne TALIA e koe ke nonofo he poko.
(o) Ua fano tuai ato ta e matahola 1:00 p.m. po ke heigoa ni e fakatokaaga he motela. Liga mitaki ke o atu ki ai ka oti e fono he aho ia, ha kua fita e poko hau he totogi e tupe fakamau.
(u) Ua kaitunu po ke fakamafana mena kai he poko ato kehe ai ni ka fai peito mo fakaaoga, mo e fakaeneene ke ua takiva ha mena he poko aki e tau mena kai.
5 Lagomatai a Lautolu ne Manako Pauaki: Fai nakai he fakapotopotoaga hau ne liga manako lagomatai ke fina atu ke he fonoaga? Ko e tau manako pauaki he tau tagata kua momotua, tino lolelole, po ko lautolu he fekafekauaga mau na fa leveki he tau magafaoa Kerisiano ha lautolu, ka e ko e tau motua mo e falu ne iloa e tau tutuaga ha lautolu ne pihia ka maeke foki ke foaki e lagomatai fakaalofa.
6 Ko e Komiti Fekafekau he Fakapotopotoaga ka liu kitekite ke he tau Special Needs Room Requests oti ne moua mai he tau tagata fakailoa. He fakaaoga e tau fakamaamaaga ne tu he laupepa ia, kua lata e komiti fekafekau ke fifili e tau ole takitaha ma e manako lagomatai pauaki ke kitia kua nakai maeke moli kia ke leveki he fakapotopotoaga. Ko e tauteaga nei ke lata ni ma e tau tagata fakailoa ne mitaki e tau tutuaga, mo e ha lautolu a tau fanau mahani mitaki. Ko e Rooming Department ka matutaki ke he tohikupu he fakapotopotoaga kaeke fai huhu a lautolu ke he ole lagomatai pauaki.
7 Ko Tautolu ko e Kitekiteaga: Kitia nakai he tau tagata e kehekehe he Tau Fakamoli a Iehova mo lautolu he lalolagi nei? E kitia! Mailoga e falu talahauaga mai he tau takitaki hotela he taha taone: “Fa fehagai tumau a mautolu mo e tau fonoaga, ka e ko mutolu kua lahi atu e kaufakalataha mo e totonu.” “Ne taha foki e matakau lotu hinei mo mautolu he fahi tapu kua mole. Kua maali e kehekehe ha mutolu mo lautolu.” “Iloa e mautolu na maeke ia mautolu ke falanaki ke he lagomatai mo e kaufakalataha ha mutolu.” Nakai kia lagomatai he tau talahauaga pihia a tautolu ke fakaaue ke he puhala he “iloilo mai luga” ne kua lauia mitaki ai ke he tau aga ha tautolu? (Iako. 3:17) Ha ko tautolu ko e “kitekiteaga ke he lalolagi,” kia eke e tau mahani ha tautolu he tau magaaho oti ke fakaata e lilifu mo e fulufuluola he Atua ha tautolu, ko Iehova.—1 Kori. 4:9.
8 Ha “ko e mena mole atu e mahani he lalolagi nai,” kua manako a tautolu ke he tau fonoaga fahimotu ha tautolu ke lagomatai a tautolu ke nonofo mataala fakaagaga. (1 Kori. 7:31) He taute e tau fakatokatokaaga ke o atu he tau aho oti kua lata mo e laliaga, ka e to aoga lahi. Ko e Fonoaga Fahimotu “Kia Fakaheke Atu ke he Atua” he tau nei kua tauteute ai ke lagomatai a tautolu ke tumauokafua he fakatali a tautolu ke fakahoko e fakafiliaga ha Iehova ke he lalolagi ha Satani. Kia nakai fakaata e tautolu ha mena ke fakatauhele aki a tautolu mai he moua e tau fakamaamaaga ne tauteute e Iehova ma tautolu.—Isaia 51:4, 5.
[Puha he lau 3]
Tau Magaaho he Fonoaga
Aho Faraile mo e Aho Faiumu
9:30 a.m. - 5:00 p.m.
Aho Tapu
9:30 a.m. - 4:05 p.m.
[Fakafonua he lau 4]
MATAKAVI TAU AHO TAU TAKAIAGA
TONGA Sepe. 26-28, 2003 10 Vala (Tonga)
Nuku‘alofa
Queen Sālote Memorial Hall
Mateialona Road
(Tongan, falu vala faka-Peritania)
VAGAHAU SAMOA Oke. 3-5, 2003 11 (Auckland Samoan, Avondale Samoan, Christchurch Samoan, Manukau Samoan, Manurewa Samoan, Porirua Samoan)
South Auckland Assembly Hall
160 Clevedon Road, Papakura
PALMERSTON NORTH—1 Oke. 10-12, 2003 3A, 3B, 3C
Manawatu Sports Stadium,
Pascal Street, Palmerston North
PALMERSTON NORTH—2 Oke. 17-19, 2003 4A, 4B, 5A Vala (North and South Taupo, Turangi), 5C
Manawatu Sports Stadium,
Pascal Street, Palmerston North
CHRISTCHURCH Oke. 24-26, 2003 1A, 1B, 2A, 2B
Westpac Trust Centre
Whiteleigh Avenue, Addington
Christchurch
(Vagahau matalima foki)
HAMILTON—1 Oke. 31-Nove. 2, 2003 5A Vala (Putaruru, Westbrook Rotorua, North & South Tokoroa), 5B, 6A, 6B, 7A, 7B, 7C, 10 Vala (Auckland Korean)
Mystery Creek Events Centre
Mystery Creek Road, Hamilton
HAMILTON—2 Nove. 7-9, 2003 8A, 8B, 9A, 9B, 10 Vala (Auckland Chinese, Auckland Niuean, Auckland Rarotongan, Auckland Tongan, Niue Island)
Mystery Creek Events Centre
Mystery Creek Road, Hamilton
(Vagahau matalima foki)
RAROTONGA Nove. 21-23, 2003 10 Vala (Cook Islands)
Assembly Hall, Vaimaanga,
Rarotonga, Cook Islands