Fonoaga Fahimotu “Tau Faiaoga he Kupu he Atua” he Tau Fakamoli a Iehova he 2001
1 Ne fakamaama he perofeta ko Isaia a Iehova ko e Faiaoga Homo Ue Atu, ne fakamafana ai fakamatua tane: “Ko e puhala hanai ke o ai a mutolu.” (Isa 30:20, 21) Ka e logona fefe e tautolu e tau kupu ha Iehova ma e aoga ni ha tautolu? Kua vagahau a Iehova ke he hana tau tagata he puhala mai he tau lau he Tohi Tapu ti pihia foki ke he tau tohi faka-Tohi Tapu, tau feleveiaaga, tau magahala takaiaga, mo e tau fonoaga fahimotu ne fakatoka mai he “fekafekau fakamoli mo e loto matala.” (Mata. 24:45) Maeke ia tautolu ke loto fakaaue ki a Iehova kua matutaki a ia ke takitaki a tautolu ke he puhala kua lata ia tautolu ke o ai.
2 He tau tau takitaha, kua foaki he fonoaga fahimotu ki a tautolu e magaaho ke fakapotopoto auloa mo e tau matakainaga talitonu ha tautolu mo e fanogonogo fakamitaki ke he tau fakaakoaga a Iehova. He tau kua mole, i Niu Silani ko e 17,684 e tagata ne o atu ke he fakahauhauaga fakaagaga he Fonoaga Fahimotu “Kupu Fakaperofeta he Atua.” He 2001, ko e tolu e aho Fonoaga Fahimotu “Tau Faiaoga he Kupu he Atua” ka fakahoko ai ke he motu katoa. Iloa e mautolu kua amaamanaki lahi a koe ke taute e tau fakatokaaga hau ke hoko atu, ti kua foaki e mautolu e tau takitakiaga ke lagomatai aki a koe.
3 Taute e Tau Fakatokaaga Hau ke Nofo Ai: Laulahi he tau tagata fakailoa ne tokaloto e takitakiaga maaliali nukua fai tau tuai kua foaki mai he uho he Ha Tautolu a Fekafekauaga he Kautu ia Me ma e fonoaga, ti loga e tau fua mitaki ne kua moua. Pete ia, kua lata agaia ke ole atu ke he tau tagata oti FAKAMOLEMOLE KIA MANATU KE MUITUA E TAU HATAKIAGA KE MOUA E TAU NONOFOAGA HE MOTELA:
(a) Fakamolemole ua fakamau tuai e tau motela ne nakai amanaki a koe ke fakaaoga po ke loga e motela ka fakamau mo e fakakiakia mua ai mogoia ti fifili e motela kua mitaki lahi, ti tiaki hifo e faoa ne toe. (Mata. 5:37) Nakai mitaki e mena nei, ti taofi foki e tau motela mai he moua e tau feua pisinisi kua lata. Kua nakai maeke foki he falu tagata fakailoa ke fakaaoga e tau poko ia, ne kua fa manako lahi ke fakaaoga he falu magaaho.
(e) Ua toka e tau poko ma hau po ke falu ka e nakai age e tau higoa mo e fakafano fakamafiti e tau tupe fakamau ma e tau poko takitaha. Ka nakai fai tupe fakamau, ha ha he motela e tonuhia ke age e poko hau ke he taha tagata foki.
(i) Ua tuku tokologa e tau tagata he poko ke he mena ne fakaata he matafakatufono mo e he motela, ne kua fa mahani ni ke nakai molea e fa po ke lima e tagata, fakalataha mo e tau tama. Manatu, na totogi e koe e katoatoa he fakave ke he numera he tau tagata ne kua TALIA e koe ke he poko.
(o) Ua fano tuai ato hoko e matahola 1:00 p.m. po ke heigoa ni e fakatokaaga he motela. Kia fina atu a koe ka oti e fakaholoaga he aho ia, ha ko e mena fita he fakamau he tupe hau e poko.
(u) Ua kaitunu po ke fakamafana mena kai he poko ato fai peito pauaki, ti fakaeneene ua takiva e poko aki e tau mena kai.
4 Ko e muitua ke he takitakiaga nei kua foaki mai ki a tautolu e magaaho ke fakatata e fakaalofa ha tautolu ma e tau matakainaga Kerisiano ha tautolu. (1 Kori. 10:24; 1 Timo. 6:8.) Ti, ke moumou e fakatufono ke he tau mena nei ka ta mai ai e ekefakakelea ke he higoa mo e fakatokatokaaga a Iehova.—Sala. 119:168.
5 Leveki ki a Lautolu mo e Tau Manako Pauaki: Ko lautolu ne momotua, gagao, tau fekafekau mau, po ke falu mo e tau manako pauaki kua lata ke lagomatai ke o atu ke he fonoaga. Ko e tau magafaoa, tau motua, mo e falu he fakapotopotoaga kua mailoga e tau tutuaga pauaki ha lautolu ke taute e tau fakatokatokaaga fakaalofa kua lata. Ko e matagahua he magafaoa mo e fakapotopotoaga kua nakai lata ke hiki ke he fakatokatokaaga he fonoaga. (1 Timo. 5:4) Kua fakatokatoka he laupepa Special Needs Room Request he Sosaiete e tau mena kua lata he fakapuke e tohi he laupepa nei. Kua lata he Komiti Fekafekau he Fakapotopotoaga ke liu kumikumi e tuaga he tagata ne ole ato fakafano atu e laupepa nei ke he Rooming Department. Ko e tohikupu he fakapotopotoaga kua lata ke tohi hifo hana numera telefoni he laupepa ke maeke he Rooming Department ke matutaki mo ia ka fai huhu. Kua lata ke fakahu atu e tau laupepa kua talia ke he kaina he fonoaga ne kua fakakite he taha fahi he laupepa.
6 Fano ke he Taha Fonoaga: Ka manako vala tala a koe ma e taha fonoaga, maeke he tohikupu he fakapotopotoaga ke atu ki a koe e kaina he tau la matapatu he fonoaga, nukua moua he taha fahi he laupepa Special Needs Room Request. Tuku tumau e faga tohi ne pili ai e siteme mo e kaina fakalataha mo e ole hau. Kaeke ke fai fonoaga foki ka fakahoko he taone ia, manatu ke fakakite e tau aho he fonoaga ka fina atu a koe ki ai.
7 Fefe e Logonaaga he Matakau Hotela Hagaao ke he Tau Fakamoli a Iehova? Mole atu e talahau ke he tau mahani mitaki he tau tagata ha Iehova, ne talahau e takitaki lahi he hotela pehe: “Ka kitia e au e Tau Fakamoli a Iehova kua o mai he Aho Tuloto, ne okioki au ato hoko e pogipogi Gofua. Iloa e au ko e tau lekua to ikiiki. Ko e fiafia tumau ka o mai e tau tagata ha mutolu ki hinei.” Ne talahau he fifine fakafua koloa he hotela: “Matakau homo ue atu! Kua talahau tumau he tau tagata oti, ‘Fakaaue.’” Nakai kia matalahi a koe ke logona kua vagahau pihia ke he tau matakainaga ha tautolu? Manamanatu la e fiafia ha Iehova ko e Atua ka kitia e ia a tautolu kua fakatatau ke he puhala kua ta mai e fakahekeaga ke he higoa hana!
8 Fakahiku: Hane tata mai e magaaho ma hau ke fina atu ke he fonoaga fahimotu, kia tuku liogi atu ki a Iehova ke fakalataha ke he tau fakaholoaga oti he tau aho tolu mo e moua e aoga mai he fakaholoaga. Kua tuku nakai e ole hau ke fai magaaho ke fano ke he tau aho tolu ma e fonoaga nukua pulega a koe ke fina atu ki ai? Ka nakai, kia taute fakamafiti. Ko e ole mule ma e taha magaaho kua nakai fa atu. Kua fakatoka he fekafekau fakamoli mo e loto matala he tau nei e Fonoaga Fahimotu “Tau Faiaoga he Kupu he Atua” ke foaki ma e takitakiaga fakaagaga ha tautolu mo e ke ati hake e tua ha tautolu. Ti kamata ke pulega he magaaho nei ke maeke ke hoko atu, he muitua e fakamafana he salamo: “Kia fakaaue ke he Atua ke he fakapotopotoaga”!—Sala. 68:26.
[Puha he lau 3]
Tau Magaaho he Fakaholoaga
Aho Faraile mo e Aho Faiumu
9:30 a.m. – 5:00 p.m.
Aho Tapu
9:30 a.m. – 4:00 p.m.
[Fakafonua he lau 4]
MATAKAVI TAU AHO TAU FAHIMOTU
CHRISTCHURCH Sepetema 14-16, 2001 1A, 1B, 2A, 2B
Westpac Trust Centre
Whiteleigh Avenue, Addington
Christchurch
(Vagahau matalima foki)
PALMERSTON NORTH—1 Sepetema 28-30, 2001 3A, 3B, 3C
Manawatu Sports Stadium,
Pascal Street, Palmerston North
PALMERSTON NORTH—2 Oketopa 5-7, 2001 4A, 4B, 5A Vala (Turangi), 5C
Manawatu Sports Stadium,
Pascal Street, Palmerston North
HAMILTON—1 Oketopa 12-14, 2001 Vala 5A (Murupara, Putaruru, Westbrook Rotorua, North & South Taupo, North & South Tokoroa), 5B, 6A, 6B, 7A, 7B
Mystery Creek Events Centre,
Mystery Creek Road, Hamilton
HAMILTON—2 Oketopa 26-28, 2001 7C, 8A, 8B, 8C, 9A, 9B, 9C, Vala 10 (Auckland: Chinese, Korean, Niuean Rarotonga, Tonga), Niue
Mystery Creek Events Centre,
Mystery Creek Road, Hamilton
(Vagahau matalima foki)
FONOAGA SAMOA Novema 2-4, 2001 Vala 10 (Tau Samoa Oti i Niu Silani)
South Auckland Assembly Hall,
160 Clevedon Road, Papakura
RAROTOGA Novema 9-115, 2001 Vala 10 (Tau Kuki Aelani)
Assembly Hall, Vaimaanga,
Rarotoga, Tau Aelani Kuki