Fonoaga Fahimotu he Tau Fakamoli a Iehova ke he “Kupu Fakaperofeta he Atua” he 1999

¹ He o atu e tau Isaraela he tutakale, ne fakaako e Iehova a Mose ke taute ua e pu ario. Ka taha ni e pu ne ulo, ti fakapotopoto mai e tau iki he tau magafaoa ke he gutuhala he fale uta fano he tutuutaaga. Ka ulo fakaleo lahi ua e pu ko e fakamailoga haia ke he fakapotopotoaga katoa a Isaraela ke fakapotopoto mai. (Nume. 10:1-4) He vaha nei, fiafia nakai a tautolu ka logona e tautolu e tau fakailoaaga ia, tuga e leo lahi he pu, kua fakapotopoto a tautolu ke he ha tautolu a tau fonoaga fahimotu he tau? He tau fonoaga ha tautolu kua moua e tautolu e tau hatakiaga mo e takitakiaga a Iehova he puhala mai he hana Kupu mo e mai he tau hukui hana ne kua fifili. Kua lagomatai he mena nei a tautolu ke fakatumau e tuokafua he gahua ke he Atua. Nakai kia olioli a tautolu ka kitia e tautolu e tau afe​—liga hogofulu e tau afe—​he tau tagata tapuaki fakamoli kua fakapotopoto auloa he fakaalofa mo e mafola? Pihia moli a tautolu!​—Sala. 122:1, 7, 8.

² Mai ia Sepetema ki a Oketopa 1998, ko e 8 e katoa he “Tau Fonoaga Fahimotu” ne fakahoko ke he la matakavi i Niu Silani. Ne uiina e tau matakainaga he matakavi ha tautolu ke o atu ke he fa e fonoaga he falu motu i San Diego, U.S.A.; Brisbane, Mel­bourne mo Sydney, Ausetalia. Ne fakalataha a lautolu mo e tau hukui tokoafe mai he tau motu he lalolagi katoa. Ko e tau vagahau kehekehe ne vagahau ne fakamoli ai kua nakai fai fakakaupa ke he matutakiaga he fakaalofa mafanatia he tau fonoaga nei. Ne moua he tau matakainaga ne hafagi ha lautolu a tau kaina ke nonofo ai e tau hukui he tau motu e feoakiaga lahi mahaki. Ko e tau misionare mo e tau fekafekau ke he lalolagi katoa ne liliu mai ki Niu Silani ke he tau fonoaga. Ko e fakalataha mai ha lautolu ne eke moli mo fakamalolo fakaagaga ke he tau tagata oti. He fakapotopoto auloa a tautolu ke he fonoaga fahimotu ha tautolu he 1999, to moua e tautolu e magaaho ke fakalataha mo e tau matakainaga uho ha tautolu ti fakaaue foki ki a Iehova ma e kaufakalatahaaga ne foaki mai e ia ki a tautolu.

³ Taute e Tau Fakatokaaga Hau ke Nofo Ai: Laulahi he tau tagata fakailoa ne tokaloto e takitakiaga maliali ne kua fai tau tuai kua foaki mai he uho he Ha Tautolu a Fekafekauaga he Kautu ia Me ke he fonoaga, ti loga e tau fua mitaki ne moua ai. Pete ia, kua lata agaia ke ole atu ke he tau tagata oti FAKAMOLEMOLE KIA MANATU KE MUITUA E TAU HATAKIAGA KE MOUA E TAU NOFOAGA HE MOTELA:

(a) Fakamolemole ua fakamau tuai e tau motela ne nakai amanaki a koe ke fakaaoga po ke loga e motela ka fakamau mo e fakakiakia mua ai mogoia ti fifili e motela kua mitaki lahi, ti tiaki hifo e faoa ne toe. (Mata. 5:37) Nakai totonu e mena nei, ti taofi foki e tau motela mai he fakaaoga ke taute aki e matagahua kua lata. Kua nakai tokanoa foki ma e tau tagata fakailoa ke fakaaoga e tau poko ia, ne kua fa lata ai ke fakaaoga.

(e) Ua toka e tau poko ma hau po ke falu ka e nakai age e tau higoa mo e fakafano fakamafiti atu e tau tupe fakamau ma e tau poko takitaha. Ka nakai fai tupe fakamau, ha ha he motela e tonuhia ke age e poko hau ke he taha tagata foki.

(i) Ua tuku tokologa e tau tagata he poko ha ko e matafakatufono a ia ti ka fakaata foki he motela, ha ko e mena fa mahani ni ke nakai molea e fa po ke lima e tagata, fakalataha mo e tau tama. Manatu, na totogi e koe e katoatoa he fakave ke he numela he tau tagata ne kua TALIA e koe ke he poko.

(o) Ua fakakia atu tuai ato hoko e matahola 1:00 p.m. po ke fakatokaaga he motela. Kia fina atu a koe he mole e fakaholoaga he aho ia, ha ko e mena fita he fakamau he tupe hau e poko.

(u) Ua kaitunu po ke fakamafana mena kai he poko ato fai fale tunu kai pauaki ai, ti fakaeneene ua takiva e poko aki e tau mena kai.

⁴ Ko e muitua ke he takitakiaga nei kua foaki mai ki a tautolu e magaaho ke fakatata e fakaalofa ha tautolu ma e tau matakainaga Kerisiano ha tautolu. (1 Kori. 10:24; 1 Timo. 6:8.) Pete ia, ko e moumou matafakatufono ke he tau mena nei kua ta mai ai e ekefakakelea ke he higoa mo e fakatokatokaaga a Iehova.​—Sala. 119:168.

⁵ Fano ke he Taha Fonoaga: Ko e matakavi kua kotofa ma hau ke fano ki ai ko e matakavi kua tata atu ke he fakapotopotoaga hau. Ko e fakatokatokaaga ke loga e nofoa, tau tohi, poko nonofo, mo e falu foki, kua fakave ke he fuafuaaga he tokologa e tau tagata fakailoa ka o atu ke he fonoaga kua kotofa ki ai e fakapotopotoaga ha lautolu. Pete ia, ka fai kakano mitaki a koe ke fakalataha atu ke he fonoaga ne nakai ko e fono kua kotofa a koe ki ai mo e kua manako nofoaga, mo e falu mena foki, to atu he tohikupu he fakapotopotoaga ki a koe e matapatu kaina he fonoaga ka nakai maeke ia koe ke taute e tau fakatokatokaaga hau ni. Ka tohi a koe ma e poko po ke falu vala tala, tuku e faga tohi kua ha ha ai e siteme, mo e kaina hau mo e ole hau. Ka molea e taha e fonoaga ka fakahoko he taone ia, kia mataala ke fakakite e aho ka fakalataha a koe ke he fonoaga.

⁶ Leveki ki a Lautolu mo e Tau Manako Pauaki: Fakamolemole kia mataala ke he tau manako pauaki he tau fuakau, lautolu ne tino gagao, ko lautolu kua leva ke he fekafekauaga, po ke falu kua lata ke fai lagomatai he fakapotopotoaga ke hohoko atu ke he fonoaga. Ko e tau magafaoa, tau motua, mo e falu he fakapotopotoaga kua mailoga e tau tutuaga kehe ue atu ha lautolu mo e tau manako pauaki ke taute fakamitaki e tau fakatokatokaaga kua lata.​—Fakatatai 1 Timoteo 5:4.

⁷ Ko e laupepa Special Needs Room Request he Sosaiete kua fakatoka e tau mena kua lata ke tohi he laupepa nei. Ko e foakiaga nei kua fakaata ni ma e tau tagata fakailoa kua mitaki e tuaga, lauia foki a lautolu kua mahani mitaki e tau fanau, ne kua talia he Komiti Fekafekau he Fakapotopotoaga. Kua lata e tau ole nei ke fakafano fakamafiti atu ke he Rooming Department he fakaaoga e kaina he fonoaga kua fakakite he taha fahi he laupepa.

⁸ Fakakite e Tau Manatu Fakaaue: Taha e magafaoa Fakamoli ne tohi ke he takitaki he hotela ne nonofo ai a lautolu: “Ko e hotela laia hau he tau hotela kua mitaki lahi mahaki ne nonofo ai e magafaoa ha mautolu. Ne fakamea kikili e tau poko ti puke katoa he tau mena ne kua lata mo e fakaaoga ha mautolu. Ne olioli lahi e mautolu e matahiku vaha tapu ha ko e kaufakalataha he tau tagata he hotela hau.”

⁹ Kua fakamalolo ka logona e fakaheke ke he higoa a Iehova ha ko e mahani mitaki he tau matakainaga ha tautolu he tau fonoaga. Ne pehe e tagata gahua hotela: “Ko e tau hukui ha mutolu ko e tau tagata mitaki lahi ne nonofo hinei.” Taha ne talahau: “Fiafia lahi a mautolu ke fakamau hifo e tau tagata ha mutolu. Kua totonu oti a lautolu ti mautali mo e tau vala tala kua lata. Ti ko e matakau mukamuka lahi ke gahua auloa.” Ko e takitaki he fale kai ne pehe: “Kua fiafia lahi a mautolu ke fakalataha mo e matakau he tau tagata he taone ne kua matalahi ai a mautolu ki ai.” Ne foaki age he fale kai 10 e pasene ne to hifo ke he tau hukui ne tau e pine fakamailoga he fonoaga! Ne talahau he takitaki hotela: “Kua fiafia ke o mai a mutolu ke nonofo he hotela ha mautolu.” Ko e tau manatu nei ko e fakamoliaga mitaki mai he tau tagata i tua. Ko e aga mitaki ne moua e tautolu kua fakatokoluga a Iehova mo e taute a ia ke matalahi ki a tautolu.​—1 Tesa. 4:12; 1 Pete. 2:12.

¹⁰ Kua fakamalolo e mautolu a koe ke taute e tau fakatokaaga hau mogonei ke fina atu ke he tau aho tolu he Fonoaga Fahimotu he “Kupu Fakaperofeta he Atua” he 1999. Kua amaamanaki atu a mautolu he fakalataha mo koe ke logona e ‘fakaheke mo e eke galue’ fakaagaga ha lautolu kua tapuaki ke he Atua ko e fuifui fakalataha. (Sala. 42:4) Kia fakamonuina e Iehova e tau fakatokatokaaga oti ne kua taute ke fakatumau ai e monuina fakaagaga ha tautolu!

[Puha he lau 3]

Tau Magaaho he Fakaholoaga

Aho Faraile mo e Aho Faiumu

9:30 a.m. – 5:00 p.m.

Aho Tapu

9:30 a.m. – 4:00 p.m.

[Fakafonua he lau 5]

MATAKAVI AHO TAKAIAGA

160 Clevedon Road, Papakura

Pascal Street, Palmerston North

(Vagahau matalima foki)

Pascal Street, Palmerston North

Rarotonga, Tau Aelani Kuki

Mystery Creek Road

Hamilton

Mystery Creek Road

Hamilton

Whiteleigh Avenue, Addington

Christchurch

(Vagahau matalima foki)