Fonoaga he Faahimotu he Tau Fakamooli a Iehova he 2009
1. (a) Ko e heigoa e tau monuina ka olioli e tautolu he fakalataha ke he tau aho tolu oti he fonoaga he faahimotu? (e) Ko e heigoa e tau pulega kua lata ia tautolu ke taute mogonei?
1 Amanaki oti a tautolu ke he fonoaga he faahimotu he 2009 mo e tau magaaho foou ke fakapotopoto mo e tau matakainaga fakaheke ha Iehova, ne kua “manamanatu ke he tau mena fakaagaaga kua lata ma lautolu.” (Mata. 5:3, NW) Hane tata lahi mai e aho a Iehova, kua tomatoma ki a tautolu takitokotaha ke fakalataha ke he tau aho tolu oti ke aoga katoatoa mai he fakafetuiaga mafanatia Kerisiano ti pihia mo e fakamalolōaga fakaagaaga ke tutū mau ke he tua. (Sefa. 1:14) Kia tala age ke he tau faiaoga mo e tau takitaki gahua ko e vala aoga lahi mahaki e fonoaga ke he tapuakiaga haau. Fakamalolō ke taute tuai e tau pulega haau mo e kumi e fakamonuina ha Iehova; to maeke mooli ia koe ke moua e lalagoaga haana.—Isaia 50:10.
2. Ko e heigoa e fakafetui mo e tau matakainaga kehekehe he lalolagi katoa ka amanaki a tautolu ki ai pete ne nakai uiina a tautolu ke o atu ke he fonoaga he lalolagi katoa?
2 Tau Fonoaga he Lalolagi Katoa: Ha ko e mena to fakahoko e tau fonoaga nei he gahoa e motu mo e tau taone, ko lautolu ni ne kotofa kua lata ke o atu. Ko e kaufakalataha ha tautolu mo e fakaholoaga nei ka puipui mai he molea e tokologa. (1 Kori. 14:40; Hepe. 13:17) Pete ia, to loga e fonoaga he faahimotu ka ha ha ai e tau matakainaga kehekehe mai he lalolagi ka o atu ki ai ha kua loga e tau misionare, tau tagata he Peteli ne gahua he tau motu kehe, mo e tau fekafekau ne gahua he lalolagi katoa ka o atu ke he fonoaga he motu ni ha lautolu.
3. Fakakite fēfē e tautolu e fakaalofa faka-Kerisiano ke he falu he fakapotopotoaga ha tautolu?
3 Lagomatai e Falu ke O Atu: Kua fai nakai he fakapotopotoaga haau ne manako lagomatai ke o atu he fonoaga? Ka lagomatai pihia e koe falu, kua “[nakai] takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.”—Filipi 2:4.
4, 5. Ka fai mena tupu ti nakai maeke a koe ke fina atu ke he fonoaga kua kotofa e fakapotopotoaga haau ki ai, ko e heigoa e mena kua lata ia koe ke taute?
4 Moua e Tau Vala Tala: Ke fakatote hifo e tau hea telefoni ke he la ofisa hagaao ke he tau aho mo e tau matakavi he fonoaga, fakamolemole fakakia fakamua e fufuta he The Watchtower ia Mati 1, 2009 po ke tohikupu he fakapotopotoaga haau ma e tau vala tala kua manako a koe ki ai.
5 Ka fano a koe ke he fonoaga ne nakai kotofa e fakapotopotoaga haau ki ai, liga moua e koe e vala tala ke he tau nonofoaga he tohi atu ke he kaina he la matapatu hagaao ke he tau poko ne tū i tua he laupepa foou Special Needs Room Request. To fakafano atu e tau laupepa nei ke he tohikupu he tau fakapotopotoaga. Ke moua e tali, kia manatu ke tuku fakalataha mo e tohi haau e fagatohi ne tū e higoa mo e kaina haau ti pili aki e ulutohi.
6. Ko e heigoa e fakatokaaga ka muitua ka ole lagomatai e tagata fakailoa ne manako pauaki ke moua e nofoaga?
6 Tau Manako Pauaki: Ka ole lagomatai e tagata fakailoa ke moua e mena ke nofo ai, kua lata he Komiti Fekafekau he Fakapotopotoaga ke fifili kua lata nakai a ia ke tuku e laupepa Special Needs Room Request. Kua lata ia lautolu ke kitekite ke he tau fakatonuaga he laupepa mo e tohi ia Novema 16, 2008, ke he kau oti he tau motua ato fakafano atu he tohikupu he fakapotopotoaga e laupepa ke he Rooming Department.
7. Ko e heigoa e manamanatuaga fakamua ha tautolu he tauteute a tautolu ke o atu ke he fonoaga he faahimotu he 2009?
7 Gahua ne Fakaheke e Atua: Ka fakatātā e tautolu e fua he agaaga ke he tau gahua oti ha tautolu, he mataala pauaki ke he puhala vagahau mo e tauteuteaga ha tautolu ka fehagai mo e tagata gahua he motela mo e falu he taone ka fono ai, kua lafi e tautolu ke he higoa mitaki he tau tagata a Iehova mo e kalo mai he fakatupetupe e falu. (1 Kori. 10:31; 2 Kori. 6:3, 4) Kia eke e fina atu haau mo e mahani ke fakaheke e Atua ke he tau puhala pihia he fonoaga he faahimotu he 2009!—1 Pete. 2:12.
[Puha he lau 6]
Tau Magaaho he Fonoaga:
Aho Tuloto (Tau Fonoaga he Lalolagi Katoa Hokoia)
1:20 afiafi - 4:55 afiafi
Aho Falaile mo e Aho Faiumu
9:20 pogipogi - 4:55 afiafi
Aho Tapu
9:20 pogipogi - 4:00 afiafi