Fonoaga he Faahimotu he 2008 he Tau Fakamoli a Iehova
1. (a) Ko e ha e fakatonuaga ha Paulo ke he tau Kerisiano Heperu kua mafiti pauaki ke he vahā nei foki? (Totou Heperu 10:24, 25.) (e) Ko e heigoa e magaaho hane hoko mai ke fakagahua e tautolu e fakatonuaga ha Paulo?
1 Ne fakamalolō he aposetolo ko Paulo e tau Kerisiano Heperu ke fakapotopoto auloa mo e fefakamafanaaki “kia au atu ai” he kitia e lautolu kua tata tuai e aho. (Hepe. 10:24, 25) Kua malikiti hake e tau fakamooliaga ko e “aho” ne vagahau a Paulo ki ai kua tata lahi mai! Ko e mena ia, kua amaamanaki atu a tautolu ke he tau magaaho ka fakapotopoto auloa mo e tau matakainaga ha tautolu ma e hatakiaga fakaagaaga ka takitaki a tautolu he “tau aho fakamui” ne tupu lahi e matematekelea. (2 Timo. 3:1) Ko e tau magaaho pihia to moua he tau fonoaga he faahimotu he 2008 hane hoko mai.
2. (a) Ko e ha ne aoga lahi ai ke ō he tau aho tolu oti he fonoaga? (e) Puhala fe kua lata ia tautolu ke kamata tauteute ke fakalataha atu ai?
2 Ō he Tau Aho Tolu Oti: Kua fakamafana atu a mautolu kia ō mai he tau aho tolu oti. He “aua neke tiaki e fakapotopotoaga ha tautolu,” to nakai fakatō e tautolu e tau kai fakaagaaga aoga lahi. (Hepe. 10:25) Kia kamata ke tauteute tuai he mogonei. To manako a koe ke fakailoa tuai ke he takitaki gahua haau ke taute e ia e ha fakatokaaga kua lata. Kaeke ka ō e fanau haau he aoga he magaaho he fonoaga, kia fakailoa ke he tau faiaoga e tau pulega haau. Tala age ki a lautolu ko e fonoaga ko e taha matapatu vala he tapuakiaga haau. Ti iloa mooli e koe kua fakamonuina e Iehova e tau laliaga haau ke tuku mua e tau mena he Kautu.—Mata. 6:33.
3. Ko e heigoa e tau puhala ka liga fakakite kua manamanatu a tautolu ke he falu?
3 Lagomatai Falu ke Ō: Ne ole foki a Paulo ke he tau matakainaga haana ke ‘manatu e tautolu ko e taha ke he taha.’ (Hepe. 10:24) Kua manako lagomatai nakai e tau matakainaga he haau a Fakaakoaga Tohi he Fakapotopotoaga ke ō ke he fonoaga? Maeke nakai a koe ke lagomatai e tau tagata fakaako Tohi Tapu haau ke ō atu ke he fonoaga, pete ni he taha e aho ka ō a lautolu? Magaaho ka tala age e koe ke he tau tagata nakai talitonu he magafaoa e tau pulega haau ma e fonoaga, kia uiina a lautolu ke ō mai mo koe. Ko e tau laliaga fakaalofa haau to liga tamai e tau monuina ofoofogia.
4. To moua fēfē mogoia e tautolu e tau fakailoaaga hagaao ke he tau aho mo e tau matakavi he tau fonoaga he faahimotu?
4 Moua e Tau Vala Tala: Ne totou teau e tau hea telefoni ne moua he la ofisa he tau tau takitaha he hūhū ko e fakahoko a fē mo e i fē e tau fonoaga. Ko e laulahi he tau hea telefoni ia ne mai ni he tau matakainaga ne fitā e moua e tau vala tala nei. Fakamua to hea e la ofisa, kua ole atu a mautolu ke kikite fakamua e fufuta he Ko e Kolo Toko, Aperila-Iuni, 2008.
5. Ko e heigoa kua lata ke taute e tautolu kaeke kua manako ke moua e tau vala tala ke he fonoaga ne nakai kotofa e fakapotopotoaga ha tautolu ki ai?
5 Kaeke ke fano a koe ke he fonoaga ne nakai kotofa e fakapotopotoaga haau ki ai, lata ke moua e tau vala tala he tohi atu ke he kaina he fonoaga he matapatu ne tū i tua he laupepa foou Special Needs Room Request. To fakafano e tau laupepa nei ke he tau tohikupu he fakapotopotoaga. Ke moua e tali, lata ke tuku i loto he tohi haau e fagatohi ne tū ai e kaina haau fakalataha mo e ulutohi.
6. Ko e heigoa falu fakamanatuaga hagaao ke he laupepa Special Needs Room Request?
6 Manako Lagomatai Pauaki: Kaeke ke ole lagomatai e tagata fakamatala ke fai kaina ke nofo ai, kua lata e Komiti Fekafekau he Fakapotopotoaga ke fifili kua latatonu kia e matakainaga ke fakapuke e laupepa Special Needs Room Request.
7. (a) Ko e heigoa e tau puhala ka liga fakaheke e tautolu a Iehova he ō ke he fonoaga? (e) Ha ko e mahani mitaki he tau matakainaga ha tautolu, ko e heigoa ne talahau he tau tagata gahua hotela?
7 Tau Gahua Mitaki: He omaoma ke he poaki a Iehova ke fakapotopoto auloa ke tapuaki ka ‘aoga ai ni a tautolu.’ Mua e aoga, kua foaki mai e tau magaaho ke fakaheke e higoa a Iehova. (Isaia 48:17) Ko e ha tautolu a “tau gahua mitaki . . . kua iloa maliali” ke he tau tagata tokologa he tau fonoaga he faahimotu, ti omoomoi falu ke fakakite e tau logonaaga ha lautolu. (1 Timo. 5:25) He taha maaga ne fakahoko e tau fonoaga ha tautolu ke he tau tau loga, ne pehē e takitaki he hotela: “Kua tala tumau e tau tagata he maaga nei hagaao ke he Tau Fakamoli a Iehova mo e kakano he tau fonoaga ha mutolu ki a mautolu. Iloa e mautolu ne fakameā he tau tagata ha mutolu e fale tolo [civic centre], ti kitia e mautolu a mutolu hane fakameā e tau paaka motokā. Ti kua fiafia lahi ai ke fakalataha mai e tau tagata ha mutolu mo mautolu he vahā mafana. Amanaki a mautolu ke matutaki e fakafetuiaga ha tautolu he tau tau i mua.” He mole e talahau e tau mena uka ne fakafehagai ki ai mo e falu matakau mo e tau tagata fakafiafia, ne tala e takitaki he hotela hagaao ke he agaaga kaufakalataha mo e fakauka he tau matakainaga ha tautolu he magaaho ne nonofo a lautolu he hotela. Ne pehē a ia, “Manako a mautolu ke tatai e tau tagata oti ne ahiahi mai mo e Tau Fakamoli a Iehova!” Ha ko e mahani he ha tautolu a tau matakainaga ati takitaki atu ke he tau talahauaga nei mo e loga atu foki ne kua liga tamai mooli e fiafia ke he loto he ha tautolu a Atua, ko Iehova!
8. Fakamaama fēfē he Mataio 4:4 e aoga he fanogonogo fakamitaki ke he tau vala takitaha he polokalama?
8 Ne pehē a Iesu kua falanaki e tau momoui ha tautolu ke he fanogonogo he “tau kupu oti ne to mai he fofoga he Atua.” (Mata. 4:4) He ha tautolu a tau fonoaga lagataha he tau, ne foaki e Iehova e ‘tau mena kai fakaagaaga ke he tau magaaho tonu,’ ne tauteute he “fekafekau fakamoli mo e loto matala.” (Mata. 24:45) Kua lahi e gahua he tauteute mo e folafola he galue fakaagaaga. Kia fakatātā ai e tautolu e loto fakaaue ma e leveki fakaalofa ha Iehova he ō mo e fanogonogo fakamitaki ke he tau vala takitaha he polokalama.
[Puha he lau 3]
Tau Magaaho he Polokalama:
Aho Faraile mo e Aho Faiumu
9:20 a.m. - 4:55 p.m.
Aho Tapu
9:20 a.m. - 4:00 p.m.