Fonoaga he Faahimotu “Muitua ke he Keriso!” he 2007 he Tau Fakamoli a Iehova
1, 2. (a) Fakamalolō fēfē e Mose e tau Isaraela ke aoga mai he fakapotopoto auloa? (e) Ko e heigoa e tau pulega kua lata ia tautolu ke kamata ke taute he mogonei?
1 Ne foaki e Mose e tau takitakiaga ma e tau Isaraela mo e tau tagata kehe oti ne nonofo i ai ke fakapotopoto auloa he tau tau fitu oti ke totou e Fakatufono ki a lautolu. Ko e heigoa e kakano? “Kia fanogonogo ai a lautolu, mo e ako ai e lautolu.” (Teu. 31:10-12) Ne kitia e Iehova kua lata ke fakapotopoto e tau tagata haana ke he tau matakau lalahi. Nakai leva, to liliu e tau tagata ha Iehova ke fakapotopoto ke he Fonoaga Faahimotu “Muitua ke he Keriso!” ke he tolu e aho.
2 Kua kamata nakai a koe ke fakatoka e tau tauteuteaga? Lata nakai a koe ke ole ke fai aho ka okioki mai he gahuaaga haau? Maeke nakai a koe ke lagomatai e tau tagata fakaako Tohi Tapu po ke magafaoa nakai talitonu haau ke fakatauō mo koe ke he fono? Kua fai foki nakai he fakapotopotoaga ne manako lagomatai ke o atu ke he fono? Kua pulega kia a koe ke finatu ke he fonoaga kehe ne nakai kotofa e fakapotopotoaga haau ki ai? To lata nakai a koe ke moua e poko he motela? To lagomatai he vala tala ne mui mai a koe ke tauteute tuai.
3. (a) Ko e heigoa e fakamooliaga he Isaia 25:6 kua kitia he vahā nei? (e) Ko e heigoa kua mailoga ke he numera tagata ne ō ke he fonoaga he Aho Faraile, ti ko e heigoa kua lata ia tautolu takitokotaha ke taute?
3 Fakalataha ke he Tau Aho Tolu Oti: Ne foaki e Iehova e tau mena kai fakaagaaga loga ma e tau tagata haana. (Isaia 25:6) Putoia ai e galue fakaagaaga ne foaki he tau fono ha tautolu lagataha he tau. Kua mailoga ai e to hifo lahi he numera tagata ne ō he Aho Faraile ka fakatatai ke he falu aho. Kia foli a koe ke ha ha he tau aho tolu he fonoaga atihake ne tauteute he fakatokatokaaga a Iehova ma tautolu! Kaeke kua lata ke ole ke fai aho ke okioki mai he gahuaaga haau, kia tuku ai ke he liogi. Ti he nakai leva e logona e koe e fakailoaaga he aho ka fono ai, kia “fakamalolo” ke tala age ke he takitaki gahua haau. (1 Tesa. 2:2; Nehe. 2:4, 5) Kua liga lagomatai ka fakamaama ki a ia ko e vala he tapuakiaga haau e fonoaga lagataha he tau. He taute tuai e mena nei ka liga mukamuka e takitaki gahua haau ke taute e tau hikihikiaga ke lata mo e ole haau.
4. Maeke fēfē ia tautolu ke tauteute tuai ha tautolu a tau tagata fakaako Tohi Tapu mo e tau tagata he magafaoa nakai talitonu ma e fonoaga?
4 Tauteute Tuai e Tau Tagata Fakaako Tohi Tapu mo e Magafaoa Haau: Ko e fiafia ha ia ka o mai e tau tagata fakaako Tohi Tapu haau mo koe ke he fonoaga, ti kitia maali e mafanatia he tau matakainaga Kerisiano ha tautolu “he fakapotopotoaga lahi”! (Sala. 22:25) Fakailoa tuai ki a lautolu ke maeke ia lautolu ke toka kehe taha magaaho ke o mai. Tala age ki a lautolu e tau kakano ne fiafia lahi a koe ke finatu ke he tau fono. Maeke ia koe ke tauteute tuai e tau tagata fakaako ke amanaki ki ai he fakakite ki a lautolu e tau vitiō ne fakatātā e tau fonoaga kua mole, mahomo ke he vitiō United by Divine Teaching. Fakailoa foki e tau pulega haau ke he tau tagata he magafaoa nakai talitonu. Liga to pulega a lautolu ke fakalataha mai mo koe ke he fono ke kitekite e taute tala po ke o mai ke taha ni e aho.
5, 6. (a) Fakatātā fēfē e tautolu e aga fakamokoi ne hagaao ki ai he 1 Timoteo 6:18? (e) Ko e heigoa e foakiaga ne taute ke lagomatai falu ne liga manako lagomatai ke moua e mena ke nonofo ai?
5 Lagomatai e Tau Matakainaga Haau: Ne tomatoma he aposetolo ko Paulo e tau Kerisiano ne muhukoloa ke ‘kia mahani mitaki, kia maukoloa ke he tau gahua mitaki, kia fakamokoi, mo e ta atu noa e tau mena.’ (1 Timo. 6:17, 18) Maeke ia tautolu ke fakakite e aga fakamokoi ne talahau e Paulo kaeke ke manamanatu a tautolu ke he tuaga he tau matakainaga fuakau mo e gagao, lautolu ne fekafekau mau, tau magafaoa ne matua tokotaha, mo e liga falu he fakapotopotoaga ne manako lagomatai ke o atu ke he fonoaga. Kua fakalago fakamua ke he tau magafaoa tino he kupu mooli ke lagomatai a lautolu nei, ka kua lata he tau motua mo e falu foki ke fakakite e manamanatuaga mo e foaki e lagomatai kua lata.—Kala. 6:10; 1 Timo. 5:4.
6 Ka manako lagomatai taha he fakapotopotoaga ke moua e mena ke nofo ai, kua lata he Komiti Fekafekau he Fakapotopotoaga ke fifili ko e latatonu nakai e matakainaga fakailoa ia ke ole ma e Special Needs Room Request.
7. Ko e heigoa e tau hatakiaga ne foaki mai kaeke lata ia tautolu ke o atu ke he fonoaga kehe ne nakai kotofa e fakapotopotoaga ha tautolu ki ai?
7 Fano ke he Taha Fonoaga: To tohi i loto he Kolo Toko ia Mati 1, 2007 e tau fonoaga oti he la matakavi i Niu Silani. Kaeke ke manako a koe ke moua falu fakailoaaga ma e taha fonoaga ne nakai kotofa e fakapotopotoaga haau ki ai, liga tohi a koe ke he fonoaga ia he fakaaoga e kaina ne moua he tohikupu he fakapotopotoaga i tua he laupepa Special Needs Room Request foou. Ke liu e fakatokatokaaga he fonoaga ke tohi ki a koe, ua nimo ke tuku e tohi haau he fagatohi ne tū ai e higoa he kaina haau mo e ulu tohi.
8, 9. (a) Ko e heigoa e tau tauteuteaga ne taute ma tautolu ato hohoko atu a tautolu ke he fonua he fonoaga? (e) Fakakite fēfē e tautolu e loto fakaaue mo e oue tulutulou ma e tau gahua oti ne taute ma tautolu? (Totou Hepe. 13:17.)
8 Kaufakalataha mo e Tau Fakaholoaga: Ka hohoko atu a tautolu ke he fonua he fonoaga, kua kitia maaliali e gahua lahi ne taute ma tautolu. Kua fakafeleveia mai mo e foaki mai he tau fekafekau totonu ki a tautolu e tau polokalama, ti lagomatai a tautolu ke moua e tau nofoa. Kua fakameā he tau matakainaga e fale mo e tuku hake e tulana fulufuluola. Kua aoga lahi foki e tau gahua nakai kitia ne tauteute ma e tau vala polokalama, mo e ke leveki falu a mena loga foki.
9 He tau fono takitaha, kua tokologa e matakainaga ne gahua ke he tau mahina loga ke taute e tau fakaholoaga, ti kua lagomatai foki e tau magafaoa ha lautolu he toka a lautolu ke fai magaaho ke leveki e tau matagahua aoga nei. Kua nakai kia loto fakaaue a tautolu ke he tau magaaho foaki noa ne taute ke aoga ai a tautolu takitokotaha? Maeke ia tautolu ke fakakite e oue tulutulou he omaoma ke he tau hatakiaga i loto he vala tala nei mo e falu takitakiaga foki ka liga moua e tautolu ato hoko e fono. (Hepe. 13:17) Ko e fakamakai mo e kaufakalataha he tau tagata katoa ati maeke ai e tau mena oti ke “fulufuluola mo e taute fakamitaki.”—1 Kori. 14:40.
10. (a) Ko e ha kua aoga lahi ke fakapotopoto e tau tagata ha Iehova he vahā ha tautolu? (e) Ko e heigoa kua lata ia tautolu takitokotaha ke taute mogonei?
10 He “kitia e [ta]utolu kua tata tuai e aho,” ati aoga lahi ma e tau tagata he Atua ke fakapotopoto auloa. (Hepe. 10:25) Ke he tau fono Kerisiano ha tautolu, ne foaki he fekafekau fakamooli mo e loto matala e tau vala tala ke lagomatai a tautolu ke “eke ai e tau kupu oti” ne manako a Iehova ke muitua a tautolu ki ai. (Teu. 31:12) Kia kamata ā mogonei ke tauteute e tau pulega ke o atu he tau aho tolu oti he Fonoaga Faahimotu “Muitua ke he Keriso!” ti aoga mai he tau hatakiaga fakaagaaga oti mo e he tau fioaga fiafia!
[Puha he lau 3]
Tau Magaaho he Polokalama
Aho Faraile mo e Aho Faiumu
9:20 a.m. - 5:05 p.m.
Aho Tapu
9:20 a.m. - 4:10 p.m.