Fonoaga Fahimotu “O Fano mo e Atua” he 2004 he Tau Fakamoli a Iehova

¹ Ko e heigoa he ha tautolu a tau fonoaga fahimotu lagataha he tau ne kua kehe pauaki ki a koe? Ko e tau lauga atihake mo e taute tala kia ne kua tauteute he “fekafekau fakamoli mo e loto matala”? (Mata. 24:45-47) Tau tohi fou ne ha ha i ai e tau mena kai fakaagaga ma e magaaho tonu? Tau mena tutupu kia ne talahau he tau matakainaga tane mo e fifine ke he tau puhala ne hiki he Tohi Tapu e tau momoui ha lautolu ke he mitaki? Tau hokotaki he holo ki mua he gahua fakamatala he Kautu he falu motu? Lafiaga mo e tau matakainaga tapuaki ne kehekehe e tau tau moui? E, kua amaamanaki lahi a tautolu ke he tau fonoaga ha tautolu mo e fiafia ma e tau mena nei mo e loga atu foki e falu kakano!

² Kia O Atu he Tolu e Aho Katoa: Puhala ia Mose, ne poaki a Iehova: “Kia fakapotopoto ai e koe e motu, . . . kia fanogonogo ai a lautolu, mo e ako ai e lautolu.” (Teu. 31:12) Puhala he vahega fekafekau fakamoli mo e loto matala, kua tauteute e Iehova e polokalama fakaako pauaki ma tautolu he tau aho takitaha he fonoaga ha tautolu. Ha kua fakaako e ia a tautolu ke ‘aoga a tautolu ni,’ kua manako a tautolu ke haia i ai ma e tau fakaakoaga oti hana. (Isaia 48:17) Ka lata ia koe ke ole ke he takitaki gahua hau ma e taha magaaho ke nakai gahua, liogi ki a Iehova ti taute e ole hau, he muitua ke he fakafifitakiaga he malolo ha Nehemia. (Nehe. 1:11; 2:4) Pihia foki, ko e manatu fakaalofa ke fakailoa tuai ke he tau tagata he magafaoa hau ne nakai talitonu hagaao ke he tau fakatokaaga hau ma e fonoaga.

³ Tau Nonofoaga: Laulahi he tau tagata fakailoa kua uta ke he tau loto e tau takitakiaga maama ne tuku mai he tau tau gahoa kua mole i loto he uho hagaao ke he fonoaga he Ha Tautolu a Fekafekauaga he Kautu ia Me, mo e loga e tau fua mitaki hane moua. Pete ia, kua aoga agaia ke ole ke he tau tagata oti ke FAKAMOLEMOLE MUMUITUA KE HE TAU HATAKIAGA NAI KE MOUA E TAU NONOFOAGA HE MOTELA:

(a) Fakamolemole ua fakamau tuai e motela ne nakai amanaki a koe ke fakaaoga po ke fakamau ke loga e motela he manatu ke fakakiakia takitaha mua to fifili e motela kua mitaki lahi, ti tiaki e faoa ne toe. (Mata. 5:37) Nakai ko e mahani totonu anei, ti taofi foki e tau motela he moua e tau feua pisinisi ne kua lata ia lautolu ke moua. Kua nakai maeke foki e falu tagata fakailoa ke fakaaoga e tau poko ia, ne kua fa manako lahi ki ai.

(e) Ua fakamau e tau poko ma hau po ke falu ka e nakai age e tau higoa mo e fakafano fakamafiti e tau tupe fakamau ma e tau poko takitaha. Ka nakai fai tupe fakamau, ha ha he motela e tonuhia ke age e poko hau ke he taha tagata foki.

(i) Ua tuku he poko ke molea e tagata ke he mena ne fakaata he matafakatufono mo e he motela, na fa mahani ke nakai molea e fa po ke lima e tagata, fakalataha mo e tau tama. Manatu, na totogi e koe e tupe katoatoa he fakave ke he numera he tau tagata ne TALIA e koe ke nonofo he poko.

(o) Ua fano tuai ato ta e matahola 1:00 p.m. po ke heigoa ni e fakatokaaga he motela. Liga mitaki ke o atu ki ai ka hili e fonoaga he aho ia, ha kua fita e poko hau he totogi e tupe fakamau.

(u) Ua kaitunu po ke fakamafana mena kai he poko ato kehe ai ni ka fai peito mo fakaaoga, mo e fakaeneene ke ua takiva ha mena he poko aki e tau mena kai.

⁴ Manako Lagomatai Pauaki: Ne fakamanatu he aposetolo ko Paulo ke he tau fakapotopotoaga i Kalatia ‘kia mahani mitaki a tautolu ke he tau tagata oti kana, ka e au atu ke he faoa ne tua.’ (Kala. 6:10) Ko e tau matakainaga tane mo e fifine kua momotua, kua nakai tino malolo, tau matua tokotaha, po ko lautolu he gahua mau kua liga nakai ole ke he lagomatai hau, ka e liga ha ha ia lautolu e tau paleko ka fehagai ki ai ke maeke ke o atu ke he fonoaga. Maeke nakai ia koe ke “mahani mitaki” atu ki a lautolu mo e foaki falu lagomatai? Ko e tau magafaoa Kerisiano mo e tau motua kua latatonu ke mataala ke he tau tutuaga ha lautolu ne pihia.

⁵ Kaeke tuku age he tagata fakailoa e laupepa Special Needs Room Request, to kitekite ki ai e Komiti Fekafekau he Fakapotopotoaga, he fakaaoga e tau fakamaamaaga he laupepa. Kua lata ia lautolu ke manamanatu kua maeke nakai e ole lagomatai ke taute ni he matakavi. Ko e tauteaga nei kua lata ni ma e tau tagata fakailoa ne mitaki e tau tutuaga, mo e ha lautolu a tau fanau mahani mitaki. Kaeke fai huhu e Rooming Department hagaao ke he ole lagomatai pauaki, to matutaki atu a lautolu ke he tohikupu he fakapotopotoaga.

⁶ Fano ke he Taha Fonoaga: Ko e matakavi kua kotofa a koe ke fano ki ai ko e matakavi kua tata atu ke he fakapotopotoaga hau. Ko e tau fakatokatokaaga ke loga e nofoa, tohi, poko nonofo, mo e falu foki, kua fakave ke he fuafuaaga he tokologa e tagata fakailoa ka o atu ke he fonoaga kua kotofa ki ai e fakapotopotoaga ha lautolu. Pete ia, ka fai kakano mitaki a koe ke fakalataha atu ke he fonoaga ne nakai kotofa a koe ki ai mo e kua manako nofoaga, mo e falu mena foki, maeke e tohikupu he fakapotopotoaga ke atu ki a koe e tau matapatu kaina he fonoaga ka nakai maeke ia koe ke taute e tau fakatokatokaaga hau ni. Ka tohi a koe ma e poko po ke falu vala tala, tuku foki e faga tohi ne tu e higoa he kaina hau mo e pili ai e ulu tohi fakalataha mo e ole hau. Ka loga e fonoaga ka fakahoko ke he taone ia, kia mailoga ke fakakite e tau aho he fonoaga ka fakalataha a koe ki ai.

⁷ Ke he fonoaga he tau tagata ha Iehova ne taute he kavi ke teitei 2,500 e tau tau kua mole, ko Esera mo e tau matakainaga Levi hana ne totou mai he Kupu he Atua mo e fakamaama ai ke he tau tagata ne fakapotopoto. Ko e fua? Talahau he Nehemia 8:12 ki a tautolu “ti o atu ai e tau motu oti . . . mo e olioli lahi ai, ha kua logona ai e lautolu e tau kupu ne fakailoa atu kia lautolu.” Kua nakai kia fakaaue lahi a tautolu ke he vahega fekafekau fakauku, ne tuga a Esera mo e tau Levi, ne fakaaoga e Kupu he Atua, fakamaama ai, mo e fakakite ki a tautolu e puhala ke fakagahuahua aki ke he tau momoui ha tautolu? He taute pihia, ko e fekafekau ia kua fakaata e fakaalofa moli ha Iehova mo e manamanatu ke he tau tagata oti Hana. Kia eke ia mo manatu malolo hau ke nakai to noa ha aho he Fonoaga Fahimotu “O Fano mo e Atua”!

[Puha he lau 3]

Tau Magaaho he Fonoaga

Aho Faraile mo e Aho Faiumu

9:30 a.m. - 5:05 p.m.

Aho Tapu

9:30 a.m. - 4:05 p.m.

[Fakafonua he lau 5]

MATAKAVI TAU AHO TAU TAKAIAGA

Mateialona Road

Nuku‘alofa

160 Clevedon Road

Papakura

Pascal Street

Palmerston North

Pascal Street

Palmerston North

Whiteleigh Avenue, Addington

Christchurch

Mystery Creek Road

Hamilton

Mystery Creek Road

Hamilton

Vaimaanga, Rarotonga

Cook Islands