Fonoaga he Fahimotu “Omaoma Mahani Atua” he 2005 he Tau Fakamoli a Iehova
1 Ko e ha tautolu a Faiaoga Homo Ue Atu, ne taute e Iehova ko e Atua e fakaholoaga ma tautolu ke fakapotopoto ke fakaako e tau puhala hana. (Isaia 30:20, 21; 54:13) Kua taute ai e ia puhala he vahega fekafekau fakamoli mo e loto matala, ne taute e tau feleveiaaga tuga e tau fonoaga he fahimotu he tau tau takitaha. (Mata. 24:45-47) Kua tatai e tau manatu ha tautolu mo e salamo ko Tavita, ne lologo: “To fakamonu au kia Iehova ki mua he fakapotopotoaga.” (Sala. 26:12) Ne maama mitaki e Tavita e aoga he fakaako e Iehova ati fakamalolo ke fakalataha mo e tau tagata Hana ke he tau mena ne fakapotopoto ai a lautolu.
2 To haia nakai a koe he “fakapotopotoaga” ka o ke he Fonoaga he Fahimotu “Omaoma Mahani Atua” he tau nei? Kaeke pihia, ko e fakatonuaga ka mui mai to lagomatai a koe ke taute e tau tauteuteaga ke hoko atu.
3 Fakatokatoka Mogonei ke O he Tau Aho Oti: “Ko e tau manatu he tagata ne malolo ke gahua kua hiku ia ke he muhu mena.” (Fakatai 21:5) Kua nakai kia peehi he tau kupu ia e lata ke taute tuai e tau fakatokatokaaga ke o ke he fonoaga? Ke iloa moli to nakai fakato ha polokalama fakahauhau fakaagaga, kia taute fakapulotu mogonei ha fakaholoaga ne kua lata ke maeke ke o atu he tau aho tolu oti. Kaeke lata ia koe ke ole ke he takitaki gahua hau ma e taha magaaho ke nakai gahua, kia taute a he mogonei. Ka lata foki ia koe ke pulega e tau fakatokatokaaga hau mo e hoa nakai talitonu hau, kia nakai fakatali ke he magaaho fakamui. Ko e heigoa ni e tau paleko kua fehagai mo koe, kia liogi ki a Iehova mo e talitonu to “fakamau ai e ia e tau mena ne manamanatu ki ai a koe.” (Fakatai 16:3) Lafi ki ai, kua mitaki ke lagomatai e tau tagata fakaako Tohi Tapu mo e tau tauteuteaga ha lautolu ke ha ha ai he tau fakaholoaga oti.
4 Tau Nonofoaga: Laulahi he tau tagata fakailoa kua uta ke he tau loto e tau takitakiaga maama ne tuku mai he tau tau gahoa kua mole i loto he uho hagaao ke he fonoaga he Ha Tautolu a Fekafekauaga he Kautu ia Me, mo e loga e tau fua mitaki hane moua. Pete ia, kua aoga agaia ke ole ke he tau tagata oti ke FAKAMOLEMOLE MUMUITUA KE HE TAU HATAKIAGA NAI KE MOUA E TAU NONOFOAGA HE MOTELA:
(a) Fakamolemole ua fakamau tuai e motela ne nakai amanaki a koe ke fakaaoga po ke fakamau ke loga e motela he manatu ke fakakiakia takitaha mua to fifili e motela kua mitaki lahi, ti tiaki e faoa ne toe. (Mata. 5:37) Nakai ko e mahani totonu anei, ti taofi foki e tau motela he moua e tau feua pisinisi ne kua lata ia lautolu ke moua. Kua nakai maeke foki e falu tagata fakailoa ke fakaaoga e tau poko ia, ne kua fa manako lahi ki ai.
(e) Ua fakamau e tau poko ma hau po ke falu ka e nakai age e tau higoa mo e fakafano fakamafiti e tau tupe fakamau ma e tau poko takitaha. Ka nakai fai tupe fakamau, ha ha he motela e tonuhia ke age e poko hau ke he taha tagata foki.
(i) Ua tuku he poko ke molea e tagata ke he mena ne fakaata he matafakatufono mo e he motela, na fa mahani ke nakai molea e fa po ke lima e tagata, fakalataha mo e tau tama. Manatu, na totogi e koe e tupe katoatoa he fakave ke he numera he tau tagata ne TALIA e koe ke nonofo he poko.
(o) Ua fano tuai ato ta e matahola 1:00 p.m. po ke heigoa ni e fakatokaaga he motela. Liga mitaki ke o atu ki ai ka hili e fonoaga he aho ia, ha kua fita e poko hau he totogi e tupe fakamau.
(u) Ua kaitunu po ke fakamafana mena kai he poko ato kehe ai ni ka fai peito mo fakaaoga, mo e fakaeneene ke ua takiva ha mena he poko aki e tau mena kai.
5 Manako Lagomatai Pauaki: Ne talahau e aposetolo ko Paulo hagaao ke he falu matakainaga ne “fakamafana” ki a ia. (Kolo. 4:7-11) Taha he tau puhala ne lagomatai e lautolu he foaki e lagomatai fakatagata ki a Paulo. Maeke fefe ia koe ke “fakamafana” ke he falu he hagaao ke he fonoaga? Ko e tau tagata fakailoa kua fuakau, lautolu ne matulituli, lautolu he fekafekau mau, mo e falu foki kua lata ke moua e lagomatai mo e tau peleoafi po ke tau nonofoaga. Ha ha he tau magafaoa e kotofaaga fakamua ke leveki a lautolu ia. (1 Timo. 5:4) Kaeke nakai maeke ia lautolu, kua liga maeke he tau katofia talitonu ke lagomatai. (Iako. 1:27) Ko e tau leveki he fakaakoaga tohi he fakapotopotoaga kua lata ke fakakia a lautolu he matakau ne manako lagomatai pauaki ke iloa moli kua tauteute tuai e tau fakatokatokaaga ha lautolu ma e fonoaga.
6 Ko e tau laupepa Special Needs Room Request kua lata ni ma e tau tagata fakailoa ne nakai maeke e tau manako lagomatai ha lautolu ke leveki he tau tagata he magafaoa po ke fakapotopotoaga ha lautolu. Ko e Komiti Fekafekau he Fakapotopotoaga kua lata ke kitekite ke he tau fua mitaki he tagata fakailoa, he fakaaoga e tau fakatonuaga he laupepa ti pihia foki he tohi ia Novema 30, 2004 ke he tau kau oti he tau motua. Ko e foakiaga nei ma e tau tagata fakailoa ni he tau tutuaga mitaki, fakalataha mo e fanau mahani mitaki ha lautolu.
7 Fano ke he Taha Fonoaga: Ke iloa moli kua loga e nofoa, tau tohi, tau poko nonofo, mo e falu mena foki, kua fakamafana ke he tau tagata fakailoa ke o ke he fonoaga ne kotofa ki ai e fakapotopotoaga ha lautolu. Kaeke fano a koe ke he fonoaga kehe ha ko e hau a tau tutuaga, fakamolemole finatu ke he tohikupu he fakapotopotoaga ke moua e numera he puha fakahu tohi he fonoaga ka fano ki ai a koe, ne tohi i tua he laupepa Special Needs Room Request. Kia mataala ke tuku i ai e faga tohi ne tu e higoa he kaina hau mo e ulu tohi fakalataha mo e ole ma e Recommended Lodging List po ke ha fakailoaaga foki. Ka loga e fonoaga ka fakahoko ke he taone ia, kia mailoga ke fakakite e tau aho he fonoaga ka fakalataha a koe ki ai.
8 Manako Tagata Gahua Foaki Noa: Ne fakatoka e Iesu e fakafifitakiaga mitaki katoatoa he lagomatai mo e loto fakatokolalo e tau manako he falu. (Luka 9:12-17; Ioane 13:5, 14-16) Ko lautolu ne gahua foaki noa ke gahua he fonoaga kua fakakite foki e agaga ia. Ke fakapuke e tau manako he tau fahi gahua he fonoaga, nakai leva to uiina he tau Komiti he Fonoaga e falu ke gahua mo lautolu. Kua ha ha ai e manako pauaki ma e tau motua ke foaki noa e tau magaaho mo e talia e tau kotofaaga. Ne fakatoka he agaga fakamakai ha lautolu e fakafifitakiaga mitaki ma lautolu oti i loto he fakapotopotoaga.—1 Pete. 5:2, 3.
9 Kitiaaga he Falu: Ne talahau he takitaki gahua he hotela: “Ko mutolu ko e matakau ne fiafia lahi a mautolu ki ai. Kua mitaki lahi e mahani ha mutolu mai he ha matakau foki. Ne nava lahi e tau tagata gahua ke he puhala lilifu ne fakakite ki a lautolu. Ti kua manako e tau tagata oti ke gahua he matahiku fahitapu ka o mai a mutolu!” Ne talahau foki he taha tagata he hotela: “Kua mukamuka lahi ke gahua mo e Tau Fakamoli a Iehova.” Liga lafi e mahani mitaki hau ke he tau talahauaga nei. Manamanatu la ke he fiafia lahi ha Iehova he kitia a tautolu hane taute e tau mena kua tamai e tau fakahekeaga pihia!—1 Pete. 2:12.
10 He puhala he “fekafekau pule,” ne taute e Iehova ko e Atua e fakaholoaga ma e tau tagata hana ke fakapotopoto ma e fakaakoaga fakaagaga he lotoga he tau nei. (Luka 12:42) He tauteute ke fakalataha ki ai he tau aho oti ne tolu kua lata ke gahua fakalahi ka e to ha ha ai e aoga ka moua mai. Ko e Fonoaga he Fahimotu “Omaoma Mahani Atua” he tau nei to fakamalolo moli e fifiliaga ha tautolu ke fekafekau ki a Iehova mogonei ke hoko ke he tukulagi. Kia fakamalolo a tautolu ke mumui ke he tomatomaaga he salamo: “Kia fakaaue ke he Atua ke he fakapotopotoaga.”—Sala. 68:26.
[Puha he lau 3]
Tau Magaaho he Fonoaga
Aho Faraile mo e Aho Faiumu
9:30 a.m. - 5:05 p.m.
Aho Tapu
9:30 a.m. - 4:10 p.m.