Fonoaga he Fahimotu “Kua Tata Mai e Laveakiaga” he 2006 he Tau Fakamoli a Iehova
1. Fakatātā fefe he tau tagata he Atua e loto fakaaue ha lautolu ma e tapuakiaga moli he tau vaha i tuai, ti ko e heigoa e magaaho pihia ne moua e tautolu he vaha nei?
1 Ne fakaaoga he Patuiki ko Hesekia ha Iuta i tuai e tau fekafekau ke tamai lima e tohi ne poaki e tau tagata ke fakapotopoto auloa ki Ierusalema. (2 Nofo. 30:6, 13) Ne fakakite he tau tali he tau tagata e aga ha lautolu ke he tapuakiaga moli. (2 Nofo. 30:10-12) He tau mahina i mua, to moua foki he tau fekafekau ha Iehova he vaha nei taha magaaho pihia ke fakatātā e loto fakaaue ha lautolu ma e monuina he fakapotopoto auloa ke tapuaki ki a Ia. Kua fai tohi ne ta atu ke he fakapotopotoaga ke uiina a koe ke fano ke he Fonoaga he Fahimotu “Kua Tata Mai e Laveakiaga.” To fefe e tali hau ke he uiina ia?
2. Ko e heigoa ka taute e tautolu mogonei ke aoga katoatoa mai he fonoaga?
2 Taute e Tau Fakaholoaga Mogonei: Ke aoga katoatoa mai he polokalama fakaagaaga ne tauteute mo e fakamoli, lata ia tautolu ke fakalataha ke he polokalama katoa. Kia fakapulotu mo e kamata he mogonei ke taute ha fakaholoaga kua lata mo koe mo e magafaoa haau ke o he tau aho tolu katoa. (Fakatai 21:5) Ko e tau tauteuteaga pihia kua putoia e ole ke he takitaki gahua ke fai magaaho okioki, pulega mo e hoa hau ne nakai ko e Fakamoli, taute e tau fakamauaga he motela, mo e lagomatai e tau tagata fakaako Tohi Tapu ke o he tau aho takitaha. Ua toka e tau mena aoga nei ke he magaaho fakamui. Ka e lata ke liogi ki a Iehova hagaao ki ai, he falanaki ‘to eke ai e ia.’—Sala. 37:5.
3, 4. Ko e heigoa e tau manatu aoga kua lata ke tokaloto e tautolu ka taute e tau fakamauaga he motela, mo e ko e ha?
3 Tau Fakamauaga he Motela: Kua aoga ke fakamau ni e tau poko he motela ka fakaaoga moli e koe he magahala he fonoaga. Ka e ka fita he talia e koe mo e he falu ke taute pihia ti kua age e tau higoa kua lata, fakamolemole kia nakai fakamau e tau poko motela ma e falu tagata foki. Kua fakavai he mena nei e tau numera he tau poko ne fakamau ma e fonoaga ti uka ma e falu ke taute e fakamauaga. Lata ke taha ni e higoa he tagata ka fakamau he tau poko takitaha he motela mai ia lautolu ka fakaaoga ai.
4 Ke fakamoli e fakamauaga hau, lata ia koe ke fai tupe ke toka aki e tau poko takitaha he motela. Neke age he motela e poko hau ke he falu tagata.
5, 6. Maeke fefe ke leveki a lautolu ne manako lagomatai pauaki?
5 Manako Lagomatai Pauaki: Pehe e Tau Fakatai 3:27: “Aua neke lamakai e koe e mena mitaki kia lautolu kua lata ki ai, ka kua maeke kia koe ke eke.” Puhala fe ka taute e koe e mitaki ke he falu he felauaki mo e fonoaga? Ko e tau tagata fakailoa momotua, tau tagata matulituli, tau fekafekau mau, mo e falu foki kua liga lata ke moua lagomatai ke he tau peleoafi po ke tau nonofoaga. Kua fakamua ke he tau magafaoa e matagahua ke leveki e tau manako ha lautolu ia. (1 Timo. 5:4) Ka nakai maeke ia lautolu, liga lata he tau katofia talitonu ke lagomatai. (Kala. 6:10) Lata he tau leveki he fakaakoaga tohi ke iloa moli ko lautolu he matakau ne manako lagomatai pauaki kua fakatokatoka tuai e tau pulega ma e fonoaga.
6 Tau laupepa Special Needs Room Request ma e tau tagata fakailoa hokoia ne manako nonofoaga ti kua nakai maeke taha he magafaoa po ke fakapotopotoaga ha lautolu ke leveki. Kua lata he Komiti Fekafekau he Fakapotopotoaga ke mailoga e tau lataaga he tagata fakailoa, he fakaaoga e tau fakatokatokaaga he laupepa ti pihia foki he tohi ia Novema 30, 2005, ke he tau matakau motua oti. Kua pauaki ni e foakiaga nei ma e tau tagata fakailoa he tuaga mitaki, mo e fanau mahani mitaki foki ha lautolu.
7. Ko e ha kua lata ia tautolu ke o ke he fonoaga ne kotofa ki ai?
7 O ke he Fonoaga Kotofa ha Mutolu: Ke iloa moli to loga e nofoa, tau tohi, tau poko nonofo, mo e falu mena foki, kua fakamafana ki a mutolu ke o ke he fonoaga ne kotofa ki ai e fakapotopotoaga ha mutolu.
8. Ko e heigoa taha puhala ka lafi e tautolu ke he fiafia he fonoaga ka hau?
8 Tau Tagata Gahua Foaki Noa Fakamakai: Nakai fakauaua to lahi e fiafia ka moua he tau tagata oti ne o ke he fonoaga mo e aoga mai he tau mena kai fakaagaaga mo e tau magaaho ma e feoakiaga atihake. To lahi mahaki foki e fiafia ha tautolu kaeke foaki noa a tautolu ke lagomatai e gahua kua lata ke fakakautu aki e fonoaga. (Gahua 20:35) Nakai leva to uiina he tau Komiti he Fonoaga he matakavi falu ke lagomatai e gahua nei. Maeke nakai ia koe?—Sala. 110:3.
9. Ko e heigoa ne loto fakaaue a koe hagaao ke he fonoaga he fahimotu ne lagataha he tau, ti ko e heigoa mogoia e fakamaloloaga hau?
9 He taha fonoaga he fahimotu, ne pehe e tama tane lima tau: “Ko e fonoaga he fahimotu ko e vala ne fiafia lahi au ki ai he tapuakiaga a Iehova.” Kua lagomatai he talahauaga mai he loto ia a tautolu oti ke loto fakaaue ke he olioli lahi ha tautolu he o ke he fonoaga he fahimotu ne lagataha he tau. Kua moli tuga ne lologo he salamo: “Kua mua e mitaki he aho taha ke he hāu a tau lotopā, ke he taha afe e tau aho kehe.” (Sala. 84:10) Ne fakakite e Tavita ke he lologo e manako hana ke ‘nofo a ia ke he fale a Iehova ke he tau aho oti he hana moui mo e kumikumi ke he faituga a Iehova.’ (Sala. 27:4) Ne fiafia lahi a Tavita ke fakalataha mo e tau tagata tapuaki ha Iehova. Kia fifitaki e tautolu e loto fakaaue hana ma e tapuakiaga moli he o ke he tau aho tolu oti he Fonoaga he Fahimotu “Kua Tata Mai e Laveakiaga.”
[Puha he lau 3]
Tau Magaaho he Fonoaga
Aho Faraile mo e Aho Faiumu
9:30 a.m. - 5:05 p.m.
Aho Tapu
9:30 a.m. - 4:10 p.m.