Fonoaga Fahimotu “Tau Tagata Fakapuloa Fakamakai he Kautu” he 2002 he Tau Fakamoli a Iehova

¹ “Ne fiafia au he pehe mai a lautolu kia au, Kia o a tautolu ke he fale a Iehova.” (Sala. 122:1) He kumikumi e talahauaga he salamo, mailoga (1) e puhala ne logona hifo he magaaho ne uiina a ia ke fakalataha he tapuaki atu ki a Iehova, (2) ko e feoaki mitaki hana, ne fiafia lahi foki ke he tapuaki mea, mo e (3) ko e fakatokaaga nukua lata ke fakalaulahi e uiina, ke fakalataha auloa, mo e fenoga atu ke he fale he Atua.

² Nakai kia taogo e kupu he salamo he tau loto ha tautolu he logona hifo e tautolu e tau fakatokaaga kua taute ke lata mo e fonoaga ha tautolu hane hau? Kua puke a tautolu he amaamanakiaga he liu a tautolu manatu e tau olioli he tau fonoaga kua mole mo e monuina foki he liu feleveia ke he fakalatahaaga pauaki mo e tau matakainaga ofania ha Iehova. Ko e tau fakatokaaga ne taute ke lata ma e tolu e aho he Fonoaga Fahimotu “Tau Tagata Fakapuloa Fakamakai he Kautu” he 2002 he la matakavi i Niu Silani katoa. Ko e magaaho anei ke taute e tau fakatokaaga ke fakalataha atu mo e moua e aoga katoatoa mai he galue fakaagaga hane fakatali mai ki a tautolu.

³ Ko e “fekafekau pule, kua fakamoli a ia mo e loto matala,” nukua kamata tauteute e tau mena kai fakaagaga kua lautonu ke folafola ai he fonoaga. (Luka 12:42) Ne kotofa ai e tau fakapotopotoaga takitaha ke he fonoaga pauaki ke nakai apiapi e matakavi fonoaga mo e tau kaina hotela/motela. Lafi ki ai, tokologa e tau matakainaga tane ne kamata tuai ke fakatokatoka e tau fahi kehekehe he fonoaga ke maeke he “tau mena oti mo e fulufuluola mo e taute fakamitaki.” (1 Kori. 14:40) Ha kua loga lahi e tau mena ne fita he fakatoka ma e aoga mo e lagomataiaga ha tautolu, ko e heigoa ha tautolu fakatagata ka tauteute ma e fonoaga?

⁴ Taute e Tau Fakatokatokaaga ma e Nofoaga Hau: Laulahi he tau tagata fakailoa kua tokaloto e hatakiaga maama ne foaki mai he uho he Ha Tautolu a Fekafekauaga he Kautu ia Me he tau tau gahoa kua mole hagaao ke he fonoaga, ti loga e tau fua mitaki ne moua mai ai. Pete ia, kua lata agaia ke ole ke he tau tagata oti FAKAMOLEMOLE KIA MANATU KE MUITUA E TAU HATAKIAGA NAI KE MOUA E TAU NONOFOAGA HE MOTELA:

(a) Fakamolemole ua fakamau tuai e tau motela ne nakai amanaki a koe ke fakaaoga po ke loga e motela ka fakamau mo e fakakiakia mua ai mogoia ti fifili e motela kua mitaki lahi, ti tiaki hifo e faoa ne toe. (Mata. 5:37) Nakai totonu e mena nei, ti taofi foki e tau motela mai he moua e tau feua pisinisi kua lata. Kua nakai maeke foki he falu tagata fakailoa ke fakaaoga e tau poko ia, ne kua fa manako lahi ke fakaaoga he falu magaaho.

(e) Ua toka e tau poko ma hau po ke falu ka e nakai age e tau higoa mo e fakafano fakamafiti e tau tupe fakamau ma e tau poko takitaha. Ka nakai fai tupe fakamau, ha ha he motela e tonuhia ke age e poko hau ke he taha tagata foki.

(i) Ua tuku tokologa e tau tagata he poko ke he mena ne fakaata he matafakatufono mo e he motela, ne kua fa mahani ni ke nakai molea e fa po ke lima e tagata, fakalataha mo e tau tama. Manatu, na totogi e koe e katoatoa he fakave ke he numera he tau tagata ne kua TALIA e koe ke he poko.

(o) Ua fano tuai ato hoko e matahola 1:00 p.m. po ke heigoa ni e fakatokaaga he motela. Kia fina atu a koe ka oti e fakaholoaga he aho ia, ha ko e mena fita he fakamau he tupe hau e poko.

(u) Ua kaitunu po ke fakamafana mena kai he poko ato fai peito pauaki, ti fakaeneene ua takiva e poko aki e tau mena kai.

⁵ Ko e muitua ke he takitakiaga nei kua foaki mai ki a tautolu e magaaho ke fakatata e fakaalofa ha tautolu ma e tau matakainaga Kerisiano ha tautolu. (1 Kori. 10:24; 1 Timo. 6:8.) Ti, ke moumou e fakatufono ke he tau mena nei ka ta mai ai e ekefakakelea ke he higoa mo e fakatokatokaaga a Iehova.​—Sala. 119:168.

⁶ Onoono Viko ke he Fakapotopotoaga: Ka mailoga e tautolu e matakainaga ha tautolu kua lata mo e lagomatai fakatino po ke koloa nukua uka ia ia ke hoko atu ke he fonoaga, maeke nakai ia tautolu ke ‘fakalahi atu’ ha tautolu a fakaalofa mo e foaki e lagomataiaga? (2 Kori. 6:12, 13; Teu. 15:7) Ko e aga hanei ne fakamalolo e Paulo ia 2 Korinito 8:14. Ko e ha he uiina a lautolu ia ke o auloa mo koe ke he fonoaga? Kaeke ko e tau paionia, liga loga e tau iloaaga ha lautolu ke tala atu he fenoga. Kaeke ko e tau matakainaga momotua he fakapotopotoaga, ha ha ia lautolu e fakamauaga tuai homo ue atu fakateokarasi ne nakai la logona ia e koe. Nakai kia ko e feoakiaga mo e tau matakainaga nei kua eke mo fakalagalaga mitaki ki a koe mo e magafaoa hau? Ko e aga fakamokoi hau ka loto fakaaue e lautolu mo e palepale mai e Iehova.​—Fakatai 28:27; Mata. 10:42.

⁷ Pete ia kua matapatu ke he ha lautolu a tau magafaoa Kerisiano ke leveki ha lautolu a tau manako pauaki, maeke he tau motua mo e falu he fakapotopotoaga kua iloa e tau manako pihia ke lagomatai fakaalofa ke taute e tau fakatokaaga. (1 Timo. 5:4) Ka tuku e laupepa Special Needs Room Request ke he Komiti Fekafekau he Fakapotopotoaga, kua lata e komiti ke liu kumikumi e tuaga he tagata ne ole ato fakafano atu e laupepa nei ke he Rooming Department. Ko e tohikupu he fakapotopotoaga kua lata ke tohi hifo hana numera telefoni he laupepa ke maeke he Rooming Department ke matutaki mo ia ka fai huhu. Kua lata ke fakahu atu e tau laupepa kua talia ke he kaina he fonoaga ne kua fakakite he taha fahi he laupepa.

⁸ Talia Fakamakai ko e Tagata Foaki Noa: He fonoaga, totou teau kua foaki noa ke lagomatai e holoaga mitaki he tau fahi gahua. Ko e tau tagata leveki he poko fono mo e tau tuaga motoka kua foaki e hatakiaga ma e tau nofoa mo e leveki e tau peleoafi ha tautolu he fono. Ha ha he Cleaning Department e kotofaaga ke taofi mau e aga mitaki ha tautolu ma e mahani mea, he toka mea e matakavi tapuaki fakaku ha tautolu nakai tuga he foaki mai ki a tautolu. Maeke nakai ia tautolu ke lagomatai e tau mena nei po ke falu he tau fahi gahua ka manako ke he lagomataiaga ha tautolu? Maeke nakai ia koe ke foaki noa e lagomatai hau ke fekafekau “loto fakalataha” mo e tau matakainaga hau?​—Sefa. 3:9.

⁹ Mailoga Moli Nakai he Tau Tagata e Mena ne Taute e Tautolu? Ke he fonoaga fahimotu ha tautolu he tau kua mole, ha ha i ai e tagata tane ne mamutu e fakaakoaga mo e Tau Fakamoli a Iehova ke molea e 20 e tau ne gahua ke he hotela. Ne tala age a ia ke he falu Fakamoli kua manamanatu a ia mogonei ke liu a ia ke fakaako e Tohi Tapu mo e liu fano ke he tau feleveiaaga. Ko e ha? Ha ko e puhala fakaalofa ne taute e lautolu ko e Tau Fakamoli ki a ia he magahala ne nonofo a lautolu he hotela.

¹⁰ Ne pehe e tagata fakafua koloa he hotela hagaao ke he tau matakainaga: “Ko e matakau ha mutolu e matakau kua mitaki lahi ne nonofo he hotela ha mautolu. Ko e tau tagata ha mutolu kua lahi e fakauka mo e totonu.” Ko e matalahi ha ia e Matua ha tautolu he lagi he kitia a tautolu hane muitua ke he fakamafanaaga ha Iesu: “Kia kikila atu pihia ha mutolu a maama ki mua he tau tagata, kia kitia ai e lautolu ha mutolu a mahani mitaki ati fakaheke atu ai a lautolu ke he Matua ha mutolu ha ha he lagi”!​—Mata. 5:16.

¹¹ Kia fakaata e tautolu e aga he Patuiki ko Tavita, ne amaamanaki lahi ke fina atu ke he fale ha Iehova he tapuakiaga. Ko e tau fonoaga fahimotu ha tautolu ko e punaaga aoga he tau mena kai fakaagaga mo e magaaho mitaki lahi ma e feoakiaga fakaalofa. Ko e mena ia, kua uiina fakamakutu e mautolu a koe ke kamata taute e tau fakatokaaga ke fina atu oti he tau aho tolu he Fonoaga Fahimotu “Tau Tagata Fakapuloa Fakamakai he Kautu” he tau nei!

[Puha he lau 5]

Tau Magaaho he Fakaholoaga

Aho Faraile mo e Aho Faiumu

9:30 a.m. - 5:00 p.m.

Aho Tapu

9:30 a.m. - 4:00 p.m.

[Fakafonua he lau 6]

MATAKAVI TAU AHO TAU TAKAIAGA

NUKU‘ALOFA

(Tongan, falu vala Faka-Peritania)

Pascal Street, Palmerston North

Pascal Street, Palmerston North

160 Clevedon Road, Papakura

Whiteleigh Avenue, Addington

Christchurch

(Vagahau matalima foki)

Mystery Creek Road, Hamilton

Mystery Creek Road, Hamilton

(Vagahau matalima foki)

Rarotonga, Cook Islands