Fonoaga Fahimotu “Tagata Omaoma ke he Kupu” he Tau Fakamoli a Iehova he 2000

¹ “To fakaheke atu au kia koe ke he fakapotopotoaga lahi, mo e lologo atu kia koe ki mua he motu ne tokologa.” (Sala. 35:18) Kia manamanatu la ke he fiafia lahi ha Tavita he vaha nei ke kitia e tokologa he tau afe ne fakapotopoto mafola atu ke fanogonogo e tau fakaakoaga faka-Atua he tau fonoaga ha tautolu! Ko koe nakai taha he 17,904 ne o atu ke he taha he tau Fonoaga Fahimotu “Kupu Fakaperofeta he Atua”? Mai he mataulu ia Sepetema ke he matahiku ia Oketopa 1999, ne katoa 7 e fonoaga ne fakahoko ke he 5 e taone he La Matakavi i Niu Silani. To foaki mai he tau fonoaga fahimotu he 2000 ki a tautolu e tau puhala fou ke feoaki mo e ha tautolu a tau katofia ne fakaheke foki ki a Iehova, ko lautolu ia ne “manamanatu ke he tau mena fakaagaga kua lata mo lautolu” mo e fiafia mo e makutu ke ‘fanogonogo ke he mena kua talahau mai he Agaga ke he tau ekalesia.’​—Mata. 5:3, NW; Fakakite. 2:29.

² Taute e Tau Fakatokaaga Hau ke Nofo Ai: Laulahi he tau tagata fakailoa ne tokaloto e takitakiaga maaliali, ne kua fai tau tuai kua foaki mai he uho he Ha Tautolu a Fekafekauaga he Kautu ia Me ma e fonoaga, ti loga e tau fua mitaki ne kua moua. Pete ia, kua lata agaia ke ole atu ke he tau tagata oti FAKAMOLEMOLE KIA MANATU KE MUITUA E TAU HATAKIAGA KE MOUA E TAU NONOFOAGA HE MOTELA:

(a) Fakamolemole ua fakamau tuai e tau motela ne nakai amanaki a koe ke fakaaoga po ke loga e motela ka fakamau mo e fakakiakia mua ai mogoia ti fifili e motela kua mitaki lahi, ti tiaki hifo e faoa ne toe. (Mata. 5:37) Nakai mitaki e mena nei, ti taofi foki e tau motela mai he moua e tau feua pisinisi kua lata. Kua nakai maeke foki he falu tagata fakailoa ke fakaaoga e tau poko ia, ne kua fa manako lahi ke fakaaoga he falu magaaho.

(e) Ua toka e tau poko ma hau po ke falu ka e nakai age e tau higoa mo e fakafano fakamafiti e tau tupe fakamau ma e tau poko takitaha. Ka nakai fai tupe fakamau, ha ha he motela e tonuhia ke age e poko hau ke he taha tagata foki.

(i) Ua tuku tokologa e tau tagata he poko ke he mena ne fakaata he matafakatufono mo e he motela, ne kua fa mahani ni ke nakai molea e fa po ke lima e tagata, fakalataha mo e tau tama. Manatu, na totogi e koe e katoatoa he fakave ke he numera he tau tagata ne kua TALIA e koe ke he poko.

(o) Ua fano tuai ato hoko e matahola 1:00 p.m. po ke heigoa ni e fakatokaaga he motela. Kia fina atu a koe ka oti e fakaholoaga he aho ia, ha ko e mena fita he fakamau he tupe hau e poko.

(u) Ua kaitunu po ke fakamafana mena kai he poko ato fai peito pauaki, ti fakaeneene ua takiva e poko aki e tau mena kai.

³ Ko e muitua ke he takitakiaga nei kua foaki mai ki a tautolu e magaaho ke fakatata e fakaalofa ha tautolu ma e tau matakainaga Kerisiano ha tautolu. (1 Kori. 10:24; 1 Timo. 6:8.) Ti, ke moumou e fakatufono ke he tau mena nei ka ta mai ai e ekefakakelea ke he higoa mo e fakatokatokaaga a Iehova.​—Sala. 119:168.

⁴ Leveki ki a Lautolu mo e Tau Manako Pauaki: Ko e tau magafaoa, tau motua, mo e falu he fakapotopotoaga kua mailoga e tau tutuaga kehe ue atu ha lautolu ne momotua, ne gagao, tau fekafekau mau, po ke falu mo e tau manako pauaki kua lata ke fakakite e fakaalofa mo e leveki ha lautolu he lagomatai a lautolu nei ke o ke he fonoaga. (Fakatatai 1 Timoteo 5:4.) Kua fakatokatoka he laupepa Special Needs Room Request he Sosaiete e tau mena kua lata ke tohi he laupepa nei. Ko e foakiaga nei kua fakaata ni ma e tau tagata fakailoa kua mitaki e tuaga, lauia foki a lautolu kua mahani mitaki e tau fanau, ne kua talia he Komiti Fekafekau he Fakapotopotoaga. Kua lata e tau ole nei ke fakafano fakamafiti atu ke he Rooming Department, he fakaaoga e kaina he fonoaga kua fakakite he taha fahi he laupepa.

⁵ Fano ke he Taha Fonoaga: Ko e matakavi kua kotofa ma hau ke fano ki ai ko e matakavi kua tata atu ke he fakapotopotoaga hau. Ko e fakatokatokaaga ke loga e nofoa, tau tohi, poko nonofo, mo e falu foki, kua fakave ke he fuafuaaga he tokologa e tau tagata fakailoa ka o atu ke he fonoaga kua kotofa ki ai e fakapotopotoaga ha lautolu. Pete ia, ka fai kakano mitaki a koe ke fakalataha atu ke he fonoaga ne nakai ko e fono kua kotofa a koe ki ai mo e kua manako nofoaga, mo e falu mena foki, to atu he tohikupu he fakapotopotoaga ki a koe e matapatu kaina he fonoaga ka nakai maeke ia koe ke taute e tau fakatokatokaaga hau ni. Ka tohi a koe ma e poko po ke falu vala tala, tuku foki e faga tohi ne pili ai e siteme mo e kaina fakalataha mo e ole hau. Ka loga e fonoaga ka fakahoko he taone ia, kia mataala ke fakakite e aho ma e fonoaga ka fakalataha a koe ki ai.

⁶ Tauteute ke Finatu ke he Tau Aho Oti ne Tolu: Kua lali kia a Satani ke fakatauhele a koe he fanogonogo ke he tau mena fakaagaga? Momoko ni, ha kua tokologa e tau matakainaga mo e tau magafaoa ha lautolu nukua to noa he tau mena kai fakaagaga kua lata. Fefe? He nakai o ke he tau fakaholoaga he fonoaga fahimotu he Aho Faraile. Ti kua mailoga ai foki e tokologa lahi he pasene he tau matakainaga ha tautolu kua to noa e tau fakaakoaga fakaagaga mo e feoaki auloa ne foaki he tau fakaholoaga he Aho Faraile.

⁷ Ko e falu matakainaga kua fakauaua ke o ke he tau takitaki gahua ha lautolu ke ole ke fai magaaho ke o ke he fonoaga. Pihia kia a koe? He ha he liogi ki a Iehova hagaao ke he matalekua ia mo e fakamalolo ke fakamaama e kakano hau ke he takitaki gahua? Manatu e fua mitaki ne tupu ki a Nehemia, ne fehagai mo e mena taha ia ni. (Nehe. 2:1-6) Kia tua ke he fakamakai he ha tautolu a Matua he lagi ke lagomatai a koe, he iloa ka tuku fakamua e koe e tau mena he Kautu, to foaki mai e ia e tau koloa kua lata mo e moui.​—Mata. 6:32e, 33.

⁸ Lauia Fefe a Koe he Tau Fonoaga Ha Tautolu? Ne tohi he matakainaga fifine mai he fahi uta he Tau Fahi Kaufakalataha: “Fakaaue lahi ke he fonoaga fahimotu he 1999. Ke fakalataha mo e tau matakainaga ne kitia lagataha ni e au he tau, kua ta mai e olioli lahi ki a au. Ne matutaki mai au ke he kupu moli ko e fuata mui ne fakafua tama, mo e manatu agaia e au e fiafia lahi haku he magaaho ne uta he faiaoga fakaako Tohi Tapu haku au ke he fonoaga fakamua haku. Ne haga hake au ke he tau aolu i luga he ulu haku he male sipote he uhu e mautolu e lologo he Kautu ‘Totou Afe e Tau Matakainaga,’ ti tagi au. ‘Mo e tau tagata fulufuluola nei ne viko takai ia au,’ ne huhu hifo au ki a au ni, ‘manako he ha a Iehova ki a au?’ Ko e aho ia ne fifili au ke fekafekau katoatoa ki a Iehova.” Ko e fakamafanatia ha ia! Ti nakai kia ko e fiafia moli a ia ke fakalataha mo e tau tagata ha Iehova?

⁹ He vala fakahiku he tau aho fakamui, kua lata lahi mogoia ke mua atu e o ha tautolu ke he tau fonoaga fahimotu ke nakai la tuga ia fakamua. Ko e foakiaga a ia mai ia Iehova ke taofi mau e malolo mo e lagotatai fakaagaga ha tautolu. Ko e mena ia, kia mautali a ke o ke he tau aho tolu he Fonoaga Fahimotu “Tagata Omaoma ke he Kupu” he tau nei. Maeke fefe a koe ke peehi ki mua e mautali ha au? Ole tuai ke he takitaki gahua hau ke fai magaaho mai he gahuaaga ke fano ke he fonoaga katoa. Ka temotemoai e tupe hau, kamata he mogonei ke tuku kehe taha tupe kua lata ke maeke ke fano. Ole ki a Iehova ke lagomatai a koe ke kautu ke he ha fakatauhele. Ka taute pihia e koe, to talifaki a koe ke olioli e feoaki mafanatia he tau matakainaga hau mo e ke logona e tau kupu he moui tukulagi mai he ha tautolu a Matua fakaalofa he lagi, ko Iehova.​—Fakatatai Ioane 6:68.

[Puha he lau 3]

Tau Magaaho he Fakaholoaga

Aho Faraile mo e Aho Faiumu

9:30 a.m. – 5:00 p.m.

Aho Tapu

9:30 a.m. – 4:00 p.m.

[Fakafonua he lau 5]

MATAKAVI TAU AHO TAU FAHIMOTU

Whiteleigh Avenue, Addington

Christchurch

(Vagahau matalima foki)

Pascal Street, Palmerston North

Pascal Street, Palmerston North

Mystery Creek Road, Hamilton

Mystery Creek Road, Hamilton

(Vagahau matalima foki)

160 Clevedon Road, Papakura

Rarotoga, Tau Aelani Kuki