Leveki e Fuifui Mamoe he Atua mo e Kaufakalataha

Kua huhu e falu: ‘Na leveki fefe e fakapotopotoaga he lalolagi katoa he Tau Fakamoli a Iehova?’ Kua tali e mautolu: Kua muitua ke he fakatokatokaaga pule ne mai he fakafifitakiaga he fakapotopotoaga Kerisiano he senetenari fakamua.

He tau tau he vaha he tau 1870 kua taute e Charles T. Russell mo e hana tau faoa feoaki e kamataaga ke folafola e tau fua he kumikumiaga Tohi Tapu ha lautolu mai he tau lauga mo e tau mena ne lomi. Ko lautolu he motu katoa, ne fifili ke feoaki fakalataha mo e gahua nei kua onoono atu ki a Russell mo e tau faoa ne feoaki tata hana, ko e kau he tau tagata tane kua mahani lahi ke taute e gahua he Iki mo e ki a ia ni kua maeke a lautolu ke kumi e fakatonutonuaga ne lata mo e ha lautolu a tau gahua.

He vaha he tau 1884 ne fakamau i lalo he matafakatufono he Pule Atu Motu a Pennsylvania e Zion’s Watch Tower Tract Society (Kaufakalatahaaga Pepa Lotu Kolo Toko ha Siona). Kua putoia lahi a Russell mo e hana faoa feoaki gahua mitaki ke he takitakiaga nei he Kaufakalatahaaga mo e pihia foki ke he tau gahua he tau Tagata Fakaako Tohi Tapu. He tau 1909 ne hiki e lautolu e matapatu ofisa ha lautolu ki Brooklyn, New York. Mai he tau tau kua fekafekau e tau patu takitaki he Kaufakalatahaaga Kolo Toko mo e falu ne feoaki tata, kua lata fakaagaga, ko e tau tagata tane fakauku kua fekafekau ke he kau fakatufono he Tau Fakamoli a Iehova.

Kua ha ha i ai he Kau Fakatufono e matakau he tau tagata tane Kerisiano fakauku (12 he tau 1992), kua fakalataha ki ai e 7 kua fekafekau ke he kau he tau takitaki he Kaufakalatahaaga Kolo Toko. Kua leveki e lautolu nei e tau gahua he lalolagi katoa he Tau Fakamoli a Iehova. Ne nakai omoi he agaga he Atua a lautolu mo e ti kua maeke ke hehe, ka kua falanaki a lautolu ke he Kupu kua nakai maeke ke hehe he Atua ko e pule malolo he lalolagi, mo e kua kitia ai e moui mai he moui katoa ke fakatokolalo ke he finagalo he Atua. Kua takitaha a lautolu mo e fakamauaga kua 50 po ke molea e tau tau ke he fekafekauaga mau he Tau Fakamoli a Iehova.

Kua takitaki he Kau Fakatufono e tau mena ne lomi he Kaufakalatahaaga. Ne fakave e tau mena ne tohia ke he kitekiteaga ke he tau mena kua lata fakaagaga ma e fuifui mo e ko e fua ne moua mai he liogi fakalahi mo e tau fakaakoaga fakamatafeiga mo e kumikumiaga ke he Kupu he Atua. He matutaki atu e tau tagata tane nei ke fakaako ke he Tohi Tapu mo e kitekite ke he tau mena ne tutupu fakahaga he finagalo he Atua, ko e fakamoliaga he perofetaaga ke he tau mena ne tutupu he lalolagi, mo e tau tutuaga he tau tagata he Atua i loto he lalolagi, ti kua liga kua lata a lautolu he falu magaaho ke taute e tau hikiaga lotomatala ha kua maama e falu fakaakoaga. Ke he puhala nei, kua eke ai ke loga lahi e maamaaga lotomatala ke he kupu moli.—Salamo 97:11; Fakatai 4:18; Tanielu 12:4.

Ne kotofa he Kau Fakatufono e Komiti he La ne kua tolu po ke lahi foki e tau tagata tane kua lata fakaagaga i loto he tau la kua teitei ke 100 he katoa ke he lalolagi katoa, ke takitaki e tau gahua he tau motu kua mole atu e 200 mo e tau atu motu he tau aelani. Kua matutaki e tau la mo e tau fakapotopotoaga i lalo he takitakiaga ha lautolu. Kua ha ha i ai e matutakiaga tumau he vahaloto he Kau Fakatufono mo e tau Komiti he La, mo e ahi atu lagataha he tau e taha he matakau he Kau Fakatufono ke he tau la loga ke maeke ai ke iloa kua fefe e tau tutuaga.

Nakai ko e tau iki e tau tagata tane nei ke he tua he falu ka ko e tau fekafekau kua gahua lahi ke maeke e falu tagata tokologa ke ako e Kupu he Atua. Ne nakai fekafekau a lautolu ke moua e tau tupe, ka kua maeke ke maluia ha lautolu a tau mena ke lata mo e manako ke tuga ne moua he falu he matakau he magafaoa he Peteli. Kua fai fakamoliaga kua fekafekau fakamoli a lautolu he kitia mai he makutu, fefakalatahaakiaga, kua tokoluga e tau mahani mea, mo e fakamoli ke he tau fakaakoaga he Tohi Tapu ne fakakite mai he Tau Fakamoli a Iehova he lalolagi katoa.—1 Korinito 3:5-9; 4:1, 2; 2 Korinito 1:24; 3:1-3; 1 Peteru 5:2, 3.

• Ko e heigoa e fakatokatokaaga fakatufono ne tupu mai?

• Ko hai ne fekafekau ke he Kau Fakatufono he vaha nei, mo e ko e heigoa ha lautolu a tau matagahua?

• Ne takitaki fefe e tau gahua i loto he falu motu?

[Mepe he lau 26]

(Ma e puhala katoa ne tohi aki, kikite e tohi)

Tau fahi ne taute he Tau Fakamoli a Iehova e finagalo he Atua

[Tau Fakatino he lau 26]

Pelesiteni he Kaufakalatahaaga Kolo Toko

C. T. Russell, 1884-1916

J. F. Rutherford, 1917-1942

N. H. Knorr, 1942-1977

F. W. Franz, 1977-1992

[Tau Fakatino he lau 27]

Gahoa mai he tau la ofisa kua teitei ke 100 he katoa kua puhala mai e tau takitakiaga ke he tau gahua he Tau Fakamoli a Iehova ke he lalolagi katoa

Kanata

Samipia

Sihamani

Sapani

Ausetalia

Pasili