Veveheaga 1

Tau Fekau Mai he Lagi

KO E moli ko e Tohi Tapu katoa, ko e fekau mai he lagi, ne foaki mai he ha tautolu a Matua he lagi mo fakaakoaga ha tautolu. Ka e taha e mena, ua e fekau pauaki ne fakafano mai he teitei ke 2,000 he tau tau kua mole he agelu ne “tu ki mua he Atua.” Ko e higoa hana ko Kaperielu. O mai ke kumikumi ke he tau tutupuaga ua he tau ahi mai aoga nei ke he lalolagi.

Ko e tau 3 F.V.N. Ke he tau atu matiketike i Iutaia, liga nakai mamao mai i Ierusalema, ne nofo ai e ekepoa a Iehova ne higoa ko Sakaria. Kua fuakau a ia, ti pihia foki hana hoana, ko Elisapeta. Ne nakai fai tama a laua. Ne taute a Sakaria he gahua ekepoa hana ke he faituga he Atua i Ierusalema. Ne ofo ni kua tu a Kaperielu ke he fahi matau he fatapoa ke huhunu ai e tau mena manogi.

Ne matakutaku lahi a Sakaria. Ka e fakanono e Kaperielu hana matakutaku, pehe, “Ma Sakaria na e, ua matakutaku a koe; nukua fanogonogo tuai ke he hau a liogi; to fanau hau a hoana ko Elisapeta e tama tane māu, to fakahigoa e koe a ia, ko Ioane.” Ne matutaki a Kaperielu ke talahau ko Ioane to “homo a ia ki mua a Iehova” mo e to “tauteute [e ia] e motu ke lata mo Iehova.”

Ka e taha e mena, nakai talitonu a Sakaria ke he mena ia. Ne tuga ke nakai maeke ia ia mo Elisapeta ke fai tama ke he ha laua a vaha fuakau. Ti tala age e Kaperielu ki a ia: “To kuhukuhu a koe, mo e nakai maeke ke vagahau ato hoko ke he aho ke eke ai e tau mena ia; ha kua nakai talia e koe haku a tau kupu.”

Ka ko e magaaho taha ia ni, ko e tau tagata i fafo ne manamanatu ko e ha ne puga ai a Sakaria i loto he faituga. Ko e magaaho ne hau ai a ia ki fafo, ne nakai maeke a ia ke vagahau ka e taute ne tau fakailoaaga ke he tau lima, mo e mailoga e lautolu kua kitia e ia e fakakiteaga.

Ne oti e tau aho ha Sakaria he fekafekau ke he faituga, ti liu a ia ki kaina. Ne nakai leva ti fakamoli​—ne fatu a Elisapeta! Ke he magaaho ne fakatali a ia to fanau hana tama, ne nofo a Elisapeta i kaina fakamamao mo e tau tagata ke he lima e mahina.

Ne liu fakakite mai foki a Kaperielu he magaaho fakamui. Mo e vagahau ki a hai a ia? Ke he tamafine tote nakai fai tane ne higoa ko Maria mai he maga ko Nasareta. Ko e heigoa e fekau ne ta mai e ia he magaaho nei? Fanogonogo! “Kua ofania he Atua a koe,” he tala age e Kaperielu ki a Maria. “Kitiala, ko e fatu ne fai a koe, ti fanau e koe e tama tane, ti fakahigoa e koe a ia, ko Iesu.” Ne lafi atu foki e Kaperielu: “To homo a ia, to talahaua a ia ko e Tama hana ne Mua Ue Atu . . . To eke a ia mo Patuiki he faoa a Iakopo tukulagi; ko e hana kautu foki nakai fai fakaotiaga ia.”

Ne fakamoli e tautolu na logona e Kaperielu e aoga ke ta mai e tau fekau nei. Ti ka totou atu foki a tautolu ki a Ioane mo Iesu, to kitia maaliali e tautolu ko e ha e tau fekau nei mai he lagi ne aoga lahi ai. 2 Timoteo 3:16; Luka 1:​5-33.

▪ Ko e heigoa e tau fekau aoga ua ne fakafano mai he lagi?

▪ Ko hai ne ta mai e tau fekau, mo e uta ki a hai?

▪ Ko e ha e tau fekau ne uka lahi ke talitonu?