Veveheaga 13

Fakaako Mai he Tau Kamatamata ha Iesu

KO E magaaho ia ni he mole hana a papatisoaga, ne takitaki he agaga he Atua a Iesu ke he tutakale i Iutaia. Loga lahi hana a tau mena ke manamanatu ki ai, ha ko e magaaho ne papatiso a ia “kua maihiua tuai e lagi,” ke maeke ia ia ke manamanatu ke he tau mena he lagi. Ko e moli, ne loga lahi hana a tau mena ke manamanatu ki ai!

Ne 40 e aho ti 40 e po ha Iesu he nofo he tutakale mo e nakai fai mena ke kai he magahala ia. Ti, ko e magaaho ia ne hoge lahi a Iesu ne hau e Tiapolo ke kamatamata a ia, mo e pehe: “Kaeke ko e tama he Atua a koe, ati tala age a ke he tau maka ē ke faliu mo tau areto.” Ka e iloa e Iesu ko e hepe ke fakaaoga hana a malolo mana ke fakamakona aki hana a tau manako fakatagata. Ti ko e mena ia ne nakai talia e ia ke kamatamata.

Ka e nakai toka he Tiapolo a ia. Ne lali foki a ia ke he taha puhala. Ne paleko e ia a Iesu ke hopo hifo he tapitapi i luga he faituga, ke maeke he tau agelu he Atua ke fakahao a ia. Ka e nakai to a Iesu ke he kamatamata ke taute e taha fakakiteaga lahi mahaki. Ne talahau mai e tau kupu he Tohiaga Tapu, ne fakakite e Iesu ko e mena hepe lahi ke kamatamata pihia e Atua.

Ko e kamatamata ke tolu aki, ne fakakite fakamana he Tiapolo ki a Iesu e tau kautu oti he lalolagi mo e pehe: “To ta atu e au e tau mena oti nai kia koe, kaeke ke fakaveli mo e hufeilo mai a koe kia au.” Ka e liu ni a Iesu nakai talia e tau kamatamata ke taute e tau mena hepe, ka e fifili ke tumau e fakamoli ke he Atua.

Maeke ia tautolu ke fakaako mai he tau kamatamata nei ha Iesu. Ne fakakite e lautolu, tuga a nei, ko e Tiapolo nakai ko e taha mena noa ni ke he manamanatuaga, ke tuga mo e talahauaga he falu tagata, ka ko ia ko e mena moli, ko e peresona nakai kitia. Ko e tau kamatamata ha Iesu ne fakakite foki ko e tau fakatufono oti he lalolagi ko e tau koloa he Tiapolo. Ke maeke fefe ke foaki age he Tiapolo e lalolagi ki a Keriso ke eke mo kamatamata ka e nakai ko e hana moli?

Mo e manamanatu foki ke he mena nei: Ne pehe e Tiapolo kua fiafia a ia ke fakapalepale a Iesu ke he taha e gahua hufeiloaga, mo e foaki ki a ia e tau kautu oti he lalolagi. Liga lali foki e Tiapolo ke kamatamata a tautolu ke he tau vahega kamatamata taha pihia, liga ke fakainaina mai i mua ha tautolu e tau mena ke moua aki e tau koloa, malolo, po ke tau tutuaga he lalolagi. Ka e fakalotomatala ha ia ha tautolu ke mumuitua ke he tau fakafifitakiaga ha Iesu ke tumau e fakamoli ke he Atua ke he ha kamatamata ni ka hoko! Mataio 3:16; 4:​1-11; Mareko 1:​12, 13; Luka 4:​1-13.

▪ Ko e heigoa e tau mena ha Iesu ne manamanatu ki ai ke he hana a 40 aho he tutakale?

▪ Lali fefe e Tiapolo ke kamatamata a Iesu?

▪ Ko e heigoa ha tautolu ne fakaako mai he tau kamatamata ha Iesu?