Veveheaga 25
Fakaalofa Hofihofi Noa ke he Tagata Lepela
HE O atu a Iesu mo e hana a tau tutaki toko fa ke ahiahi e tau maga i Kalilaia, ko e tau tala ke he hana tau gahua mitaki ne taute e ia, kua holofa atu ke he matakavi oti ia. Hoko e kupu he hana tau gahua ke he taha maga ne nofo ai e tagata tane gagao lepela. Ne fakamaama he ekekafo ko Luka a ia “kua oti hana tino he lepela.” Ke he tau vala fakahikuhiku he gagao ia, ko e gagao kelea nei ne maeke ke faliu fakaeneene e tau vala kehekehe he tino. Ti ko e tagata lepela nei kua hoko ke he tuaga matematekelea lahi.
Ko e magaaho ne hoko mai a Iesu ke he maga, ne finatu e tagata lepela ki a ia. Ke lata mo e Fakatufono he Atua, ko e tagata lepela ka hea ke poaki tuai, “Kua kelea, Kua kelea” ke puipui aki e falu neke o mai fakatata mo e pikitia. Ko e tagata lepela mogonei kua fakaveli fakafohifo mo e ole ki a Iesu: “Ko e Iki na e, ka finagalo a koe ki ai, ti maeke ni ia koe ke fakamea au.”
Ko e lahi ha ia he tua he tagata nei ki a Iesu! Ka e taha e mena, ko e fakaalofa ha a ia he onoono ki ai ha ko e hana gagao! Ko e heigoa ha Iesu ka taute? Ko e heigoa hau ka taute? Mai he hana a fakaalofa hofihofi noa, ne fakaolo atu e Iesu hana lima mo e aamo e tagata mo e pehe: “Na loto au ki ai, kia mea a koe.” Ko e magaaho ia ni ne galo kehe e lepela ia ia.
Manako nakai a koe ke he tagata fakaalofa hofihofi noa pehe nei mo patuiki hau? Ko e puhala ne fakamaulu e Iesu e tagata lepela nei ke fakamalolo aki a tautolu ko e vaha ka pule ai Hana Kautu, to fakamoli ai e perofetaaga he Tohi Tapu: “To fakaalofa a ia kia ia kua lolelole, mo ia kua nofogati; to fakamoui e ia a lautolu kua nonofogati.” E, to fakamoli e Iesu hana a manako mai he loto ke lagomatai oti a lautolu ne matematekelea.
Fakamua to fakamalolo e tagata lepela, ko e feua fakamatala ha Iesu kua lutu lahi ke he tau tagata. Ke he fakamoliaga he perofetaaga ha Isaia, ne tala age a Iesu ke he tagata ne fakamalolo: “A koe, neke talahau atu e koe ha mena kia taha.” Ne fakaako atu a ia ke he tagata: “Fano a a koe mo e fakakite atu a koe ke he ekepoa, mo e uta e tau poa ne p[o]aki mai ai a Mose, he hau a fakameaga ke eke mo fakamailoga kia lautolu.”
Ka ko e tagata ne fiafia lahi ti nakai maeke ia ia ke toka e mana ki a ia ni. Ne fano kehe a ia mo e kamata ke folafola e tala ke he tau mena oti, ti tupu lahi e fiafia mo e fia iloa he tau tagata ti nakai maeke a Iesu ke fano noa ni ke he maga. Ti ko e mena ia, ne nofo ni a Iesu he tau mena tokanoa ne nakai nonofo ai taha, ti tokologa e tau tagata mai he tau maga loga ne o mai ke fanogonogo ki a ia mo e fakamalolo mai he tau gagao. Luka 5:12-16; Mareko 1:40-45; Mataio 8:2- 4; Levitika 13:45; 14:10-13; Salamo 72:13; Isaia 42:1, 2.
▪ Ko e gagao fefe e lepela, mo e ko e heigoa e poakiaga ka talahau he tagata lepela?
▪ Ole fefe e tagata lepela ki a Iesu, mo e ko e heigoa e fakaakoaga ne moua e tautolu ke he tali ha Iesu?
▪ Kaumahala fefe e tagata ne fakamalolo ke omaoma ki a Iesu, mo e ko e heigoa e tau fua ne tutupu mai ai?