Veveheaga 39

Tau Tagata Fakatokoluga mo e Fakatokolalo

MOLE he talahau e tau mahani mitaki ha Ioane ko e Papatiso, ne fuluhi e onoonoaga ha Iesu ke he tau tagata fakatokoluga mo e hikihiki fano ne agaagai ia ia. Ko e “hau nai,” he talahau e ia, “ke lata a ia mo e tau tama ikiiki kua nonofo he male, mo e tauhea atu ke he tau kapitiga ha lautolu. Kua pehe atu, Ne fakatagi kofe e mautolu kia mutolu, ka e nakai kolikoli mai a mutolu; ne tagi ualoa a mautolu kia mutolu, ka e nakai tagi tatuki a mutolu.”

Ko e heigoa e kakano ha Iesu? Ne fakamaama e ia: “Ko e mena hau a Ioane nakai kai, nakai inu foki a ia; ti pehe ai a lautolu, Ha ha ia ia e temoni. Ne hau e Tama he tagata, kua kai a ia, mo e inu; ti pehe ai a lautolu, Kitiala, ko e tagata kai lahi mo e inu uaina, ko e kapitiga he tau telona mo e tau tagata hala.”

Ne uka lahi ke fakafiafia e tau tagata. Nakai fai mena ne fiafia ai a lautolu. Ne moui e Ioane e moui kaka lahi he Naseri, ke lata mo e fakailoaaga he agelu ke “nakai inu e ia e uaina po ke kava.” Ka e pehe agaia e tau tagata ha ha ia ia e tau temoni. Ke he taha fahi, ne moui a Iesu tuga ni e falu tagata, nakai moui kaka lahi, ka kua fakahigoa a ia ko e lotokai.

Ko e uka ha a ia ke fakafiafia e tau tagata! Kua tuga e tau kapitiga fefeua, ne nakai koli e falu he fakatagi kofe e falu fanau po ke tagi tatuki he tagi ualoa e falu. Pete ni he pihia, ne pehe a Iesu: “Ti talahaua tututonu e pulotu he tau gahua.” E, ko e fakamoliaga​—ko e tau gahua​—ne fakamahino maaliali ko e tau hokotaki ki a Ioane mo Iesu kua pikopiko.

Ne matutaki a Iesu ke fakamahao e hokotaki kelea ke he tolu e maaga ha Korasina, Petesaita mo Kapanaumi, ko e matakavi ne taute ai e laulahi he tau gahua malolo hana. Ka ne mai taute e ia e tau gahua ia ke he tau maaga i Foinike ha Turo mo Saitonu, he talahau a Iesu, to tokihala e tau maaga nei ke he ie kafu popo mo e efuefu. Ne akonaki foki a Kapanaumi, ko e fakatauaga he magahala he hana fekafekauaga, ne fakailoa e Iesu: “To laukauka e motu ko Sotoma ke he Aho Fakafili kia koe.”

Ne mui mai e fakaheke e Iesu hana Matua he lagi i mua he tau tagata. Ne futiaki a ia ke taute pihia he ufiufi he Atua e tau mena moli fakaagaga uho mai he tau tagata iloilo mo e lotomatala ka e fakakite e tau mena ofoofogia nei ke he tau tagata fakatokolalo, tuga e tau tama mukemuke.

Ko e fakahikuaga ne foaki e Iesu e uiina fiafia: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.”

Foaki fefe e Iesu e okiokiaga? Foaki e ia he tamai e tokanoaaga ne lili he tau mena toka tuai ne fakakavega aki he tau takitaki lotu e tau tagata, putoia ai, ke fakatai, e tau fakatokatokaaga he Sapati. Ne fakakite foki e ia e puhala he okiokiaga ki a lautolu ne logona e pehia he pule fakapolitika mo lautolu ne logona e mamafa he ha lautolu a tau hala ke he tau manamanatuaga agahala. Ne fakakite e ia ki a lautolu ia kua matematekelea e puhala fakamagaloaga he ha lautolu a tau hala mo e puhala ke moua e lautolu e matutakiaga uho mo e Atua.

Ko e kavega totonu ne foaki mai e Iesu ko e tukulele katoatoa ke he Atua, he maeke ke fekafekau ke he ha tautolu a Matua fakaalofa hofihofi noa he lagi. Ko e kavega mama ne foaki e Iesu ki a lautolu ne o mai ki a ia, ko e omaoma ke he finagalo he Atua ma e moui, ko e Hana a tau poakiaga ne fakamau he Tohi Tapu. Ko e omaoma ke he tau mena nei ne nakai mamafa. Mataio 11:​16-30; Luka 1:15; 7:​31-35; 1 Ioane 5:3.

▪ Tatai fefe e tau tagata fakatokoluga mo e hikihiki fano he atuhau a Iesu mo e tau tama ikiiki?

▪ Ko e ha ne fakaheke e Iesu hana Matua he lagi?

▪ Ko e tau puhala fe ne pehia ai he tau kavega e tau tagata, mo e ko e heigoa e okiokiaga ne foaki e Iesu?