Veveheaga 89

Ko e Fenoga he  Fakaalofa Noa ki Iutaia

KO E falu a fahi tapu fakamua, ke he Galue he Fakaulu Fale i Ierusalema, ne lali e tau Iutaia ke kelipopo a Iesu. Ko e mena haia ne fenoga a ia ke he fahi tokelau, ko e maga ne nakai mamao mo e Tahi ha Kalilaia.

Ne nakai la leva, ne liu fenoga a ia ke he fahi toga ki Ierusalema, fakamatala fakahaga ke he tau maga ha Perea, ko e maga he fahi uta he Vailele Ioritana. He oti he talahau e ia e tala fakatai hagaao ke he tagata maukoloa mo Lasalo, ne matutaki a ia ke fakaako ke he hana tau tutaki ke he falu mena ne kua fita he fakaako fakamua e ia i Kalilaia.

Tuga a nei, ne pehe a ia, kua mua atu e aoga ma e tagata ke “pipi ke he hana ua e makaholo lahi, ti liti a ia ke he tahi,” ka e kelea ke fakatupetupe e ia e taha “kua fakateaga” he Atua. Ne peehi foki e ia e lata ke fakamagalo atu, he fakamaama: “Kaeke ke lagafitu ke he aho he mahani kelea mai [e matakainaga] kia koe, ti lagafitu ke he aho he mafoki mai kia koe, mo e pehe mai, Kua tokihala tuai au; kia fakamagalo atu a koe ki ai.”

Ko e magaaho ne ole e tau tutaki, “Kia fakalahi e koe ha mautolu a tua,” ne tali e Iesu: “Ane mai kua lata ha mutolu a tua mo e fua sinapi, po kua tala age a mutolu ke he sukamina nai, Kia tāki a koe, mo e to ke he tahi; ti omaoma mai ni kia mutolu.” Ti pete ni e tote e tua ka e maeke ke taute e tau mena lalahi.

Ko e taha mena foki, ne talahau e Iesu e tuaga he moui moli ke fakakite aki e aga tonu he fekafekau he Atua mua ue atu. “Ko hai foki taha ia mutolu kua fai fekafekau ke keli e kelekele, po ke leveki e tau mamoe,” he talahau e Iesu, “to tala age kia kia ia, ka hau a ia mai he kaina, Hau la mogoho nai ke takoto ke kai? Ka e nakai kia tala age kia ia, Ati taute mai a haku a mena kai, mo e pipi a koe, ti fekafekau mai kia au ato oti haku a kai mo e inu, ka mole ia, ti kai ai a koe mo e inu? To fakaaue atu kia a ia ke he fekafekau ia, nukua eke e ia e tau mena ne poaki atu ai kia ia? toka ai, ko e nakai. To pihia foki a mutolu, ka oti he eke e tau mena oti ne poaki atu ai kia mutolu, ti pehe a mutolu, Ko e tau fekafekau nakai aoga a mautolu; ha ko e tau mena kua lata ke eke e mautolu, ko e tau mena ia kua eke e mautolu.” Ti, ko e mena ia ko e tau fekafekau he Atua kua nakai lata ke logona hifo ko e taute e lautolu e mitaki ma e Atua he fekafekau ki a ia. Ka ko e mena, kua lata ia lautolu ke manatu tumau ko e fakamonuinaaga e tapuakiaga ha lautolu ki a ia ko e tau tagata fakamoli he hana magafaoa.

Ko e moli ne nakai la leva he talahau e Iesu e tala nei ti hoko mai e tagata uta fekau. Ne fekau mai e Maria mo Mareta, ko e lafu mahakitaga ha Lasalo, ne nonofo i Petania i Iutaia. “Ko e Iki na e, kitiala, kua gagao, tuai a ia ne ofania e koe,” he talahau he uta fekau.

Ne tali e Iesu: “Ko e gagao nai nakai fakahiku ke he mate, ka ko e fakahekeaga he Atua, kia fakaheke ai ke he Tama he Atua.” Mole e ua e aho ti pehe a Iesu ke he hana tau tutaki: “Kia liliu a a tautolu ki Iutaia.” Ka e taha e mena, ne fakamanatu e lautolu kia ia: “Rapai na e, ko e aho tuai nai ne kolo e tau tagata Iutaia ke tauliti a koe, to liu haele atu kia a koe ki ai?”

“Nakai kia ko e mena hogofulu ma ua e magaaho ke he aho taha?” he huhu aki e Iesu e tali. “Kaeke ke fano taha ke he aho, ti nakai tupetupe a ia, ha kua kitia e ia e maama he lalolagi nai. Kaeke ke fano taha ke he po, ti tupetupe ai a ia, ha kua nakai fai maama ia ia.”

Ko e kakano ha Iesu he “magaaho ke he aho taha,” po ke magaaho he Atua ne kotofa ma e feua fakamatala ha Iesu he lalolagi, ne nakai la oti ia mo e ato oti ai, to nakai fai tagata ke fakapakia a ia. Kua lata ia ia ke fakaaoga ke katoatoa e magaaho ku ia he “aho” ne toe ma hana, ha ko e mena ka oti ti hoko mai e “po” ke kelipopo he tau fi hana a ia.

Ne lafi atu e Iesu: “Kua mohe tuai ha tautolu a kapitiga ko Lasalo; ka e fano au ke fafagu a ia.”

Ne manatu ko e okioki a Lasalo he mohe mo e ko e fakamailoga mitaki to ala mai a ia, ti tali he tau tutaki: “Ko e Iki na e, kaeke kua mohe a ia, to moui ni.”

Ati talahau fakatonu atu e Iesu ki a lautolu: “Kua mate tuai a Lasalo. Kua fiafia foki au ha ko mutolu, he nakai ha i ai au, kia talia e mutolu; ka e o a a tautolu kia ia.”

Ne mailoga to liga kelipopo a Iesu i Iutaia, ka e manako ke lagomatai a ia, ne fakamalolo e Toma hana tau matakainaga tutaki: “Ati o foki a a tautolu, kia mamate ai a tautolu fakalataha mo ia.” Ti ko e mena hagahaga kelea ke he ha lautolu a tau momoui, ne o fakalataha e tau tutaki mo Iesu ke he fenoga he fakaalofa noa ki Iutaia. Luka 13:22; 17:​1-10; Ioane 10:​22, 31, 40-42; 11:​1-16.

▪ Ko fe ne fakamatala fou a Iesu ki ai?

▪ Ko e heigoa e tau fakaakoaga ne liu a Iesu fatiaki, mo e ko e heigoa e tuaga moli he moui ne fakamaama e ia ke fakakite aki e manatu fe?

▪ Ko e heigoa e hokotaki ne moua e Iesu, mo e ko e heigoa e kakano hana he “magaaho ke he aho taha” mo e “po”?

▪ Ko e heigoa e kakano ha Toma he magaaho ne pehe a ia, ‘O mai a tautolu ke o ke mamate fakalataha mo ia’?