Ko e Mena ne Ako e Tautolu Mai ia Iesu

Ke he Amaamanakiaga ma Lautolu ne Mamate

Ne fakaliu tu mai e Iesu kavi ke he tolu e tagata, ti fakatātā kua fai amaamanakiaga ma lautolu ne mamate. (Luka 7:11-17; 8:49-56; Ioane 11:1-45) Ke maama e amaamanakiaga ma lautolu ne mamate, kua lata ke iloa fakamua e tautolu e tupuaga mo e kamataaga he mate.

Ko e Ha ne Gagao mo e Mamate a Tautolu?

He magaaho ne fakamagalo e Iesu e tau agahala he tau tagata, ati malolō a lautolu. Ma e fakatai, he fehagai mo e tagata pareluti, ne pehē a Iesu: “Ko e mena fe ne maeke vave? po ke tala age, Kua fakamagalo hau a tau hala? po ke tala age, Matike a, ti fano. Ka kia iloa ai e mutolu, ha ha he Tama he tagata e pule ke he lalolagi ke fakamagalo ai e tau hala, (ati tala age ai a ia ke he tagata pareluti,) Ati matike a, ti uta hau a mohega, ti fano a koe ke he hau a fale.” (Mataio 9:2-6) Ti ko e agahala ne fakatupu e gagao mo e mate. Ko e tuaga agahala ne moua e tautolu ne kamata mai he tagata fakamua, ko Atamu.—Luka 3:38; Roma 5:12.

Ko e Ha ne Mate a Iesu?

Ne nakai agahala a Iesu. Ko e mena ia, kua nakai lata a ia ke mate. He mate ma tautolu, ne totogi e Iesu e palepale he tau agahala ha tautolu. Ne pehē a ia ko e toto haana to “fakamaligi mo e tau tagata tokologa ke fakamagalo aki e tau hala.”—Mataio 26:28.

Ne pehē foki a Iesu: “[Ko] e Tama he tagata nakai hau a ia kia fekafekau mai e tau tagata ki a ia, ka kia fekafekau atu a ia, kia foaki atu foki hana moui mo lukutoto ke hukui aki e tau tagata tokologa.” (Mataio 20:28) Ne fakahigoa e Iesu e palepale ne totogi e ia ko e “lukutoto” ha kua fakatoka noa mai e falu he mate. Ne pehē foki a Iesu: “Kua hau au kia moua e lautolu e moui, kia moua lahi ai ni.” (Ioane 10:10) Ke maama katoatoa e amaamanakiaga ma lautolu ne mamate, kua lata foki ia tautolu ke iloa e tuaga ha lautolu ne mamate he mogonei.

Ko e Heigoa ne Tupu he Mate e Tagata?

He mate e kapitiga ha Iesu ko Lasalo, ne fakamaama e Iesu e mena ne tupu he mate e tagata. Ne pehē a ia ke he tau tutaki haana: “Kua mohe tuai ha tautolu a kapitiga ko Lasalo; ka e fano au [ki Petania] ke fafagu a ia. . . . Ka e piko na lautolu ko e mena vagahau a ia ke he takoto mo e mohe. Ati talahau fakatonu atu ai e Iesu kia lautolu, Kua mate tuai a Lasalo.” Ati fakakite fakamaali e Iesu ko e tau tagata mamate hane momohe, kua nakai gahuahua.—Ioane 11:1-14.

He magaaho ne fakaliu tu mai e Iesu a ia, nukua fā tuai e aho he mate e kapitiga haana ko Lasalo. Ka e nakai fai talahauaga mai ia Lasalo ne fakamau he Tohi Tapu hagaao ke he mena ne tupu ki a ia he magaaho ia. He mate, ne nakai gahuahua mo e nakai iloa e Lasalo ha mena.—Fakamatalaaga 9:5, 10; Ioane 11:17-44.

Ko e Heigoa e Amaamanakiaga ma Lautolu ne Mamate?

To liliu momoui a lautolu ne mamate mo e amaamanakiaga ke momoui tukulagi. Ne pehē a Iesu: “Ko e mena hoko ke he aho ke logona ai ke he hana [Iesu] leo a lautolu katoa ha he tau [“tuagamau fakamanatu,” NW], mo e o mai ai.”—Ioane 5:28, 29.

Ko e amaamanakiaga nei ko e fakakiteaga he fakaalofa he Atua. Ne pehē a Iesu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.”—Ioane 3:16; Fakakiteaga 21:4, 5.

Ma e falu vala tala foki, kikite e veveheaga 6 he tohi Ko e Heigoa ne Fakaako Moli he Tohi Tapu?a

[Matahui Tala]