Veveheaga 91

Magaaho ne Liu Tu Mai a Lasalo

KO IESU mo lautolu ne o fakalataha mo ia, kua hohoko ke he tuagamau fakamanatu ha Lasalo. Ko e ana ne toka ai e maka he gutu ana. “Uta kehe atu ā e maka,” he ui e Iesu.

Ne totoko e Mareta, nakai la maama ko e heigoa ha Iesu ka taute. “Ko e Iki na e,” he talahau e ia, “kua elo tuai a ia, nukua po fa tuai a ia.”

Ka e huhu a Iesu: “Ka e nakai kia ko e mena tala atu e au kia koe, Kaeke ke tua a koe, ti kitia ai e koe e lilifu he Atua?”

Ti kua uta kehe e maka. Ko e magaaho ia ne haga hake e fofoga ha Iesu mo e liogi: “Ma Matua na e, kua fakaaue atu au kia koe, he fanogonogo mai a koe kia au. Kua iloa foki e au, kua fanogonogo mai a koe kia au nakai noa; ka ko e moto tagata ha ne agaagai mai kua tala atu ai e au, kia talia ai e lautolu ne fakafano mai e koe au.” Kua liogi a Iesu ki mua he tau tagata ke maeke ia lautolu ke iloa ko e mena ne amanaki a ia ke taute to maeke ni ha ko e malolo mai he Atua. Ti ui ai a ia mo e leo lahi: “Lasalo na e, ati hau a ki fafo.”

Ko e mena ia, ne hau a Lasalo ki fafo. Ko e hana tau lima mo e tau hui ne viko agaia he tau ie ne tanu aki, mo e hana tau mata ne pipi aki e holoholo. “Vevete e mutolu a ia, ti tuku atu a ia ke fano,” he talahau e Iesu.

Ha kua kitia e mana, tokologa e tau Iutaia ne o mai ke fakamafana ia Maria mo Mareta ne tua ki a Iesu. Ka ko e falu ne o tala age ke he tau Farasaio e tau mena ne tutupu. Ko lautolu mo e tau ekepoa ne mua ne taute e fakatokaaga fakamafiti ke fono ke he fakafiliaga tokoluga he tau Iutaia, ko e Saneheturini.

Kua putoia ai he Saneheturini e ekepoa ne mua he magahala ia, ko Kaiafa, pihia foki mo e tau Farasaio mo e tau Satukaio, tau ekepoa ne mua, mo e tau ekepoa ne mua fakamua. Ne tagi a lautolu nei: “Ko heigoa e mena ke eke e tautolu? Ha ko e tagata na, kua eke e tau fakamailoga loga. Kaeke ke tokai pihia e tautolu, a ia, ti talia a ia he tau tagata oti kana; ti o mai e tau tagata Roma, ti fakaoti ai ha tautolu a tau mena, katoa mo e ha tautolu a motu.”

Pete ni he talahau he tau takitaki lotu ko Iesu ne “eke e tau fakamailoga loga,” ko e taha ni e mena ne tupetupe a lautolu ki ai ko e ha lautolu a tau kotofaaga mo e pule. Ko e liu tu mai ha Lasalo ko e mena malolo lahi ke moumou aki e tau Satukaio, ha ko e mena nakai talitonu a lautolu ke he liu tu mai.

Ko Kaiafa, liga ko e taha he tau Satukaio ne vagahau he magaaho ia mo e pehe: “Nakai iloa ni e mutolu ha mena; nakai manamanatu foki a mutolu, ko e mena aoga ia tautolu ke mate taha tagata ke hukui aki e motu, kia nakai mahakava ai e motu oti kana.”

Ko e Atua ne fakaohooho a Kaiafa ke talahau e mena nei, ha kua tohi he aposetolo ko Ioane he magaaho fakamui: “Nakai talahau noa e [Kaiafa] e mena ia.” Ko e kakano moli ha Kaiafa, kua lata ke kelipopo a Iesu ke nakai toka a Ia ke uta kehe e pule mo e tau tutuaga ha lautolu. Ka e taha e mena, tuga he talahau e Ioane, ‘ne perofeta e Kaiafa to mate a Iesu ke nakai hukui aki e motu ni hokoia, ka kia fakapotopoto fakalataha e fanau he Atua ne mavehevehe.’ Mo e, ko e moli, ko e finagalo he Atua ke mate hana Tama ke lukutoto aki e tau tagata oti.

Ne kautu a Kaiafa he magaaho ia ke fakaohooho e Saneheturini ke taute e tau fakatokatokaaga ke kelipopo a Iesu. Ka ko Iesu, liga iloa e tau fakatokatokaaga nei mai ia Nikotemo, ko e taha mai he Saneheturini ne kapitiga ki a ia, ne fano kehe mai i ai. Ioane 11:​38-54.

▪ Ko e ha ne liogi a Iesu ki mua he tau tagata ato liu fakatu mai a Lasalo?

▪ Tali fefe e lautolu ne kitia e liu tu mai nei?

▪ Ko e heigoa ne fakakite aki e kelea muikau ha lautolu he Saneheturini?

▪ Ko e heigoa e amaamanakiaga ha Kaiafa, ka ko e heigoa ne fakaaoga he Atua a ia ke perofeta?