Veveheaga 119

Takitaki Atu ki a Ana, To Uta ki a Kaiafa

KO IESU, kua lili tuga e tagata mahani kelea, kua takitaki atu ki a Ana, ko e ekepoa ne mua, ne talahaua. Ko Ana ko e ekepoa ne mua he magaaho ne 12 e tau he moui ha Iesu ne fakaofogia e tau akoako rapai he faituga. Ko e falu he tau fanau tane ha Ana he magaaho fakamui ne fekafekau ko e tau ekepoa ne mua, ti ko e magaaho nei ko e hana figona tane ko Kaiafa ne tu ke he kotofaaga ia.

Liga takitaki atu fakamua a Iesu ke he kaina ha Ana kakano ha ko e ekepoa ne mua kua leva e talahaua ke he moui he lotu faka-Iutaia. Ko e okioki fakaku nei ke kitia ia Ana ati fai magaaho ma e Ekepoa ne Mua ko Kaiafa ke fakapotopoto e Saneheturini, ko e 71 e tagata he fakafiliaga tokoluga faka-Iutaia, pihia mo e fakapotopoto foki he tau fakamoli fakavai.

Ko e magaaho nei ne huhu e ekepoa ne mua ko Ana ki a Iesu hagaao ke he hana tau tutaki mo e hana fakaakoaga. Ka e taha e mena ne pehe a Iesu he tali: “Kua talahau fakakite au ke he tau tagata, kua fakaako mau au ke he tau sunako mo e faituga, ne tolo mau ki ai e tau tagata Iutaia; ka e nakai talahau fakagalo e au ha mena. Ko e ha ne hūhu mai ai a koe kia au? Kia hūhu a koe kia lautolu ne fanogonogo ai, po ke heigoa e mena ne talahau atu e au kia lautolu; kitiala, kua iloa e lautolu e tau mena ne tala age ai e au.”

Ko e magaaho nei, ne taha mai he tau fekafekau ne tu tata ki a Iesu ne pati hana mata, mo e pehe: “Kua tali atu pihia kia e koe ke he ekepoa ne mua?”

“Kaeke kua kelea haku a kupu,” he tali e Iesu, “ti talahau la e koe hana a kelea; kaeke kua mitaki, po ke heigoa e mena ne poki mai ai e koe au?” He mole e fakatutalaaga nei, ti lili mo e fakafano e Ana a Iesu ki a Kaiafa.

Ko e magaaho nei kua fita e tau ekepoa ne mua mo e tau patu mo e tau tohikupu, e, ko e Saneheturini katoa, kua kamata ke fakapotopoto. Ko e matakavi ne fono ai a lautolu kua maaliali ai ko e kaina ha Kaiafa. Ke taute e fakafiliaga ia he po he Paseka kua maaliali e totoko ke he fakatufono faka-Iutaia. Ka e nakai taofi he mena ia e tau takitaki lotu mai he ha lautolu a amaamanakiaga kelea.

Ko e tau fahi tapu fakamua, he magaaho ne fakaliu tu mai e Iesu a Lasalo, kua fita he mau e manatu he Saneheturini kua lata ni a ia ke mate. Ko e ua ni e aho fakamua, he Aho Lotu, ko e tau takitaki lotu ne fono auloa ke tapaki aki e tau lagatau kelea a Iesu ke tamate. Manamanatu la, kua fita ni he fakahala ka e nakai la hoko hana a fakafiliaga!

Kua lahi e gahua he magaaho nei ne taute ke kumi e tau tagata fakamoli ke talahau e tau fakamoliaga pikopiko ke maeke ke totoko ki a Iesu. Ka e taha e mena, ne nakai fai tagata fakamoli ne moua ne talia ke he ha lautolu a fakamoliaga. Ka ko e fakahikuaga, tokoua ne o mai mo e talahau fakamakamaka: “Ne fanogonogo atu a maua kia ia, ne pehe mai, To ulu e au e faituga nai ne eke he tau lima, ti ta foki e au taha ke he aho tolu, nakai eke he tau lima.”

“Nakai lea mai a koe he ha?” he huhu e Kaiafa. “Ko [e] heigoa e talahau he tau tagata nai kia koe?” Ka e fakanono ni a Iesu. Pihia ni ke he hokotaki pikopiko nei, ke he fakama he Saneheturini, ne nakai maeke he tau tagata fakamoli ke tatai ha lautolu a tau tala. Ti ko e mena haia ne lali e ekepoa ne mua ke he taha puhala kehe foki.

Ne iloa e Kaiafa e tetotonu he tau Iutaia ke he taha ka talahau ko e Tama he Atua a ia. He tau magaaho ua fakamua, ne fakahigoa vale e lautolu a Iesu ko e tagata vagahau kelea kua lata ke tamate, lagataha e manatu hepe ko e pehe a Iesu ko e tatai a ia mo e Atua. Ne taute lagatau a Kaiafa mogonei he poaki: “Kua tala atu fakamakamaka e au kia koe ke he higoa he Atua moui, kia tala mai e koe kia mautolu, po ke Keriso a koe, ko e Tama he Atua!”

Pete ni he pihia e tau manatu he tau Iutaia, ko e moli ni ko Iesu ko e Tama he Atua. Ko e tumau ke fakanono, tuga kua eke mo fakatikai ko ia ko e Keriso. Ti ko e mena ia ne tali fakamalolo a Iesu: “Ko au haia; ti kitia e mutolu e Tama he tagata ha ne nofo ke he fahi matau hana ha i ai e mana, to hau foki a ia ke he tau aolagi.”

Ko Kaiafa he magaaho nei ne taute e fakatataaga lahi, ne hehe hana tau tapulu mo e vagahau fakalahi: “Kua vagahau kelea a ia ke he Atua; to aoga ha ha e falu a talahau kia tautolu? kitiala, kua logona mogoho nai e mutolu hana vagahau kelea ke he Atua. Kua manatu a mutolu ke ha?”

“Kua lata ke mate a ia,” he fakapuloa he Saneheturini. Ko e magaaho ia ne kamata a lautolu ke eke fakakelea a ia, mo e talahau loga e tau ekefakakelea ki a ia. Ne ta pati e lautolu hana a fofoga mo e tauanu. Ka ko e falu ne uufi katoa hana fofoga mo e ta moto mo e talahau fakafiufiu: “Keriso na e, talahau la kia mautolu, po ko hai a ia ne ta a koe?” Ko e ekefakakelea mo e mahani moumou fakatufono nei ne tupu he magaaho pouli he fakafiliaga. Mataio 26:​57-68; 26:​3, 4; Mareko 14:​53-65; Luka 22:​54, 63-65; Ioane 18:​13-24; 11:​45-53; 10:​31-39; 5:​16-18.

▪ Ne takitaki fakamua a Iesu ki fe, mo e ko e heigoa ne tupu ki a ia i ai?

▪ I fe ne takitaki atu foki a Iesu ki ai, mo e ko e heigoa e kakano?

▪ Maeke fefe ia Kaiafa ke taute e Saneheturini ke fakapuloa kua lata a Iesu ke mate?

▪ Ko e heigoa e tau ekefakakelea mo e tau mahani moumou fakatufono ne hoko he magaaho he fakafiliaga?