Veveheaga 103

Liu Aahi Atu ke he Faituga

KO E po ke tolu aki a ia ha Iesu mo e hana tau tutaki i Petania tali he o mai i Ieriko. Ko e magaaho pogipogi a nei he Aho Gofua, Nisana 10, kua fita a lautolu he puhala tu ke o ki Ierusalema. Ne hoge a Iesu. Ti ko e magaaho ne kitia e ia e mati ne kua tupu e tau lau, ti fano a ia ke kitia ko e fai fua nakai.

Kua tupu tuai e tau lau he akau, ha ko e nakai la hoko ke he vaha he tau mati, ato hoko la ki a Iuni, ka ko e fakahikuhiku a ia ha Mati. Ka e taha e mena, ne manatu a Iesu ha kua tupu tuai e tau lau, ti liga fua tuai foki e mati. Ka e fakaita ai ki a ia. Kua fakatuaha noa e tau lau he akau. Ne kaialu e Iesu e akau mo e pehe: “Aua neke kai he taha tagata ha fua mai ia koe tukumalagi.” Mailoga la e tau mena ne tutupu ke he tau gahua ha Iesu he pogipogi hake.

Ko e matutakiaga, ne hohoko a Iesu mo e hana tau tutaki ki Ierusalema. Ne fano a ia ke he faituga, ne kua fita he tivi e ia he pale la he aho fakamua. Ka e taha e mena, he aho nei, ne fai mena a ia ne taute, tuga ni he taute e ia he tolu tau fakamua he magaaho ne fano a ia ke he Paseka he 30 V.N. Ne vega e Iesu ki fafo a lautolu ne fakafua mo e fakatau he faituga mo e tulutulei e tau laulau ha lautolu ne gahua ke he tau tupe mo e tau laulau ha lautolu ne fakafua e tau lupe. Ne nakai fakaata e ia ha tagata ke uta ha kavega taha ke he faituga.

He fakafili a lautolu ne gahua ke he tau tupe mo e fakafua e tau manu he faituga, he pehe a ia: “Nakai kia tohi, To talahaua haku a fale, ko e fale liogi he atu motu oti kana? ka kua eke e mutolu mo ana he tau tagata fofo mena.” Ko e tau tagata fofo mena a lautolu, kakano ha kua fakatau uka e lautolu e tau totogi ki a lautolu ne nonofogati ke fakatau mai ia lautolu e tau manu ke lata mo poa. Ti kitia e Iesu e tau fefakafuaaki nei ko e puhala eke fakakelea po ke kaiha.

Ko e magaaho ne logona he tau ekepoa ne mua, tau tohikupu, tau takitaki e tau gahua ha Iesu, ne liliu a lautolu ke kumi puhala ke kelipopo aki a ia. Ne fakamoli e lautolu kua nakai maeke a lautolu ke fakahako. Ka e taha e mena nakai iloa e lautolu e puhala ke kelipopo aki a Iesu, ha kua agaagai tumau e tau tagata ke fanogonogo ki a ia.

Nakai ni ko e tau Iutaia tino hokoia, ka ko e tau tagata Motu Kehe foki ne o mai ke he Paseka. Ko lautolu ia hanai ne hiki ke he lotu he tau Iutaia. Ha ha i ai e falu Heleni, ko lautolu ne hiki mai, ne o atu he magaaho nei ki a Filipo mo e ole ke kitia a Iesu. Ne fano a Filipo ki a Aneterea, liga ke huhu ko e lata nakai e kitiaaga ia. Haia agaia a Iesu he faituga, ko e mena ne maeke e tau Heleni ke kitia a ia.

Ne iloa e Iesu ko e toe gahoa ni e hana a tau aho, ti mitaki e fakataiaga hana ke he tuaga ia: “Kua hoko mai e vaha ke hoko ai e Tama he tagata ke he hana lilifu. Ko e moli, ko e moli, ke tala atu e au kia mutolu, Kaeke kua nakai to e fua saito ke he kelekele mo e mate ai, ti tumau ni e mena taha; kaeke ke mate, ti fua mai ai e tau fua loga.”

Nakai lahi e aoga he taha e tega saito. Ka e taha e mena, ka e kua ka to ke he kelekele mo e “mate,” fakaoti hana moui tuga e tega akau? Ne tupu a ia, mo e fai magaaho ti tupu hake e ka mo e tau fua loga, mo e loga e tau tega saito. To pihia foki, ko e tokotaha ni a Iesu ko e tagata mitaki katoatoa. Ka e kaeke ke mate mo e fakamoli a ia ke he Atua, to eke a ia mo puhala ke moua e lautolu ne fakamoli e moui tukulagi, ko lautolu haia ne tatai e tau aga ke poa ni e lautolu a lautolu ke tuga a ia. Ti ko e mena ia ne pehe a Iesu: “Ko e tagata ne fakahelehele hana moui, to moumou ai e ia; ka ko e tagata ne fakavihia hana moui ke he lalolagi nai, to taofi ai e ia kia hoko ke he moui tukulagi.”

Kua maaliali e nakai manamanatu ni a Iesu ki a ia ni hokoia, ha kua liu fakamaama mai e ia: “Ka fia fekafekau mai taha kia au, kia mui mai a ia kia au; ko e mena ke nofo ai au, ha ha i ai foki haku a fekafekau; ka fekafekau mai foki taha kia au, ti fakalilifu ai e Matua a ia.” Ko e taui kua mua atu e mitaki he mumui ki a Iesu mo e fekafekau ki a ia! Ko e taui he fakalilifu he Matua ke fakalataha mo Keriso ke he Kautu.

Manamanatu ke he mamahi mua ue atu mo e mamahi he mate ne fakatali mai ki a ia, ne matutaki e Iesu: “Ha ne fakaatukehe nai hoku loto; to talahau e au ha ha? Ma Matua na e, fakamoui au mai he magala nai.” Ane mai maeke ke kalo mai he mena ne fakatali mai ki a ia! Ka e, nakai, he talahau e ia: “Ka ko e mena ia ne hoko mai ai au ke he magala nai.” Ne talia katoatoa a Iesu ke he tau fakatokatokaaga oti he Atua, putoia ai hana a poa mate. Mataio 21:​12, 13, 18, 19; Mareko 11:​12-18; Luka 19:45-48; Ioane 12:​20-27.

▪ Ko e ha ne amaamanaki a Iesu ke moua e tau fua mati ka e nakai la hoko ke he vaha ha lautolu?

▪ Ko e ha ne ui e Iesu a lautolu ne fakafua he faituga ko e “tau fofo mena”?

▪ Ko e puhala fe ne tatai a Iesu mo e tega saito ne mate?

▪ Fefe e logonaaga ha Iesu ke he mamahi mo e mate ne fakatali ki a ia?