Iloa Nakai e Koe?

Ko e ha kua tonu a Iesu he fakahigoa e tau tagata fakafua koloa ne fakafua e tau manu he faituga i Ierusalema ko e “tau tagata fofo mena”?

KE HE Evagelia ha Mataio ne totou e tautolu: “Kua hu atu a Iesu ke he faituga he Atua, ati vega oti ai e ia ki fafo a lautolu ne fefakafuaaki ke he faituga, ne tulei atu foki e ia e tau lapa ha lautolu ne fakafua tupe, mo e tau nofoa ha lautolu ne fakafua lupe; Kua pehe age a ia kia lautolu, Kua tohi, To talahaua hoku fale, ko e fale liogi, ka kua eke e mutolu mo ana he tau tagata fofo mena.”​—Mataio 21:12, 13.

Fakakite he fakamauaga tala ko e tau tagata fakafua koloa he faituga ne nakai tonu e puhala ne fakafua e lautolu e tau koloa ke he tau tagata. Ma e fakatai, na tau mukamuka lahi e tau lupe ka fakatau he tau tagata nonofogati mo poa. Ka e pehē e tau tohiaga Iutaia i tuai na fai magaaho he senetenari fakamua ne lata e tagata ke gahua kavi ke 25 e aho ke fakatau aki ua e lupe. Kua tauuka e tau lupe ti nakai maeke e tagata nofogati ke fakatau ai. (Levitika 1:14; 5:7; 12:6-8) Ko e rapai ko Simeon ben Gamaliel ne ita lahi ke he tuaga nei ti fakatote hifo e numera he tau poa ne kua lata ke foaki he tau Iutaia. Mogonei kua gahua e tagata ke tolu ni e tulā ke fakatau ua e lupe.

He kitia e tautolu, ko e tau tagata fakafua koloa he faituga ne lotokai mo e fakaaoga hehē e tau tagata fakatau ha lautolu. Kakano haia kua tonu a Iesu he fakahigoa a lautolu ko e “tau tagata fofo mena.”