Vala 1

Kua Leveki Moli Kia he Atua a Tautolu?

1, 2. Ko e heigoa e tau huhu ne huhu he tau tagata hagaao ke he Atua, mo e ko e ha?

KE HE falu a magaaho he hau a moui, kua huhu a ko e: ‘Ka ha ha i ai e Atua ne leveki moli kia tautolu, ti ko e ha ne fakaata e ia e loga he matematekelea?’ Ko tautolu oti kua kitia e matematekelea po ke kua iloa falu tagata ne kua pihia foki.

² Moli lahi, mai he fakamauaga tala tuai ko e tau tagata kua kafokia he matematekelea mo e loto mamahi ha ko e tau felakutaki, tau vale, kelipopo, nakai fakafili tonu, mativa, gagao, mo e mamate he tau fakahelehele. Ke he senetenari ke 20 aki ha tautolu hokoia, ko e tau felakutaki kua tamate ai molea e 100 miliona he tau tagata. Teau he tau miliona he falu kua pakia po ke galo ha lautolu a tau kaina po ke tau koloa. Loga lahi foki he tau mena kelea kua tutupu ke he vaha ha tautolu, ti fua mai ai ke he momoko, loga e tau hihina mata, mo e manamanatuaga nakai fai amaamanakiaga ke he taha vala he tau numela tokologa he tau tagata.

3, 4. Fefe e manatu he tokologa hagaao kehe fakaataaga he Atua ke he matematekelea?

³ Falu kua kona mo e manatu kaeke ke ha ha i ai e Atua, kua nakai leveki moli e ia a tautolu. Po ke kua manatu foki a lautolu kua nakai fai Atua. Ko e taha mena, ko e tagata tane ne matematekelea ha ko e favaleaga lahi he hoko e mate ke he tau kapitiga mo e magafaoa he Tauaga I he Lalolagi kua huhu: “Ko fe e Atua he magaaho kua manako a mautolu ki a ia?” Ko e taha foki, ne hao mai he kelipopo he miliona he tau Nasi he Tauaga II he Lalolagi, kua lahi e maanu he matematekelea ne kitia e ia ti pehe a ia: “Kaeke ke epoepo e koe haku a loto, to kona a koe.”

⁴ Ti, tokologa e tau tagata ne nakai maama ko e ha e Atua mitaki ne fakaata e tau mena kelea ke tutupu. Kua huhu a lautolu ko e mena leveki moli e ia a tautolu po ke mena moui nakai a ia. Mo e tokologa ia lautolu ne manatu ko e matematekelea ko e taha vala tumau a ia he moui he tagata.

[Fakatino he lau 2, 3]

Kua tata kia e lalolagi fou ne tokanoa mai he matematekelea?