Vala 2
Ko e Lalolagi kua Tokanoa Mai he Matematekelea
1, 2. Ko e heigoa e kitekiteaga kehe kua ha ha he tokologa?
PETE ia, miliona he tau tagata he lalolagi katoa kua fekehekeheaki e tau kitekiteaga. Kua kitia tuai e lautolu e homo ue atu he vaha mai mua ma e tau tagata oti. Kua pehe a lautolu ke he lalolagi nei kua teitei tuai ke eke mo lalolagi kua katoatoa e tokanoa mai he mahani kolokolovao mo e matematekelea. Kua mauokafua a lautolu ko e mena kua kelea kua teitei tuai ke hoko e fakameaaga mo e fakatu ai e lalolagi fou katoatoa. Ti pehe foki a lautolu ko e fakaveaga he lalolagi fou nei kua fakatoka tuai he magaaho nei!
2 Ko e tau tagata nei kua talia ko e lalolagi fou to tokanoa ai mai he felakutaki, vale, kelipopo, nakai fakafili tonu, mo e mativa. Ko e lalolagi kua nakai fai gagao, momoko, tau hihina mata, ti pihia foki mo e mate. Ke he magaaho ia to momoui e tau tagata ke he mitaki katoatoa mo e nonofo tukulagi he parataiso he lalolagi fiafia. Ko e ha, ko lautolu ia ne mamate to liu tutu mai foki mo e maeke ke moua ai e moui tukulagi!
3, 4. Ko e ha foki e tau tagata ia ne mauokafua hagaao ke he ha lautolu a kitekiteaga?
3 Ko e kitekiteaga nei kia ke he vaha mai i mua ko e miti, tuga ko e manamanatuaga manako noa ni? Nakai, ai pihia. Kua moua mai he fakaveaga mao he tua ko e Parataiso nei ka hau mo e nakai fakauaua. (Heperu 11:1) Ko e ha kua tali tonu ai a lautolu? Ko e kakano ko e Tufuga lahi ue atu he lalolagi katoatoa kua mavehe mai ai pihia.
4 Hagaao ke he tau maveheaga he Atua, kua talahau he Tohi Tapu: “Nakai to ha kupu taha he tau kupu mitaki oti ne vagahau mai ai e Iehova ha mutolu a Atua kia mutolu; kua hoko oti kia mutolu, nakai ni to ha kupu taha.” “Nakai ko e tagata e Atua ke pikopiko ai a ia, . . . kua talahau kia a ia, ka e nakai eke ai? ti vagahau mai kia a ia ka e nakai fakamau ai?” “Ne omonuo e Iehova Sapaota, kua pehe mai, Ko e moli tuga ne manatu e au kua hoko ni pihia, ti tuga ne pule e au kua fakamoli ai ni.”—Iosua 23:14; Numera 23:19; Isaia 14:24.
5. Ko e heigoa e tau huhu kua lata ke tali?
5 Pete ia, kaeke ko e finagalo he Atua ke fakatu e lalolagi parataiso ke tokanoa mai he matematekelea, ko e ha ne fakaata e ia e tau mena kelea ke tutupu he magaaho fakamua? Ko e ha ne leo ai a ia ke ono e afe he tau tau ti hoko mai foki ke he magaaho nei to fakahako e mena ne hepe? Liga he tau senetenari matematekelea oti ia kua talahau ne nakai leveki moli he Atua a tautolu, po ke nakai moui foki a ia?