Fakaakoaga 11
Tau Taofiaga mo e Tau Mahani Fakamotu ne Vihiatia he Atua
Ko e heigoa e tau vahega taofiaga mo e tau mahani ne hepe? (1)
Kua lata nakai he tau Kerisiano ke taofi ko e Atua ko e Atua Tolu Taha? (2)
Ko e ha e tau Kerisiano moli ne nakai fakamanatu e Kerisimasi, Isita, po ke tau aho fanau? (3, 4)
Maeke nakai ia lautolu ne mamate ke fakamamahi a lautolu ne momoui? (5)
Mate nakai a Iesu he akau fakalava? (6)
Fefe e aoga ke fiafia e Atua? (7)
1. Nakai kelea oti e tau taofiaga mo e tau mahani fakamotu. Ka e nakai talia he Atua e tau mena ia kaeke ko e tutupu mai ai he lotu pikopiko po ke totoko ke he tau fakaakoaga Tohi Tapu.—Mataio 15:6.
2. Atua Tolu Taha: Ko Iehova kia ko e Atua Tolu Taha—toko tolu e tagata i loto he taha e Atua? Nakai! Ko Iehova, ko e Matua, “ko e Atua moli tokotaha ni.” (Ioane 17:3; Mareko 12:29) Ko Iesu ko e Hana Tama uluaki, ti i lalo hifo a ia ke he Atua. (1 Korinito 11:3) Mua hake e Matua ke he Tama. (Ioane 14:28) Ko e agaga tapu nakai ko e peresona; ko e mena nei ko e malolo gahuahua he Atua.—Kenese 1:2; Gahua 2:18.
3. Kerisimasi mo e Isita: Ne nakai fanau a Iesu ia Tesemo 25. Ne fanau a ia he matakavi ia Oketopa 1, ko e magaaho he tau ne toka he tau leveki mamoe ha lautolu a tau fuifui mamoe i fafo ke he pouli he po. (Luka 2:8-12) Ne nakai poaki e Iesu e tau Kerisiano ke fakamanatu hana aho fanau. Ka e tala age a ia ke he hana tau tutaki ke fakamanatu, po ke manatu, hana mate. (Luka 22:19, 20) Tupu mai e Kerisimasi mo e hana tau mena taute mai he tau lotu pikopiko i tuai. Kua pihia ni e tau mena taute he Isita, tuga e fakaaoga he tau fufua moa mo e tau lapisi. Ko e tau Kerisiano fakamua ne nakai fakamanatu e Kerisimasi mo e Isita, ti nakai fakamanatu foki he tau Kerisiano moli he vaha nei.
4. Tau Aho Fanau: Ko e ua ni e fakamanatuaga he tau aho fanau ne tutala ki ai he Tohi Tapu ko e tau fakamanatuaga ha laua ko e tau tagata ne nakai tapuaki ki a Iehova. (Kenese 40:20-22; Mareko 6:21, 22, 24-27) Nakai fakamanatu e tau aho fanau he tau Kerisiano fakamua. Ko e tau mena taute he tau fakamanatuaga he tau aho fanau ko e mena tutupu mai he tau lotu pikopiko i tuai. Maeke he tau Kerisiano moli ke foaki mena fakaalofa mo e fiafia auloa ke he falu magaaho he tau.
5. Matakutaku he Tau Tagata Mamate: Nakai maeke he tau tagata mamate ke taute ha mena taha po ke logona ha mena taha. Nakai maeke a tautolu ke lagomatai a lautolu, ti nakai maeke a lautolu ke fakamamahi a tautolu. (Salamo 146:4; Fakamatalaaga 9:5, 10) Mate e solu; nakai matutaki e moui ka mate. (Esekielu 18:4) Ka ko e falu magaaho ko e tau agelu kelea, ne fakahigoa ko e tau temoni, ne taute a lautolu ke tuga e tau agaga ha lautolu ne mamate. Ko e tau mahani oti ne fakamatakutaku po ke tapuaki ke he tau tagata mamate kua hepe lahi.—Isaia 8:19.
6. Ko e Akau Fakalava: Nakai mate a Iesu ke he akau fakalava. Ne mate a ia ke he pou, po ke akau tu fakahako. Ko e kupu Heleni ne fakaliliu ko e “akau fakalava” ke he loga he Tohi Tapu ko e hagaao ni ke he taha ni e vala akau. Ko e mena fakatai ke he akau fakalava ko e mena tupu mai he tau lotu pikopiko i tuai. Ne nakai fakaaoga e akau fakalava po ke tapuaki he tau Kerisiano fakamua. Ti ko e mena ia, tonu nakai he manamanatu e koe ke fakaaoga e akau fakalava ke tapuaki?—Teutaronome 7:26; 1 Korinito 10:14.
7. Liga uka lahi ke toka e falu he tau taofiaga nei mo e tau mahani fakamotu. Ko e tau magafaoa mo e tau kapitiga ka lali ke fakaako a koe ke ua hiki hau a tau taofiaga. Ka e mua atu e aoga he fakafiafia ke he Atua mai he ki a lautolu e tau tagata.—Tau Fakatai 29:25; Mataio 10:36, 37.
[Fakatino he lau 22]
Nakai ko e Atua Tolu Taha e Atua
[Fakatino he lau 23]
Tutupu mai e Kerisimasi mo e Isita he tau lotu pikopiko i tuai
[Fakatino he lau 23]
Ne nakai fai kakano ke tapuaki ke he tau tagata mamate po ke matakutaku ia lautolu