Fakaakoaga 12
Fakakite e Fakalilifu ke he Moui mo e Toto
Fefe e onoonoaga ha tautolu ke he moui? (1) ke he moumou tama ke he manava he matua fifine? (1)
Fakakite fefe he tau Kerisiano ko e kikili lahi ke ua pakia? (2)
Hepe nakai ke kelipopo e tau manu? (3)
Ko e heigoa e falu tauteaga mena ne nakai fakakite e fakalilifu ke he moui? (4)
Ko e heigoa e fakatufono he Atua ke he toto? (5)
Putoia nakai e fagaiaga toto ke he mena nei? (6)
1. Ko Iehova ko e Punaaga he moui. Ko e tau mena momoui oti mai he Atua ha lautolu a tau momoui. (Salamo 36:9) Tapu e moui ke he Atua. Pihia ni e moui he tama nakai la fanau mai i loto he matua fifine kua uho ki mua a Iehova. Ke tamate pauaki e tama tupu fou ia ko e mena hepe lahi ke he fofoga he Atua.—Esoto 21:22, 23; Salamo 127:3.
2. Kikili lahi e tau Kerisiano moli ke nakai pakia. Mailoga lahi e lautolu ha lautolu a tau motoka mo e ha lautolu a tau kaina kua hagahaga mitaki neke fai pakia. (Teutaronome 22:8) Ko e tau fekafekau he Atua nakai fakahanoa ha lautolu a tau momoui ha ko e tau mena fakafiafia po ke fefeua. Ti nakai fakalataha a lautolu ke he tau sipote vale ne taute pauaki ke pakia e falu tagata. Ne fakamamao a lautolu mo e tau fakafiafia ne fakaohooho e favale.—Salamo 11:5; Ioane 13:35.
3. Ko e moui he manu kua tapu foki ke he Tufuga. Maeke he Kerisiano ke tamate e tau manu ke moua aki e tau mena kai mo e tau mena tui po ke puipui a ia mai he tau gagao mo e hagahaga kelea. (Kenese 3:21; 9:3; Esoto 21:28) Ka e hepe lahi ke eke fakakelea e tau manu po ke tamate a lautolu mo sipote po ke fakafiafia.—Tau Fakatai 12:10.
4. Ula tapaka, gau fua pitolo (betel), mo e kai tulaki ke fiafia, ko e tau mena nakai ma e tau Kerisiano. Hepe e tau mahani nei kakano (1) kua eke he tau mena ia a tautolu mo tupa ki ai, (2) fakamamahi he tau mena ia ha tautolu a tau tino, mo e (3) kiva e tau mena nei. (Roma 6:19; 12:1; 2 Korinito 7:1) Uka lahi ke toka e tau aga nei. Ka kua lata ia tautolu ke tiaki ke fiafia a Iehova.
5. Ko e toto ko e mena tapu ke he fofoga he Atua. Pehe e Atua ko e toka ai he toto e solu, po ke moui. Ti kua hepe lahi ke kai e toto. Hepe foki ke kai e tau vala manu he manu ne nakai fakamaligi fakamitaki e toto. Kaeke kua mate e manu he fofota po ke mate he hele, kua nakai lata ke kai. Kaeke ke liti aki e tao po ke fana, kua lata ke fakamafiti ke fakatafe e toto kaeke ko e mena taute ke kai.—Kenese 9:3, 4; Levitika 17:13, 14; Gahua 15:28, 29.
6. Hepe nakai ke talia e fagaiaga toto? Manatu, manako a Iehova ke fakamamao a tautolu mo e toto. Ko e kakano he mena nei ke nakai uta ki loto ke he tau tino ha tautolu ke he ha puhala e toto he falu tagata po ke ha tautolu ni a tau toto ne kua toka kehe mai he ha tautolu a tau tino. (Gahua 21:25) Ti nakai talia he tau Kerisiano moli e fagaiaga toto. To talia e lautolu e falu tauteaga fakamalolo tino, tuga e fagaiaga he tau puke noa nakai ko e toto. Manako a lautolu ke momoui, ka e nakai lali a lautolu ke fakahao ha lautolu a tau momoui he moumou e fakatufono he Atua.—Mataio 16:25.
[Tau Fakatino he lau 25]
Ke fiafia e Atua, kua lata ia tautolu ke fakamamao mo e fagaiaga toto, tau aga nakai mea, mo e nakai mahani fakahanoa