Tau Tala he Kautu Nu. 35

To Maeke Nakai e Tau Tagata Oti ke Fefakaalofaaki?

Kua Tupu e Momoko he Fakaalofa ke he Katofia

TOTOU miliona kua fakahakuhaku mo e matematekelea, ti nakai fai mena ke hahaga ki ai. Ne talahau he fifine pisinisi kua okioki mai he gahua: ‘He taha afiafi ko e takape kua nofo he fale luga mo au ne tukituki e gutuhala haku mo e pehe kua matimati a ia. Ne tala age totonu e au ki a ia ka e fakahako kua lavelave au. Ne fakamolemole a ia ha kua fakalavelave a au mo e fano kehe.’

Momoko ai, ko e po ia ni, ne taupega e takape. He magaaho fakamui, kua pehe e fifine pisinisi ne kua ako e ia e “fakaakoaga matematekelea lahi.”

Kua fa mahani e kaumahala he fakaalofa ke he katofia ke matematekelea. He magahala he tau taufetoko fakamatakavi i Posinia mo Hesekovina, ko e vala fakamua ha Iukosalavia, kua molea e miliona kua fakaohooho ke o kehe he tau kaina ha lautolu mo e tau hogofulu afe kua kelipopo ai. E hai? “He tau katofia ha mautolu,” he tagi he tama fifine ne kua uta kehe mai he maaga hana. “Na iloa e mautolu a lautolu.”

I Ruanata kua totou teau afe he tau tagata ne kelipopo, na fa taute ni he tau katofia ha lautolu. “Ko e tau Hutu mo e tau Tutsi [kua nonofo] auloa, femauaki, nakai tokaga po ke nakai iloa foki ko hai e Hutu mo e ko hai e Tutsi,” he hokotaki mai he The New York Times. “Ti fai mena ne tupu fakalutukia,” mo e “kamata e keliaga.”

Tatai ai, kua nonofo fakalataha e tau Iutaia mo e tau Arapi i Isaraela, ka e fevihiatiaaki e tokologa. Ko e tuaga taha ke he tokologa he tau Katolika mo e tau Porotesano i Ailani mo e tupu ki mua e numera he tau tagata he falu he tau motu. Nakai la tupu ia ha mena fakamua pihia he fakamauaga tuai he lalolagi ko e kaumahala he fakaalofa.

Ko e Ha e Fakaalofa ke he Katofia kua Momoko Ai?

Kua foaki he Tufuga ha tautolu e tali. Ko e Kupu hana, ko e Tohi Tapu, kua ui e vaha ne kua nonofo ai a tautolu ko e “tau aho fakamui.” Ko e magahala nei kua talahau ai he perofetaaga he Tohi Tapu, to “nakai fai fakaalofa” e tau tagata. Hagaao ke he “tau aho uka” nai, kua ui foki he tau Tohiaga Tapu ko e “fakaotiaga he lalolagi,” kua talahau tuai e Iesu Keriso to “momoko foki e tau loto he tau tagata tokologa.”—2 Timoteo 3:1-5; Mataio 24:3, 12.

Ko e kaumahala he fakaalofa he vaha nei, ko e mena ia, ko e vala he tau fakamoliaga kua nonofo a tautolu ke he tau aho fakamui he lalolagi nei. Fiafia ai, kua kakano foki ko e lalolagi nei he tau tagata nakai mahani Atua to nakai leva ti hukui ai he lalolagi tututonu fou ne pule e fakaalofa.—Mataio 24:3-14; 2 Peteru 2:5; 3:7, 13.

Ka e ha ha moli kia ia tautolu e kakano ke talitonu to maeke e hikiaga pihia—ke fakaako ke fefakaalofaaki e tau tagata oti kana mo e nonofo fakalataha ke he mafola?

Fakaalofa ke he Katofia—Ko e Mena Moli

“Ko hai kia e tagata ne katofia mo au?” he huhu he Ioea he senetenari fakamua ki a Iesu. Nakai fakauaua ai kua amanaki a ia ki a Iesu ke pehe, ’Ko e hau a tau matakainaga Iutaia.’ Ka e i loto he tala hagaao ke he katofia Samaria, ne fakakite e Iesu ko e tau tagata he falu motu ko e tau katofia foki ha tautolu.—Luka 10:29-37; Ioane 4:7-9.

Ne peehi e Iesu, he tata ke he fakaalofa ke he Atua, ko e fakaalofa ke he katofia kua lata ke pule ke he tau momoui ha tautolu. (Mataio 22:34-40) Ka e fai matakau tagata kia kua fakalofa moli ke he tau katofia ha lautolu? Taute pihia he tau Kerisiano fakamua! Ne mailoga a lautolu ha ko e fakaalofa ne ha ha ia lautolu ke he falu.—Ioane 13:34, 35.

Ka e kua e vaha nei? Kua taute kia he ha tagata e fakaalofa tuga ha Keriso? Kua talahau he Encyclopedia Canadiana: “Ko e gahua he Tau Fakamoli a Iehova ko e liu fakafou mo e liu fakatu he vaha faka-Kerisiano fakamua ne taute e Iesu mo e tau tutaki hana . . . Ko e tau matakainaga oti a lautolu.”

Ko e heigoa e kakano he mena ia? Ko e kakano kua nakai fakaata he Tau Fakamoli a Iehova ha mena taha—ko e lanu, motu, po ke matakau—ke fakatupu a lautolu ke vihiatia e tau katofia ha lautolu. To nakai keli foki e lautolu ha tagata, ha kua tukituki fakatai ai e tau pelu ha lautolu ke he tau koho mo e tau tao ke he tau titipi taute ulu vine. (Isaia 2:4) Moli ai, ko e Tau Fakamoli, kua mailoga ai ha kua fakalotomatala ke lagomatai e tau katofia ha lautolu.—Kalatia 6:10.

Ati ko e mena ia ni he tohi tala Sacramento Union i California ne tohi: “Makona ai ke talahau kaeke ke momoui e lalolagi katoa ke he taofiaga he Tau Fakamoli a Iehova to ha i ai e fakaotiaga he lima toto mo e fevihiatiaaki, mo e to pule katoa ai e fakaalofa tuga e patuiki.” Ko e tagata tohi Hugarii he mekasini Ring ne talahau: “Kua hokotia au ke he fakaotiaga kaeke ni ko e Tau Fakamoli a Iehova ne nonofo he lalolagi, to nakai fai felakutaki, mo e ko e gahua ni he tau leoleo ko e leveki e tau motoka mo e foaki e tau tohi fakaata.”

He talahau ai mogoia, ko e hikiaga lahi mahaki he lalolagi katoa to maeke kaeke ke fefakaalofaaki e tau tagata oti. To hoko mai fefe e hikiaga ia? (Fakamolemole kikite e lau i tua.)

Magaaho ka Fefakaalofaaki e Tau Tagata Oti

Kua fakakite he liogi ne fakaako e Iesu Keriso kua tata mai e hikiaga kua mua atu e kehe. He hana Lauga talahaua he Mouga, ne fakaako e Iesu a tautolu ke liogi: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:10.

Ko e heigoa e Kautu he Atua? Ko e fakatufono moli, kua pule mai ai he lagi. Ko e mena haia ne ui ai ko e “kautu he lagi.” Ko Iesu, ko e “Iki he mafola,” kua kotofa he hana Matua ke eke mo pule i ai.—Mataio 10:7; Isaia 9:6, 7; Salamo 72:1-8.

Ka hoko mai e Kautu he Atua, ko e heigoa ka tupu ke he lalolagi nei ne puke he vihiatia? “To tuki malipilipi mo e fakaotioti,” he “kautu” e tau fakatufono matahavala oti he lalolagi nei. (Tanielu 2:44) Kua fakamaama mai he Tohi Tapu: “Ha ne mole atu foki e lalolagi . . . ; ka ko e tagata kua eke e finagalo he Atua to tumau a ia tukulagi.”—1 Ioane 2:17.

Hagaao ke he lalolagi fou he Atua, kua pehe e Tohi Tapu: “To eke ni e motu ma e tau tagata tututonu, to nonofo muatua ai a lautolu.” (Salamo 37:9-11, 29; Tau Fakatai 2:21, 22) Ko e magaaho lilifu ue atu ha ia mogoia! “Ti nakai tuai fai mate, po ke fakatutuku, po ke tagi, ti nakai tuai fai matematekelea.” (Fakakiteaga 21:4) Ti ko lautolu foki ne mamate to liu ai ke momoui, mo e to faliu e lalolagi oti ke he parataiso moli.—Isaia 11:6-9; 35:1, 2; Luka 23:43; Gahua 24:15.

Ke nofo he lalolagi fou ia he Atua, kua lata ia tautolu ke fefakaalofaaki, tuga toki he fakaako he Atua a tautolu ke taute. (1 Tesalonia 4:9) Ne pehe e tagata fakaako Tohi Tapu he Fahi Uta: “Amaamanaki lahi atu au ke he magaaho, tuga kua mavehe ai he Tohi Tapu, to fakaako e tau tagata oti ke fefakaalofaaki.” Mo e kua mauokafua a tautolu to fakamoli he Atua e tau maveheaga hana! “Ne vagahau atu e au,” he talahau e ia, “to eke ai ni e au.”—Isaia 46:11.

Ka ke olioli e tau monuina i lalo he Kautu he Atua, kua lata ia koe ke fakaako e iloilo he Tohi Tapu, tuga fa e taute he tau tagata miliona ne loto fakamoli he lalolagi katoa. (Ioane 17:3) Ko e porosua lau tohi 32 Ko e Heigoa e Manako he Atua ma Tautolu? ka lagomatai a koe. Kia moua e lagaki he fakapuke e coupon ne tohi he lau tohi fakamua mo e fakafano atu ke he kaina kua tata lahi ke he kaina hau.

□ Manako au ke moua e porosua Ko e Heigoa e Manako he Atua ma Tautolu?

□ Fakamolemole fakailoa mai ki a au hagaao ke he fakaakoaga Tohi Tapu nakai totogi.

[Fakatino Credit Line he lau 2]

Sniper and funeral in Bosnia: Reuters/Corbis-Bettmann