Manako Nakai a Koe ke Iloa Lahi e Tohi Tapu?

Ko e Ha ne Totou Ai e Tohi Tapu?

KO E Tohi Tapu kua nakai tuga e falu a tohi—kua ha ha i ai e fakaakoaga fakaalofa mai he Atua. (1 Tesalonia 2:13) Kaeke ke fakaaoga e koe e tau mena ne fakaako he Tohi Tapu, to aoga lahi ia ki a koe. To tupu hau a fakaalofa ma e Atua mo e tata atu ki a ia, ko e Foaki he “tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki.” (Iakopo 1:17) To iloa e koe e puhala ke fina atu ki a ia he liogi. Ke he tau magaaho fakaatukehe, to iloa e koe e lagomatai he Atua. Kaeke ke fakatatai hau a moui mo e tau tutuaga kua fakatoka he Tohi Tapu, to foaki atu he Atua ki a koe e moui tukulagi.—Roma 6:23.

Kua ha ha he Tohi Tapu e tau kupu moli ke moua mai e maamaaga. Ko lautolu ne moua e iloilo he Tohi Tapu kua tokanoa mai he tau manatu fakahehe ne pule ke he tau momoui he tau miliona. Ke fakatai, ka iloa e kupu moli ke he tau mena ka tutupu he mole atu e mamate ha tautolu, to tokanoa a tautolu mai he matakutaku kua fakamamahi he tau tagata mamate a tautolu po ke matematekelea e tau magafaoa mo e tau kapitiga mamate ha tautolu. (Esekielu 18:4) Ko e fakaakoaga he Tohi Tapu ke he liu tu mai kua fakamafana aki a lautolu ne mamate e tau fakahelehele. (Ioane 11:25) Ke iloa e kupu moli ke he tau agelu kelea kua fakamataala aki a tautolu ke he tau hagahaga kelea fakataulatua mo e lagomatai a tautolu ke maama ko e ha ne loga lahi ai e tau mena vihi he lalolagi.

Ko e tau poakiaga faka-Atua he Tohi Tapu kua fakakite ki a tautolu ke momoui ke he puhala kua tamai e tau mena aoga fakatino. Ke fakatai, ko e “mataala” ka lagomatai atu ke he tino malolo mitaki. (1 Timoteo 3:2) He “fakamea e tautolu a tautolu ke he tau mena oti ke kelea ai e tino katoa mo e agaga,” kua lata ke ua moumou e tau malolo tino ha tautolu. (2 Korinito 7:1) He fakaaoga e fakatonuaga he Atua ne moua mai he Tohi Tapu kua fakaholo ki mua foki e fiafia he fakamauaga mo e fakalilifu fakatagata—1 Korinito 6:18.

Kaeke ke fakaaoga e koe e Kupu he Atua, to eke a koe mo tagata mua atu e fiafia. To lagomatai he iloilo he Tohi Tapu a tautolu ke moua e mafola mo e totoka he loto mo e foaki ki a tautolu e amaamanakiaga. Kua lagomatai a tautolu ke fakalaulahi e tau fua mitaki pihia tuga e hofihofi, fakaalofa, olioli, mafola, totonu, mo e tua. (Kalatia 5:22, 23; Efeso 4:24, 32) To lagomatai he tau fua pihia a tautolu ke eke mo tau tane po ke hoana, matua tane po ke matua fifine, tama tane po ke tama fifine mitaki.

Kua manamanatu nakai a koe ke he vaha i mua? Kua fakakite he tau perofetaaga he Tohi Tapu e matakavi kua hohoko tonu a tautolu ki ai. Nakai ni fakamaama hokoia he tau perofetaaga nei e tuaga he lalolagi he vaha nei ka e fakakite mai foki to nakai leva ti fakafou he Atua e lalolagi ke he tuaga parataiso.—Fakakiteaga 21:3, 4.

Lagomatai ke Maama e Tohi Tapu

Na liga lali a koe ke totou e Tohi Tapu ka e kitia ki ai kua uka ke maama. Po kua nakai iloa e koe, ko e mena fe ke kumi ki ai he Tohi Tapu ke moua e tau tali ke he tau huhu hau. Kaeke ke pihia, nakai ko koe ni tokotaha ne uka. Kua manako lagomatai oti a tautolu ke maama e Kupu he Atua. Ko e Tau Fakamoli a Iehova, he tau atu motu 235, hane foaki noa e fakaakoaga Tohi Tapu ke he tau miliona tagata. To fiafia lahi a lautolu ke lagomatai foki a koe.

Kua fa mahani ke mitaki lahi ka fakaako fakapapahi e Tohi Tapu, kamata mai he tau matapatu fakaakoaga. (Heperu 6:1) He matutaki tumau a koe ki ai, to maeke mitaki ia koe ke maama e tau “mena kakano”—pehe a ia, ko e hokulo ke he kupu moli. (Heperu 5:14) Ko e Tohi Tapu ko e punaaga katoa. Ko e tau tohi fakave ke he Tohi Tapu, tuga e porosua Ko e Heigoa e Manako he Atua ma Tautolu?, ka lagomatai a koe ke maama e tau talahauaga Tohiaga Tapu hagaao ke he tau fakaakoaga kehekehe.

Talia Nakai e Koe ke Fai Magaaho he Tau Faahi Tapu Takitaha ke Maama e Tohi Tapu?

Ko e fakaako Tohi Tapu kua fa mahani ke fakatoka e magaaho mo e matakavi ne hagahaga mitaki ki a koe. Tokologa ne fakaako ni he tau kaina ha lautolu. Ko e falu ne fakaako foki ke he telefoni. Ko e fakaholoaga fakaako, nakai ko e vahega he tau tagata tokologa, ka ko e fakatokaaga ni kua lata mo e tau tutuaga fakatagata, lauia e lahi he iloilo mo e fakaakoaga hau. Kua nakai fai kamatamata, mo e to nakai taute ke fakafuafuakelea aki a koe. To maeke ke tali e tau huhu hau ke he Tohi Tapu, mo e fakaako ki a koe e puhala ke fakatata ke he Atua.

To nakai totogi e koe e fakaakoaga Tohi Tapu ia. (Mataio 10:8) Kua foaki noa ke he tau tagata he tau lotu oti mo lautolu ne nakai fai lotu ka ko lautolu ni kua fiafia moli ke fakalaulahi ha lautolu a iloilo ke he Kupu he Atua.

Ko hai ka fakalataha ke he fakatutalaaga? Ko e hau a magafaoa katoa. Ko e ha kapitiga ni ne fifili e koe ke uiina ka fakalataha mai foki. Po ke, ka manako a koe, ko e fakatutalaaga to taute ni mo koe.

Tokologa ne fakatoka kehe taha e tula he faahi tapu ke fakaako e Tohi Tapu. Kaeke ke maeke ia koe ke fakalahi e magaaho ka fakaaoga po ke fakakaupa ni he tau faahi tapu takitaha, to maeke he Tau Fakamoli ke fakaata a lautolu ke lagomatai a koe.

Ko e Uiina ke Fakaako

Kua uiina atu ki a koe ke matutaki mo e Tau Fakamoli a Iehova. Ko e taha puhala ka taute e koe, ke tohi ke he matahigoa he kaina na i lalo. To taute e tau fakatokatokaaga ke fai tagata ke fakaako Tohi Tapu noa he kaina mo koe.

□ Fakafano mai ki a au e lagaki he porosua Ko e Heigoa e Manako he Atua ma Tautolu?

□ Fakamolemole matutaki mai ki a au hagaao ke he fakaako Tohi Tapu noa he kaina.

Ane mai kua kehe e mena ne fakakite, ne moua mai e tau fatiaga kupu Tohi Tapu oti kana he Tohi Tapu Niue.