Veveheaga Uafulu Ma taha
Moua he Finagalo a Iehova e Kautuaga Lilifu
1, 2. (a) Ko e heigoa e amaamanakiaga ha Iehova hagaao ke he tau tufugatia lotomatala hana? (e) Ko hai ne putoia ke he magafaoa kaufakalataha he Atua he tau tagata tapuaki?
KO E tau tufugatiaaga lotomatala oti kua kaufakalataha he tapuaki ke he Atua moli tokotaha mo e olioli e lautolu oti e tokanoaaga lilifu ko e tau fanau he Atua—ko e amaamanakiaga fakaalofa ha Iehova. Ko e mena foki kua manako lahi ki ai a lautolu ne ofania e tututonu.
2 Ne kamata a Iehova ke fakamoli e tau amaamanakiaga mua ue atu hana he magaaho ne kamata e ia e tau gahua tufugatia hana. Ko e tufugatiaaga fakamua hana ko e Tama ne tali mai he fakaliu tu mai “ko e kikila a ia he hana [Atua] lilifu, mo e hana fakatai moli.” (Heperu 1:1-3) Kua kehe e Tama nei, ne tufuga ni tokotaha he Atua. Ati puhala mai he Tama nei e falu ke momoui: fakamua ko e tau agelu he lagi, ti ko e tau tagata he lalolagi. (Iopu 38:7; Luka 3:38) Ko e tau mena oti nei kua eke mo magafaoa taha he lagi mo e lalolagi katoatoa. Ki a lautolu oti kana, ko Iehova e Atua, ko e Pule Katoatoa he Lagi mo e Lalolagi, mo e Matua fakaalofa ha lautolu.
3. (a) Ko e heigoa ha tautolu oti ne moua mai he tau mamatua uluaki ha tautolu? (e) Ko e heigoa e foakiaga fakaalofa ne taute e Iehova ma e tau hologa ha Atamu?
3 Magaaho ne fakahala e tau mamatua uluaki ha tautolu ke mamate ha ko e tau tagata agahala pauaki, ne vega kehe a laua mai Etena mo e tiaki he Atua. Ne nakai eke a laua mo vala he magafaoa he lagi mo e lalolagi katoatoa. (Kenese 3:22-24; Teutaronome 32:4, 5) Ko tautolu oti kana ko e tau hologa ha laua, ne fanau a tautolu mo e tau hihiga he agahala. Ka e iloa e Iehova to fai he tau hologa ha Atamu mo Eva ka ofania e tututonu. Ti tuku mai fakaalofa e Ia e foakiaga ke maeke ia lautolu nei ke moua e ‘tokanoaaga ha ha he lilifu he fanau he Atua.’—Roma 8:20, 21.
Galo e Tuaga Talia ha Isaraela
4. Ko e heigoa e kotofaaga ne tuku age e Iehova ki Isaraela i tuai?
4 Kavi ke he 2,500 e tau he mole e tufugaaga ha Atamu, ne tuku e Iehova ke he falu tagata pauaki e kotofaaga mitaki ke fai fakafetuiaga pauaki mo Ia. Ne fifili e ia a Isaraela i tuai ke eke mo tau tagata hana ti age ki a lautolu e Fakatufono hana. (Kenese 12:1, 2) Ne fakatu e ia a lautolu ko e motu mo e fakaaoga a lautolu ke lata mo e hana finagalo. (Teutaronome 14:1, 2; Isaia 43:1) Pete ia, ne lili agaia a lautolu ke he agahala mo e mate, ti nakai olioli e lautolu e tokanoaaga lilifu ne moua e Atamu mo Eva he kamataaga.
5. Galo fefe he tau Isaraela e tuaga pauaki ha lautolu mo e Atua?
5 Moha ia, ne moua he tau Isaraela e tuaga talia mo e Atua. Ne moua foki e lautolu e matagahua ke fakalilifu a Iehova ko e Matua ha lautolu mo e ke gahua fakatatau ke he hana finagalo. Ne peehi e Iesu e aoga he fakamoli e lautolu e kotofaaga ia. (Mataio 5:43-48) Ka e, ne kaumahala a Isaraela ke taute e mena nei. Ne talahau he tau Iutaia “ne taha ha m[a]utolu a Matua, ko e Atua,” ka e ne fakapuloa e Iesu ko e tau gahua mo e agaga ne fakakite e lautolu kua fakatikai e talahauaga ia. (Ioane 8:41, 44, 47) He 33 V.N., ne fakaoti he Atua e Fakatufono, ti oti foki e fakafetuiaga pauaki ha Isaraela mo ia. Ka e kakano kia e mena nei to nakai liliu foki e tau tagata ke olioli e fakafetuiaga talia mo e Atua?
Fakamaopoopo e “Tau Mena ha he Lagi”
6. Ko e heigoa e kakano he ‘fakaholoaga’ ia ne talahau e Paulo he Efeso 1:9, 10?
6 Ne fakakite he aposetolo ko Paulo kua maeke e falu tagata ke olioli e fakafetuiaga pauaki mo e Atua. Ma e fakatai, hagaao ke he fakaholoaga ha Iehova ma lautolu ne fakagahua e tua ka liga eke mo tau tagata he Hana a fale, ne tohi e Paulo: “Kua fakailoa mai [he Atua] kia tautolu e mena galo he hana finagalo, ke lata mo e pule totonu hana kua manatu ai a ia ke he hana finagalo; kia fakamaopoopo ai e ia e tau [fakaholoaga] oti kia Keriso ka hoko mai e katoatoaaga he tau ne kotofa, ko e tau mena ha he lagi katoa mo e tau mena ha he lalolagi.” (Efeso 1:9, 10) Ko e ‘fakaholoaga’ nei kua matapatu ki a Iesu Keriso. Puhala mai ia ia, ne tamai e tau tagata ke he tuaga talia ki mua he Atua. Kua fakakaupa e numera ha lautolu ka momoui ke he lagi. To mua atu e tokologa ha lautolu ka momoui tukulagi ke he lalolagi.
7. Ko hai e “tau mena ha he lagi”?
7 Fakamua, kamata he Penetekoso 33 V.N., ne onoono atu ai ke he “tau mena ha he lagi,” ko lautolu haia ka eke mo tau hakega fakalataha mo Keriso he Kautu he lagi. He fakave ai he tua ha lautolu ke he uho he poa ha Iesu, ne talahaua tututonu a lautolu ke he Atua. (Roma 5:1, 2) Fai magaaho, ne putoia ai e tau Iutaia mo e tau Tagata Kehe, ti ko e “tau mena ha he lalolagi” ka katoa ko e 144,000. (Kalatia 3:26-29; Fakakiteaga 14:1) Kua gahoa ni a lautolu ne toe agaia he lalolagi.
Fakamaopoopo e “Tau Mena ha he Lalolagi”
8. Ko hai e “tau mena ha he lalolagi,” mo e ko e heigoa ha lautolu a fakafetuiaga mo Iehova?
8 Ko e fakaholoaga taha ia foki ka fakamaopoopo mai e “tau mena ha he lalolagi.” Totou miliona e tau tagata mogonei ne kua fakamaopoopo mai mo e amaamanaki ke momoui tukulagi ke he lalolagi. He kaufakalataha mo lautolu ne toe he tau hakega he Kautu, ne fakamatalahi e lautolu e higoa ha Iehova mo e fakatokoluga hana tapuakiaga. (Isaia 2:2, 3; Sefanaia 3:9) Ne talahau foki e lautolu a Iehova ko e “Matua” kakano kua mailoga e lautolu a ia ko e punaaga he moui. Ti olioli e lautolu e tuaga talia ki mua hana he fakave ke he tua ha lautolu ke he toto ha Iesu ne fakamaligi. (Fakakiteaga 7:9, 14) Ka e ha kua nakai mitaki katoatoa agaia a lautolu, ko e fakahigoa katoatoa mo tau fanau he Atua kua haia agaia he vaha i mua.
9. Ko e heigoa e maveheaga ia Roma 8:21 ne tuku mai ma e tau tagata?
9 Ko lautolu nei ne ha ha e amaamanakiaga ke he lalolagi kua fakatalitali fiafia ke he magaaho he tau tufugatiaaga ka “toka noa ai e tau mena ne eke mai he tupaaga ke he mena popo vave.” (Roma 8:21) Ko e fakatokamaiaga ia to kamata agataha ka mole e tamai e Keriso mo e hana tau kau he lagi e matematekelea lahi ke he fakaotiaga ka hokotia ke he tapunu i Amaketo. To kakano e mena nei ko e moumouaga he fakatokaaga kelea katoa ha Satani, ti mui mai e tau monuina he Pule Afe Tau he Keriso he pule ke he Kautu.—Fakakiteaga 19:17-21; 20:6.
10. Ko e heigoa e lologo fakaheke ka uhu he tau fekafekau ha Iehova?
10 Ko e fiafia ha ia he magaaho ka fakalataha auloa e tau fekafekau ha Iehova he lalolagi ke fakataogo e tau manatu he tau fekafekau hana he lagi, ne fakapuloa olioli: “Kua lalahi hau a tau gahua ke ofomate ai [“ma Iehova ko e Atua Malolo Lahi Mahaki Katoatoa,” NW]; kua tonu mo e fakamoli hau a tau puhala, ko e Patuiki he tau tagata tapu na e. Ko hai kia taha, ma [Iehova] na e, kua nakai matakutaku kia koe, mo e nakai fakaheke atu ke he hau a higoa? ha ko koe hoko koe ni kua mitaki; ha ko e mena to o mai e tau motu oti, mo e hufeilo ki ho mua; ha kua fakakite mai tuai hau a tau fakafiliaga tonu.” (Fakakiteaga 15:3, 4) E, ko e tau fekafekau oti ha Iehova to fakalataha he tapuaki ke he Atua moli tokotaha. Hokotia foki ke liliu fakatu mai a lautolu ne mamate mo e foaki age e magaaho ke lologo auloa fakaleo lahi ki a Iehova.—Gahua 24:15.
Tokanoaaga Homo Ue Atu i Mua
11. Ko e heigoa e tokanoaaga homo atu ka olioli he tau tagata ka hao mai he matematekelea lahi?
11 Ka mole e matematekelea lahi, he hokotia ke he tapunu i Amaketo, kua fakamea e lalolagi mai he tau mahani kelea, to nakai liu a Satani ko e Tiapolo mo “atua he lalolagi nai.” To nakai liu e tau tagata tapuaki ha Iehova ke taufetului mo e tau fakaohoohoaga kelea muitui ha Satani. (2 Korinito 4:4; Fakakiteaga 20:1, 2) To nakai liu e lotu fakavai ke talahau fakakelea a Iehova mo e taute mo fakaohoohoaga totoko ke he fakalatahaaga tagata. To nakai liu e tau fekafekau he Atua moli ke logona e nakai fakafili tonu mo e ekefakakelea he tau pule tagata. Ko e tokanoaaga homo ue atu ha ia ka olioli!
12. To fakatokanoa fefe e tau tagata oti kana mai he agahala mo e tau lauiaaga he agahala?
12 Ha ko e “Punua mamoe he Atua, ko ia ke utakehe e hala he lalolagi,” to fakagahua e Iesu e kakano uho he hana poa ke magalo noa ai e tau agahala he tau tagata. (Ioane 1:29) Magaaho ne nofo a Iesu he lalolagi mo e fakamagalo e tau agahala he tagata, ne fakamalolo e ia e tagata ne fakamagalo ke fakamoli aki e mena nei. (Mataio 9:1-7; 15:30, 31) Ke he puhala taha ia, ko Keriso Iesu, ko e Patuiki he Kautu he Atua he lagi, to fakamaulu fakamana e tau matapouli, tau kuhukuhu, tau teligatuli, lautolu ne mafatifati fakatino, lautolu ne matematekelea e tau manamanatuaga, mo lautolu ne fai gagao kehe foki. (Fakakiteaga 21:3, 4) Ko lautolu oti ne omaoma to magalo noa ai e “fakatufono he hala” ke maeke he tau manatu mo e tau gahua ha lautolu ke fakafiafia, ki a lautolu mo e ke he Atua. (Roma 7:21-23) He matahiku he Meleniamu, to moua e lautolu e mitaki katoatoa he tagata, ke he ‘fakatai mo e tatai’ he Atua moli tokotaha.—Kenese 1:26.
13. He matahiku he Pule Meleniamu, ko e heigoa ka taute he Keriso, mo e ko e heigoa e fua?
13 Ka oti e tamai he Keriso e tau tagata ke he mitaki katoatoa, to liuaki age mogoia e ia ke he Matua e pule ne tuku age ki a ia ma e gahua nei: “Ka oti he tuku atu e ia e kautu ke he Atua, ko e Matua haia, ka oti he fakaotioti e ia e tau iki ne mua oti kana, mo lautolu gotoa kua pule, mo lautolu kua malolo. Ha ko e mena to pule ni a ia ato tuku e ia hana tau fi oti ki lalo he na ve hana.” (1 Korinito 15:24, 25) To fakakatoatoa he Pule Meleniamu he Kautu e hana finagalo; ti to nakai lata e fakatufono lafi mai nei ke toe hifo he vahaloto ha Iehova mo e tau tagata. Ti ha ko e mena to utakehe katoatoa e agahala mo e mate mo e kua laveaki mai e tau tagata, kua oti foki e lata ha Iesu mo Laveaki. Kua fakamaama he Tohi Tapu: “Ti tuku ai foki e Tama ki lalo ia ia ne tuku ai e tau mena oti ki lalo ia ia, kia pule okooko e Atua ke he tau mena oti kana.”—1 Korinito 15:28.
14. Ko e heigoa ka tuku ke he tau tagata mitaki katoatoa oti, mo e ko e ha?
14 Mui mai he mena nei, to tuku age e magaaho ke he tau tagata mitaki katoatoa ke fakatata e fifiliaga ha lautolu ke fekafekau tukulagi ke he Atua moli tokotaha. Ka e ato hiki katoatoa a lautolu mo tau fanau hana, to tuku oti e Iehova a lautolu ko e tau tagata mitaki katoatoa ke he kamatamata fakahiku. To vevete mai a Satani mo e hana tau temoni mai he pahua. Ke he mena nei to nakai fai fakamatematekelea tukulagi ki a lautolu kua fakaalofa moli ki a Iehova. Ka ko e ha tagata ka fakaata e mahani nakai fakamoli ha lautolu ke takitaki atu ke liuliu ki a Iehova to moumou tukulagi, fakalataha mo e totoko fakamua mo e hana tau temoni.—Fakakiteaga 20:7-10.
15. Ko e heigoa e tuaga ka liu foki ke moua he tau tufugatia lotomatala oti ha Iehova?
15 Ko e hiki laia mogoia e Iehova mo tau fanau hana e tau tagata mitaki katoatoa oti ne fakatokoluga e pule katoatoa he Atua he magahala he kamatamata fakahiku ia. Ka mole e magaaho ia, to fakalataha katoatoa a lautolu ke he tokanoaaga lilifu ko e tau fanau he Atua ko e vala he magafaoa he Atua he lagi mo e lalolagi katoatoa. Ko e tau tufugatia lotomatala oti he lagi mo e lalolagi to liu foki ke kaufakalataha he tapuaki ki a ia ko e Atua moli tokotaha. To moua he finagalo ha Iehova e kautuaga lilifu! Manako nakai a koe ke eke mo vala he magafaoa fiafia mo e tukulagi ia he lagi mo e lalolagi katoatoa? Kaeke pihia, kua fakamafana e mautolu a koe ke uta ke he loto e tau talahauaga he Tohi Tapu ia 1 Ioane 2:17: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”
Fakatutala Fakamanatu
• Ato hoko e totokoaga i Etena, ko e heigoa e fakafetuiaga he tau tagata tapuaki oti ha Iehova mo ia?
• Ko e heigoa e matagahua ne lago ki a lautolu ko e tau fekafekau he Atua?
• Ko hai ne toe ke eke mo tau fanau he Atua, mo e felauaki fefe e mena nei mo e finagalo ha Iehova hagaao ke he kaufakalataha he tapuakiaga?
[Fakatino he lau 190]
To olioli he tau tagata omaoma e moui he parataiso he lalolagi oti