Ko e Heigoa ka Moua he Faahi Kupega Hila ha Mautolu?

Ne tala age a Iesu Keriso ke he tau tutaki haana: “Kia kikila atu pihia ha mutolu a maama ki mua he tau tagata, kia kitia ai e lautolu ha mutolu a mahani mitaki ati fakaheke atu ai a lautolu ke he Matua ha mutolu ha ha he lagi.” (Mataio 5:16) Kakano ia, kua fakaaoga fakamitaki e mautolu e tau matini he vahā nei, putoia e Initanete. Ko e faahi kupega hila ha mautolu e jw.org, ko e puhala pauaki ke moua e tau vala tala hagaao ke he tau taofiaga mo e tau gahua he Tau Fakamoli a Iehova. Ko e heigoa ne fakakite ai?

Kua tali he Tohi Tapu e tau hūhū mahani mau. Maeke a koe ke moua e tau tali ke he falu he tau hūhū aoga lahi kua fa hūhū he tau tagata. Ma e fakatai, ko e tau tuleke To Fakaoti Nakai e Matematekelea? mo e Maeke Mooli Kia a Lautolu ne Mamate ke Liu Momoui? ne kua moua ai he Initanete ke molea e 600 e vagahau. Maeke foki a koe ke moua e New World Translation ke he molea e 130 e vagahau mo e fai tohi kumikumi lagomatai he Tohi Tapu, putoia e tohi Ko e Heigoa ne Fakaako Mooli he Tohi Tapu? mo e tau lagaki foou he Ko e Kolo Toko mo e Awake! Loga he tau tohi nei ka totou po ke fanogonogo ke he Initanete po ke moua mai he tau fakatokaaga mahuiga tuga e MP3, PDF, po ke EPUB. Maeke ia koe ke lolomi mai e falu lau ke age ke he tagata fiafia he vagahau ni haana! Ko e tau koloa vitiō kua moua ke he loga he tau vagahau matalima. Maeke a koe ke moua e tau totouaga tala Tohi Tapu, taute tala Tohi Tapu, mo e tau lologo fulufuluola ke fiafia ke he tau magaaho okioki haau.

Tau vala tala mooli hagaao ke he Tau Fakamoli a Iehova. Ha ha i ai foki e tau vala tala foou mo e tau vitiō kūkū hagaao ke he gahua ha mautolu he lalolagi katoa, tau mena tutupu ne lauia e Tau Fakamoli a Iehova, mo e ha mautolu a tau foakiaga lagomatai ke he tau tagata. Maeke a koe ke moua e tau fakailoaaga he tau fonoaga i mua mo e tau vala tala ke he tau la ofisa ha mautolu.

He tau puhala nei, kua fakakikila e mautolu e maama he kupu mooli ke he tau matakavi mamao he lalolagi. Kua aoga ai ke he tau tagata mai he tau atu motu, putoia e Antarctica. Liogi a mautolu “kia mafiti . . . e kupu he Atua” ke he lalolagi oti ke lata mo e lilifu he Atua.​—2 Tesalonia 3:1.

• Lagomatai fēfē he jw.org e tau tagata tokologa ke fakaako e kupu mooli he Tohi Tapu?

• Ko e heigoa haau kua manako ke kumikumi ke he faahi kupega hila ha mautolu?