Ko e Mena Galo kua Fiafia a Tautolu ke Iloa

Kua fai tagata nakai ne tala atu ki a koe e mena galo?—a Ne tutala e Tohi Tapu hagaao ke he taha “mena galo” pauaki ne tapu. Kua tapu ha ko e mena mai he Atua. Ti ko e mena galo kakano he nakai iloa ai he tau tagata. Manako foki e tau agelu ke iloa hagaao ke he mena nei. Fia iloa nakai a koe he mena galo ia?—

He leva tigahau kua mole, ne tufugatia he Atua e tagata taane fakamua mo e fifine. Ko Atamu mo Eva e tau higoa ha laua. Ne foaki age he Atua e kaina fulufuluola ma laua ne fakahigoa ko e katene i Etena. Ane mai omaoma a Atamu mo Eva ke he Atua, to taute e laua mo e tau fanau e lalolagi katoa ke eke mo parataiso ke tuga e katene ia. Ti maeke a lautolu ke nonofo tukulagi he Parataiso. Ka e manatu nakai e koe e mena ne taute e Atamu mo Eva?—

Ne nakai omaoma a Atamu mo Eva ke he Atua, ti ko e kakano a ia ne nakai nonofo a tautolu he parataiso he vahā nei. Ka e pehē e Atua to taute e ia e lalolagi katoa ke fulufuluola, momoui tukulagi mo e to fiafia e tau tagata oti. To taute fēfē e ia e mena nei? Leva lahi e nakai iloa he tau tagata. Ko e mena galo a ia.

Magaaho ne hau a Iesu ke he lalolagi, ne fakaako e ia ke he tau tagata hagaao ke he mena galo nei. Talahau e ia kua hagaao ke he Kautu he Atua. Ne talaage e Iesu ke he tau tagata ke liogi ma e Kautu nei ke hoko mai. To taute e lalolagi nei mo parataiso fulufuluola.

Fiafia lahi nakai a koe ke iloa e mena galo nei?— Manatu ko lautolu ni ne omaoma ka momoui he Parataiso. Ne talahau he Tohi Tapu e tau tala loga hagaao ke he tau tagata taane mo e fifine ne omaoma ki a Iehova. Manako nakai a koe ke iloa a lautolu ia?— O mai la ke kitia ko hai a lautolu ia mo e maeke fēfē ia tautolu ke tuga a lautolu.