Ko e Mena Galo ka Tala Age e Koe ke he Falu

KUA tala atu nakai ki a koe e mena galo?—a Taha e mena galo nei ne manako au ke tala atu ki a koe. Ko e mena galo tapu. I loto he Tohi Tapu ne fakahigoa ko e “mena galo ne ufia tali mai he kamataaga.” (Roma 16:25) He magaaho fakamua ko e Atua ni ne iloa e “mena galo.” O mai la a tautolu ke onoono ke he puhala ne mailoga he Atua ke iloa he tokologa e mena galo nei.

Ke kamata aki, iloa nakai e koe ko e heigoa e kakano he “tapu”?— Ko e kakano he kupu tapu, ko e meā po ke uho lahi mahaki. Ti kua fakahigoa ai ko e mena galo ha kua moua mai he Atua kua tapu. Ko hai he manatu e koe kua manako ke iloa e mena galo pauaki nei?— Ko e tau agelu. Pehē e Tohi Tapu: “Ko e tau mena ia kua foli ki ai e tau agelu he fia kitekite ki ai.” E, manako a lautolu ke maama e mena galo tapu nei.—1 Peteru 1:12.

Magaaho ne hau a Iesu ke he lalolagi, ne tutala a ia hagaao ke he mena galo tapu ti kamata ke fakamaama ai. Tala age a ia ke he tau tutaki haana: “Kua foaki atu kia mutolu ke iloa ai e mutolu e tau mena galo he kautu he Atua.” (Mareko 4:11) Mailoga nakai e koe kua hagaao ke he heigoa e mena galo tapu?— Kua hagaao ke he Kautu he Atua, ne fakaako e Iesu a tautolu ke liogi ke hoko mai!—Mataio 6:9, 10.

O mai la mogoia ke onoono ke he puhala ne eke e Kautu he Atua mo mena galo “tali mai he kamataaga” ato hau a Iesu ke he lalolagi ti kamata ke fakamaama ai. He mole e moumou e Atamu mo Eva e fakatufono he Atua ti tuku kehe a laua mai he katene ko Etena, ne iloa he tau fekafekau he Atua to taute agaia he Atua e lalolagi katoa mo parataiso. (Kenese 1:26-28; 2:8, 9; Isaia 45:18) Ne tohi e lautolu hagaao ke he fiafia ka olioli he tau tagata he lalolagi ka ha ha i lalo hifo he Kautu he Atua.—Salamo 37:11, 29; Isaia 11:6-9; 25:8; 33:24; 65:21-24.

Manamanatu la mogonei hagaao ke he Pule he Kautu he Atua. Iloa nakai e koe ko hai ne fifili he Atua ke Pule?— Ko e Tama haana, ko e “Iki he [M]afola,” ko Iesu Keriso. “Ha ha he ua hana e pule,” he talahau he Tohi Tapu. (Isaia 9:6, 7) Kua lata a koe mo au ke “iloa mitaki ai e kupu galo he Atua, ko e Matua ia, katoa mo Keriso.” (Kolose 2:2) Lata ia tautolu ke iloa na uta he Atua e moui he agelu fakamua (Tama fakaagaaga) ne tufuga e ia ti tuku i loto ha Maria. Ko e Tama ia, ko e agelu malolō lahi ne fakafano mai he Atua ke he lalolagi mo poa ke maeke ia tautolu ke moua e moui tukulagi.—Mataio 20:28; Ioane 3:16; 17:3.

Ka kua lahi atu e mena kua lata ia tautolu ke iloa hagaao ke he mena galo nei he iloa hokoia na fifili he Atua a Iesu ke eke mo Pule he Haana Kautu. Ko e taha vala he mena galo tapu ia to fai tagata ka fakalataha mo Iesu ne fakaliu tu mai ke he lagi, ko e tau taane mo e tau fifine. To pule a lautolu mo Iesu he lagi!—Efeso 1:8-12.

O mai la ke fakaako e tau higoa he falu ia lautolu ka pule mo Iesu he lagi. Ne tala age a Iesu ke he tau aposetolo tua fakamooli haana to fano a ia ki ai ke taute taha mena ke nonofo a lautolu. (Ioane 14:2, 3) He onoono ke he tau kupu Tohi Tapu i lalo, to kitia e koe e tau higoa he falu tagata taane mo e fifine ka pule mo Iesu he Kautu he Matua haana.—Mataio 10:2-4; Mareko 15:39-41; Ioane 19:25.

Ne leva lahi mahaki e nakai iloa ko e fiha e tagata ka pule he lagi mo Iesu ko e vala he Kautu haana. Ka e mogonei kua iloa e tautolu e numera. Iloa nakai e koe e numera ia?— Pehē e Tohi Tapu ko e 144,000. Ko e vala anei foki he mena galo tapu.—Fakakiteaga 14:1, 4.

Talia nakai e koe ko e “mena galo he kautu he Atua” ko e mena galo ne mua ue atu ka iloa he ha tagata?— Ka pihia, kia lali a tautolu ke fakaako e tau mena oti hagaao ki ai ke maeke ia tautolu ke fakamaama e tau mena nei ke he tokologa he tau tagata ka maeke ia tautolu.