VALA 2
Mahani Fakamooli ko e Taha ke he Taha
“Ko ia kua fakalataha he Atua, aua neke vevehe he taha tagata.”—Mareko 10:9
Kua amanaki a Iehova ki a tautolu ke fiafia ke he ‘fakaalofa fakamooli.’ (Salamo 31:23) Kua mua e aoga he mena nei he fakamauaga ha mua kakano ka nakai fakamooli, ti nakai fai falanakiaga. Kua aoga lahi e falanakiaga ke tupu lahi e fakaalofa.
He vahā nei, ko e mahani fakamooli i loto he fakamauaga kua fakahagahaga kelea. Ke puipui e fakamauaga ha mua, kua latatonu ia mua ke eketaha ke taute ua e mena.
1 TUKU FAKAMUA E FAKAMAUAGA HA MUA
PEHĒ E TOHI TAPU: “Kia mailoga ai e mutolu e tau mena [ne mua atu e aoga].” (Filipi 1:10) Ko e fakamauaga ha mua ko e taha mena kua mua e aoga he moui. Ti latatonu ke tuku fakamua ai.
Manako a Iehova ke hagaaki a koe ke he hoa haau mo e “fiafia . . . hāu a moui” fakalataha mo e hoa. (Fakamatalaaga 9:9) Kua talahau fakamaaliali e ia kua nakai lata a koe ke fakaheu e hoa haau, lata a mua ke kumi e puhala ke fakafiafia e taha ke he taha. (1 Korinito 10:24) Kia lagomatai e hoa haau ke logona hifo kua aoga mo e ofania a ia.
KO E MENA HAAU KA TAUTE:
Kia eketaha ke fakalataha tumau tokoua, ti hagaaki katoa ki a ia
Manamanatu ki a “taua” ka e nakai ki a “au”
2 PUIPUI E LOTO HAAU
PEHĒ E TOHI TAPU: “Ka kikite atu taha ke he fifine kia manako ki ai, kua faivao tuai a ia ke he hana loto.” (Mataio 5:28) Ka manamanatu tumau e taha ke he mahani faivao, ko e kakano, kua nakai fakamooli a ia ke he hoa haana.
Kua talahau e Iehova kua lata ke “leveki e koe e loto hāu.” (Tau Fakatai 4:23; Ieremia 17:9) Ke taute e mena nei, kua lata ia koe ke leveki e tau mata haau. (Mataio 5:29, 30) Muitua ke he fakafifitakiaga he tupuna ko Iopu, ne taute e ia e maveheaga mo e tau mata haana ke nakai onoono mo e manako lahi ke he taha fifine foki. (Iopu 31:1) Kia eketaha ke nakai kitekite ke he tau fakatino telefua. Ti kia mauokafua ke nakai feaki e tau manako loto fakavihi mo e taha tagata ne nakai ko e hoa haau.
KO E MENA HAAU KA TAUTE:
Fakakite fakamaaliali ke he falu kua loto katoatoa a koe ke he hoa haau
Manamanatu ke he tau logonaaga he hoa haau, ti fakaoti fakamafiti ha fakafetuiaga ka liga fakatupetupe e hoa haau