FAKAAKOAGA 18

Vala Tala ma e Toloaga Haau

1 Korinito 9:19-23

MENA KE TAUTE: Fakalagalaga e manamanatuaga he tau tagata fanogonogo haau he toka a lautolu mo e logonaaga kua fai mena aoga ne fakaako e lautolu.

PUHALA KE TAUTE AI:

Manamanatu ke he mena kua fitā he iloa he tau tagata fanogonogo haau. He nakai fatiaki noa e tau mena ne logona e lautolu fakamua, lagomatai a lautolu ke onoono ke he matakupu he puhala foou.

Fakamaama fakamafiti e tau manatu fa mahani ki ai, ka e fakamaama fakatekiteki e tau manatu foou.
Kumikumi mo e manamanatu fakahokulo. Ke fakatai e tau matapatu manatu, putoia e fakaaoga he tau vala tala ne nakai mahani lahi po ke tau mena tutupu foou. Ka e manamanatu fakahokulo ke felauaki ai mo e vala tala.

Ka kumikumi a koe ke he vala tala, fakalagalaga e manamanatuaga ni haau he hūhū ki a koe e tau hūhū tuga ‘ko e heigoa, ko e ha, magaaho fe, i fe, mo e fēfē.’ Tuku taha moui he fakaakoaga haau he talahau mo e tali e falu hūhū ia he fakataitaiaga haau.
Fakakite e aoga he fekau haau. Fakamaama e puhala ka lagomatai he tau manatu he Tohi Tapu e tau tagata fanogonogo ke he tau momoui ha lautolu he tau aho takitaha. Fakatutala ke he falu he tau tutūaga, tau aga, mo e tau mahani ne aoga ke he tau tagata fanogonogo haau.