Ko e Tagata Fēfē a Iesu?

He fakaako a tautolu ke he tau mena ne talahau mo e taute e Iesu he nofo he lalolagi, iloa e tautolu e tau mahani kua fakatata lahi a tautolu ki a ia mo e haana Matua ko Iehova. Ko e heigoa e falu mahani mitaki nei? Ti fifitaki fēfē e tautolu a Iesu he tau momoui ha tautolu?

1. Ko e tau puhala fe ha Iesu kua tuga e Matua haana?

I luga he lagi, kitekite a Iesu ke he Matua fakahele haana mo e fakaako mai ia Ia ke he loga e tau tau. Ko e fua kua manamanatu, logona hifo, mo e gahua a Iesu tuga a Ia. (Totou Ioane 5:19.) Fifitaki katoatoa e Iesu e tau mahani he Matua haana ti pehē a ia: “Ko ia kua kitia au, kua kitia foki e ia e Matua.” (Ioane 14:9) He fakaako e koe e aga ha Iesu, to iloa mitaki e koe a Iehova. Tuga anei, ko e fakaalofa hofihofi ha Iesu ma e tau tagata kua fakakite e logonaaga ha Iehova hagaao ki a koe.

2. Fakakite fēfē e Iesu kua fakaalofa a ia ki a Iehova?

Pehē a Iesu: “Kia iloa he lalolagi, kua fakaalofa au ke he Matua, tuga e poaki mai foki he Matua kia au, pihia he eke e au.” (Ioane 14:31) He nofo a Iesu he lalolagi, fakakite e ia e fakaalofa lahi ke he Matua haana he omaoma ki a Ia pete ni kua uka. Fiafia foki a Iesu ke tutala hagaao ke he Matua haana mo e lagomatai e falu ke feaki e fakafetuiaga mo Ia.​—Ioane 14:23.

3. Fakakite fēfē e Iesu kua fakaalofa a ia ke he tau tagata?

Talahau he Tohi Tapu ko Iesu kua “fiafia . . . ke he fanau he tau tagata.” (Tau Fakatai 8:31) Fakatātā e ia e fakaalofa nei he fakamafana mo e foaki katoatoa e lagomatai ma e tau tagata. Taute e ia e tau mana ne fakakite kua ha ha ia ia e malolō mo e fakaalofa hofihofi. (Mareko 1:40-42) Taute fakamitaki e ia e tau tagata mo e nakai fakamailoga a lautolu. Ko e tau kupu haana kua foaki e mafanatia mo e amaamanakiaga ki a lautolu oti kua loto fakamooli ke fanogonogo. Makai a Iesu ke mamahi mo e mate ha kua fakaalofa a ia ke he tau tagata oti kana. Ka e fakaalofa lahi a ia ki a lautolu kua muitua ke he tau fakaakoaga haana.​—Totou Ioane 15:13, 14.

KUMIKUMI FAKAHOKULO

4. Fakaalofa a Iesu ke he Matua haana

Ko e fakafifitakiaga ha Iesu kua fakaako mai e puhala ke fakakite e fakaalofa ha tautolu ke he Atua. Totou Luka 6:12 mo e Ioane 15:10; 17:26. He oti e totou he tau kupu Tohi Tapu, tutala ke he hūhū nei:

• He fifitaki ki a Iesu, maeke fēfē ke fakakite kua fakaalofa a tautolu ki a Iehova?

6. Fakamokoi a Iesu

Fakamokoi a Iesu pete he nakai loga e tau koloa haana, ti fakamalolō e ia a tautolu ke fakamokoi. Totou Gahua 20:35, ti tutala ke he hūhū nei:

• Tuga ne talahau e Iesu, maeke fēfē a tautolu ke moua e monuina, po ke fiafia?

Tā e VITIŌ, ti tutala ke he hūhū nā.

VITIŌ: ‘Kua Mua e Monuina ke Foaki Atu’​—Vitiō Kū (4:00)

• Ko e heigoa e falu puhala ka foaki atu e tautolu, pete he nakai loga e tau koloa ha tautolu?

Iloa nakai e koe?

Fakaako he Tohi Tapu ki a tautolu ke liogi ki a Iehova puhala he higoa ha Iesu. (Totou Ioane 16:23, 24.) Ka liogi pihia a tautolu, fakakite ai kua mailoga e tautolu e tau mena ne taute e Iesu ke lagomatai a tautolu ke eke mo tau kapitiga ha Iehova.

MANATU KATOA

Fakaalofa a Iesu ki a Iehova mo e tau tagata. Ha ko Iesu kua tuga e Matua haana, ka iloa lahi mogoia e koe a Iesu to iloa lahi foki e koe a Iehova.

Liu Fakamanatu

• Fakakite fēfē e tautolu e fakaalofa ki a Iehova, tuga ne taute e Iesu?

• Fakakite fēfē e tautolu e fakaalofa ke he tau tagata, tuga ne taute e Iesu?

• Ko e heigoa e aga ha Iesu ne fiafia lahi a koe ki ai?

KUMI FOKI

Manamanatu ke he falu mahani ha Iesu kua maeke a tautolu ke fifitaki.

“Ke Fifitaki a Iesu, Kia . . . ” (Jesus​—The Way, the Truth, the Life, lau 317)

Kumikumi e kakano kua lata a tautolu ke liogi puhala he higoa a Iesu.

“Ko e Ha ne Liogi ke he Higoa a Iesu?” (Ko e Kolo Toko, Aperila-Iuni 2008)

Fai talahauaga nakai e Tohi Tapu ke he foliga ha Iesu?

“Mata Fēfē a Iesu?” (Vala tala he kupega hila)

Ko e heigoa ka fakaako e tautolu he puhala ne fehagai a Iesu mo e tau fifine?

“Ofaofa mo e Fakalilifu i Lalo he Levekiaga he Atua” (Vala tala he Kolo Toko)