Tapuaki a Koe ke he Atua Fe?

KA TAKAI e lalolagi, kua loga e tau puhala kehekehe ka tali he tau tagata e huhu ia. Ne kitia he aposetolo ko Paulo: “Ha kua tokologa e tau atua, mo e tokologa e tau iki,” mo e vaha nei, ko e tau atua ne tapuaki ki ai kua numela atu ke he tau miliona. (1 Korinito 8:5) Kua iloa nakai e koe, kua pehe, tokologa e tau tagata kua tapuaki ke he atua ne kehe mai he taha kua manamanatu a lautolu kua tapuaki a lautolu ki ai? Mo e kua iloa nakai e koe, ko e tokologa e tau tagata ne nakai tua ko e fai atua, ne mua atu e tukulele, ia lautolu ne kua tua ke he taha atua? Ke he heigoa e puhala?

Kua pehe, ko e taha kakano he tapuaki, “ke onoono atu mo e ke lahi mahaki, ke eke foki ke molea atu he kaupaaga ne famahani ki ai e fakalilifu, fakaheke, poke fakamoli ki ai.” He tau vagahau fakamua he Tohi Tapu, ko e tau kupu ma e tapuaki ne hahamo e manatu ke fekafekau poke tukutuku hifo ki lalo, i mua he taha tagata. Mo e tau mena nei he loto, kia omai a, a tautolu, ke kitia kua maeke fefe e tau tagata ke hehe, mo e ko hai poke heigoa kua tapuaki moli a lautolu ki ai.

Tapuakiaga Fiofio

Kia mailoga la e fakatai ke he tau Samaria i tuai. Tokologa mai ia lautolu nei ko e tau tagata motu kehe he kamataaga, ne uta he tau Asuria ki Palesitaina ke hukui aki e magafaoa hogofulu he fahi tokelau ha Isaraela ne fakapaea. Ne muitua a lautolu fakamua ke he tau atua pouliuli, ka ko e magaaho nei kua taute fakamakutu a lautolu ke fakaako atu hagaao ki a Iehova, ko e Atua he tau Isaraela. Kua tiaki kia he magaaho ia ha lautolu a tau lotu tuai? Nakai. Kua hokotaki mai e Tohi Tapu: “Ka e eke ni e lautolu ke tuga ne mahani tuai ha lautolu. Ne matakutaku e tau motu ia kia Iehova ka e fekafekau foki a lautolu ke he ha lautolu a tau tupua kua ta.” (2 Patuiki 17:40, 41) Ti ko e tau Samaria, kua mailoga a Iehova, ka e tumau agaia ke fekafekau ke he ha lautolu a tau atua tuai, ti kua taute ai e faga lotu fiofio.

Fai mena pihia ne tutupu he magaaho ne uta he tau faifeau, e taofiaga he lotu Katolika Roma ki Amelika Toga. Tokologa mai he tau tagata he motu ne fakafaliu e lautolu, ka e tuga e tau Samaria i tuai, nakai nimo he laulahi he tau tagata ha lautolu a tau atua tuai. Ti kua pihia i Pasili (Brazil), ko e tau tauteaga fakalotu he taulaatua kua taute tumau agaia he tau “Kerisiano,” tuga e tau fakafiafiaaga kua fakaheke atu ke he tau atua tuai, tuga e atua fifine ko Iemanjá. Tatai ni pihia e tau mena ne tutupu he falu a tau motu i Amelika Toga.

Ke lafi ki ai, ko e lotu ne uta he tau faifeau ia ki loto a Amelika Toga, ko e lotu fiofio agaia ni. Loga mai he hana tau fakaakoaga tuai, tuga e Atua Tolu Taha, ko e afi ha hell, mo e nakai maeke ke mate e solu, ne moua mai he tau lotu pouliuli i tuai mo e tau manatu fakataitai. Kua moli lahi kua nakai moua a lautolu ia, i loto he Tohi Tapu. Ti tatai ni, e tau galue fiafia​—kua fakalataha ki ai e Kerisimati mo e Isita​—ne nakai mai he Kerisiano he kamataaga.a Kua maeke foki kia, ke taute e tau fakafiafia pouliuli pihia mo e tali tonu ke he tau fakaakoaga ne nakai ko e fakaakoaga Kerisiano mo e tumau agaia ke tapuaki e Atua he Tohi Tapu, ko ia ne pehe: “Aua neke eke e koe māu e tau atua kehe hoku mua”? (Esoto 20:3) Kua nakai pihia e mena ia!

“Kia Leveki e Mutolu a Mutolu kia Mamao mo e tau Tupua”

Kia manamanatu la ke he taha puhala ne fakahehe aki e tau tagata, ke he tau mena tapuaki. Ne tohia he aposetolo ko Ioane: “Ko e tau fanau ikiiki na e, kia leveki e mutolu a mutolu, kia mamao mo e tau tupua.” (1 Ioane 5:21) Kua hagaao atu ke he afe e tau miliona he tau tagata ne tohia ko e tau tagata ha Kerisitenitome, mo e kua liga lahi kua talahau a lautolu nei ko e tapuaki ke he Atua taha ne tapuaki a Ioane ki ai. Ka e tukutuku hifo e tau teau e tau miliona ia lautolu ke he tau tupua he tau “tagata tapu,” ha Iesu, mo e taopou ko Maria.

Ka e ha ha i ai foki falu mena fakagalogalo ne tapuaki atu ke he tau tupua. He tau 44 V.N. ne taute he Patuiki ko Herota Akeripa e lauga ke he tau tagata, mo e kua eke ai e tau tagata ke fiafia lahi, ne tauhea atu a lautolu: “Ko e leo he atua, ka e nakai ko e tagata.” (Gahua 12:21, 22) E, ne tapuaki fakaatua e lautolu a Herota, kua taute ko e atua a ia. Kua tatai ni mo e tau mena ne tutupu he vaha nei. Ko e aho ne tokoluga lahi e fiafia malolo, he magaaho hane lagaki hake e puhala Nazi ke he malolo i Europa, ko e fakaleo tauhea “Heil Hitler!” kua moli ni ko e tauhea fakaheke. Tokologa kua manako lahi ke tau mo e mamate ma e Führer kua tuga ko e atua a ia, ko e fakamouiaga he kautu. Ka e loga ia lautolu ne foaki atu e fakalilifuaga pihia, ko e tau tagata mai he tau lotu ha Kerisitenitome!

Fakamua, mo e he mole atu a Hitler, ko e falu takitaki politika kua tatai pihia, mo e tuku atu ne lautolu a lautolu ke mua, ko e tau fakamoui mo e poaki atu ke katoatoa e tukuleleaga ki a lautolu. Ko lautolu ne kaumahala ne taute e tau tagata tane nei mo tau atua, pete ni ko e heigoa e tau lotu ne nonofo ai e tau “tagata tapuaki” poke pihia foki kaeke ne talahau a lautolu ko e tau tagata nakai tua ko e fai atua. Ko e fakakite he fakahekeaga ke he tau tagata mahifi he taute mena fakafiafia, tau tagata mahifi he taute kifaga, mo e falu a tagata taute mena fakafiafia, ne moua mai he ha lautolu a tau tagata ne nava ki a lautolu kua tuga foki ne faoa atu ke he tapuaki.

Tapuaki ke he Tupe

Ke lafi ki ai, manamanatu la ke he kakano he tau kupu a Iesu he magaaho ne pehe a ia: “Nakai maeke ia taha ke fekafekau ke he na iki tokoua, ha ko e mena fakavihia e ia taha, ka e fakaalofa ke he taha, ka nakai pihia, ti pipiki atu a ia ke he taha, ka e fakateaga ke he taha. Nakai maeke ia mutolu ke fekafekau ke he Atua mo Mamone.” (Mataio 6:24) Kua iloa nakai e koe e taha ne nofo he taha lotu, ka e ko e mena fiafia fakamua he moui hana ko e taute tupe? Ko hai mogoia, kua fekafekau moli a ia ki ai, ko e Atua poke tau koloa uho? Tokofiha e tau tagata nakai tali tonu ne iloa e koe kua putoia ke he tutuliaga fakahehe he tupe? Kua moli nakai, ko lautolu ia foki kua tapuaki atu ke he tupe, liga kua lahi e fakamakutu mai he tokologa he tau tagata tali tonu.

Ko e aposetolo ko Paulo ne fakamaama e puhala ne eke ke tatai ki ai, he magaaho ne tohia a ia: “Hanai, kia tamate e mutolu ha mutolu a tau fahi tino ha he lalolagi, ko e feuaki, ko e mahani kelea, ko e manako kelea, ko e foli kelea, mo e mahekeheke, ko e hufeilo ke he tupua haia.” (Kolose 3:5) Kaeke kua manako lahi a tautolu ma e taha mena, kua fakaaoga oti e tautolu ha tautolu a tau lali fakamalolo ke moua ai, liga kua eke foki ke moumou e mata fakatufono he taute e tau mena ia, ti kua eke e tautolu e mena ia mo tupua, ko e atua. (Efeso 5:5) I loto he taha tohi, ne tohia e Paulo hagaao pauaki ke he tau tagata ne taute mena hehe: “Ko e manava, ko e atua ha lautolu haia.” (Filipi 3:19) Kaeke ko e kakano katoa he ha tautolu a tau momoui, ko e fakafiafia a tautolu ni, ko e fakapuke ni he tau manava, ti ka pihia, ko tautolu ni ha tautolu a atua. Tokofiha ne iloa e koe kua tapuaki ke he faga atua pehe nei?

E, tuga he tohia he aposetolo ko Paulo: “Ha kua tokologa e tau atua, mo e tokologa e tau iki.” Mo e i loto he loga he tau mena, ko e ha lautolu a tau tagata tapuaki kua tuga e tau Samaria i tuai, kua fekafekau ke he taha atua he ha lautolu a tau kupu mo e ke he taha he ha lautolu a tau mena ne taute. Kua moli, kua ha ha ai ni ko e taha e Atua, kua lata ke moua ha tautolu a tapuaki. Kua iloa nakai e koe ko hai a ia? Ke lafi ki ai, kua ha ha ai e taha mena ne fakalataha e tau tapuakiaga katoa he falu a tau atua ne kehe mai ia ia. Ko e heigoa e mena ia? To kitia e tautolu i loto he tala ne muitua mai.

[Tau Matahui Tala]