Kia Puke ke he Olioli

“Kua puke foki e tau tutaki ke he olioli, mo e Agaga Tapu.”​—Gahua 13:52.

1. (a) Ko e heigoa e vahega he fua olioli? (e) Ko e heigoa e foakiaga olioli lahi ka fakaheke ai e Atua?

OLIOLI! Ko e fua Kerisiano nei, ne tohia ke uaaki ni ke he fakaalofa i loto he fakamaamaaga ha Paulo ke he tau fua he agaga. (Kalatia 5:22-25) Mo e, ko e heigoa ne ui mai e olioli ia? Ko e tala mitaki ne fakapuloa he agelu he Atua ke he tau leveki mamoe loto holoilalo he tau tau ne molea e 1,900 i tuai: “Ti pehe mai e agelu, kia lautolu, Ua matakutaku a mutolu; kitiala, kua fakamatala atu e au kia mutolu e tala mitaki, ke fiafia lahi ai e tau tagata oti he motu. Ha ko e aho nai kua fanau ai ma mutolu ke he māga a Tavita, e Fakamoui, ko e Iki a ia ko e Keriso.” He magaaho ia ne tu fakaofo mai e agelu mo e matutaki atu mo e agelu ke he fakahekeaga olioli lahi mahaki ke he Atua mo e pehe: “Ko e fakahekeaga, ke he Atua ni ke he tau mena i luga muatua; mo e mafola ke he lalolagi, ko e finagalo fakaalofa ke he tau tagata.”​—Luka 2:10-14.

2, 3. (a) Ko e ha, kua lata lahi ke fakafano mai he Atua hana Tama uluaki ke eke mo Liuakiaga ma e tau tagata? (e) Ko e heigoa a falu puhala ne fekafekau a Iesu ke he finagalo he Atua he magaaho ne nofo he lalolagi?

² Ne fakailoa mai e finagalo fakaalofa ha Iehova ke he tau tagata, he foaki mai e fakamouiaga ne fakapuhala mai ia Keriso ko e Iki. Ko e Tama uluaki nei he Atua, ne kitia ki a ia ni e pulotu moli mo e tuga he fakamaama mai he pehe hagaao ke he hana Matua he magaaho tufugatia: “Ti eke ai au, ke he hana tapa ko e taute gahua mauokafua mo e moli, ti eke ai au, ke puke e kolikoli ke he aho mo e aho, fakahakehake e fiafia ki mua hana he tau magaaho oti; fakahakehake e fiafia he fua loga e fonua he lalolagi hana, e ko e puke katoa he haku kolikoli ne fakalataha atu ke he tau fanau tane he tau tagata.”​—Fakatai 8:30, 31, Rotherham.

³ Kua lata moli, ha kua pihia, ke fakafano mai e Iehova e Tama nei, ne moua ki a ia e kolikoli pihia ke he tau fanau tane he tagata, ke eke ko e Liuakiaga he tau tagata. Mo e maeke fefe he mena nei ke tamai e fakaheke ke he Atua? Kua maeke ke hafagi e puhala ki a ia ke fakakautu hana finagalo lilifu, ke fakapuke aki e lalolagi mo e tau tagata tututonu ne ofania e mafola. (Kenese 1:28) Ke lafi ki ai, he magaaho ne nofo ai he lalolagi e Tama nei ko Iesu, kua maeke ke fakakite, ka nofo i lalo he kamatamata kelea lahi, maeke he tagata mitaki katoatoa ke omaoma fakamoli ki a Iehova ko e Iki Pule katoatoa, ti kua katoa lahi e fakatokolugaaga he tonu he hana Matua ke pule ki luga he Hana tufugatia. (Heperu 4:15; 5:8, 9) Ko e puhala fakamoli tumau ha Iesu kua toka foki e fakafifitakiaga ma e tau Kerisiano moli oti ke fakatata lahi e muitua atu ke he hana tau tuaga hui.​—1 Peteru 2:21.

4. Ko e heigoa e olioli lahi ne tupu mai he fakauka ha Iesu, mo e lata fefe he mena nei ke fakamalolo a tautolu?

⁴ Ne moua e Iesu e olioli lahi mahaki i loto he tauteaga he finagalo he hana Matua, mo e amaamanaki atu ke he olioli ne mua atu e lahi mahaki, tuga ne fakakite he aposetolo ko Paulo ia Heperu 12:1, 2 (NW): “Kia taute a tautolu ke tafepoi fakauka, ke he poitufi kua toka ki mua ha tautolu, ka e onoono fakalahi atu a tautolu ke he Iki Hukui mo e ko e Fakamitaki katoatoa he tua ha tautolu, ko Iesu. Ma e olioli ne fakatu ki mua ia ia, ne fakauka a ia ke he akau fakatautau, fakafiufiu fakama, mo e kua nofo hifo he fahi matau he nofoaiki he Atua.” Ko e heigoa e olioli nei? Ko e olioli ne ha ha ia Iesu, nakai ni ke he fakatokolugaaga he higoa he hana Matua mo e lukutoto e tau tagata mai he mate ka e pihia foki ke pule faka-Patuiki mo e Ekepoa Ne Mua, he liuaki mai e ia e tau tagata omaoma ke he moui nakai fai fakaotiaga i loto he lalolagi parataiso.​—Mataio 6:9; 20:28; Heperu 7:23-26.

5. Ko hai e “tau matakainaga” ha Iesu, mo e ko e heigoa e olioli kehe lahi ne moua e lautolu?

⁵ E, ne moua tumau he Tama he Atua e olioli i loto he fekafekauaga ke he tau tagata. Mo e ko e hana olioli a ia ke fekafekau fakalataha mo e hana Matua ke fifili e matakau he tau tagata fakamoli tumau, ko lautolu ne ui e ia ko e hana “tau matakainaga” mo e ka mamate a lautolu ia to fakaliu tutu mai ke he lagi. Ne huhu atu a lautolu nei ke he fiafia kehe lahi mo Iesu. Ne talahau atu ki a lautolu ko e “fiafia mo e tapu,” mo e ko lautolu “ka eke mo tau ekepoa he Atua mo e he Keriso, mo e to eke ke pule faka-patuiki mo ia ke he afe e tau tau.”​—Heperu 2:11; Fakakiteaga 14:1, 4; 20:6, NW.

6. (a) Ko e heigoa e uiina olioli lahi ne foaki atu he Patuiki ke he hana tau “mamoe kehe”? (e) Ko e heigoa e tau monuina, ne fiafia ki ai e tokologa he tau mamoe, he vaha nei?

⁶ Ke lafi foki, e moto tagata he tau “mamoe kehe” ko lautolu ne vevehe kehe he Patuiki ne pule ke he fiafiaaga he hana faahi matau, kua moua hana uiina: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.” (Ioane 10:16; Mataio 25:34) Ko e monuina olioli lahi! Mai ia lautolu nei ka moua e tufaaga ke he lalolagi i lalo he Kautu, tokologa foki he mogonei ne talia e tau kotofaaga kavega lago mamafa, ke he tau fahi ha lautolu ne fakauku, tuga ne talahau tuai mai e Iehova: “To tutu e tau tagata kehe mo e leveki e lautolu ha mutolu a tau fuifui mamoe, ti eke e tau tagata he tau motu kehe mo tau gahua fonua ha mutolu, mo e tau gahua vine ha mutolu. Ka ko mutolu to ui a mutolu, Ko e tau ekepoa a Iehova, to talahaua a mutolu, Ko e tau fekafekau he Atua ha tautolu.” Kua matutaki atu fakalataha a lautolu oti nei ke he perofeta he Atua ke pehe: “To fiafia lahi au kia Iehova, to olioli haku loto ke he haku Atua; he fakatapulu e ia au ke he tau tapulu he fakamouiaga.”​—Isaia 61:5, 6, 10.

7. Tali mai he tau 1914 ko e ha, ne uho lahi ai e “aho” nei?

⁷ Ne momoui a tautolu he mogonei i loto he aho uho lahi. Tali mai he tau 1914 kua fita e aho ke pule a Keriso ko e Patuiki i luga he lagi, ne fakamaama mai ia Salamo 118:24, 25: “Ko e aho nai ne eke e Iehova; kia kolikoli a tautolu mo e fiafia ki ai. Iehova na e, kua ole lalo atu au ke fakamoui au; kua ole atu au, Iehova na e, ke fakamonuina mai.” Ko e aho a ia, ka hoko ke he tapunu, he magaaho ka fakaoti e Iehova e tau lotu faka-Papelonia mo e fakalataha e kitofaitane ha Keriso ne 144,000 he tau matakainaga mo e ha lautolu a Patuiki i luga he lagi. To katoatoa e tau tagata he Atua ke “fiafia . . . mo e kolikoli” ke he mena nei. To olioli lahi foki a lautolu ha kua tau atu ha lautolu a Patuiki Mesia, i Amaketo ke fakahao hana motu fakamoli ke hoko atu ke he lalolagi tututonu fou hana. (Fakakiteaga 19:1-7, 11-16) Kua foaki atu nakai e Iehova e fakakautuaga he fakamatala atu he hana tau tagata e amaamanakiaga olioli lahi nei? Ti fakamaama mai he hokotaki ne muitua mai.

Fakalaulahiaga he Lalolagi Katoa

8. (a) Ne fakaata mai fefe e olioli fakalataha mo e agaga tapu, i loto he hokotaki he tau lau tohi 18 ke he 21 he mekasini Kolo Toko (Peritania) ia Ianuali 1, 1991? (e) Ko e heigoa a falu mena he hokotaki ne maali lahi e kehe?

⁸ Ko e tau Fakamoli ha Iehova he vaha fou ne “ha ha . . . e amaamanaki kua lahi ue atu ke he mana he Agaga Tapu.” (Roma 15:13) Ne fakaata mai e mena nei i loto he tohi fakatata he tau lau tohi 18 ke he 21 Ko e Kolo Toko (Peritania) ia Ianuali 1, 1990, he mekasini, ne toka ai e hokotaki he lalolagi katoa ke he fekafekauaga he Kautu he tau 1990 ne fakatokatoka fakamatafeiga. Kua olioli lahi a tautolu he kitia e tapunu fou ne 4,017,213 he tau tagata fekafekau gahuahua ke he fonua! Ko e fakamailoga a nei ke he holo hake he pasene ke he 77, he vaha he tau tau hogofulu ne mole, he holo ki mua e fakapotopoto mai e tau mamoe i loto he tau motu 212 he lalolagi katoa. He mole e tau tau 15 ne liu ke hokotia e tapunu katoa he papatiso 301,518! Ne ha ha i ai e falu numela ne kehe lahi e tokoluga ke he loga e tau fonoaga, mua atu a lautolu ne o ki ai e tau Fakamoli ne omai he Fahi Uta ha Europa. He vaha loto ia lautolu nei, tokologa e tau tagata fuata, ne foaki atu e pikopiko ke he talahauaga he tau motu fekaufakalatahaaki, ko e to mate e lotu fakalataha mo e tau faoa fuakau.

9. (a) Ko e heigoa e taui olioli lahi he fakaako fakamua he tau mamatua? (e) Ko e heigoa e tau mena tutupu tata poke falu ne fakamoli mai e mena nei?

⁹ Kua loga lahi mahaki e tau tagata fuata hane tali e uiaga he Salamo 32:11: “Kia fiafia kia Iehova, mo e olioli a mutolu kua tututonu; kia kalaga mo e fiafia a mutolu oti kua loto fakamoli.” Kua tuga kua tokologa e tau mamatua kua fakaaoga e fakatonuaga ke fakaako ha lautolu a tau fanau ikiiki “tali mai foki he vaha tote.” (2 Timoteo 3:15) Hane taute fakamitaki e fakaaogaaga he tau tohi mo e tau tepi kasete ne foaki mai ma lautolu he tau tau molulu. He magaaho ka kamata e tau fanau ikiiki nei ke o he tau aoga, nakai leva kua foaki atu e lautolu e fakamoli mitaki, tuga e fakatai he tama fifine ne valu e tau tau he moui i Sapani, ne hokotaki mai: “He mole e tukuaoga okioki he vaha mafana, ne fano au ke he haku a faiaoga mo e huhu atu ki ia: ‘Kua fano nakai a koe ke aahi e tukuaga he hau matua tane he vaha tukuaoga okioki?’ Ne tali mai a ia: ‘E, ko e tagata mahani molu lahi haku a matua tane, mo e fa fano tumau a au ke he hana tukuaga he tau tau oti.’ Ti pehe au: ‘Kaeke ke fakaako Tohi Tapu a koe mo e muitua ke he tau fakaakoaga he Atua, to maeke ia koe ke kitia hau a matua tane fakaalofa i loto he lalolagi parataiso.’ Ti age e au ki a ia e My Book of Bible Stories. He mogonei ne totou mai he faiaoga ha mautolu taha e veveheaga he tohi nei ke he vahega katoa he magaaho okioki kai he tau fahi tapu oti.”

10. Ko e heigoa e finagalo mitaki ne fekafekau atu e tohi Young People Ask, mo e heigoa a falu fakatai?

¹⁰ Ne fakaaoga fakamitaki he tau tagata fuata ikiiki e tohi Questions Young People Ask​—Answers That Work (Tau Huhu ne Huhu he Tau Tagata Fuata​—Tau Tali ne Gahua), ma e fakaakoaga tokotaha mo e ke fakamoli atu ke he falu fuata ikiiki. Ne fakaaue foki e tau mamatua ma e tohi nei. Ko e matakainaga fifine i Suiselani, ne tohi hifo ke gahua foafoa lagomatai, ne fifili ke aahi atu e tau mamatua he tau kapitiga aoga he hana tama. Ne foaki mai he mena nei e hafagiaga ma e tau tutalaaga mitaki mo e tau mamatua he tau kapitiga aoga he tama hana, mo e 20 e tau tohi, (lahi ke he Young People Ask) mo e 27 e tau mekasini ne toka mo lautolu. He magaaho ne toka he tama fifine fano aoga i Tirinitata e tohi nei mo e hana faiaoga he aoga, ne muitua atu hana matua fifine, ne 25 e tau tohi taha ia ne tufa ke he tau faiaoga 36. Ne matutaki atu a ia he mahina fakamui, mo e fano pauaki ke he tau mamatua ne iloa tuai e ia, ti tufa foki e ia 92 e tau tohi, mo e kamata e tau fakaakoaga Tohi Tapu fou ke he tau loto kaina. I Korea ne fakaaoga he faiaoga he aoga lotouho e tohi Young People Ask ke foaki atu e tala fakaku ke he tau tala tuga “Maeke Fefe ia Au ke Fakaholo ki mua atu Haku tau ola he Kamatamata?” mo e “Maeke fefe ia Au ke Fakakapitiga atu ke he Haku a Faiaoga” mo e he magaaho ia ne foaki atu e tohi. He mole ai ne uta he tau fanau aoga, 39 e tau tohi, ne kamata e tau mamatua ke fegui. Ka e, fakaati he ulu he aoga e taha tohi, ti fakailoa ai pehe “homo lahi,” mo e ota foki e ia e taha tohi ma e tama fifine hana ni.

Ko e Puhala Fakaako Mitaki Lahi

11, 12. Ko e heigoa a falu fakamoliaga ke he mena moli ko e foaki he tau tohi fakailoa he Kaufakalatahaaga Kolo Toko e fakaakoaga mitaki lahi?

¹¹ Ko e aoga he tau fakaakoaga he ha tautolu a tau mekasini ne fakaaue foki ki ai e tokologa tuga e fakatai he aoga i U.S. ne ota 1,200 he tau tohi he Awake! ia Iulai 22, 1990 (ne fakakite e nakai mamutu kehe he vai kona crack) ke fakaaoga ke he vahega. Ke lafi ki ai, ko e tau mahani mitaki lahi, i loto he tau aoga he tau fanau he tau Fakamoli ha Iehova, ne taute tumau e onoonoaga mitaki. I loto he taha poko aoga hoha i Tailani, ne ui he faiaoga a Racha ne 11 e tau tau he moui, ki mua he vahega, mo e nava atu ki a ia ma e hana mahani, kua pehe: “Ko e ha he nakai uta e mutolu oti a ia mo fakafifitakiaga? Ne gahua fakamakutu a ia ke he hana tau fakaakoaga mo e mahani mitaki.” Ti lafi atu foki a ia: “Kae liga kua lata foki a mutolu ke eke mo tau Fakamoli ha Iehova tuga a Racha ke mitaki ha mutolu a tau mahani.”​—Fakatatai mo e Fakatai 1:8; 23:22, 23.

¹² Ko e matakainaga fifine fuata tote i Tominikene Pule Tagata kua tohi: “He magaaho ne fa la ia e tau tau he moui, kua teitei a au ke fakaholo ki mua mai he aoga fakamahani-mua he taha lotu, ne fakaako i ai a au ke totou mo e tohitohi. Ma e mena fakaalofa, ne age e au ke he taha nun (fifine fakatapu he lotu) ko e haku a faiaoga, e tohi You Can Live Forever in Paradise on Earth fakalataha mo e fekau: ‘Fakaaue lahi au he fakaako e koe au ke totou mo e tohitohi. Ti manako ai au ke maeke ia koe ke maama haku a tua mo e eke foki ke moua e amaamanakiaga haku ke moui tukulagi ke he lalolagi nei he magaaho ka taute ai mo parataiso.’ Ma e mena nei ne tuku ki tua au mai he aoga. Valu e tau tau fakamui ne feleveia foki au mo e faiaoga nei. Ne talahau e ia, pete ni ne totoko lahi e faifeau, ka e maeke agaia ia ia ke totou e tohi. Ne hiki atu a ia ke he loto taone, ke he mena kua maeke ia ia ke fakaako Tohi Tapu mo e taha Fakamoli. Ne papatiso a ia he Fonoaga Fahi Motu ‘Vagahau Mea’ fakalataha mo au.” Tuga ne perofeta mai, maeke foki e pulotu ke omai he “tau gutu he tau tama mukemuke”!​—Mataio 21:16; Salamo 8:1, 2.

13. Kua fefe e tauteaga he tau fuata ikiiki tokologa ke he fakatonuaga ha Solomona, mo e ne fakaata mai fefe e mena nei, i loto he hokotaki he lalolagi katoa?

¹³ Ne foaki e Solomona e fakatonuaga fakamalolo: “Ko e fuata na e kia olioli a a koe ke he hāu a vaha tote, kia fiafia foki a koe ke he tau aho he hāu a vaha fuata, mo e fano a koe ke he tau puhala kua loto a koe ki ai.” (Fakamatalaaga 11:9) Ko e kolikoli he vaha nei, ke kitia ko e tokologa e tau fanau he tau Fakamoli ha Iehova ne fakaaoga e tau kupu nei, ne fakaaoga ha lautolu a tau tau fuata ikiiki ke tauteute ma e moui fekafekau tumau ki a Iehova mo e hu atu ke he mena nei ne mua atu e mitaki he tau feua oti, he oti a lautolu mai he tau aoga. Ne tumau e matakau foafoa ke holo vave lahi atu, mo e 821,108 ne hokotaki he vaha he tau. Fakalataha mo e 11,092 he tau matakainaga tane mo e tau fifine ne fekafekau he Peteli, ko e 21 e pasene a ia mai he tau tagata gahua fakailoa katoa!

14. Ko e heigoa e tau foakiaga ne taute he ha tautolu a tau matakainaga fifine, mo e ko e heigoa e talahauaga nava kua lata ki a lautolu?

¹⁴ Ke mailoga, kua ha ha i loto he tau motu, tuga e Tau Fahi Kau Fakalataha, kua hagaao ke 75 e pasene he tau tagata fakailoa foafoa oti, ko e tau matakainaga fifine kua ­foaki age e malolo ke he tau kupu he Salamo 68:11 (NW): “Ko ia ni ko Iehova, ne foaki mai e talahauaga; ko e matakau kautau lahi e tau fifine ne talahau e tala mitaki.” Kua lata ke fai kupu nava ke he ha tautolu a tau matakainaga fifine ha ko e lahi mahaki e vala ne taute e lautolu ke he gahua he fonua. Ko e ha lautolu a puhala fakaako fakailoilo ke he tau fakaakoaga Tohi Tapu ke he tau loto kaina kua takitaki mai e tokologa ke he kupu moli, mo e tau matakainaga fifine faitane, kua lata foki ke nava e fakamafana atu, he lagomatai fakamoli e tau tane ne loga e tau matagahua fakapotopotoaga.​—Fakatai 31:10-12; Efeso 5:21-25, 33.

Tupu Lahi e Fakaakoaga Tohi Tapu

15. (a) Homo lahi fefe e falu he tau motu ne tohia i loto he hokotaki he lalolagi katoa ke he fakaako Tohi Tapu ke he tau loto kaina? (e) Ko e heigoa e tau mena tutupu kua maeke ia koe ke talahau, ne fakakite ko e maeke fefe e tau fakaako Tohi Tapu ke fua fakaloga?

¹⁵ Kua tupu lahi e gahua fakaako Tohi Tapu, kua fakavahega lotouho e tau fakaakoaga he lalolagi katoa ke he 3,624,091 he tau nonofoaga he tau mahina takitaha. Maeke he kupu moli he Tohi Tapu ke liliu e tau aga fakatagata, tuga ne fakakite mai he hokotaki he fahi i lalo hifo. Fakamua ia Ianuali 1987, ne fakafolau atu ki Niu Silani mai i Ausetalia e tagata tane, he magaaho ne mole ai e fakapagota ke 25 e tau mahina ke he fale pouli ma e kaiha mo e fakafifitaki fakavai. Ne nakai mamutu mai a ia he tau vai kona mo e fakafua foki e ia a lautolu ia ti molea atu e 17 e tau tau. He tau hake, ne kamata hana hoana ke fakaako e Tohi Tapu mo e tau Fakamoli ha Iehova, mo e he magaaho ne tupu hana a lotomatala, ne kitia e ia e liliu kehe lahi he hana mahani. Ne liliu a ia mo hoana mo e matua fifine mitaki. Ke he tau ole lalo he hana hoana, ne fano a ia ke he toloaga he takaiaga ia Iuni 1989. He magaaho ia ne talia a ia ke fakaako Tohi Tapu, mo e kamata e tau liliuaga lalahi ke kitia ke he hana tauteaga mo e puhala he moui. Ne kamata e toko fitu katoa he magafaoa ke o ke he tau feleveiaga. Ne papatiso a ia ia Ianuali 1990, ko e taha ne muitua ke he fakatonuaga homo lahi ha Paulo ia Efeso 4:17-24.

16. (a) Fefe e tau hokotakiaga he Fakamanatu he tau 1990, ko e punaaga he olioli? (e) Ko e fakatepetepe ke he heigoa kua lata ke mailoga, mo e ko e heigoa e laliaga kua lata a tautolu ke taute ke lagomatai atu?

¹⁶ Ko e mena ne mua atu he hokotaki he tau ia, ko e fakamauaga talahaua he 950,058 e tau tagata ne fakalataha ke he tauteaga fiafia he Fakamanatuaga, ne taute he aho Ua, ia Aperila 10, 1990. Mai he 212 e motu, molea e 70 ne hokotaki mai kua molea atu he fakalahi tolu e tau tagata ne fakalataha atu mai he ha lautolu a tapunu tagata gahua fakailoa! Ke fakatai ki ai, pete he nakai fakaata, fitu e tau motu Afelika ne lafi katoatoa, ti tapunu ke he 62,712 e tau tagata gahua fakailoa, ne hokotaki mai ko e 204,356 e tau tagata ne fakalataha ke he Fakamanatuaga. He fetauaki mavehevehe i Lipelia 1,914 e tau tagata gahua fakailoa ne olioli lahi he moua 7,811 ke he Fakamanatuaga. Ko Haiti ne tapunu e tau tagata fakailoa ke he 6,427 ne hokotaki mai 36,551. Ko e 886 e tau tagata gahua fakamoli i loto he tau aelani tutu kehekehe ha Mikoronesia, ne 3,958. I Siri Lanaka 1,298 e tau tagata gahua fakailoa ne hokotaki 4,521 mo Samipia 73,729 he tau tagata gahua fakailoa ne 326,991 ne fakalataha ke he Fakamanatuaga ko e taha e tagata ke he 25 mai he tau tagata katoa ha Samipia. Ne fakakite mai foki he hokotaki he lalolagi katoa kua ha ha i ai e tau miliona he tau tagata loto moli ne fakatalitali agaia ke fakamaopoopo mai ki loto he fuifui mamoe. Ka e nakai lahi ni e loto moli. Kua maeke nakai ia tautolu ke fakaholo hake mo e fakamitaki hake e kakano mitaki he ha tautolu a gahua fakaako Tohi Tapu ke he tau loto kaina, ke lagomatai loga e tau tagata ne fakalataha ke he Fakamanatuaga ke talaga e tua malolo? Manako a tautolu ke eke a lautolu mo tau hoa gahuahua ha tautolu, kua fakaheke a Iehova. Kakano ni ko e tau momoui ha lautolu!​—Salamo 148:12, 13; Ioane 17:3; 1 Ioane 2:15-17.

Ko e Katoatoaaga he Olioli

17. Ko e heigoa e tau fakatai he senetenari fakamua kua lata e lagomatai ke fakamalolo ha tautolu a loto fakamakamaka ke kuku mau ha tautolu a olioli?

¹⁷ Ko e heigoa mo e heigoa e tau kamatamata ne fehagaiaki mo tautolu, kia lata a tautolu ke fakamalolo ke kuku mau ha tautolu a olioli. Liga to nakai moua e tautolu e puhala uka lahi ne tupu ki a Setefano, ka e maeke he hana fakatai ke fakamalolo a tautolu. I lalo ke he hokotakiaga kua maeke ia ia ke fakatumau hana mahani olioli lahi. Ko e hana tau fi “kua kitia . . . hana mata kua tuga ne fofoga he agelu.” Ne tu e Atua ke he hana tapa he vaha matematekelea lahi hana. Ne fakamoli atu fakamalolo a ia, ha kua “puke a ia ke he Agaga Tapu” ti hoko atu ke he hana mate ma e tua. He fuluhi atu a Paulo mo Panapa ke fakamatala a laua ke he tau motu kehe, ko lautolu nei foki e “ati olioli ai, mo e fakaheke atu a lautolu ke he kupu he Iki.” Kua liu foki e favale ke tupu hake. Ka e nakai matakutaku a lautolu ne tua. “Kua puke foki e tau tutaki ke he olioli, mo e Agaga Tapu.” (Gahua 6:15; 7:55; 13:48-52) Ko e heigoa mo e heigoa ka taute he tau fi ha tautolu ki a tautolu, ko e heigoa mo e heigoa ha lautolu a tau kamatamata he tau aho he moui, kua lata a tautolu ke nakai toka ha tautolu a olioli he agaga tapu ke fakalolelole. Ne fakatonu mai a Paulo: “Kia fiafia ke he amaamanaki, kia fakauka ke he matematekelea, kia fakamakamaka ke he liogi.”​—Roma 12:12.

18. (a) Ko e heigoa e Ierusalema Fou, mo e ko e ha kua lata e tau tagata he Atua ke olioli lahi mo ia? (e) To fakamonuina fefe he “lagi fou mo e lalolagi fou” e tau tagata?

¹⁸ Homo lahi e amaamanaki ia! Ke he hana tau tagata oti, ne tukuogo a Iehova: “Ha ko e mena kitiala, kua eke e au e lagi fou mo e lalolagi fou; nakai tuai manatu ke he tau mena fakamua, ti nakai hake ai ke he loto e tau mena ia. Ka e olioli ā mutolu mo e fiafia tukulagi ā mutolu ke he mena kua eke e au.” Ko e Iki ko Keriso ka fakalataha mo e “Ierusalema Fou” (he mogonei ko e loto taone he fakatokatokaaga i luga he lagi he Atua, ko e “Ierusalema i luga”) mo e kaufakalatahaaga fou he lalolagi i luga he lalolagi ka tamai fakalahi e olioli ke he tau tagata. (Kalatia 4:26) Ko e fakaliutumai he tau tagata mamate, ko e lagaki hake a lautolu oti ne omaoma ke he moui tukulagi he tagata mitaki katoatoa, kua aoga lahi tukulagi, tau momoui malolo lahi ki luga he lalolagi parataiso​—ko e amaamanaki ne mua atu e homo lahi mo e mena tupu ma e fiafia fakahekeheke a nei! Tuga he moua e ia ni ko Iehova e ‘olioli i Ierusalema mo e fiafia fakaheke ke he hana tau tagata,’ ti kua tuku mai he hana perofeta e taha ui foki ke he tau tagata he Atua: “Kia fiafia a mutolu fakalataha mo Ierusalema, ti olioli a mutolu kia ia, ko mutolu oti kua fakaalofa kia ia; kia fiafia fakalahi a mutolu fakalataha mo ia.” (Isaia 65:17-19; 66:10; Fakakiteaga 14:1; 20:12, 13; 21:2-4) Kia tumau a tautolu ke puke lahi mo e olioli mo e agaga tapu he omaoma a tautolu ke he tomatomaaga he aposetolo ko Paulo: “Kia fiafia a mutolu ke he Iki, aua neke noa; to liu foki tala atu e au, kia fiafia a mutolu.”​—Filipi 4:4.

Talahau Fakaku e Olioli ha Tautolu:

◻ Ko e heigoa e fakafifitakiaga he fakauka olioli lahi mahaki ne toka e Iesu ma tautolu?

◻ Ko e heigoa e kakano he olioli lahi he matakau ua ne tukulele?

◻ Fakahekeheke fefe e tau fuata mo e tau fuakau he vaha nei i loto he kupu moli?

◻ He liu ke onoono atu ke he hokotaki he tau 1990, ko e heigoa e tali kua foaki mai he mogonei ke he liogi, “ole atu au, Iehova na e, ke fakamouina mai”?

◻ He magaaho fe mo e moua fefe e olioli katoatoa?

[Fakatino he lau 25]

Ne fakapuloa he agelu ha Iehova e fanauaga he Iki ko Keriso, ko e “tala mitaki ke fiafia lahi”