Fakalilifu ke he tau Tagata Oti Kana
“Kia fakalilifu . . . ke he tau tagata oti kana; . . . kia matakutaku ke he Atua; kia fakalilifu ke he patuiki.”—1 PETERU 2:17.
1. (a) Ko hai taha foki, mai he Atua mo Keriso ne tonu lahi ke fakalilifu? (e) Hagaao ke he 1 Peteru 2:17, ko e heigoa e tau fahi kehekehe ke fakakiteaga e fakalilifu ke he tau tagata?
KUA KITIA e tautolu ne omoi mai ki a tautolu ke tuku atu e fakalilifu ke he Atua ko Iehova mo Iesu Keriso. Ko e tonu, pulotu mo e mena fakaalofa ke taute pihia. Ka e fakakiteaga mai foki he Kupu he Atua ke fakalilifu atu foki a tautolu ke he tau tagata. Ne talahau mai ki a tautolu ke “fakalilifu . . . ke he tau tagata oti kana.” (1 Peteru 2:17) Ha kua fakahiku atu e kupu nei mo e poaki, “kia fakalilifu ke he patuiki,” kua fakakiteaga ko e lauiaaga a nei, ko e lata ke foaki atu e fakalilifu ki a lautolu ne lata ke moua ai, ha ko e ha lautolu a tau tutuaga. Ti ko hai, mogoia, kua lata a tautolu ke taute fakatonu e fakalilifu ki ai? Liga fakalataha, ko e numela ha lautolu kua lata ke fakalilifu ki ai ne molea atu he tokologa, ne liga nakai manamanatu e falu ki ai. To maeke ia tautolu ke pehe, kua ha ha ki ai fa e tau fahi he taute mena ke fakakiteaga e tautolu e fakalilifu ke he falu he tau tagata.
Fakalilifu e tau Tagata Pule Fakapolitika
2. Ne iloa fefe e tautolu ko e “ke he patuiki” ne talahau he 1 Peteru 2:17 ko e hagaao ke he tau patuiki poke pule fakapolitika?
2 Ko e fahi ke fakamua aki he tau mena nei, ne hagaao atu ke he tau fakatufono he lalolagi. Kua lata a tautolu ke fakalilifu e tau tagata pule fakapolitika. He magaaho ne fakatonu mai a Peteru: “Kia fakalilifu ke he patuiki,” ko e ha ne pehe ai a tautolu ko e hagaao ke he tau tagata pule fakapolitika e loto manamanatu ha Peteru? Ha kua vagahau a ia hagaao ke he tau tutuaga i tua he fakapotopotoaga Kerisiano. Ha kua oti la ia a ia he pehe: “Hanai, kia omaoma a mutolu ke he tau pule oti he tau tagata ha ko e Iki; po ke patuiki ha kua mua ni a ia.” Kia mailoga foki, ne fakatu e Peteru e Atua ke fekeheaki mo e “patuiki,” he pehe: “Kia matakutaku ke he Atua, kia fakalilifu e patuiki.” (1 Peteru 2:13, 14) Ti ko e “patuiki” ne ole fakamakamaka mai a Peteru ki a tautolu ke fakalilifu, ne hagaao atu ke he tau patuiki fakatagata, mo e tau tagata pule fakapolitika.
3. Ko hai e tau “pule malolo ne mua” mo e ko e heigoa kua tonu ki a lautolu?
3 Ne tatai pihia e poaki he aposetolo ko Paulo: “Ke fakalilifu ke he tau pule malolo ne mua.” Ko e tau “pule malolo ne mua” nei, nakai ko Iehova poko Iesu Keriso, ka ko e tau tagata pule fakapolitika a lautolu, ko e tau ofisa fakatufono. Mo lautolu nei ke he loto, ne holo atu a Paulo ke pehe: “Kia tuku atu ki a lautolu katoa, ha lautolu a tonu, . . . ki a ia ne ui mai ma e lilifu, ko e lilifu pihia.” E, ko lautolu pihia ne fakaata he Atua ke fakagahuahua e pule fakapolitika kua lata ke tukuage e fakalilifu.—Roma 13:1, 7, NW.
4. (a) To maeke fefe ke fakakiteaga e fakalilifu ke he tau pule fakapolitika? (e) Ko e heigoa e fakatai ne fakatu he aposetolo ko Paulo ke he fakakiteaga he fakalilifu ke he tau pule?
4 Ti fakakiteaga fefe e tautolu e fakalilifu ke he tau tagata pule fakapolitika? Ko e taha puhala ke taute atu ki a lautolu mo e fakahokulo e fakalilifu. (Fakatatai 1 Peteru 3:15.) Mo e ha ko e ha lautolu a tau tutuaga, kua tonu e fakalilifu pihia, pete ni liga, ko e tau tagata mahani kelea a lautolu. Ne fakamaama mai he tagata Roma fakamau tala he vaha tuai ko Tacitus ko e Kavana ko Feliki, ko e tagata tane kua “manatu a ia kua maeke ke taute e falu gahua kelea mo e nakai fakahala.” Ka e fakalilifu lahi e puhala ne hafagi aki e Paulo hana a puipuiaga ki mua ha Feliki. Ti ke eke ke tatai ai, ne talaage mo e fakalilifu lahi mahaki a Paulo ke he Patuiki ko Herota Akeripa II, “kua manatu na au kua monuina au he fakatonu atu e au au nai ho mua ke he aho nai,” pete ni foki, ne iloa e Paulo ko e moui femauaki a Akeripa. Ke tuga ai ne fakakiteaga e Paulo e fakalilifu ke he Kavana ko Feso, he tutala atu ki a ia “Ko e Hau a Homo lahi,” pete ni foki ko e tagata tapuaki tupua a Feso.—Gahua 24:10; 26:2, 3, 24, 25, NW.
5. Ko e heigoa foki e puhala ke fakakiteaga e fakalilifu ke he tau pule malolo fakatufono, mo e fakatu fefe he tau Fakamoli ha Iehova e fakatai mitaki ke he tauteaga he mena nei?
5 Ko e taha puhala ke fakakiteaga e tautolu ke he tau ofisa fakatufono e fakalilifu, ne fakakiteaga mai he magaaho ne tohia he aposetolo ko Paulo, hagaao ke tuku atu ke he tau pule malolo fakatufono ha lautolu a tonu. Ne pehe a ia, ke tuku atu “ki a ia ne ui mai ma e tukuhau, ko e tukuhau; ki a ia ne ui mai ma e fakalilifu ke totogi, ko e fakalilifu ke totogi.” (Roma 13:7, NW) Ne tuku atu he tau Fakamoli ha Iehova e tonu pihia, pete ni ko e motu fe i loto he lalolagi ne nonofo ai a lautolu. I Italia, ne kitia he pepa tohi tala ko e La Stampa: “Ko e tau tagata fakamoli lahi a lautolu ke manako a taha ki ai: ne nakai kalo mai a lautolu he tau tukuhau, poke kumi ke hao mai he tau matafakatufono ne nakai lata ki a lautolu.” Mo e The Post i Palm Beach, Florida, U.S.A., ne tohia hagaao ke he tau Fakamoli ha Iehova: “Ne totogi e lautolu ha lautolu a tau tukuhau. Ko lautolu e falu he tau tagata loto fakamoli lahi, i loto he motu Pule he tau Tagata.”
Kia Fakakite e Fakalilifu ke he tau Tagata Fakagahua
6. Kia hai foki, ne pehe e tau aposetolo ko Paulo mo Peteru, kua lata ke tuku atu ki ai e fakalilifu?
6 Ko e fahi ke ua aki, kua tonu ke fakalilifu, i loto he ha tautolu a tau gahuaaga. Ne pehi tokoua mai he tau aposetolo, ko Paulo mo Peteru e aoga lahi he fakalilifuaga he tau Kerisiano ki a lautolu ne tuku ki luga ia lautolu ke he fakafetuiaga he gahua. Ne tohia e Paulo: “Ko lautolu oti ha i lalo he akau hahamo, ko e tau fekafekau, kia manatu e lautolu kua lata ke he tau iki ha lautolu ni e lilifu, neke talahaua kelea e higoa he Atua mo e hana kupu. Ka ko lautolu kua nofo ke he tau iki kua tua, aua neke fakalialia a lautolu ki ai; ha ko e tau matakainaga a lautolu, ka kia au atu he fekafekau ki ai.” Mo e pehe a Peteru: “Ko mutolu e tau fekafekau, kia omaoma a mutolu mo e matakutaku oti ke he tau iki ha mutolu, nakai kuenaia ki a lautolu kua mahani mitaki mo e totonu, ka e katoa foki mo lautolu kua hepehepe.”—1 Timoteo 6:1, 2; 1 Peteru 2:18; Efeso 6:5; Kolose 3:22, 23.
7. (a) Maeke fefe e fakatonuaga he Tohi Tapu ke he tau “tupa” ke fakakiteaga e fakalilifu ke he tau “iki,” ke fakaaoga tonu he vaha nei? (e) Ko e heigoa kua lata he tau tagata gahua Kerisiano ne fai tagata fakagahua Kerisiano ke fakaeneene lahi ke taute?
7 E moli, nakai laulahi e fakatupa ke tupu he vaha nei. Ka ko e tau mahani ne takitaki aki e tau Kerisiano ke he vaha loto he iki mo e tupa kua aoga lahi ke he vaha loto he tagata gahua mo e tagata fakagahua. Ti kua lago e kavega ke he tau tagata gahua, ke fakakiteaga e fakalilifu, pete ni ko e uka lahi ke fakafiafia e tau tagata fakagahua. Mo e ko e heigoa, kaeke ko e tagata he taofiaga taha e tagata fakagahua? Ke kehe mai, he nakai ke amanaki ke fao pauaki poke tu mua ke he tau fifiliaga ha ko e vaha loto, kua lata e tagata gahua ke mau tauteute ke fakamakaukau lahi, ke nakai fakaaoga noa a ia ke he ha taha puhala.
Fakalilifu i Loto he Magafaoa
8, 9. (a) Ko hai, kua lata e tau fanau ke fakalilifu? (e) Ko e ha, kua lata e tau fanau ke fakakiteaga e fakalilifu nei, mo e maeke fefe ia lautolu ke fakakiteaga e mena ia?
8 Ko e fahi ke tolu aki, kua tonu ke fakalilifu ne ha ha i loto he magafaoa. Ko e tau fanau ke fakatai ki ai, kua lata ke fakalilifu ha lautolu a tau mamatua. Nakai ni hokoia ko e tau mena kua lata a nei ke he Matafakatufono ne age ki a Mose, ka e kua lago tonu foki ke he tau Krisiano. Ko e aposetolo ko Paulo ne tohia: “Ko mutolu na, ko e tau fanau, kia omaoma ke he tau matua ha mutolu ke he Iki, ha ko e mena tonu ni haia. Kia fakalilifu a koe ke he hau a matua tane, mo e hau a matua fifine.”—Efeso 6:1, 2; Esoto 20:12.
9 Ko e ha kua lata e tau fanau, ke fakalilifu ha lautolu a tau mamatua? Kua lata a lautolu ke fakalilifu ki a laua ha ko e pule malolo he tau mamatua ne tuku atu he Atua ki a lautolu, mo e pihia foki ha ko e tau mena ne taute he tau mamatua ha lautolu, fakatupu mai ha lautolu a fanauaga mo e feaki mo e leveki a lautolu talimai he ikiiki. Kua lata fefe, e tau fanau ke fakalilifu ha lautolu a tau mamatua? Kua lata a lautolu ke taute e mena nei, mua atu ke omaoma mo e nonofo i lalo ia laua. (Fakatai 23:22, 25, 26; Kolose 3:20) Ke fakatatai atu ke he fakalilifu pihia, liga kua lata e tau fanau kua lalahi ke foaki atu a falu lagomatai, fakakoloa tino ti pihia foki fakaagaga, ke he ha lautolu a tau mamatua motua poke tau mamatua tupuna. Kua lata e mena nei ke taute mo e lotomatala ke lago tatai mo e a falu kavega, tuga ke leveki hana ni a tau fanau, mo e fakalataha katoatoa ke he tau Kerisiano mo e ke he fekafekauaga he fonua.—Efeso 5:15-17; 1 Timoteo 5:8; 1 Ioane 3:17.
10. Ki a hai, kua lago tonu ke he tau hoana ke fakakiteaga e fakalilifu, mo e ke he heigoa e tau puhala kua maeke ia lautolu ke taute e mena nei?
10 Ka e nakai ni hokoia, ko e tau fanau i loto he magafaoa ne lata ke tuku atu pihia ke he falu e fakalilifu. Kua lata e tau hoana ke foaki atu e fakalilifu ke he ha lautolu a tau tane. Ne pehe foki e aposetolo ko Paulo, “ka ko e fifine kia fakalilifu a ia ke he hana tane.” (Efeso 5:33; 1 Peteru 3:1, 2) He fakakiteaga ke he tau tane e “fakalilifu” ne hokulo lahi, kua lauia lahi moli ke foaki atu ki a lautolu e fakalilifu. Ne fakalilifu e Sara hana tane ko Aperahamo he magaaho ne pehe atu a ia ki a ia ko e “iki.” (1 Peteru 3:6) Ti ko e tau hoana, kia fifitaki ki a Sara. Kia tuku atu e fakalilifu ke he ha mutolu a tau tane, he talia ha lautolu a tau fifiliaga mo e gahua ke taute a lautolu ke kautu. He taute e tau mena oti kua maeke ia koe ke lagomatai ha mutolu a tau tane ke fua ha lautolu a kavega mamafa, ka e nakai lafi ke he tau mena nei, kua fakakiteaga e koe ki a lautolu e fakalilifu.
11. Hagaao ke he fakakiteaga he fakalilifu, ko e heigoa e tonu ne lago ke he tau tane, mo e ko e ha?
11 Ka e kua e tau tane? Ne fakaako mai e Kupu he Atua ki a lautolu: “Kia pihia foki a mutolu ko e tau tane, kia nonofo fakalataha mo lautolu mo e iloilo, kia fakalilifu ke he hoana, ha ko e kapiniu a ia kua mua he lolelole kia koe, ha kua eke foki mo tau hakeaga fakalataha ke he moui kua foaki noa mai, neke fakalavelave ha mutolu a tau liogi.” (1 Peteru 3:7) Kua lata moli lahi e mena ia ke fakamanamanatu aki e tau tane oti. Kua tuga ai ko e fua i luga he hoana e fakamailoga “Fakahele. Molulu lahi. Kia lapolapo fakaeneene! Tuku atu ki ai e fakalilifu!” Kia lata ke manatu he tau tane, ane mai kua tuku atu e lautolu ke he ha lautolu a tau hoana e fakalilifu, he fakakiteaga ki a lautolu e tau manamanatuaga tonu, to fakamalona e lautolu ha lautolu a vaha loto mo e Atua ko Iehova, ha kua fakalavelave e tau liogi ha lautolu. Ne moli lahi, ko e fakafahi ua e aoga lahi ke taute takitokotaha e lautolu he magafaoa ke tuku atu he fakalilifu e taha ke he taha.
I Loto he Fakapotopotoaga
12. (a) Kia hai, ne lago e kavega ke fakakiteaga e fakalilifu i loto he fakapotopotoaga? (e) Fakakite fefe e Iesu, ko e tonu ke moua e fakalilifu?
12 Kua lago foki e kavega ke he tau tagata oti ke fakakiteaga e fakalilifu, i loto he fakapotopotoaga Kerisiano. Ne fakatonu mai ki a tautolu: “Kia takitokotaha mo e mua ke tuku atu e lilifu ke he falu.” (Roma 12:10) Ne fakakiteaga e Iesu i loto he taha he hana tau fakatai, ko e tonu ke talia e fakalilifu. Ne pehe a ia, ka uiina a tautolu ke he taha kaiaga galue, kua lata ia tautolu ke uta e nofoaga tokolalo, ti ka ole mai e tagata ne uiina mai ki a tautolu ke uta e nofoa tokoluga ti moua e tautolu e fakalilifu ki mua ia lautolu oti ne uiina. (Luka 14:10) He mogonei, ha kua fakaaue oti a tautolu oti ka tuku mai e fakalilifu, nakai kia lata a tautolu ke loto maama mo e tuku atu e fakalilifu ke he taha mo e taha? Ti maeke fefe ia tautolu ke taute e mena nei?
13. Ko e heigoa a falu puhala, kua maeke ia tautolu ke fakakiteaga e fakalilifu ki a falu i loto he fakapotopotoaga?
13 Ko e tau fakailoaaga fakaaue ma e mena ne taute fakamitaki lahi, kua tuga ni e foakiaga fakalilifu. Ti kua maeke ia tautolu ke fakalilifu e taha ke he taha he foaki atu e navaaga, liga ma e lauga, poke ma e tali ne talahau he taha he fakapotopotoaga. Ke lafi ki ai, kua maeke ia tautolu ke fakalilifu e taha ke he taha, he pipi e tautolu e loto holoilalo ki a tautolu, hagaao ke he ha tautolu a tau matakainaga Kerisiano tane mo e tau fifine, he taute atu ki a lautolu, fakalataha mo e fakalilifu fakahokulo. (1 Peteru 5:5) Ti kua fakakiteaga e tautolu ko e uho a lautolu ki a tautolu, ko e taha he faoa he tau fekafekau lilifu he Atua ko Iehova.
14. (a) Maeke fefe he tau matakainaga tane i loto he fakapotopotoaga, ke tuku atu e fakalilifu kua tonu ke he tau matakainaga fifine? (e) Ko e heigoa ne fakakite, ko e taute mena fakalofa noa e taha puhala ke tuku atu e fakalilifu?
14 Ne fakatonu atu e aposetolo ko Paulo ke he fuata ko Timoteo ke taute e tau matakainaga fifine Kerisiano momotua ke tuga e tau matua fifine mo lautolu ne fuata tuga e tau mahakitaga he toto moli, “mo e loto mea ni.” E, ka fakaeneene e tau matakainaga tane ke nakai fakahanoa ke he ha lautolu a tau matakainaga fifine Kerisiano, tuga ke fakakiteaga e mahani nakai lata, kua tuku atu ki a lautolu e fakalilifu. Ti kua holo atu a Paulo ke tohi: “Kia fakalilifu e tau fifine takape, ko lautolu kua takape moli.” Ko e taha puhala ke fakalilifu e fifine takape ne lata, ko e tau lagomatai fakakoloa tino. Ka e ke lata ma e tau mena nei, kua lata lahi a ia ke fai “talahaua mitaki ha ko e tau gahua mitaki hana.” (1 Timoteo 5:2-10) Hagaao ke he tau mena fakaalofa noa he koloa tino, ne tohia a Luka hagaao ke he tau tagata he aelani ha Melita: “Kua fakaalofa mai foki a lautolu kia mautolu ke he tau mena mitaki ne loga; kua tukuvaka atu a mautolu, ati tanaki ai e lautolu ki luga he foulua e tau mena aoga.” (Gahua 28:10) Ti kua maeke foki ke fakakiteaga e fakalilifu ke he taha mo e taha he foaki e tau mena fakaalofa noa he koloa tino.
15. (a) Kia hai, kua lago tonu pauaki ki a tautolu ke fakakiteaga e fakalilifu? (e) Ko e heigoa e taha puhala, kua maeke ia tautolu ke fakakiteaga e fakalilifu ki a lautolu ne uta e takitakiaga?
15 He tutaki atu hana tohi ki a Timoteo, ne tohi e Paulo: “Ko e tau [momotua] kua pule fakamitaki, kia talahaua a lautolu kua lata mo e lilifu kua lafi ua, ka e au atu kia lautolu kua gahua ke he kupu katoa mo e fakaako atu.” (1 Timoteo 5:17) Ke he heigoa e tau puhala kua maeke ia tautolu ke fakalilifu e tau momotua mo e tau leveki? Ne pehe a Paulo: “Kia fifitaki mai a mutolu kia au, tuga na au kia Keriso.” (1 Korinito 11:1) Ka taute e tautolu e tau kupu ha Paulo, ke fifitaki atu ki a ia, kua tuku atu e tautolu e fakalilifu ki a ia. Kua lauia e mena nei, ki a lautolu ne taute e takitakiaga ke he vaha loto ha tautolu he vaha nei. Ke he tau mena ne fifitaki atu a tautolu ki a lautolu, he muitua ke he ha lautolu a tau fakataiaga, to tuku atu e tautolu e fakalilifu ki a lautolu.
16. Ko e heigoa a falu puhala, kua maeke ke fakakiteaga e fakalilifu ki a lautolu ne uta e takitakiaga?
16 Ko e taha puhala ke fakakiteaga e tautolu e fakalilifu ke he tau leveki, ka omaoma ke he tomatomaaga: “Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai.” (Heperu 13:17) Ke he puhala taha ia, kia fakalilifu he tau fanau ha lautolu a tau mamatua, he omaoma mo e nonofo i lalo ia lautolu, ti fakalilifu a tautolu ki a lautolu ne fa e takitaki he vaha loto ha tautolu, he omaoma mo e nonofo i lalo ia lautolu. Mo e tuga a Paulo mo e hana tau hoa, ne fakalilifu mo e tau mena fakaalofa noa he koloa tino, mai he tau tagata loto molu ia i Melita, tokologa e tau hukui o fenoga he Kaufakalatahaaga ne tuga foki he fakalilifu ke he puhala nei ke he taha magaaho mo e taha foki. Ka e moli lahi, kua nakai lata ke poaki atu ma e tau mena fakaalofa noa pihia, poke talahau ko e fakaaue lahi a lautolu ma e tau mena ia poke kua lata lahi a lautolu ia.
17. Ko e heigoa ne lago tonu ki a lautolu ne fai monuina ke he levekiaga, hagaao ke he fakakiteaga he fakalilifu?
17 Ka e he taha fahi, ko lautolu oti ne tutu ke he tau tutuaga leveki i loto he fakatokatokaaga fakaatua—pete ni ke he fakapotopotoaga tata, ke he takaiaga poke ke he fahi motu, ha ko e leveki faifano, he taha he tau la he Kaufakalatahaaga he Kolo Toko, poke i loto he magafaoa—kua lago e tonu ke tuku atu e fakalilifu ki a lautolu ne leveki e lautolu. Kua lata a lautolu nei ke loto fakamaama mo e pihia foki ke manamanatu ke he falu. Kua lata a lautolu ke maeke e falu ke oatu ki ai he tau magaaho oti, ha kua loto molu mo e holoilalo e loto mo e loto manamanatu, tuga he pehe a Iesu Keriso ko e pihia a ia.—Mataio 11:29, 30.
Kia Gahua ke he Fakalilifuaga he Taha ke he Taha
18. (a) Ko e heigoa kua maeke ke fakalavelave a tautolu, ke fakakiteaga e fakalilifu ki a lautolu kua lata ki ai? (e) Ko e ha, kua nakai fai tonuaga ma e loto nakai fiafia mo e manamanatuaga fakafili tagata?
18 Kua lata a tautolu oti ke gahua fakamalolo ke he fakalilifuaga ke he taha mo e taha, ha kua ha ha i ai e fakalavelave ne malolo lahi ke taute pihia e tautolu. Ko e mena fakalavelave ia, poke mena uka ia, ko e ha tautolu a loto nakai mitaki katoatoa. Ne pehe e Tohi Tapu “kua kelea e tau fatuakiloto he tua loto he tau tagata kua kamata mai he vaha tote.” (Kenese 8:21) Ko e taha he tau mahani fakatagata, kua liga fakalavelave aki e tonu ke fakakiteaga e tautolu e fakalilifu ke he falu, ko e kehe mo e fa fakafili tagata e loto manamanatu. Lolelole a tautolu oti, ko e tau tagata nakai katoatoa, kua lata ai ma e fakaalofa noa mo e fakaalofa hofihofi noa, ha Iehova. (Roma 3:23, 24) He fakaaue ke he mena nei kia lata ke fakaeneene a tautolu ke nakai manamanatu tumau ke he tau mena lolelole he tau matakainaga ha tautolu, poke huhu fakatuaha noa ke he tau mena ne loto ha tautolu a tau matakainaga ki ai.
19. Ko e heigoa ka lagomatai a tautolu ke liliu kehe e tau manamanatu nakai fiafia?
19 Ko e vai ke fakamauluaki e taha he tau aga kehe pihia e fakaalofa mo e mahani fakalatalata. Kua lata a tautolu ke loto fakamaama, mahani fakamoli, mo e fiafia mo e mitaki e manamanatuaga hagaao ke he ha tautolu a tau matakainaga, ke mailoga ha lautolu a tau mahani mitaki. Kaeke kua ha ha i ai e taha mena kua nakai maama e tautolu, kia tumau e manako lahi ha tautolu ke tuku atu ke he tau matakainaga ha tautolu e manatu nakai tuaha noa mo e omaoma ke he fakatonuaga ha Peteru: “Kia mua ke he tau mena oti ke moua e mutolu e fakaalofa lahi ko e taha kia taha, ha ko e fakaalofa ke ufiufi ai e tau hala loga.” (1 Peteru 4:8) Kua lata ke ha ha ia tautolu e fakaalofa pihia, kaeke ke maeke a tautolu ke tuku atu ke he ha tautolu a tau matakainaga e fakalilifu ne tonu ki a lautolu.
20, 21. (a) Ko e heigoa e taha mahani lolelole, ne liga kua lahi ke fakalavelave e fakakiteaga he fakalilifu ha tautolu ke he taha mo e taha? (e) Ko e heigoa ka lagomatai a tautolu, ke liliu kehe e mahani lolelole nei?
20 Ko e taha mahani kua liga ke fakalavelave e tonu ke fakakiteaga e tautolu e fakalilifu ke he falu, he fa mukamuka lahi e mahani ke hogohogo manava poke fa loto hukia vave. Fai tokaaga e loto hukia vave. Kua eke ke loto hukia vave e tau tagata ne taute e tau leo logona poke tau lanu ha ko e vala he feua ha lautolu. Ka eke ke loto hukia vave, poke mukamuka ke hogohogo manava, ke he ha tautolu a fakafetuiaga mo e falu, ko e fuafuaaga he mahani fulukovi kua maeke ke kaiha ai, ia tautolu ha tautolu a mafola mo e taofi ki tua a tautolu ke fakakiteaga e fakalilifu ke he falu.
21 Kua foaki mai ki a tautolu e tomatomaaga mitaki hagaao ke he mena nei e tau kupu ne moua mai ia Fakamatalaaga 7:9: “Aua neke fakatepetepe hāu a loto ke ita; ha kua toka mau ai e ita ke he tau loto he tau tagata goagoa.” Ti kua fakakiteaga kua noa mo e pulotu mo e manamanatu mitaki, mo e noa foki mo e fakaalofa, kaeke ke loto hukia vave poke mafiti lahi ke ita vave. Kua lata a tautolu ke puipui tumau neke taute he aga kua fa veveli ai a tautolu ke tuga loto nakai fiafia, fakafili tagata tumau, poke loto hukia vave, ke fakalavelave a tautolu ke fakakiteaga e fakalilifu ki a lautolu oti kua tonu ke tuku atu ki ai.
22. Liga to maeke fefe ke talahau fakaku ha tautolu a tonu ke fakakiteaga e fakalilifu?
22 Kua moli lahi, hanai ia tautolu loga e tau kakano ke fakakiteaga e fakalilifu ke he falu. Mo e, tuga he kitia e tautolu, kua loga mo e loga e tau puhala kua maeke ia tautolu ke fakakiteaga e fakalilifu pihia. Ke he tau magaaho oti kua lata a tautolu ke puipui tumau neke fakalavelave he mahani fulukovi poke nakai fiafia e loto ke fakakiteaga e tautolu a fakalilifu. Ke he mena nei, kua lata a tautolu ke fakaeneene lahi, ke fakakiteaga e fakalilifu ki a lautolu i loto he tau magafaoa ha tautolu, ko e tau tane mo e tau hoana ke he taha ke he taha mo e tau fanau ke he ha lautolu a tau mamatua. Mo e i loto he fakapotopotoaga, kua lago ki a tautolu e tonu ke fakakiteaga e fakalilifu ki a lautolu ne tapuaki auloa mo e, mua atu ki a lautolu ne gahua fakamalolo he vaha loto ha tautolu ke he tau tutuaga leveki. Ki loto he tau fahi oti nei, kua lata e mitaki ki a tautolu ke tuku atu e fakalilifu kua tonu ki a lautolu ne talahau ki ai i luga, ha kua tuga he pehe a Iesu: “Kua mua e monuina hana ke foaki atu, ke he monuina hana ke talia mai.”—Gahua 20:35.
To Tali Fefe a Koe?
◻ Ko e ha mo e taute fefe e tautolu e fakalilifu ke he tau pule malolo fakatufono?
◻ Ko e heigoa e fakatonuaga he Tohi Tapu ne liga ke fakaaoga ke he vaha loto he tagata gahua mo e tagata fakagahua?
◻ Kua lata ke fakakiteaga fefe e fakalilifu i loto he magafaoa?
◻ Ko e heigoa e fakalilifu pauaki, liga kua maeke ke fakakiteaga i loto he fakapotopotoaga, mo e ko e ha?
◻ To maeke fefe e tau mahani lolelole fakatagata ne kaumahala ke fakalilifu e falu, ke uta kehe?