Ko e Onoonoaga he Tohi Tapu he Mafola mo e Nakai Haofia
Tokologa e tau tagata kua talia noa kua moli e mahani kua maeke ke kitia he magaaho nei, kua fakalataha lahi e lalolagi ke mafola mo e nakai haofia kua liga ke tamai he mena nei. Kua amaamanaki a lautolu to maeke he fakaholoaga ia ke takitaki atu ke he lalolagi mitaki. Ka e fakakite mai he Tohi Tapu kua loga e tau mena kua putoia ki ai mai he tau mena kua maeke ke kitia.
KO E tala ke he mafola mo e nakai haofia ko e mena talia fiafia pauaki ke he tau Kerisiano ha ko e tau mena ne tohia he aposetolo ko Paulo i lalo he omoiaga he agaga ke he fakapotopotoaga Kerisiano he senetenari fakamua. Ne fakamau hana tau kupu i loto he Tohi Tapu ia 1 Tesalonia 5:3: “Ha ko e mena ka pehe a lautolu, Kua mafola, kua nakai haofia, ti hokotia fakalukutia ai a lautolu he mahaikava, tuga ne mamahi fanau ke he fifine kua fatu, ti nakai fakai ke hao a lautolu.” Kua lagaaki mai he tohiaga tapu nei e tau huhu kua aoga lahi.
Mafola mo e Nakai Haofia—Ko e Fakaataaga ke he Heigoa?
Kaeke ke totou e koe e laulahi he tau kupu ha Paulo ne fatiaki mai i luga, to kitia e koe nakai ko e tau Kerisiano ne fae mataala a lautolu kua pehe ‘kua mafola mo e nakai haofia,’ ka e, kua pehe, ko lautolu ia takitokotaha kua momohe ke he tau mena moli ne tutupu. Kua tutu a lautolu he tuaga hagahaga kelea lahi ka e nakai iloa ha kua manamanatu a lautolu kua holo ki mua e mitaki he tau mena. Ka e hagaao ke he tau Kerisiano, ne pehe a Paulo: “Ka ko e tau vaha mo e tau tau, nakai aoga kia mutolu, ko e tau matakainaga na e, ke tohi atu ai e au kia mutolu.” (1 Tesalonia 5:1) E, kua lata a tautolu ke iloa e tau fakatokaaga he tau mena tutupu he Atua. Ko e ha? Ha kua pehe a Paulo ko e magaaho he fakaotiaga fakalutukia, ne ui “ko e aho he Iki [Iehova],” ka hau “ke tuga e kaiha ke he po.”—1 Tesalonia 5:2.
Ko e heigoa ne putoia ai e talahauaga tuai he tala ke he mafola mo e nakai haofia? Kua maaliali lahi, kua lata ke lahi mai he tala noa. Kua fa tutala e tau tagata ke he mafola ti kua teitei e leva ke tuga he fa latau a lautolu ke he tau tauaga. Kua liga lata e tau kupu ha Paulo ke tuhi ke he magaaho kua tuga kua moua tuai he tau motu e mafola mo e nakai haofia ke he taha puhala kehe lahi. Ka e to hili ni he kili e kitekiteaga he mena nei. Ko e mena kua tuga ko e mafola mo e nakai haofia ne takitaki atu ke he fakaotiaga fakalutukia kua kitia moli nakai ko e mafola moli po ke nakai haofia moli lahi.
Ne vagahau foki a Iesu hagaao ke he fakaotiaga fakalutukia nei. Ne ui aki e ia ko e “lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.” He falu teau he tau tau fakamua to hau a Iesu, ne vagahau foki e perofeta ko Tanielu ke he mena ia, mo e ne fakamaama mai e ia tuga “e tau aho ke matematekelea ai; nakai kitia ha vaha pihia tali he fakatoka eke e tau motu ke hoko mai ke he vaha ia.”—Mataio 24:21; Tanielu 12:1.
Ui ai ko e matematekelea lahi, po ke ui ai ko e magaaho fakaagitau—ke he tau mena ua ia, hagaao ke he tau perofetaaga, ko e to holoholo kehe e tau mena ikiiki oti he fakatokaaga fakalalolagi ha Satani. Kua kehe mai he nakai fakakite e taliaga he atua, ko e tala ke he mafola mo e nakai haofia ne perofeta ki ai ka takitaki atu ke he fahi kehe lahi!—Fakatatai Sefanaia 3:8.
Ne Fakakite e Tau Mena he Vaha
Ko e fakamoliaga kia he hatakiaga fakaperofeta ha Paulo e tau fakaholoaga kua kitia he magaaho ku kua mole ke he fakalatahaaga lahi mahaki he lalolagi mo e tau amaamanakiaga ne moua mai ma e mafola mo e nakai haofia? Kua pehe, tuga he fa fakakite mai tumau he mekasini nei, talimai he tau 1914 ne kitia fakamoli e tautolu e fakamoliaga he tau perofetaaga loga he Tohi Tapu ne hagaao ke he hokoaga i luga he lagi ha Iesu ke he malolo he Kautu. (Mataio tau veveheaga 24, 25; 2 Timoteo 3:1-5; Fakakiteaga 6:1-8) Ne fakakite e Iesu ka hoko fakalutukia e fakaotiaga he aho a Iehova ki luga he tau tagata mahani kelea, to hoko mai he magaaho ka fai ia lautolu he atu hau he tau tagata ne kitia fakamoli e kamataaga he vaha nei mo e kua momoui agaia.—Luka 21:29-33.
Ne fakakite mai foki he aposetolo ko Paulo e tau mena he vaha. Ne pehe a ia: “He magaaho taha kua tutala a lautolu ke he mafola mo e nakai haofia, ti amanaki agataha ni ki luga ia lautolu e matematekelea.” Ko e talahauaga nei he tau kupu a Paulo i loto he The New English Bible kua fakakite fakamaali ko e tupu e matematekelea lahi “he magaaho taha kua tutala a lautolu.” Ke tuga e tagata kaiha he po—nakai iloa tuai—e fakaotiaga ka hoko mai he magaaho ne nakai amaamanaki lahi ki ai, he magaaho ka lahi e onoonoaga he tau tagata tokologa ke he ha lautolu a amaamanakiaga ke he mafola mo e nakai haofia. Ha kua pihia, he magaaho nei, kua nakai maeke a tautolu ke pehe mo e fakahiku tonu ko e mafola he magaaho nei mo e tutuaga nakai haofia kua fakamoli e tau kupu ha Paulo—po ke to laulahi atu fefe e tutala he mafola mo e nakai haofia kua nakai la eke ke tupu—ko e mena moli ni, ha kua logona e falu tutala ia he mogonei ti nakai fai fakatataiaga kua fakalagalaga aki e tau Kerisiano ke lata ke nonofo mataala tumau he tau magaaho oti.
‘Tau’ Fepokaaki e Tau Pulemalolo he Lalolagi
He magaaho ne vagahau a ia hagaao ke he magaaho fakaatukehe, ne fakakite mai foki he perofeta ko Tanielu e tau mena he vaha. Ne fakakite e ia to tupu mai e vaha fakaatukehe he fakahikuaga he vahaloto kelea kua leva he tau atu motu pulemalolo ne ua, taha ne ui ko e “patuiki he fahi tokelau” mo e taha foki, ko e “patuiki he fahi toga.” (Tanielu 11:5-43) Talimai he oti e Tauaga II he Lalolagi, ko e tau atu motu pulemalolo ne fakatai mai he fakafuakoloa tutokotaha he “patuiki he fahi toga” mo e fakafuakoloa kaufakataha he “patuiki he fahi tokelau.”
Ne talahau tuai mai e Tanielu e taufetului kelea he vaha loto he tau atu motu ua nei, tuga ne mailoga mai he tau tau 45 kua mole, ne “tau ai,” tuga e ua e tau tagata taufagatua kua lali fakamalolo ke fai tuaga mitaki. He magaaho ku kua mole, tuga kua oti e tau. Ti, ia Me he tau kua mole, ne talahau he fekafekau ke he tau motu kehe ha Soviete kua oti tuai e Tau Fetului. Ia Iuni, ne totoku he Time mekatini e fonoaga lahi he vaha loto he Tau Fahi Kau Fakalataha ha Amelika mo e Matutakiaga Taha he Soviete mo e tohia: “Falu he tau maveheaga ke he levekiaga he tau kanavaakau tau mo e kamatamataaga niukilia kua liga ko e kautuaga fakaofogia ke he tau tau gahoa kua mole. He magaaho nei, ka fakaputu auloa foki kua tuga kua maoki hifo a lautolu.”
Po kua fakaku po ke tumau e fekapitiagaaki ke he vaha loto he tau pulemalolo lalahi ua nei, to iloa ni he hana magaaho. Ka e taha e mena kua kitia maali lahi mai. Ko e vaha he tau magaaho ne talahau mai e Iesu kua holo fakahaga ki mua. Mo e kua fakakite mai he tau mena tutupu i loto he lalolagi kua tata a tautolu ke he tau mena tutupu ne talahau mai i tuai he aposetolo ko Paulo mo e perofeta ko Tanielu. Pete ni, ne tutupu mai e tau mena fakapolitika he magaaho ku kua mole, ha ko e taha vala he haofiaaga he tau lotu ha Kerisitenitome, ka e to nakai takitaki a lautolu ia ke he mafola tumau. Kua fakakite mai he tau mena moli to takitaki e lautolu e tau motu he lalolagi nei ke he taha mena kehe lahi.
[Tau Fakatino he lau 4]
To iloa mai ni he tau magaaho ko e leva fefe e vaha loto he fekapitigaaki he tau pulemalolo lalahi ua ia
[Credit Line]
Fekau Pauaki ha USSR ke he UN